إنتقام عشاق الجزء 18 🔥🔥🔥 ( التتمة من بعد 500 لايك طاكيو صحابكم يعاونوكم عليها ) الواليدة : يوسف أجي دابا دابا تشوف هادشي لي قدام الباب _ غير سمعت هدرتها تخلعت أو مال الواليدة باغياني نجي دغيا شنو غادي يكون حدا الباب شدينا تاكسي تاني تال الدرب هبطت وتما كانت المفاجأة كيبان ليا واحد الموطور طماكس بميكاتو قدام الباب تفاجئت وبقيت كنشوف فيه أمين : بشاخ وبياسة لهما بارك ( بصوت كيليميني ) _ الواليدة ديالمن هاذا و شكون حطو هنا الواليدة : مانعرف هاك شوف البرية مكتوب فيها سميتك لقيتها فوق الموطور ومبغيتش نحلها حتا تجي _ شديتها عندها لقيت فيها وراق الموطور والكونطاك وواحد الرسالة جبدتها و بديت كنقرا فيها مكتوب فيها عيد ميلاد سعيد يوسف بغيت نكون أول وحدة تبارك ليك وتعطيك الكادو ونتمنا ينال الإعجاب ديالك ... أو شكون هاذي لي سيفطات كادو غالي بحال هاذا . وعلاه إيمتا عيد ميلادي بديت كنخمم وأنا نتفكر بيلا عيد ميلادي بعد غدا و نسيتو . و لكن شكون هادي لي سيفطات المطور ياكما أسيل ماجيت فين نكمل سميتها حتا بدا يصوني التيليفون جبدتو من جيبي نشوف شكون لقيتها أسيل نيت بعدت شوية على الواليدة وأمين وأنا نجاوب أسيل : أهلا يوسف كيف جاك الكادو ديالي _ بصراحة زوين صدمتيني ماكنتش كنتوقع منك شيحاجة بحال هاذي ولا تفكريني أسيل: إيوا من اليوم غير توقع اي حاجة حيث عزيز عليا نفاجأ الأصدقاء دياولي _ شكرا ولكن كيفاش حتا عرفتي بيلا عيد ميلادي قرب وانا براسي ماعقلتش عليه أسيل : كنعرف عليك كولشي أيوسف الصغيرة والكبيرة يله بسلامة عليك وعيد ميلاد سعيد _ شكرا بزاف حيت كنتي أول وحدة تفكرات عيد ميلادي والكادو ديالك حتا هو عجبني أسيل : قلت ليك الأصدقاء مابيناتهمش الشكر _ عندك الحق ولكن علاش سيفطتيه اليوم كون خليتيه تال نهار الثلاثاء كان غادي يكون حسن أسيل : ماغديش نكون مسالية يله خليت ليك الراحة حنان : بنتي أسيل كتباني ليا ساهية و كتبتاسمي غير بوحدك . هاذي الابتسامة ديال الحب كنتي كدوي مع يوسف ياك أسيل : اه كنت كندوي معاه . و أه أماما أنا كنبغيه وبزاف وأخيرا قلبي مال لشيواحد حنان : مزيان أبنتي كنت كنتسنا هاذ اللحظة وقولي ليا يوسف كيبادلك نفس الشعور واش غادي اوافق على علاقتك بيه أسيل : أكيد غادي يكون مبادلني نفس الشعور على كاينة شيحاجة تقدر تخليه يرفضني ولا ميبغينيش حنان: مزيان أبنتي غير هو نقول ليك واحد النصيحة وديريها في بالك راكي كديري غلاط كبير وهو كتحاولي تشري الحب ديالو أبنتي متحاوليش تشري الحب ديالو بالفلوس كيما كديري دابا . حيث أنا عارفة داكشي لي درتي على ودو في نظرك واش غادي يبغيك على شخصيتك إلى عرف بيلا نتي لي عطيتيه ديك الفلوس كاملة ودوك الفيلات وماشي ورثهم أنا متأكدة غادي يبغيك على فلوسك داكشي علاش بدلي طريقتك راه الحب مكيتشراش بالفلوس أسيل : مادخليش فشي حوايج مكيخصوكش أنا عارفة شنو كندير وزايدون يوسف ماشي من داك النوع لي طماع هو مختالف على كاع الناس وهاذا لي خلاني نتعلق بيه وهاذ الفلوس أماما هوما لي خلاوه فرحان ومستعدة ندير أي حاجة غير باش يكون هو فرحان أمين : قول ليا أيوسف دابا هاذا ديالك _ اه أخويا زيد نجيبو دورة نشوفوه كيف داير يله تمينا غادي ليه وهي تعيط الواليدة الواليدة : أجي نتا وياه هنا أنا حيط ولا شنو مابنتش ليكم ماغديش تقولو ليا منين جا هاذ الموطور _ الواليدة راني شريتو لبارح بليل والمحل لي شريتو عندهم وصيتهم يجيبوه ليا هنا الواليدة : مالك كدوخ عليا غير قبيلة فاش جيتي قلتي ليا ديالمن هاذا _ وغير نسيت حيت مشيت شريتو لبارح وليوم خرج من بالي صافي دابا بركة من الأسئلة خليني نمشي نجربو بست ليها راسها وهي دخل . اوفف يمكن تيقاتني مابغيتش نقول ليها الحقيقة غادي تبدا عليا بكترة الاسئلة شكون هاذي وعلاش ... غادي تصحبني طايح تاني مع شيوحدة بحال تيريزا لهما نكدب . أمين : نسوق أنا ولا نتا _ سوق نتا كيبان ليا الموطور تلفك لدرجة ماسولتينيش منين جاك أمين : والله حتا عندك الحق . بشاخ على ركبة في هاذ الطماكس طلع و عاود ليا _ تمينا غاديين وكنعاود ليه البلان أمين : سعداتك أخويا ها تيريزا ها أسيل وأنا كنطيح في الفقيرات تفو على زهر _ جرب زهرك مع أسيل الساط تلقها تسرح راه أنا وياها غير اصدقاء تصاحب معاها إلى بغات أمين : وشوف ليا معاها عرفتي إلى طحت مع هاذ الساطة غناني الله _ صافي غادي نحاول نهدر معاها وخا نخاف طمر معايا ولكن على ودك ندير أي حاجة أمين : عارف لي كاين وتا أنا أخويا قول ليا فين غادي نمشيو دابا _ قصد خونا لي في المدينة الجديدة لي كيبيع الماطر نشوفوو ليك شي حاجة تانتا وعدتك خاصني نوفي بالوعد ديالي . هبطنا عند خونا وصيتو على واحد بحال هاذا لي عندي عطيتو العربون ودار معانا الغد ليه وتحركنا لدرب أمين : هاهو المطور عندي غادي نمشي عند هناء نشوفها ومنها نعرف منها علاش نسرين دارت هكذا معاك يله تال العشية _ صافي واخا دخلت لدار وريحت في الصالون ... الواليدة واش غادي نبقاو في هاذ الدار ولاشنو يله نمشيو نسكنو في دار تيريزا راها حسن من هاذي الواليدة : اه ولكن راني ولفت هاذي وولفت الجيران نبقاو هنا حسن _ لي بان ليك كوني غير على خاطرك هاني في البيت وفاش يطيب الغدا عيطي ليا مشيت دخلت لبيتي دخلت الوتساب بغيت ندخل نشوف هناء واش اونلاين باش نسولها على البلان حيت درني في راسي لقيتها مبلوكياني صونيت ليها أبيل شداتني بوات فوكال . دخل الكونتاكت محيت نمرتها ودخلت الوتساب بديت كنشوف في النوامر لي عندي وهي طلع ليا نمرة أسيل في الوتساب ودايرة الطوف ديالها بديت كنشوف فديك طوف ويلي ويلي كتبان فيها أية في الجمال وحتا في الواقع كتبان زوينة زعمت سيفطت ليها السلام قراتو وخلات ليا ڤي شوية عاودت سيفطت ليها صافا وهي تخلي ليا ڤي عصباتني وأنا نقول ليها رجعتي لطبيعتك المتكبرة قراتو وبلوكاتني أو مال هاذي تاني كتبدل بحال الحرباء غير قبيلة كانت مزيان مالها دابا غير قبيلة كانت مزيان مالها دابا قررت نصوني ليها صونيت المرة لولة قطعات المرة التانية طفات التيليفون وليني متكبرة يمكن هاذ البنت عندها إنفصام الشخصية طلع ليا الدم وشديت vikings تفرجت فشي حلقات بيما حطات الواليدة الغدا قصيت ومشيت نعست تال 17:00حتا جا أمين فيقني أمين : نوض الساط نمسيو نحسنو ومن بعد نمشيو الحمام _ هزيت حوايجي والفلوس وتميت خارج الواليدة : نقص ديك الشعكاكة أيوسف _ صافي هي لولة غادي نقصها بست ليها فوق ومشينا حسنا ومع ديك 20:00 تحركنا الحمام خرجنا مع ديك 22:00 وكل واحد زاد لدارهم غير وصلت لدار وهي توقف عليا الواليدة الواليدة : بصحتك أولدي ولا كيبان في غير ضو بعدا شتي هادي تحسينة زوينة زيد التعشا العشا موجود _ أشمن زوينة غير درت ليك خاطرك ... مشيت تعشيت وجمعت الكتوبة ديول الماط وعمرت التيليفون على 8:00 واخا داخل تال 10:00 غير هو خاص نمشيو عند خونا لي وصيناه على الموطور وأنا نحط راسي على المخدة مبغاش يديني النعاس بقيت كنفكر في أسيل والمزاج ديالها المتقلب حرت مع هاذ البنت وقررت الغد ليه نشدها صحة تعتارف ليا علاش كدير هكدا معايا وعلاش هي غامضة بقيت تانفكر تاداني النعاس الغد ليه كنسمع الدقان مع 7:55 مشيت حليت لقيتو أمين أمين : زيد نمشيو راه الوقت هاذا _ شتك تحمستي بزاف جاي بكري عمرك درتيها في حياتك بلاتي نلبس ونفطر راه مزال الحال خونا دار معانا تال 9 فطرت ولبست 8:30 خرجنا قصدنا خونا لقيناه وجد لينا الحديدة لي وصيناه عليها طماكس بحال ديالي مختالفين غير في لون أنا عندي في البيض وهو في الكحل ( الطماكس أولاد العبد الله يخلص حل واحد على قد نيتو ههه ) قادينا معاه المسائيل وشدينا وراق الموطور وأمين فرحان وأنا وحطيت 9 البريكات مليون تنطح مليون وتحركنا بدينا مسركلين أنا بيما وصل ليسي بلاصينا الماطر عند الكرديان هو يعنقني أمين أمين : العز أخويا الزين _ هانية أخويا مابينتناش اي حاجة ديالي راها ديالك وتمينا داخلين وهي تجي عندي هناء هناء : بغيت نطلب منك السماحة على داكشي لي دارت صحبتي ماتوقعتهاش منها _ نتي ماليك والو نساي هاذ الموضوع ... جرها أمين ومشاو لواحد القنت وأنا مشيت قدام الكلاس كنتسنا في أسيل ضرب الجرس ومجاتش دخلنا الكلاس ودازت ساعة مجاتش عرفتها ماغديش تجي دازت الحصة ديال الماط وتحركنا لديورنا أنا كيف دخلت لدار صونيت ليها تيليفونها طافي تغديت ومشيت تكيت بيما وصلات 4 غير قرب الوقت هزيت ادوات الصيونص وبدلت حوايجي وبديت كنتسنا بيما جا أمين سمعت الكلاكسون ديال المطور وخرجت تحركنا ليسي ودخلنا عند الصيونص وأسيل ماكيناش طلع ليا الدم وتوترت أو مالني وليت هكدا شنو واقع بديت مصادع مع راسي ثاني وكنقول تموت ݣاع بغيتها وواحد الراس كيقول ليا خاصك ملي تخرج تمشي تشوف مالها بقيت كنفكر شنو ندير وأنا نتفكر شنو وقع ليا اخر مرة تما وأنا نقول والله تاندخل سوق راسي وتبعت مع الاستاذ غير سلات الحصة وجمعنا أدواتنا هو يقول الأستاذ أستاذ الصيونص : غدا عندكم رحلة إستكشافية لمدينة الصويرة مع 7:30 كولشي يكون حاضر قدام باب المدرسة الرحلة بالمجان أمين : زاهية الساط نمشو نتسركلو ومنها نشوف مع أسيل _ فين هي بانت ليك كعما غادي تجي يمكن ضرب الجرس وخرجنا مشينا لديورنا كيف دخلت كليت وقلت لواليدة على الرحلة ودخلت لبيتي صونتي على أسيل وأخيرا تيليفونها كيصوني وجوباتني ... مالكي انم طافية مشقوفك ومخلياني مشطون عليك النهار كولو وعلاش بلوكيتيني وفين غابرة أسيل : غير بشوية عليك ومتغوتش راك سمكتيني كانو عندي شي حوايج كنت كنوجد فيهم وماكنتش مسالية _ ايوا علميني ديك الساعة من واجب الأصدقاء يقولو كولشي لبعضياتهم أسيل: صافي نسا سمعت كاينة رحلة دايرها أستاذ الصيونص غادي تمشي _ أكيد غادي نمشي ونتي موحال غادي تمشي أسيل : غادي نمشي يله بسلامة تال غدا وحاجة أخرى غدا غادي يكون نهار مميز _ كملات كلامها وقطعات وأنا رجعات فيا شوية الروح حيث عرفت بيلا بيخير .جاني الملل ومشيت شديت التلفازة وبديت كنتفرج بيما وصل العشا قصيت ومشيت نعست الغد ليه فقت مع 7:00 فطرت ولبست وطركت أمين وتحركنا ليسي لقينا الكار كيتسنا جينا حنا لاخرين غير طلعنا ديمارا الكار بديت كنتسارا في الكار كنقلب على أسيل مالقيتهاش . تفو على بلان معندهاش الكلمة ريحت في بلاصتي وأنا كاعي تاصولنا الصويرة حطنا الكار حدا واحد الجبل وبدا كيشرح لينا الأستاذ شي لعيبات تما من بعد ساعة مشينا لمدينة وبدينا كنتسركلو واحد الوقت دار ليا واحد خونا بالاشارة أجي وتا أنا من نيتي مشيت عندو وقال ليا أجي معايا نوريك شيحاحة كتعلق بيك مشيت معاه غير بعدني من الكليكة وهوما يخرجو ليا واحد 3 شدوني دغيا مينطاوني وغطاو ليا وجهي وركبوني الطموبيل وبقاو غاديين بيا تقريبا لمدة 10 الدقايق عاد نزلوني ودخلوني لواحد البيت وحطوني فوق واحد الكرسي ومع داك الغطا لي في وجهي ماكيبان ليا والو وبديت كنغوت وحلو ليا شنو بغيتو عندي شوية حسيت بشيواحد جاي جيهتي غير وصل بدا كيحل ليا في المينوط غير تحل وأنا نحيد داك الغطا من وجهي بزربة وبغيت نضرب لي يحيد ليا المينوط وتما كانت الصدمة قوية ...يتبع في نضركم شكون غادي يكون؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM