قصة المزحة #الجزء 113 : حسات بيدين صغار كيزعزعو فيها, حلات عينيها كتلقاها البنت الصغيرة. البنت: نوضي راه وصلنا و ناس بداو كينزلو. ناضت حكات عينيها كتستوعب اش طرا ليها و فين هي و شكون هادي, حتى صحصحات و ناضت باستها و شكراتها, هزات صاكها و توجهات لباب ديال الطائرة غير خرجات و ضربها البرد ديال المغرب حسات بشعور رائع, حسات بالراحة لا تتصور, توجهات لمطار و دوزات الاجراءات و خرجات, كتلقى مها و باها و خوها في الاستقبال, غير شافت مها و هي تلاح عليها كتبكي. ايلاف: توحشتكم توشحتكم. مها غير طبطبات عليها وهي حاسة بلي بنتها ماشي هي هاديك و خلاص ملي عيطات عليهم و خبراتهم بلي غادي تجي شهر قبل على لي كانت عالماهم و هي حاسة بشي حاجة في شكل, كيف لا و هو القلب الام لي كيحس بولادها. ساعتين كانت كالسة في دارهم من بعد ما تجمعو خواتتها و رجاتلهم و ولادهم باش يستقلبوها و معاهم حتى جيرانهن المقربين, هي كانت كالسة بحال كالسة على الجمر باغا غير تنوض تبقى بوحدها, كتسنى غير امتى تخوا الدار و تستفرد في بيتها, تحط راسها و تنسى كلشي, تنساه و تنسى ايامهم, تنسى هضرتو و هي اكثر حاجة طعناتهم, و لكن كلشي كيبقى غير تمني, حسات بختها كتحرك فيها. ختها: ا فين مشيتي , راه كانو كيسولوك كيف داير الجو. ها هي كلشي كيسولها على الجو و الدولة و المعيشة و الغربة بحال هي سفيرة النوايا الحسنة و لا مقدمة نشرة الجوية, كلشي كيولي فيها خبير, بغات تغوت على جهدها تقول ليهم انا كنتكوا من الداخل ديالي سولو عليا انا ماشي الجو و لكن ماقدرت تقول والو. ايلاف: اه, سمحو ليا مع العيا ديال السفر بغيت غير نعس نرتاح. و انسحبات لغرفة ديالها بمجرد ما سدات الباب مشات نيشان تلاحت فوق ناموسية و غرقات في ذكراياتها, باقي تعقل غير العام لي فات في الصيف رجعات وحدة كلها نشاط و حيوية الفرحة باينة في عينيها قبل من وجهها حبو ليها خلاها تنشر السعادة حولها, جات كتجمع مع كلشي تفيق بكري تمشي الخدمة مع باها و خوها, ترجع لدار تعاون مها و يبقاو عاطينها لضحك مع خواتتها, تخرج تجمع مع ناس ديال الدرب, و دابا كيف ولات فرق ساشع ما بين المجية الاولة و الثانية, في لولة كانت ثمتيلية و عايشة دور البطلة, و في الثانية فاقت منها و عرفات راسها كانت عايشة في رواية, نسات بلي عمر الخيال كيولي حقيقة غمضات عينيها و نعسات على جنبها غير باش تحاول تنعس و لكن جملة وحدة بقات كضرب ليها في ودنيها " ماتستغليش حبي ليك, هادشي لي كطلبيه مني مستحيييل.... ماتستغليش حبي ..... ماتستغليش" سدات ودنيها بديها بزوج و حاولات تصمك ودنيها, ماعقلاتش على راسها امتى نعسات. ~ بعد شهر ~ واقفة قدام باب المطار هي و مامات جودي كتسناو فيها لي غادي تكلس معاها سيمانة قبل ماتمشي لطنجة, حتى كتبان ليهم جودي خارجة و الفرحة باينة من عينيها فكراتها غير في راسها قبل من عام, تسالمو و توجهو لدارهم. ها هوما اخيرا بوحدهم في البيت غادي يخويو المزيودة على بعضياتهم. جودي: شفتك وليت لاباس على اخر مرة شفتك. ايلاف: الحمد لله, و كيف قلتي الضربة لي ماكتقلش كتقوي, مهم خلينا مني انا مع الوقت انسى كلشي و نبقاو نتفكرو هاد اليامات و نبداو نضحكو عليهم. جودي حاسة بيها غير كتصطانع القوة قدامها و مع ذالك سايراتها في الهضرة. جودي: ايه اشنو بغيتي تعرفي ا لالة !!؟ ايلاف: كلشي اش طرا في هاد الشهر كاامل جودي ماقدراتش تعاود لصاحبتها بلي هي عايشة في سعادة و حب و هي هنا كتألم بوحدها, داكشي علاش دخلات ليها نيشان. جودي: الا كنتي تسوليه عليه هو فماعاودتش شفتو من نهار غبرتي, و حتى انا ماسولتش عليه. ايلاف: مابغيت نعرف عليه والو, الله يسهل عليه, و الله يبعد طريقو على طريقي. جودي: مهم غير بغيت نعلمك و صافي, دابا غادي تقولي ليا اش طرا داك نهار..... ملي جيتي و نتي متغيرة, سديتي على راسك في البيت و بقيتي ليالي كتبكي في كل مرة كنت كنسول كتقولي ليا مابقات حتى حاجة سميتها ايلاف و ارثر, و لكن ماقلتي ليا والو, عطيتيعا لقراية و نسيتي راسك حبستي على راسك الماكلة و النعاس و غير كملتي امتحانات هربتي, ماكنتش بغيت نزيد عليك ديك ساعة و نحكر عليك, و لكن دابا ماغادي نتفارق معاك حتى تعاودي ليا كلشي و اشنو طرا داك نهار. سكتات جودي و كتسنى ايلاف تهضر. ايلاف: باقي كتعقلي على داك نهار, فاش عيطت ليه و قال ليا, بلي معصب مع شي مناقصة و كان خدام عليها. جودي: اه, نهار قلتي اديري ليه مفاجأة و تفوجي عليه شوية, ساعة نتي لي فاجأتيني ملي رجعتي محطمة. ايلاف: كنت مشيت عندو, حلات ليا الخدامة و قالت ليا بلي كاين في بيرو, توجهت ليه و لقيت البار محلول شوية, بقيت حاضياه شحال كيفاش منغامس في الخدمة و مرة مرة كيتصعب يلوح ستيلو و مرة يحك راسو, بقيت شحال من دقيقة و انا حاضياه تقولي بحال اخر مرة كنت انشوفو و فعلا حدسي ماخيبنييش. سكتات شوية عاد كملات و كتعاود بحال الا الحوار طرا غير البارح ايلاف: دخلات عليه كيف العشاشة و مشات عنقاتو, شافني تبسم و زاد عنقني. ارثر: هاد الحضن لي محتاج نيت, احسن حاجة ضرتي, راسي غادي يطرطق. ايلاف: كاين فاش نعاونك ا حبيبي !! ارثر: هاد الساعة غير كلسي حدايا هادشي كافييني. ايلاف: ماطلبتي غير الموجوود, ~ كلسات في الفوطوي لي مقابل مع البيرو ديالو~ الله يسهل علييك. -رجعت حاضياه بحال كنحفظ ليه في حروفو و كنرسخهم في بالي, حتى جات في بالي الفكرة لي من شحال هادي و انا كنأجلها كل مرة و ديما كنلوح ليه كلمة كلمة و هو مرة كيجاوب معايا مرة كيقلب الموضوع و بعد المرات كيدير راسو ماسمعنيش. ايلاف: ارثر علاش مابغيتيش تسلم بحال ادم!!!؟ هز راسو و شاف فيها و مع كان مخنزر في وراق بقى بيها. ارثر: رجعنا لهاد الموضوع تااني !!! ادم سلم ضرب راسو علاش كتبقاي ديما تقارنيني معاه؟؟؟ ايلاف:لا انا ماقارنتكش معاه, غير كنوري ليك طريق الصح, و ادم كن ماعرفوتش هو دين الحق ماكانش غادي يتشبث فيه. خبط البيرو بيديه و غوت: صافففي ا ايلاااف مابغيتش نهضر في هاد الموضوع مازال, لي فيا كافييني و انا داخل على مناقصة مهمة وهادي هي الهضرة لي كتقولي. - في ديك اللحظة ا جودي ماعقلتش على راسي مابقيتش ديك ايلاف لي ديما ضريفة معاه, حسمت امري و قررت نفرتك الرمانة و الحمد لله هي الحاجة الوحيدة لي ماندمتش عليها. رجعات كتكمل ليها. ايلاف: ماغاديش نسكت مازال, كتقول ماشي وقت الهضرة راه كلشي بيد الله, الا كان مكتاب ليك تربح هاد المناقصة فكن اكيد واخا ماعرفت اش يطرا غادي ديها, و لكن نتا مابغبتيش حتى دير محاولة تعرف على الاسلام و ديك ساعة حكم راسك, انا كنقول ليك دابا غير بحث و قبل و انا متأكدة 1000% غادي تأكد هضرتي و تبع طريق ادم. زاد غوث كثر من لول: الا كان باتريك ولا ادم مستهزأ و مامسوقش لمكانتو ماكيهمنيش و لكن انا ارثر كندجي مكانتي الاجتماعية عندي هي اللولة مايمكنش يقولو سلم على قبل حبيبتو, و اصلا عندي عقود و مشاركات مع عدة مستثمرين و لي عارفين الاسلام بلي هو الارهاب الا عرفو باسلامي غادي نخصر كلشي و خلاص انا داخل لهاد المناقصة, مانقدر نحط كلشي على محك غير باش نرضيك ا ايلاف. ايلاف: هادشي كامل راه الله لي رزقك بيه و كيفما عطاه ليك, يقدر في رمشة عين تخسر كلشي, لاش كتخلط شي مع شي, و انا مابغيتكش ترضيني, رضي ربك هو اللول. ارثر: هادشي كامل وصلت ليه بخدمتي و مجهودي انا و الاب ديالي, نتي لي ماتخلطي والو. سكت شوية حاول يبرد راسو. ارثر قرب ليها و شد وجهها بين يديها: ايلاف حبيبتي لاش كيعجبك تجبدي صداع, شوفي عامين و لا مرة تناقشنا و لا مرة كانت بيناتنا الغيرة, احسن علاقة بين زوج كيبغيو بعضياتهم كاينة ثقة و حب, لاش باغا ديري عرقلات دابا. ايلاف بدات كتبكي: بغيت نتلاقاو في الجنة ان شاء الله........ #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM