قصة المزحة #الجزء 59 : فاق بكري كيف العادة, شاف الجو لقى الشتا حابسة لبس سورفيط و خرج يجري, من بعد نص ساعة رجع دوش, لبس حويجو و فطر و لكن قبل ما يمشي لخدمو جبد تيليفونو و سيفط ميساج و هو رجع تيليفون في جيب المونطو و دار ابتسامة النصر و ركب في طوموبيلتو. ايلاف لي كانت في سابع نومة ديك الساعة و ماجايبة لدنيا خبار. جودي لي بزز باش فاقت مع بقات سهرانة مع صفر الكمارة, ناضت وجدات الفطور فطرات و جمعات كتوبتها و قادات حالتها و قبل ماتخرج تاجهات لبيت ايلاف لقاتها مفرشخة فوق ناموسية قادات ليها الغطا و خرجات و مشات عند سامانتا وصاتها و عاد مشات فحالها و هاد المرة هزات المضلة. غير حطات رجليها قدام باب العمارة ضرب واحد البرد صحصحات و بقات واقفة كتصيب في حويجها و تسد في المونطو مزيان حتى سمعات صوت ماغريبش عليها "صباح الخير" هزات راسها كتلقى صفر الكمارة مبتاسم ليها جودي: اش كدير هنا ؟ باتريك: انا لاباس عليا, شكرا على السؤال جودي: صباح نور, لاباس؟..... يالاه ها انا سولتك... قول ليا دابا اش كدير هنا؟ باتريك: جيت عندك, اش غادي ندير مثلا جودي: اه و اشنو بغيتي؟ و علاش جيتي باتريك: شحال فيك ديال الهضرة, زيدي نحيدو من البرد بعدا و نقول ليك جودي: واش ا سيدي ماعندك مايدار؟ راني تابعاني القراية نمشي ليها و اصلا ليل كامل و انا نهضر معاك ماكفاكش و زايد في صباح نصبح عليك. باتريك: بشوية عليك انجاوبك على كلشي..... عندي مايدار..... عارفك قارية داكشي علاش جيت نوصلك..... لا ماكفانيش لييل ماكرهتش نبقى ديما نهضر معاك..... انا بعدا احسن صباح ملي صبحت عليك جودي لي تزنكات من تعناب ديالو واخا مولف ديما يتعنب عليها و لكن فاش تخلطو عليها المشاعر و لات تحشم و كيجيها بلي كيتغزل فيها, باقي ماجاوباتش حتى حسات بديه فوق كتافها جارها قدامو باتريك: الا بقيت معاك هاكا و نتي تحشمي من زوج كلمات غادي نجمدو غير بالبرد جودي: ا حبس راه ماغاديش نمشي معاك راه باقي الحال و الجامعة قريبة باتريك: عرفتك داكشي علاش غادي نمشيو نكلسو فشي كافي هي لولة قبل ماتمشي و عاوتاني مخلاش ليها الوقت فين تجاوب كان حل الباب و دخلها. ~"اش عند الميت مايدير قدام غسالو"~ مشاو و ختارو واحد الكافي مقابلة مع الجامعة باتريك: باقي مامتيقش راسي راني كالس معاك و نتي قدامي, لا و داك اللسان المادي عندك ماحليتيهش جودي: حتى انا باقي مامتيقاش اش كلسني معاك و نتا خاصك تكون شاد طريق لخدمتك دابا, و داك اللسان الا بغيتيه موجود باتريك: لا لا بلاش غير خلينا هاكا مزيانين جودي: اصلا عندك غير 8 دقايق و غادي تمشي فحالك باش ندخل نقرا انا باتريك: مكتعرفي لرومانسية لا والو جودي: تا اشمن رومانسية اوو, عطيت لينا فرصة و مابقينش كنصدك و لكن دقة دقة ماشي سلم عليه زرب عليه احنيني باتريك: و انا فرحان بهاد الفرصة لي عطيتينا و كوني اكيدة انني ماغاديش نضيعها و انا معاك كيفما بغيتي. قلت ليكم عنوب باتريك بغى يبدل الجو فاش شافها كتحشم و ماباغاش تهضر : ماكرهتش شي كاس دالشاي ديالكم حسن من هاد القهوة جودي: هههه اصلا اي حاجة مغربية زوينة ماشي غير اتاي هي عنات الماكلة و لكن عنوب فهمها في شكل و ضرب ليها واحد الشوفة طيح صرصور من فوق السور.......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM