إنتقام عشاق الجزء 29 🔥🔥🔥 ( التتمة من بعد 530 لايك طاكيو صحابكم يعاونوكم عليها بغينا نرجعو ليامات العز ♥️ ) وكبيت عليه الما باش يفيق غير حل عينو وأنا نبدا عليه فين الوحش فرصة سعيدة فاش شفتك شحال وأنا كنتسنا هاذ الحظة لي نكون فيها غير أنا وياك وهاهي جات . دابا غادي تجاوبني على ݣاع الأسئلة ديولي ولا غادي نكون أنا هو ملاك الموت لي غادي يقبط روحك نبداو بأول السؤال شكون عطاك الأوامر باش تقتل دوك الزوج لي ضربوني وتيريزا وشنو كدير عندنا في الدار . مبغاش يجاوبني وبقيت كندخل ليه الكروشيات لوجهو حتا رعفتو وخرج ليه الدم من فمو دفل داك الدم وبدا كيضحك الوحش : هههه إلى صحبتيني غادي نهضر فراك غالط واخا تبقا ضربني تال الصباح وغير طلقني أيوسف أنا راه في جنبك ماشي عدوك _ وأخيرا سمعتيني صوتك وراك غالط غادي دوي بلهلا يطريه ليك من الأفضل تجاوبني على السؤال ديالي الوحش : ماغديش نعاود ليك لي خاصك تعرف هو اي حاجة درتها راني درتها على ودك ولكن هادشي لي كتسول عليه ماغديش نقولو ليك _ غادي دوي وبقيت كنضرب فيه ووالو مبغاش مأثراتش فيه ديك العصا . ومع الوحش صلع بديت كنمس ليه في صلعتو زوينة عندك هاذ الساعة غادي ندير فيها واحد التجربة مشيت جبت واحد القرعة ديال سيدي علي خاوية وبريكة وشديتها شعلت فيها العافية وبديت كندوبها على راسو حتا بدا كيغوت الوحش : صافي حبس غادي نعاود ليك لي بغيتي _ يله قول ليا عند من خدام شكون كيعطيك الأوامر وعلاش درتي هكاك الوحش : أنا خدام عند مدام أسيل _ وأنا نضربو علاش كتكدب علاش قول الصراحة الوحش : والله حتا كنقول الحق أنا خدام عند مدام أسيل أنا كنت هو الحارس الشخصي ديالها واليد اليمني ديالها في نفس الوقت و من كثرة حبها ليك كلفاتني أنا اواحد المجموعة باش نبقاو مراقبينك في حالة وقعات ليك شيحاجة نعاونوك . وفاش ضربوك دوك 2 امرتنا نتاقمو ليك و نقتلوهم وامرتنا باش نقتلو حتا تيريزا من بعد ماعرفات بيلا كتهددك ودوك الفلوس لي ورتي على تيريزا راها ديول مدام أسيل راه هي لي مسؤولة على كولشي _ ديك الساعة الدنيا دارت بيا ماعرفت باش تبليت لعبات عليا مزيان وأنا بحال الحمق ماقشعت والو . ولكن شكون لي غادي يظن بيلا ديك البنت البريئة والزوينة يطلع منها هادشي كامل ولكن خلاها عمها شيطان بصفة ملاك .باقي سؤال واحد شنو جيتي دير ليوم عندنا في الفيلا يله بغا ينطق وهو يتفرع الباب ودخلو شي وحدين مغطيين وجاهم ومسلحين قال ليا واحد هز يديك لفوق هزيت ايدي وشدني واحد وواحد جوج مشاو فكو الوحش هو يدك لي داك خونا لي شادني برا في عنقي ماعقلت على راسي تافقت في بيتي غير حليت عيني وأنا نلقا أسيل قدامي أسيل : كنتمنا تكون رتاحيتي أحبيبي _ وأنا نشدها من شعرها واش أنا معاك هنا وبغيتيني نكون معاك مرتاح ها العار إيما بعدي مني أسيل : طلقني احبيبي علاش كتصرف معايا علاش كتبغي تقلقني شنو لي معاجبكش _ تاحاجة معاجباني لا نتي لا تصرفاتك هاذ العلاقة أصلا مبنية على الكدوب راني عرفت كولشي من داك الكلب ديالك ندمت على النهار لي عرفتك. أسيل : عفاك متقولش هكاك أنا مدرت حتا حاجة غالطة كولشي درتو على ودك وغير باش نعاونك وتكون فرحان _ نتي ماشي فرحتيني دمرتي ليا حياتي وخنقتيني مابقيتش كنحملك شوفي أمدام أسيل داكشي لي كان جامعنا سالا من ليوم مابقيتش غادي نشوف جيهتك وموتي ولا تفرݣعي مابقاش كيهمني حيث حياتي أصلا ضاعت ملي عرفتك ومن الأفضل سيري لسبيطار تعالجي يله الله يعاون . مشيت بديت كنجمع حوايجي في واحد الباليزة وهي تقاس ليا على رجلي وكتبوس فيها وكتبكي أسيل : عفاك أيوسف كنبغيك مانقدرش نعيش بلا بيك ندير لي بغيتي غير متخلينيش نعطيك تروتي كاملة نكتبها بسميتك اي حاجة بغيتيها نحضرها ليك غير متمشيش وتخليني عفاك أيوسف . _فاش جمعت حوايجي وأنا نتحنا هزيتها . سمعي أسيل أنا ماببغيت منك والو أنا وياك صافي سالينا تقبليها و دخليها لعقلك أنا مابقيتش كنبغيك ومن الأفضل ليك سيري تعالجي حيث وليتي ماشي طبيعية أولا راكي ماشي طبيعية من الأول يله تهلاي في راسك وتميت خارج وبدات كتجر فيا أسيل : لا ماسليناش وماغديش نساليو إلى على الجتة ديالي راني كنبغيك ومستحيل نسمح فيك ديرها في بالك وعمري غادي نخليك وإلى خرجتي من هنا غادي نتاقم ليك من عائلتك وغادي ندمرك حتا ترجع ليا وعقل على هدرتي _ إلى قربتي ليهم غادي تشوفي الوجه لاخر من الأفضل نسايني ومشيت قصدت طوموبيلتي وشديت الطريق لأسفي من بعد 4 السوايع وصلت لدربنا ومتبدل فيه والو كيما خليتو قربت حدا الدار مازعمتش نمشي بقيت كنشوف في الدار من الطومبيل وكنبكي واحد الوقت زعمت ومسحت دموعي ومشيت دقيت هو يحل ليا البرهوش ديال خويا كبر وتجبد ولا قدي وصوتو غلاض شوية . تافين البرهوش كبرتي هو يعنقني وبستو ريان : خويااا الواليدة سربي أجي تشوفي شكون جا _ دخلت شافتني كانت هازة شي ماعن لاحتهم وجات عنقاتني وكتبوس فيا وكتبكي وتا أنا كنبكي . سمحي ليا اميمتي سمحي ليا مكانش عليا نمشي ونخليك ماشي لخاطري اميمتي ديك لفعة عماتني وخلاتني مابقيت كنشوف حتا حاجة وحتا ملي كنبغي نجي نشوفك كدير المستحيل باش تمنعني الواليدة : ماشي موشكيل أولدي مسمحاك الموهيم هو رجعتي ليا شحال كنت كندعي سيدي ربي يجي هاذ النهار وهاهو حقق ليا دعوتي _ بقينا معانقين مدة عاد ريحنا في الصالون وبديت كنعاود ليها على المشاكل ديولي وشنو كدير أسيل تصدمات الواليدة: كنت عارفة بيلا حمقة ولكن ماتصورتش بيلا غادي توصل تال هاذ المرحلة ديال الحماق الحمدلله ملي تفكيتي منها _ مزال ماتفكيت منها ماغدي نتفك حتا نطلق منها ونتي الواليدة عمرك فكرتي تحاولي تجي عندي ولا تسولي فيا الواليدة : خاصك تشوف شنو داز علينا حتا لقينا العنوان ديال فيلا ديالك وفاش مشينا كيصدرونا السيكيريتي يا إما كيقولو لينا مسافر ولا مابغيتيش تشوفنا جيت شي 10 المرات _ اه ديك المريضة يمكن كانت موصياهم سمحي ليا اميمتي الواليدة : مسمحاك اولدي بلاتي نصوب ليك شي كاس ديال أتاي _ ايه واخا بيما نيت نجي حيت غادي نمشي عند صاحبي أمين يله معايا أخويا عندو . تحركنا عندو وأنا بقيت في راس الدرب وسيفطت خويا يدق عليه ويجيبو لعندي باش نفاجئو وداكشي لي دار غير بان ليا جاي وانا نتخيل عليه ودرت ليه إيدي على عينو وغلضت صوتي شكون أنا بدا كيقدر ماعرفنيش تاحيدت ايدي وأنا نبغي نعنقو وهو يروغ عليا سمح ليا أخويا أمين غلطت في حقك مكانش عليا نتيق بأسيل ونكدب صاحبي سمح ليا وإلى بغيتي ضربني ݣاع ورد ليا داكشي لي درت ليك عفاك غير متبقاش مقلق مني أمين : أجي نعنقك أخويا فاش عرفتي الغلاط ديالك ورجعتي أنا مسامحك _ تعانقنا ومشينا ريحنا في واحد القنت وبدينا مجمعين وكبرتي العود لا نتا ولا هاذ البرهوش . أمين : تا نتا الساط كبرتي وصحاحيتي عاود ليا شنو وقع _ وعاودت ليه بلان من ازيرو تال ليوم وعاودت ليه حتا بلان نسرين . أمين : قلتها ليك ديك المرة بيلا غادي تندم حيث راها حمقة عرفتها من نهار جيت عندكم وتلاحت عليا _ وايه ولكن فين هو العقل ديك الساعة كنت كنبغيها مكتبانش ليا شيحاجة من غيرها ولكن الحمد الله دابا غادي نتفك منها اجي فين هي واحد هناء مزال معاها ولا بدلتيها والدراسة ديالك شنو درتي معاها أمين : بالنسبة لدراسة نجحت في الباك بي 16 وكنقرا في بريبا وتفارقت معاها دابا طايح مع واحد الساطة أخرى سميتها نور فين تبان هناء شنو بان ليك غدا نمشيو لواحد السينما يله تحلات أنا وياك وهي وواحد صحبتها مليحة غادي تعجبك _ ايه علاش لا نمشيو قيد نمرتي الجديدة وفاش تبغيو نمشيو صوني ليا ريان : وأنا ماعلياش الله مانمشيش أمين : ماكينش قدك نلقا ليك نديوك معانا _ عطيتو النمرة وتحركنا لدار أنا وخويا وبدينا مجمعين . الواليدة كيفاش كنتو عايشين وفاش كنتي خدامة الواليدة : رجعت لمعمل لي كنت فيه أولدي وهو مناش عايشين _ سمحي ليا الواليدة ولكن غادي نعوضك ونتهلا فيك راني عندي في الكونط 15 مليار لي جامع من ورا ضهرها كنت عارف غادي يجي هاذ النهار وستغليتها الواليدة : مزيان اولدي نتمنا هاذ البنت تبعد علينا بلا مشاكيل _ متخافي والو بقينا مجمعين تال ديك 22:30 ومشيت لبيتي باقي كيما هو شديت بلاصتي وأنا نجبد عليها بنعسة حتا فيقاتني الآم ديالي مع 11 بستها في راسها الله على نعسة شحال زوينة شحال هادي مانعست مهني الواليدة : مزيان ملي مرتاح نوض تفطر _ مشيت غسلت و بديت كنفطر حتا تاصل بيا أمين علمني بالوقت لي غادي نتحركو فيه وقطع كملت فطروري وشديت تيليفون بديت كنتفرج في واحد الفيلم بيما حطات الواليدة الغدا قسيت وبدلت حوايجي وخرجت ركبت طوموبيلتي وطركت أمين ومشينا عند الدريات هزيناهم . وعندك الحق هاذ الساطة واعرة وحتا صحبتها زوينة شنو سميت ديك القطيطة لاخرة أميمة : سميتي أميمة ونتا _ سميتي يوسف تشرفت بمعرفتك الزين وكيبان ليا غادي نتفاهمو أميمة : ويلي أمين ماقلتيش ليا صاحبك زوين هكذا ولسانو حلو أمين : مكانش يله ولا يمكن _ ههه تبدلتي الساط مشا داك يوسف الحشومي بقيت طالقها تا وصلنا للسينما وتمينا داخلين . أجي أمين تا أشمن فيلم معروض بعدا أمين : واحد الفيلم مصري كيعاودو عليه واعر _ تا شنو قربنا لشي أفلام مصرية يله نغيروها لشي قنت أمين : وغير يله غادي يعجبك _ دخلوني بزز وشدينا ݣليات وبدينا كنتفرجو وبصراحة الفيلم زوين ولي مزينو كثر هو البطلة ديال الفيلم قوقة تاع بصح عجباني . اجي أمين شنو سميت هاذ الممتلة أمين : سميتها لينا واعرة أخويا هاذ الممثلة سعدات هاذا لي غادي ياخدها _ ههه يله نجيبو دورة لمصر نشوفو معاها . بدا كيضحك أمين : هنينا خلينا نكملو الفيلم _ بدينا كنتفرجو في الأخير ماتت البطلة وأطرات فيا ديك لقطة دموعي نزلو غير بوحدهم وبداو كيضحكو عليا نور : صاحبك قلبو هشيش _ كون تعرفو شنو داز على هاذ القلب ݣعما ضحكو زيدو قدامي . خرجنا من سينيما وقصدنا واحد البار بقينا عاطينيها لشطيح والرديح واحد الوقت جريت أميمة لطواليط وبقينا خدامين كملنا وتمينا خارجين النهار لول يموت المش. شافني أمين بدا كيضحك أمين : هاي هاي تبدلتي هاذا يوسف ولا كدبت _ ومالك كتصحابنا مزال صغار . بقينا زاهيين تما تا 9 ومشينا قسينا في واحد السناك وصلتهم لديروهم ومشيت لدار مع دخلت لقيت الواليدة حاطة العشا قلت ليها شبعان ودخلت لبيتي جبدت عليها مع عيان ولكن غير نعست بديت كنحلم بيلا خارج مع ديك الممتلة لينا ومشادين وأنا وياها فرحانين وكنضحكو ومشينا ريحنا في واحد الجردة وبديت كنعبر ليها على المشاعر ديولي وحتا هي وغير بستها في حنكها وهي تحيبني الفيقة فقت فرحان وكنحس بواحد الشعور في شكل ...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM