الحاجة لي كنبغيها كنبغيها ليا بوحدي ولا بلاش . من بعد هاذ  الهدرة لي تقالت نقصات جماعتنا شوية وفي نفس الوقت رجعت كنهدر مع وحدة وخوكم ماشي من العاگزين تصاحبت معاها باش نلاهي الوقت وهاذا الغلاط لي كنصح أي واحد مايديروش يدخل في علاقة مع شخص باش يدوز الوقت أو يحيد الملل حيث الى كنتي نتا أو نتي باغي(ة) دوز (ي) الوقت فرآه داك الشخص يقدر يبغيك ويتعلق بيك ديك الساعة غادي تحطمو وقلب الإنسان ماشي ديال لعب .  بالنسبة ليا ديك الساعة هاذ السبب كان مزيان ليا حيث فاش قلتو لديك البنت لي تزعطت فيها اخيرا حسات بالغيرة وقبلات بالعلاقة وأنا قلت نبدا علاقة جديدة بلا كدوب وتفلية مشيت ساليت علاقتي بختنا لاخرة صارحتها بكلشي وهاذشي لي كنشوف فراسي زوين هو اني مكنخبيش الهدرة على بنادم قلت ليها لي كاين تمنات ليا توفيق واخا كانت هي باغية تكمل معايا مي طلعت أناني فضلت لي بغا قلبي ماكان عندي ماندير غير هو الغلط ديالي مكانش عليا ندخل في ديك العلاقة واخا يمكن  دازت يوماين أو 3 يام مي كانت غالطة . ماعلينا بدات ديك العلاقة مع البنت لي دات ليا عقلي نهار على نهار كنزيد نتعلق بيها نقدر نقول ليكم وليت كنبغيها في مدة قصيرة واحد 15 يوم هكاك طحت طيحة العما في الضلمة ولكن حتا هي كانت تستاهل كتبان ليا فشكل على كاع البنات لي عرفت . تقريبا وصل شهر على علاقتنا دوزتو غير هدرة معاها وكتابة القصة حتا كنكتاشف شي بلانات كايخصو علاقاتي خربقوني وخلاو دنيا دور بيا حتا ضطريت نسالي العلاقة واخا ماكنتش باغي . ولكن الساس إلى متبناش من لول على الصح الدار كتريب . داز نهار لول صعيب بزاف كنت موالف نبدا نهاري بيها ونبقا داوي معاها حتا كتبغي تنعس وأنا كنبقا من وراها سهران شوية كنكتب ليكم القصص عاد كنعس . قلت مع راسي غير ولف هاذ الشعور غادي يفوت دغيا ولكن كنت غالط داز أسبوع ووالو مبغاتش تحيد من بالي كيف كنفيق هي أول حاجة كنفكر فيها ولي زاد كمل ليا القضية وسالا معايا هو وقع موشكيل بين واليديا وضرات الأم ديالي تخرج من دار ودي معاها ختي خوات عليا الدار زدت تأزمت ودخلت في واحد الاكتئاب مابقيتش كندوي مع حتا واحد من غير عشيري حسام والكتبة ديال قصة ( إنتقام عشاق ) .  ديك الفطرة كانت صعيبة عرفتي شناهيا تخسر بنت كتبغيها وفي نفس الوقت تمشي الأم من دار ومعاها ختك الصغيرة عقلي بغا يخرج من بلاصتو خلاو فراغ كبير بزاف قربات شهر على فراقي مع البنت ووالو مزال كنفكر فيها بالصدفة واحد النهار كنت داوي مع واحد صديقة ديالي سميتها منال وكنت محتاج الكونت فايسبوك ديالها على ود واحد البلان حتا كنتصدم أنها كدوي مع البنت لي كنبغي صدفة غريبة حسيت بقلبي كيضرب وبديت داوي معاها من بعد ماخديت الاذن من منال باش تخلي ليا كونت وافقت وكملت على هدرتي معاها على أساس أني منال ( شوفو الحب فين وصلنا 🤣 كنتفكر هاذشي كنبدا نضحك مي هانية في سبيل الحب هاهاهاهاهاها) دازت شي يامات من هدرتي معاها على أساس أني منال البنت رجعاتني صديقتها معرفاهش أنا ديك البنت هو نفسو سكفاندري ماعلينا قلبي حن من جيهتها واخا كانت دايرة الغلاط من جيهتي حبي خلاني نسمح ليها وفاش عرفت أنها كتبغيني زعمتها ترجع تهدر معايا وداكشي لي كانت سيفطات ليا ورجعنا نهدرو ورجعات ليا الفرحة شوية  بدينا صفحة جديدة وعلاقة جديدة وحب جديد . حب لي كان نهار على نهار كيتزاد واخا كنا بعاد على بعضنا وكنتشاوفو غير في ابيل فيديو دازت واحد المدة يمكن شهر درنا جروب وتساب فيه أنا وياها وحسام وأمينة وشي وحدين آخرين . ايه داك الجروب لي عرفني على ناس جداد وخلاني مستمتع بوقتي . البنت لي وليت كنبغي وعشراني جداد خلاوني نرجع لحياة طبيعية ونبدا نبعد شوية بشوية من الباج والقصص لي كنت دايرهم غير باش نبعد على الواقع ديك الساعة كنت قريب من نهاية قصة إنتقام عشاق كملتها بزز غير باش منخسرش الخاطر للمتابعين حيث وقتي كامل كنت كنبغي ندوزو مع حبيبة القلب والعشران وديك الساعة بديت القراية في ofppt يعني مبقاش عندي وقت لكتابة ومن تما باي باي سكفانديري المبدع ديال القصص رومبلاصاني حسام وبدا أول قصة ليه وأنا كنت غارق في الحب تا وصل النهار لي غادي نتلاقاو فيه أنا وياها أول مرة ستاغليت الفرصة ديال واحد السطاج و مشيت ديبلاصيت لمدينة لي فيها هي وصلت قبل منها وبديت كنتسنا وانا مخلوع ومتوتر كانو بزاف ديال الحوايج كيدورو ليا في بالي مثلا منعجبهاش إلخ... حتا كتبان ليا جاية قصداني شفتها منعاودش ليكم خلاها شاب مامي تزعزع خاطري ... بروجولة زدت تعجبت بيها كتبان زوينة كتر مباشرة كيوت تمشينا شوية وحنا كنهدرو وأنا معاها حسيت براسي طاير بالفرحة مقدرتش نحيد عليها عيني كيفاش كانت كتهدر زين ديالها كلشي كان فيها زوين عشقت فيها كلشي وبالأخص إبتسامتها سالات معايا ولات كتبان ليا غير هي الحاجة الوحيدة لي كانت خايبة في داك النهار هو الوقت لي داز دغيا . نهار داز في رمشة عين النهار لي كان احسن نهار في حياتي وعمرو يتنسا وقبل مانتوادعو باش تمشي حسيت بواحد الشعور خايب حسيت براسي غادي نخلي واحد الحاجة غالية ورايا بقا فيا الحال مكرهتش نهزها ونهرب بيها نرجعها معايا 🤣 ولكن رآه داك الشعور ديال فراقها من بعد ماكانت معايا صعيب . من بعد ماقلت ليكم دات العقل ها القلب طار حتا هو .  من أول لقاء لينا حسيت براسي وليت كنبغيها لافان. فاش تودعنا هي مشات وانا شديت الكار لمدينة آخرى شفت الواليدة وختي حتا هوما لي مدة ماشفتهم حسيت براسي أسعد واحد في الدنيا ديك الساعة وتما فين تبدلات عندي الفكرة أنا السعادة سبابها الأشخاص ماشي الفلوس ( حسام الى كتقرى هاني كنعتارف وكنقول كلامك صحيح الفلوس ماشي هي أهم حاجة )  دوزت شي يامات مع عائلتي وعشراني ورجعت لمدينتي لي كتعرفوها جميع أسفي حاضرة المحيط رجعت لنفس الروتين الدارسة والهدرة معاها والعشران ديال الجروب غير هو ولات عندي فكرة وحدة في بالي وهدف واحد هو خاصي نصوڤي راسي باش نجمع في دار وحدة الأم ديالي وختي والبنت لي كنبغي حيث بصح كنت باغيها لحلال ماشي كنت كنتفلا ولأول مرة كنبغي بنت لحلال . بقيت كنفكر كيفاش غادي نصوڤي ماوصلت حتا حل من غير انهو وصلاتني دعوة ديال كونكور المخازنية كنت عقدت عليه أمل كبير ولكن دار الله فيها خير ماتقبلتش فيه واخا في لول حقدت وطلع ليا الدم ولكن ربي ماكيسد باب حتا كيحل باب اخر رجعت مدينتي من بعد مادوزت الكونكور رجعت لأسفي كيف ديما الروتين ديال ديما حتا دازت شهرين كنت جمعت شي بركة ديال الفلوس وبديت كنتيتستي في واحد المنتوج عبر الانترنت الحمد لله جاب الله تيسير وبديت خدام ومع دعاودي الواليدة و تحفيز البنت لي كنبغي جاب الله تيسير وبديت كندير شوية راس المال وفي نفس الوقت كنقرا دازو شهور و كنت دوزت فيهم باك ليبر حتا هو نجحت فيه ونجحت حتا في ليتيا حسيت ديك الساعة أن أخيرا الدنيا بدات كضحك ليا من بعد ماكانت شادة معايا الضد...يتبع