الحامي ♥️ الجزء 28 🔥🔥🔥🔥🔥🔥 ( تتمة من بعد 270 لايك ❤️ ) نجم الدين : " قاطعها " انا الي غادي نهضر معاه و نشرح ليه نتي خليك بعيدة قمر : مكانش عليا نوافق من الأول حاسة بالذنب نجم الدين : متخافيش انا غادي نتكلف ركبي و دخلي لداركم ارتاحي من بعد نعيط عليك قمر : عندك رقمي بعدا ؟ نجم الدين : من شحال هدا قمر : و انا گاع معندي نمرتك منين خدتيه ؟ نجم الدين : أسرار المهنة " فتح ليها باب اللوطو " طلعي قمر : غادي تعيط عليا ياك نجم الدين : اممم " بغات دخل و حبسها " بلاتي قمر : شنو ؟ نجم الدين : اليوم كنتي زوينة فالإجتماع " قرب حط شفايفو على جبهتها و قبلها " يالاه سيري طلعات قمر و سدات الباب ديمارات اللوطو و تحركات بقا نجم الدين واقف كيشوف فيها غادية عاد طلع لسيارتو تبعها حتا بانت ليه داخلة مع الڤيلا و هو اضور و زاد مكسيري هز الفون كيتاصل بساجد بقا كيصوني شحال عاد جاوب ساجد : اش جاك عليا هاد النهار غير عرفتي غادي نتزوج و نتا تحس بقيمتي هههه نجم الدين : " مزير على الفولون " فينك نجي عندك ؟ ساجد : انا فالطريق غادي للدار عاد عرفت الواليدة و الواليد جاو نجم الدين : على سلامتهم ساجد : الله اسلمك جي عندي نتلقاو تماك نجم الدين : صافي انا جاي قلب نجم الدين الضورة غادي لڤيلا عائلة العبدلاوي وقف فالسطوب كيتسنا حتا دازت من حداه لوطو غادة طايرة لمحها من بعيد و هو اهز الفون دوز الخط نجم الدين : ابنادم...مالك غادي طاير و حارق الضو انا و مدرتهاش ساجد : كنحبس الفران و والو هاد النم موحال اش خدام نجم الدين : " كسيرا " كيفاش مخدامش ؟؟ ساجد : و كنقول ليك الفران مخدااامش و مخدااااامش نجم الدين : " زاد فالسرعة " حاول دوز من الطريق الي خاوية هانا من وراك ساجد : هههه شنو زعما غادي نموت هاد الليلة حتا بغينا نتوبو و نتزوجو و تجي الموت ههههه تهلاااااا في راسك نجم الدين : باركة من النحيب الزمر و ديها فالسوگان دور على ليمن كاينة رومبوان تماك ساجد : عارف اش كدير و لا غير كتفلا عليا نجم الدين : دير داكشي الي قلت ليك ساجد : كيبان ليا نسطح مها مع شي حيط نجم الدين : سكتنا الحبس عصبتي جد مي بهاد الهضرة ساجد : ههه مكتاب ليك تسمع وصيتي لخرا شوف والديا تهلا فيهم راك عزيز على الواليدة كانت ديما تقول ليا كن غير كان عندي ولد بحال نجم الدين ههه عارفها كتقول هاد الهضرة باش نجمع راسي كنت باغي نفرحها و نتزوج كيف تمنات و نبعد على الزهو لكن مصدقاتش عرفتي شنو نوصيك على قمر عنداك تخليها تزوج بشي قندوح مكيستحقهاش بحال داك وجه الدحش ديال ناصيف منعرفك غير نتا غادي نخليها أمانة فرقبتك كتسمعنياخويا ؟ نجم الدين : " غادي هو وياه فنفس المستوى" ساليتي الحجاية و توگض معيا شتي داك السطوب الي قدامك ساجد : انا و زهري اقدر نجي مع الضو لخضر و لا نجي مع السطوب و تخرج ليا شي خرشاشة تشتت مي نجم الدين بلا متحاول راه مستحيل نجو وهاذ الموصيبة غادية بهاذ السرعة وبلا فران الموت كيتسناني نجم الدين : " بصوت عالي " و سمععععع النمممم شوف شاف نجم الدين قدامو بان ليه كامايو جاي من ليمن هما كيقربو للسطوپ الي خاصهم اوقفو فيه لكن ساجد غادي بسرعة و ميمكنش احبس الفران تلفت نجم الدين شاف فساجد و رجع شاف قدامو زاااد فالسرعة و سبقو بعد عليه بمسافة نيت و هو اضور الللوطو بلاما احبس الفران بطريقة Drift حتا تحكو الروايض مع الشانطي و رجع سايق مواجه ساجد بدا كينقس فالسرعة و كيف قرب لسيارة ساجد ضار بجنب و حبس الفران قامو لحظاااااات و تسمع صوت اصطدااااام قوي ... نجم الدين شاف الكمايو جاي بسرعة فائقة الى خرج فسيارة ساجد غادي اعجنو مكانش قدامو من غير انو اسبق سيارة ساجد و اضور اتلقا ليه باش احبسو واخة غادي اصطادمو لكن مكان عندو حتا حل آخر فديك اللحظة ساجد شاف نجم الدين جاي عندو و خرج عنيه.عرفو شنو غادي ادير و بدا اسب و اغرق ليه شافو ضار و حبس اللوطو فوسط الطريق مجا فين اتحاشاه حتا اصطادمو السيارات بجوج سيارة ساجد بقات دافعة سيارة نجم الدين مسافة عاد وقفات حل عنيه بصعوبة شاف اللوطو عامرة زاج مشتت هز يدو ليمنية و حطها على كتفو ليسر حاس بألم رهيب حيد الحزام و حل الباب خرج كيتمشا بصعوبة ضار عند سيارة ساجد شاف فجهة السائق بان ليه ساجد متكي على الفولون و وجهو عامر دم حاول احل الباب و مبغاش ضار بانو ليه الناس تجمعو والسيارات كيوقفو غوت بأعلى صوتو نجم الدين : عيطو على الإسعااااااف شد فراسو كتبان ليه غير ضبابة شوية طاح فالشانطي على طولو فاقد الوعي كانت قمر جالسة فالبالكون هازة الفون و كتسنا اتصالو فجأة حسات بقلبها تزير و شعور خايب شدها يديها كيرجفو غير بوحدهم و شي حاجة متقلة ليها على صدرها حلات الفون و طلعات نمرة ديال ساجد هي الي عندها اتاصلات بيه بقا كيصوني مدة عاد جاوب .......... : " صوت بنت " الووو قمر : الفون ديال ساجد هدا ياك ؟ .......... : آه اختي السيد مول الفون دار كسيدة و حاليا فغرفة العمليات قمر : " بصدمة " شنووو ؟ ......... : وي كيف سمعتي راه صاحب الفون دار كسيدة قمر : " وقفات من بلاصتها " فإنا صبيتار ؟ .......... : مستشفى ********* قمر : اوكي شكرا قطعات قمر و دخلات لغرفتها هزات مونطو خفيف لاحتو عليها فوق السورڤيت الي كانت لابسة خشات فرجليها سبرديلة و خرجات كتجري ركبات فسيارتها و اتاجهات للمستشفى وصلات و اتاجهات للإستقبال سولات على ساجد قالو ليها مزال مخرج من العملية مشات لجهة غرفة العمليات بانو ليها امرأة و رجل جالسين فالكرسي عرفاتهم والدين ساجد من صورهم قربات عندهم كيف شافتها الأم ديالو و هي تلاح عليها عنقاتها كتبكي .......... : هئ هئ ولدي غادي اضيع مني حتا قلت غادي نفرح بيه و توقع ليه كسيدة الله يا ربي اشهاد المكتوب .......... : زهرة الله يهديك اش هاد الهضرة كتقولي زهرة : " بعدات على قمر و حطات يدها على وجها " غير شفت خطيبة ولدي و ضرني قلبي عليه يا ربي تحفضو ليا يا رب قمر واقفة غير مصدومة بقا فيها ساجد و حاسة بالخنقة مقدرات تنطق بحتا كلمة شاف فيها أب ساجد و هو اجرها .......... : اجي ابنتي چلسي باينة عاد سقتي الخبار انا مصطفى اب ساجد كنا نتمناو نتعرفو فأوقات حسن من هادي لكن جابتها الأقدار قمر : مزال مقالو ليكم والو ؟ مصطفى : لا ابنتي ساعة باش دخلوه و مزال مخرج حد قمر : كيفاش وقع ليه ؟ مصطفى : معرفتش كيفاش وقع ليهم حتا خرجو فبعضياتهم واش كانو شاربين و لا مانعرف ليهم هاد الدراري غادي اسكتو لينا القلب شي نهار قمر : مفهمتش...شكون الدراري ؟ مصطفى : ساجد و نجم الدين خرجو فبعضياتهم قمر : " سمعات اسم نجم الدين و هما اخواو بيها ركابيها " ن نجم الدين حتا هو دار كسيدة ؟ مصطفى : اه راه كاين فغرفة العمليات اعلم الله بحالو حتا هو قمر : " سندات على الحيط " مصطفى : " شد فيها " چلسي ابنتي...معندك لاش تخافي غادي احنقزوها كيف ديما جلسات و شادة فيديها الي كيرجفو كتحاول تستوعب شنو سمعات مقداتها صدمة ان ساجد دار حادث حتا نزل عليها الخبر لاخر كيف الصاعقة الجهد باش تسول على حالتو شنو وقع ليه واش حياتو فخطر مقدراتش الهضرة مبغاتش تخرج ليها بقات مدة كتحاول تستجمع قوتها باش تنوض تمشات بشوية كتقلب حتا شافت آيات من بعيد معنقة شي راجل و كتبكي و امرأة جنبهم حتا هي عطياها لبكا نزلو الدموع من عنيها بغزارة و مفيكسية عنيها فعائلتو بغات تجري عندهم تسولهم على حالتو و واش هو بخير بغات تشوفو باش ارتاح قلبها الي على وشك انفاجر بقات واقفة فبلاصتها بعيد عليهم شوية شافتهم ناضو كيجريو جهة الباب الي تحل و خرج منو الطبيب مراقباهم على أعصابها غير شافت ابتسامة آيات و هي كتعنق فمها و باها رجعات فيها الروح شوية يعني هو بخير شوية بانو ليها مخرجين نجم الدين من غرفة العمليات فالباياص مكرهاتش تجري عندو تلاح عليه و تعنقو لكن مكاينش كيف دير تبعاتهم من بعيد حتا شافتهم دخلوه للغرفة ديالو حمدات الله و شكراتو على سلامة حبيبها مسحات دموعها و رجعات للبلوك فين كاين ساجد بقات چالسة مع والديه لساعات عاد خرجو الأطباء خبروهم بلي العملية نجحات لكن حالتو باقي مستقرات و حولوه لغرفة الإنعاش مخلاو حتا واحد فيهم ادخل عندو بقاو واقفين خارج الغرفة و كيشوفوه غير من الزاج مصطفى : بنتي سيري ترتاحي من الصباح و نتي واقفة سيري للدار و غدا رجعي قمر : لا اعمي غادي نبقا حتا نطمأن على ساجد مصطفى : راك سمعتي الطبيب مرحلة الخطر داز منها الحمد لله غير سيري حتا انا و زهرة غادي نمشيو للدار زهرة : انا مغادية فين حتا نشوف ولدي حل عنيه و كيهضر معيا مصطفى : مغاديش اخليوك تشوفيه دابة غدا فالصباح غادي نرجعو زهرة : " شافت فقمر " غير سيري ابنتي الى كانت شي حاجة غادي نتاصل بيك بعد اصرارهم سلمات عليهم و وقفات ورا الزاجة كتشوف فساجد الي كان كولو سلوكة و مضورين فاصمة على راسو بقا فيها ميستاهلش هادشي الي وقع ليه ، طلعات للطابق الثاني فين كاينة غرفة نجم الدين بقات واقفة قدامها شحال حتا بان ليها الباب تحل ضورات وجها غير شافت الممرضة هي الي خرجات مشات عندها كتجري قمر : عفاك اختي قولي ليا كيف بقا ؟ الممرضة : شكون ؟ قمر : الشخص الي فالغرفة الي عاد خرجتي منها الممرضة : نتي من العائلة ؟ قمر : لا...انا صديقة الممرضة : المريض حالتو مستاقرة العملية الي دار لكتفو راه نجحات ليه و عندو إصابات طفيفة قمر : واش فاق ؟ الممرضة : مزال " بغات تمشي و حبساتها " قمر : كاين عندو شي حد فالغرفة ؟ الممرضة : كانو عائلتو طلبنا منهم اخليوه ارتاح حينت غالبا مغادي افيق حتال الصباح قمر : شكرا بزاف الممرضة : " ابتاسمات " واش حبيبك ؟ قمر : " حركات راسها بآه " الممرضة : ممكن دخلي تشوفيه لكن مطوليش قمر : لا غير نشوفو ونمشي قربات حدا الباب حطات يدها على الپواني و قلبها كيضرب بسرعة حلاتو بشوية و هي دخل كتشوف فيه ناعس فوق الباياص مغطيين ليه غير نصو لتحتاني صدرو عريان و دايرين ليه الگبص و بانضة على كتفو مشدودة على كرشو وجهو عامر كدمات و دايرين ليه فاصمة على جبهتو قربات بخطوات بطيئة و عنيها عامرين دموع مقدراتش تستحمل تشوفو فهاد الحالة چلسات جنبو فوق البياص و حطات يدها على يدو الي ممدودة جنبو اليوم عرفات و زادت تأكدات من عمق مشاعرها اتجاهو فكرة انها تفقدو متقدرش تستحملها ابدا حياتها عاد ولات عندها معنى مستحيل تستحمل امشي و اخليها بوحدها من جديد.هو الحامي ديالها هو حارسها و درعها الي كتحس بالأمان و هي فجنبو زيرات على يدو كأنها كتقول ليه معندك فين تمشي و تخليني قمر بدونك مجرد قوقعة بدون حياة ميمكنش تمشي و تخليها ترجع لديك الانسانة المتحجرة المتضررة من ماضي اليم ميمكنش ترجع لديك النقطة السوداء فحياتها مسحات دمعتها و تحنات عليه سدات عنيها و قبلات جبهتو بعدات و وقفات بغات تسحب يدها من فوق يدو حتا شد فيها و زير عليها شافت فيدو ممصدقاش هزات عنيها و هو ابان ليها حال عنيه كيبتاسم بلاما تشعر طاحت عليه عنقاتو و انفاجرات بالبكا قمر : هئ هئ كنت غادي نحماق كن وقعات ليك شي حاجة كنت نمشي فيها هئ هئ نجم الدين : " زير على عنيه حينت تعگر و هز يدو بثقل حطها على ظهرها " شوو متبكيش قمر : " حاطة راسها على صدرو " شفتك خارج من العملية.كنت بغيت نجري عندك نعنقك و مقدرتش.ضرني قلبي حينت مقدرتش نجي عندك " هزات راسها شافت فيه " كنت خايفة بزاف نجم الدين : " حط يدو على خدها " هاني قدامك موقع ليا والو قمر : تهرستي و كتقول موقع ليك والو نجم الدين : ساجد بخير ياك ؟ قمر : " بحزن " نجحات ليه العملية مي حالتو مزال ممستاقرة نجم الدين : " بغا انوض " خاصني نمشي نشوفو قمر : نووو نتا عاد خرجتي من عملية و باغي تنوض راه فالإنعاش ميمكنش ادخل عندو شي حد نجم الدين : كيفاش حتا سقتي لخبار ؟ قمر : اتاصلت بساجد و جوباتني شي ممرضة.جيت لهنا مكنتش عارفة حتا نتي درتي كسيدة منين قالها ليا بات ساجد فشلت كنت غادي نطيح نجم الدين : خفتي عليا ؟ قمر : " تغرغرو عنيها " بزاااف هئ نجم الدين : متبكيش مبغيتش نشوف دموعك اجي عندي جرها عندو و ضمها بدا كيمرر يدو على شعرها حتا هدات نزل راسو عند راسها استنشق ريحتها و قبل راسها بعدات شوية حاطة ذقنها على صدرو ابتاسمات و هي كتشوف فيه هزات يدها و مررات صبيعاتها على الجريحات الي فوجهو قربات عندو أكثر حتا تخالطات أنفاسهم غمضات عنيها و هي تبوسو قبلة خفيفة و بعدات ترسمات ابتسامة عريضة على شفايفو و جرها باليد الصحيحة رجع قربها لعندو. نجم الدين : شكون الي زعم دابة ؟ قمر : رجعت غير بوستي الي خديتي مني لبارح نجم الدين : هههه...حتا فالأوطيل درتي نفس الشي قمر : " باستغراب " فالأوطيل !!! نجم الدين : اممم فاش كنتي شاربة قمر : واش فاش كنا فباريس ؟ نجم الدين : " حط صبعو على جبهتها " عصري هاد الدماغ و تفكري قمر : مرة وحدة الي شربت هي فاش كنا فالبار ديال الأوطيل نتا مكنتيش خرجتي قبل منا انا منين شربت طلعت للسويت و نعست نجم الدين : " تفرشخ بالضحك " طلعتي و نعستي هههه قمر : وي هادشي علاش عقلت نجم الدين : اوى الالة فاش رجعت لقيتك جالسة فالكولوار و مكوخا كن ما دخلتك لبيتك علم الله شنو درتي قمر : لااا ميمكنش نجم الدين : امكن دخلتك للسويت و قمر : و شنو ؟ نجم الدين : " مبتاسم " و حطيتك فبلاصتك كان صبعك مجروح و درت ليك فاصمة و خرجت قمر : آه بالصح فاش فقت فالصباح لقيت صبعي فيه الفاصمة قول نتا الي درتيها ليا " خرجات عنيها " و شنو وقع آخر ياكما قلت شي حاجة ماشي هي هاديك متديش عليا غير كنت كنخربق نجم الدين : " دار راسو كيتفكر " لا هادشي الي وقع قمر : و علاش قلتي ليا درت نفس الشي فالأوطيل شنو درت ؟ نجم الدين : " بمكر " بستيني قمر : " حطات يدها على فمها " حلف كنعاودها راه كنت شاربة ماشي فوعي نجم الدين : نهار شربتي جبتي الكاو و فقدتي الذاكرة هههه عمرك تعاوديها قمر : اصلا مكنشربش غير كنت معصبة نجم الدين : " شدها من عنقها " سمعي مزيان عمرك باقي تحطي داكشي فمك كتسمعي جاب الله انا الي شفتك كن تلاقيتي شي حيوان و استغلك و نتي فديك الحالة قمر : " حركات راسها بآه " اوكي عمرني نعاود " وقفات " خاصني نمشي الممرضة قالت ليا ماطوليش نجم الدين : " شدها من يدها " غير خليك معيا و لا عيتي ؟ قمر : لا بغيت نخليك ترتاح نجم الدين : " حكز خلا ليها بلاصة جنبو " قربي تكات جنبو و حطات راسها على كتفو دور يدو على خصرها و حط دقنو على راسها قمر : معذب ؟ نجم الدين : بالعكس هاكة مرتاح بقا نجم الدين كيدوز يدو على شعر قمر حتا دازت بيه عنيه هزات راسها طلات عليه شافتو نعس قربات باستو من خدو و ناضت بشوية دوزات يدها على خصلات شعرو الي طايحين على جبهتو كترجعهم اللور تنفسات براحة باستو فجبهتو و خرجات ، خرجات من المستشفى ركبات فسيارتها و رجعات للدار طلعات لبيتها حيدات المونطو و السبرديلة تلاحت فناموسيتها و غفات بسرعة كيف صبح الحال ناضت قمر بكري دوشات و لبسات جينز و تيشورت گري و سبرديلة نشفات شعرها و هبطات لتحت لقات الفطور محطوط فالطبلة خدات كاس ديال القهوة شرباتو و خرجات مسرعة طلعات فسيارتها و اتاجهات للمستشفى عيطات عليهم فالشركة و خبراتهم بلي مغاديش تجي وإلى كانت شي حاجة ضرورية اسيفطوها ليها للدار حطات اللوطو و دخلات أول حاجة توجهات لغرفة الإنعاش لقات مصطفى و زهرة تماك سلمات عليهم و سولاتهم على حالة ساجد مصطفى : مزال معارفين والو...الطبيب عاد دخل لعندو افحصو و كنتسناوه كيف كمل مصطفى هضرتو خرج الطبيب و طاقم العمل ديالو تقدم عند الأب مصطفى الطبيب : الإحتمال الي كنا خايفين منو وقع للأسف المريض دخل فغيبوبة زهرة : شنو قلتي لا لاا ميمكنش ولدي ادخل فغيبوبة " بدات كتغوت " و لاااا بغيييت ولدي رجعو لياااا ولدي كيفاش كتقول ليا مغاديش احل عنيه و اشوف فياااا مصطفى : " عنيه حمرين و مغرغرين " و امتا غادي افيق الطبيب : معندنا حتا أدنى فكرة ممكن افيق اليوم او غدا و لا بعد أشهر و لا سنوات الدقة الي جاتو فالراس كانت خطيرة كانت معجزة انو نجا منها و نجحات ليه العملية مكرهناش افيق و تكمل الفرحة حنا درنا الي علينا و الباقي عليه هو و مشيئة الله مصطفى : شكرا دكتور الطبيب : هادا واجب " مشا " زهرة : ولدي ميمكنش ابقا ناعس تماك غادي نديوه لأمريكا عند أحسن الأطباء غادي اتعالج و احل عنيه " كتغوت بأعلى صوتها " واش ولدي عااام مشفتو و نجي نلقاه مجبد فالصبيتار ولدييي هئ هئ بغيت ولديييي _قمر كانت واقفة جنب الحيط و دموعها على خدها حالة ساجد قطعات ليها فقلبها و منظر مو الي مقدراتش تحمل الخبر زاد عليها قربات عندها جلسات على ركابيها و عنقاتها بجوج كيبكيو بحرقة مصطفى چلس فالكرسي و حط راسو بثقل على الحيط علاقتو بولدو مكانتش فأحسن حالاتها كان كيفرض عليه اتبع خطاه و اكون الإبن المثالي الي بغا هو لكن طبيعة ساجد خلاتو اتمرد على الأب ديالو و قراراتو و نهار قرر ادخل معاه للخدمة فرح و كانت فرصة ارجع اتقرب من ولدو من جديد و فرح فاش اتاصل بيهم و خبرهم بلي لقا البنت المناسبة الي باغي اتزوج بيها و اكمل معها حياتو حس بيه فعلا كيبغيها غير من الطريقة الي هضر ليهم عليها و قرر اغير شحال من حاجة فحياتو بسببها حتا وقع الي مكانش فالحسبان انو توقع لولدهم حادثة سير و هو فطريقو باش اشوفهم ، زهرة طاح ليها الظغط و جاو هزوها حطوها فغرفة و علقو ليها السيروم بقات قمر بجنبها بقات فيها بزاف و هي كتشوفها فديك الحالة من بعدما نعسات خلات معها مصطفى و خرجات طلعات لفوق لغرفة نجم الدين حلات الباب حتا كتفجأ بوجود ... يتبع ( قرا وتفاعل وخلي كومنطير زوين ♥️💪🏻) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM