انتقام عشاق الجزء 45 🔥🔥🔥 ( التتمة من بعد 340 لايك . طايكو صحابكم يعاونوكم عليها بغينا نرجعو ليامات العز ♥️ ) حطوني في الأرض وشفت واحد الحاجة لي خلاتني كنقول أنا ميت مستحيل نكون مزال عايش عرفتو كنشوف النسخة ديالي طبق الأصل والأب ديالي واقفين قدامي وكيشوفو فيا بديت كنقول أنا صافي مت ودابا راني واقف مع الأب ديالي في العالم الآخر . بديت كنحاول نوض و كنقول بواحد الصوت منخفض بابا هاني جيت عندك ديني عند ماما غير وقفت وبغيت نتمشا وكنت غادي نطيح هو يشدني النسخة ديالي لي هو أنا يمكن بديت كنقول ليه واش أنا مت ولا كنحلم والضبابة في عيني يعني الصورة غير واضحة الأب ديالي : جيبوه وحرݣو السطافيط بلي فيها _ كانت هاذي اخر جملة نسمع قبل مانفقد الوعي . حليت عيني في واحد الغرفة مظلمة ودغيا تفكرت داكشي داز . داز ليا داك فيلم كامل في 3 الثواني ومع ديك الظلمة ضنيت راسي في قبر حتا تحركت ولقيت راسي كولي فصمات ومديور ليا السيروم عاد عرفت راسي مزال حي ولحمي كامل ضارني . ولكن شنو داكشي شفت يمكن غير حلم شفتو ملي كنت ناعس ولا تخيل تخيلتو بسبب ديك الضربة . بديت كنغوت و كنقول فين أنا حلو عليا وهو يتشعل الضو ودخل عندي واحد الطبيب شفتو حاولت نوض ولكن ماقدرتش الطبيب : رتاح راه ماغديش تقدر تنوض حيث عطيتك واحد المهدأ _ فين أنا وكيفاش حتا جيت هنا الطبيب : أنا خدمتي غير نداويك حتا يجي المسؤول علينا وتعرف راسك فين وراك في أمان غير رتاح _ بدل ليا السيروم وبغا يخرج وأنا نعيط ليه شحال وأنا ناعس الطبيب : 14 ساعة ونتا فاقد الوعي _ تما خارج وهوما يبانو ليا واحد 2 صحاح عند الباب لابسين تيشورتات كحلين مزيرين كيبنو الصحة ديالهم وسراول كحلين وبرودكلات وتا أنا ملبسيني بحالهم مع خرج تطفا الضو وبديت كنفكر في داكشي لي طرا ولي تخيلت بديت كنقول كون غير مت وتهنيت يعلم الله فين أنا والقدر شنو مخبي ليا وغالبا أنا غير عند أسيل دابا بديت كنفكر كيفاش نخرج من هنا بقيت كنفكر فشي طريقة ولقيت طريقة وحدة وهي نبدا نفرشخ بنادم ولكن الموشكيلة ماقدرش حتا نتحرك . دازت واحد الساعتين وأنا غير كنفكر في ذكرياتي مع لينا وعائلتي حتا بديت كنحس براسي قادر نوض نضت من بلاصتي بديت كنتحرك وكنشوف راسي واش قادر على الهروب ولا لا جربت ايدي ورجلي بديت كنضرب بيهم مزيانين غير هو اليد الݣوشية مقصح فيها شوية ولكن ماعليش رجعت ريحت بلاصتي هو يدخل عندي الطبيب وتشعل الضو ثاني بدا كيقلب فيا وكيسول فيا كيف بقيت قلت ليه دابا مزيان ودار باش يهز واحد البرا وأنا نضربو لناضرو بواحد الكروشية فقد الوعي حطيتو بلاصتي ولبست ديك الطابلية ديالو ودرت كمامة وبديت كنقلب فشي حاجة نضرب بيها دوك 2 بقيت كنقلب حتا لقيت واحد الكورة ديال الحديد ودرتها في داك السليب ديالي لي كنت لابس قبل من الحادثة وحليت الباب ودوك 2 حراس واحد واقف ليمن واحد ليسير خرجت زدت خطوة وأنا نتلفت ليهم ضربت واحد فيهم بكورة لراس ولاخر بغا يضربني كليتو برجلي وجمعتو بنص تلفت زدت 4 الخطوات لقدام وهو يبانو ليا واحد 3 اخرين ݣالسين في كراسة شافوني وناضو وقدامي كاين وواحد الباب كبير شوية وفيه واحد الشرجم من الجاج وداك الباب ماشي من نوع العادي باينة كيتحل بالبصمة حيث كاينة حداه ديك لوحة التحكم بديت كنجري ضربت في ديك الجازة بجهدي كامل وتقاسيت لجيهة لاخرة وتطلق جهاز الانذار مع غادي نوض لقيت 2 قدامي يله جا واحد تحنا بغا يشدني ضربتو براسي لوجهو واخا حسيت ضربني الضو في راسي ولاخر ضربتو بديك الكورة لراس ولكن الموشكيلة هو أنا هاذ البلاصة لي أنا فيها دابا دايرة بحال شي غرفة كبيرة بزاف وخاوية وفيها واحد الباب ديال الحديد كيتحل بحال الݣراج بدا كيطلع داك الباب وتخبيت فاش قرب يتحل كيبانو ليا دوك 3 جايين كيجرو وأنا تضعقت كنقول تحل دغيا وغير تحل داك الباب كيبانو واقفين بزاف بزاف ديال الحراس مغطين وجاهم وهاذو مسلحين هزو عليا السلاح وقال ليا واحد فيهم وقف بلاصتك و تما قاصدني . حصلت حصلة ديال الكلاب وبديت كنقول مع راسي غادي نضربو ولي ليها ليها غير وصل عندي وبغيت نضربو بديك الكورة . خونا داير بحال الزواق خوا بيها دغيا وضربني بواحد الضربة لعنقي لي فشلاتني طحت دودة مابقيتش قادر نوض بقيت غير كنشوف فيه وكنقول ليه شكون نتوما وشنو بغيتو مني . ماجيت فين نكملها حتا كنتصدم بالأب ديالي جاي قاصدني واخا كبر شوية ولكن نفس الملامح ماتبدل فيه والو من غير الكبر وقف قدامي وبديت كنشوف فيه وممصدقش راسي ودموعي بداو كيهبطو غير بوحدهم لا مايمكنش هاذا نتا . تزادني واحد الجهد ونضت من بلاصتي وبديت كنقرب ليه بشوية بشوية بحال شيواحد يله بدا كيمشي حتا وصلت لعندو وبديت كنمس فيه ياك مكنحلمش هاذا نتا أبابا علاش مشيتي وفين كنتي الأب ديالي : دابا نعاود ليك أولدي غير رتاح دابا _ شنقت عليه . ولكن علاش تال دابا فين كنتي فاش كنا محتاجين ليك علاش تاماتت الأم ديالي وخويا ووليت في هاذ الموشكيل عاد جاي تعاوني . يله تما جاي خونا لي ضربني بغا يعاودني وهو يدير ليه الأب ديالي بي إيديه وقف ورجع الأب ديالي : ولدي عطيني وقت فين نشرح ليك يله معايا _ زدت شنقت عليه مزيان .ماغديش نسمع ليك غادي نقتلك هو يغمز داك خونا وهو يتما جاي بغا يضربني حاولت نشدو ونكالي الضربة ولكن خونا ماعندوش يد عندو ماسيطة ضربني حتا غيبت فقت لقيت راسي في نفس الغرفة غير هو هاذ المرة لقيت الأب ديالي والنسخة ديالي واقفين قدامي بقيت كنشوف في خونا بواحد الصدمة ومخرج فيه عيني الأب ديالي : بلا ماتستغرب أيوسف هاذا خوك التوأم سيف _ شنو خويا التوأم ولكن كيفاش وإيمتا وفين كان الأب : ديالي غير بشوية غادي تفهم كولشي _ كولشي بدا قبل 25 عام كنت واحد من رجال الفرقة الخاصة والسرية ديال المخابرات وكانت عندي مهمة في اسفي باش نلقي القبض على واحد من أخطر مهربين المخدرات وبالصدفة تعرفت على الأم ديالك وحبينا بعضياتنا غير هو كدبت عليها في الإسم والعمل ديالي وهمتها على أني صياد حيث ممنوع علينا حنا في ديك الفرقة الخاصة نكشفو على الهوية ديالنا ولا الزواج أنا خالفت الأوامر وتزوجت بالأم ديالك بلا خبار الرؤساء ديالي من بعد مازورت الوثائق ديولي وبدينا عايشين هانين إلى يوم عرفت بيلا ماماك حاملة بتوأم كان أسعد يوم في حياتي ولكن رئيس المخابرات كلف فرقة تراقبني فين وليت كنغبر وعرف بيلا أنا تزوجت ومراتي حاملة بالتوأم وجا عندي مع أنا كنت عزيز عليه حيث معقول في العمل ديالي قال ليا ياك عارف القانون مزيان و لي خالف الأوامر شنو كيوقع ليه قلت ليه عارف اسيدي العقاب هو الموت . ضنيت غادي يقتلني ولكن قال ليا ملي غادي تولد مراتك غادي تعطينا واحد من ولادك باش نكونوه من صغرو ونخدموه لمصلاحتنا ضطريت نوافق وداكشي لي وقع من بعد ماتولدتو جا الرئيس ختار واحد فيكم بعينو وجا الاختيار على سيف حيث بان ليه سكوتي خداه ووهمنا الأم ديالك مسكينة بيلا واحد من التوأم مات تقبلاتها وبقينا عايشين بيخير حتا تزاد ريان وبدا كيكبر شوية من بعد توفى الرئيس القديم تنتاخب واحد أخر وأنا وليت هو النائب ديالو ولكن تفرض عليا اوعر شرط يقدر تفرض على شيواحد وهو نبعد عليكم رفضت ولكن بززو عليا و تهددت إلى مابعدتش عليكم غادي يقتلوكم وضطريت نقبل و دابا أولدي 4 السنين وأنا الرئيس ديال المخبرات _ ملي نتا هو رئيس علاش ماجيتيش تشوفنا علاش الأب ديالي : ماقدرتش والله ماكنش عندي الوجه باش نسوف فيكم نتا وخوك ومك كنتمنا تسامحني حيث ماشي لخاطري _ ماغديش نسامحك . بابا عرفتي شنو دوزنا بلا بيك واش عرفتي شنو وقع لينا شحال تأدينا وقاصينا وشحال جعنا ونتا مادرتي والو وتجي تقول ليا سمح ليا الأب : واش أنا لخاطري بعدت راه كنت كنموت يوميا من فراقكم لدرجة أني شحال من مرة تاكنجي لدرب وكنتراجع حيث كنخاف لا تأداو _ لا تبارك الله عليك دابا عايشين بيخير وعلى خير ياك ما تأدينا ما والو غير الأم ديالي وخويا ماتو وأنا غادي نتعدم. حياتنا تدمرات الشريف كون غير خليتيني نموت في ديك الحادثة حسن ليا حيث حياتي ضاعت ومابقا عندي حتا سبب باش نعيش وحتا هاذ الضهور ديالك جا معطل بزاف الأب ديالي : متقولش هكذا أولدي حيث ... يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM