إنتقام عشاق الجزء 26 🔥🔥🔥 ( التتمة من بعد 525 لايك . بغينا نرجعو ليامات العز ♥️ ) منير : سميتي منير عم أسيل وبغيت نعاود ليك عليها شيحاجة _ غير سمعت عم أسيل لحت داكشي لي في إيدي وبديت كندخل في الكروشيات لوجهو طاح الأرض وبقيت كنعطيه كنعطيه هاك عزيز عليك ضرب هاني كنضربك دابا الواليدة : خليه شنو دار ليك منير : متيقش بكلام أسيل عارفها دوات عليا بالخايب وعودات ليك غير داكشي الخايب لي درت ليها ومعوداتش ليك علاش أنا درت ليها هكاك خليني نعاود ليك الحقيقة الكاملة راها حمقة ومجرمة وإلى مابعدتيش عليها غادي تندم _ متسوقتوش و بقيت كنعطيه كنعطيه حتا ولا كولو دمايات و جرني أمين أمين : واش نتا حمق باغي تقتلو منير : غادي تندم أيوسف خليني نعاود ليك الحقيقة متيقش بهدرتها راها شيطان بصفة ملاك مديش على شكلها وتصرفاتها البريئة راه قلبها كحل متليقش ليك غادي دمر ليك حياتك نقد راسك منها ماحد باقي الوقت _ دفعت أمين ومشيت جمعتو بواحد النص وبديت كنشتف عليه . يا غدي تبعد من جيهتي ومن جيهة أسيل يا غدي نقتلك المرة الجاية يله سير بحالك هو يمشي كيجري وكيقول منير : راك جنيتي على راسك غادي تندم على النهار لي عرفتيها الواليدة : تبارك الله ونعمة التربية ربيتك هاذي هي التربية لي ربيتك عليها تهز إيدك على واحد قد باك _ الواليدة هاذا راه شيطان كون تسمعي شنو دوز على أسيل كون عاونتوني فيه أمين : ديك الساعة خليه غير نسمعو شنو باغي يقول وديك الساعة حكم _ ماعندي مانسمع منو . دابا زيدو خليونا نمشيو راه تعطلنا الواليدة: من نهار تعرفتي على هاذ ختنا بديتي تبدل ايوسف رجوع لله أنا بعدا خلعني كلام هاذ السيد _ الواليدة الله يحفظك بلا متنكديها عليا تانتي وتخسري ليا فرحتي وزايدون هاذا غير كذاب يله زيدي نمشي . طلعنا الطومبيل ومشينا لفيلا ديال الخطيبة ديالي نزلنا وهزينا الكادوات و استقبلتنا ام أسيل مع الطبالة والغياطة أمين : بشاخ على فيلا كيف دايرة غير من برا وزوينة محساك من لداخل _ ايه هاذ الفيلا كنت غادي نموت فيها شكون قال أودي يا أمين غادي ناخد مولاتها . دخلنا كتبان ليا أسيل مريحة هي والعدول ناضت سلمات علينا و لابسة واحد الكسوة تال حد الركبة وطالقة شعرها الاشقر بقيت غير كنشوف في هاذ الزين لي عطاني سيدي ربي وهي تنغزني الواليدة تاتوݣض معانا وحنا ريحو وأسيل كتشوف فيا بنص عين زعما حشمانة حنان : مرحبا وألف مرحبا الواليدة : ترحب بيك الجنة ألا حنان حنان : كيما كنعرفو ولادنا قررو يكملو حياتهم مع بعضياتهم يعني حنا خاصنا نعاونوهم ونوقفو معاهم داكشي علاش غادي ندير ليهم أحسن عرس ونسكنهم في أحسن فيلا الواليدة : العرس مرحبا ولكن كنفضل يسكنو معايا _ ولكن الواليدة بغينا نسكنو في دارنا بوحدنا وزايدون أسيل ماغديش تبغي تسكن تما أسيل : لي قالتها خالتي هي لي غادي تكون أنا موافقة نسكن معاكم في داركم الواليدة : صافي ألا حنان بنتك غادي نديرها بحال بنتي وغادي تكون أمانة عندي والوقت لي بغيتي مرحبا بيك عندنا وتاحنا نجيو نزوروك حنان : بقا غير نحددو وقت العرس يوسف قرر من هنا 8 ايام يكون العرس يعني الحد الجاي إنشاء الله شنو بان ليك ألا منال نديرو عرس بسيط الواليدة : واخا مبقاش الوقت بزاف غير لي بغا ولدي هو لي غادي يكون بقات حاجة وحدة نتافقو عليها وهي الصداق حنان : الصداق ماشي موهيم الحمد الله أمورنا المادية فوق المزيانة _ ضروري الصداق وحيث عارف اموركم المادية مزيانة غادي نهدي أسيل هاذ القرءان وهاذ السنسلة كعربون المحبة ديالي ونتمنا تقبلهم أسيل : أي حاجة تجي منك قبلاها الواليدة : ايوا الله يكمل كولشي مبارك ومسعود نقراو الفاتحة _ قريناها و درنا العقد وريحت حدا أسيل شوية جابت لينا الخدامة القهوة بديت كنفخ فيها تابردات وأنا نكفحو على أسيل . سمحي ليا أسيل مانتابهتش أسيل : ماشي مشكل نطلع نبدل ونجي _ غير مشات وأنا ندير راسي غادي لطواليط وتبعتها كنجري لقيتها يله بغات دخل البيت وأنا نجرها وزديتها مع الحيط وحكمتها مزيان بدات كتنهج أسيل : شنو كدير أيوسف _ عطيني بوسة دابا وليتي مراتي غمضت عيني وقربت ليها يله بغيت نبوسها وهي تخوي بيا وضربت جبهتي مع الحيط وبدات كضحك حشومة عليك أنا راجلك أسيل : صبر احبيبي الحد الجاي مابقا ليه والو ونولي ليك _ بغيت ندخل معاك نعاونك تبدلي حوايجك أسيل : تا سير ولا ندير صبعي في ودني و نعيط لخالتي _ تفو على معكسة هاهو غادي . ورجعت بحالي ريحت مع النسيبة ومع مالين الدار حتا كتبان ليا مهودة جات ريحات حدايا . أسيل متبقايش تلبسي بحال هادشي وتعري ركيباتك راني كنغير أسيل : ماكينش شيواحد براني وزايدون ممعيقاش الواليدة : بغيت نسولكم على داك السيد منير مالو معاكم أسيل : مالو مالو شنو قال ليكم _ ريحي أسيل متخافي والو جا بدا كيخرب علينا وكيقول شي هدرة خاوية ولكن سلختو مزيان حنان : داك السيد دوز علينا الجحيم _ بدات كتعاود وكتبكي بدات كتهدن فيها الواليدة . شوية حطو لينا البسطيلة بالحوت والبسطيلة بالدجاج والحم والبرقوق . أش هاذ التبذير اخالتي حنان : زعما بغينا نرحبو بيكم تستاهلو ماكتر _ ولكن هادشي كتير كون خرجتوه غير صدقة لناس عرفتي شحال من واحد كيتقطع بالجوع حنان : صافي يكون غير خاطرك اولدي فريد سيفط الماكلة لي لداخل للأحياء الفقيرة ولي محتاج دور معاه _ من بعد ماكلينا بقينا مريحين مجمعين تال وقت العشا تعشينا ومشينا لدارنا وهكدا بقا دازت 7 يام و بقا غير نهار واحد لعرس وجدنا كولشي أي حاجة كتعلق بالعرس وعرضنا على صحابنا لي كيقراو معانا وجيرانا وداك النهار لاخر درتو غير لحسانة والحمام مشيت أنا وأمين عند الحلاق حسنا وتحركنا لحمام أمين : سعداتك أخويا غدا الليلة غادي دوز عندك زاهية امم حسدتك _ ياك نتا الشيطان كدير داكشي بلا زواج أمين : اه ولكن الحلال له طعم أخر - وتزوج تانتا بهناء شكون حبسك أمين : كتفلا عليا فين هي الفلوس اصحبي في راس مالي غير ديك Tmax واش كيسحاب ليك هناء مرفحة بحال أسيل _ دابا تا نتا ترفح وزايدون فلوسي هوما فلوسك مستعد من غدا نحط ليك 100 مليون في الكونط ديالك أمين : العز خويا الزين _ دوشنا خرجنا من الحمام تسالمت معاه وحددت معاه الوقت باش نمشيو غدا القاعة ومشينا لديورنا قسيت وصليت وتاصلت بأسيل سولت فيها ونعست حتا بديت كنحلم بواحد الحلم خايب أسيل كبيرة و كلها دم وسادة عليا في واحد الكاس وبديت كنتخنق وكنبكي وكنقول ليها طلقيني نمشي بحالي وهي غير كضحك فقت مخلوع مع اذان الفجر قلت اعوذ بالله من الشيطان الرجيم أش هاذ الحلمة تاني توضيت وصليت ومبقاش بغا يديني النعاس من الخلعة حيث كنأمن أي حلم قبل أدان الفجر كيتحقق بقيت فايق تا سمعت الواليدة كتقرقب في الكوزينة مع ديك 8:00 نضت بست ليها راسها الواليدة : شتك ليوم فايق بكري _ غير مع الفرحة الواليدة مابغيتش نقول ليها شنو لي طير ليا النعاس بقينا داويين شوية بيما وجد الفطور كلينا ومشيت دخلت لبيتي كنتفرج في vikings بيما قرب الوقت غير وصلات 1 بديت كنوجد في راسي ضربت الكومبلي ديال العرس طلعت فسر ورشيت شوية البرفان وريحت في بلاصتي تاجا عندي أمين كيدق أمين : هاي هاي على مولاي السلطان حطاتك هاذ الكومبلي _ الله يعزك . خرجت من بيتي لقيت العائلة ديال أمين في الدار سلمت عليهم وخرجنا وشرجاو ولاد الدرب الدفوع في واحد الكميو وتمينا غاديين تا وصلنا لقاعة تلقات لينا حنان بالدقة المراكشية وجاو بداو كيسلمو عليا وكيتصورو معايا وأنا هاز داك البوكي ديال الورد معنكشني طلعت لقاعة لقيت أسيل مريحة في كرسي الخاص بالعرسان ودايرين داك الوشاح الخضر الخاص بالحنة حيدتو ليها وبستها في جبهتها وبديت كنعلق لصحاب الدقة المراكشية وريحت أنا وياها وبديت كنشوف في الناس العرس عامر غير بالناس ديول الدرب وديال الكلاس وبعض الاصدقاء . داز العرس زوين كولشي كلا شرب نشط وتا أنا وأسيل شبعنا شطيح ودابا جا الوقت باش نمشيو أنا وأسيل لوطيل خرجنا من القاعة وبقات أسيل كتعانق هي ومها ويبكيو 10 الدقايق تابديت كنجر فيها والله يهديك على أنا غادي بيك لدار البقاء راه غدا غادي تشوفيها سلمنا عليهم وطلع فريد لطومبيل باش يوصلنا لوطيل أسيل : فريد هبط غادي نمشيو بوحدنا فريد : ولكن أمدام أسيل : هبط مكتسمعش _هو ينزل وطلعات هايا الله يهديك كيفاش غادي نمشيو بوحدنا وكيفاش غادي تسوݣي مع هاذ الكسوة والطالون ديال العرس غادي يكرفسوك أسيل : طلع وسكت الحبيب ديالي _ طلعت ومشينا تسركنا أسفي كاملة وتصورنا في كاع البلايص الزوينن عاد مشينا لوطيل و طلعنا الشومبر ديالها وأخيرا وصلات اللحظة لي كنتسنا وكتسناوها تانتوما باش نعاودها ليكم ولكن والله منعاود ليكم التفاصيل دوزنا ليلة الدخلة بحال كاع الناس وقبل مانبداو تافقنا باش مانديروش الولاد دابا تادير هي 22 عام يعني من بعد 4 سنين من بعد ماكملنا دوشنا وشدينا بلاصتنا وحنا معانقين بقينا كنهدرو تاداها النعس وبقيت كنشوف فيها إحساس زوين يكون حداك داك الشخص لي كتبغيه بستها وأنا نعس ماعقلت على راسي تاكنحس بالبوسان في حنكي أسيل : صباح الخير فيق احبيبي تفطر _ جريتها لعندي وعنقتها . نتي هي فطوري أسيل : طلقني احبيبي وزيد تفطر _ مشيت غسلت وبديت كنفطر وهبطنا ريحنا حدا البيسين تا وصل وقت الغدا غير تغدينا شدينا طريق لدارنا ستقبلاتنا الأم ديالي بالتمر والحليب ودخلنا لبيتي وهكذا داز اسبوع من حياتنا كولو سعادة مكنتفرقش أنا وياها من دار لمدرسة لبار ولا القهاوي مكندخلوش تال نصاصات ليل وليت كنحس براسي غادي ندير بالفرحة معاها تعلقت بيها لواحد الدرجة مكتصورش ولكن الاسبوع تاني تخلق لينا واحد العائق ولي هو الأم ديالي ...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM