قصة المزحة #الجزء 7 : مشاو مالين دار و اخييرا بقيت بوحدي لا صداع لا والو. اول حاجة درتها هي الموسيقى و نضت نبالي بدار سيقتها من فوق لتحت و غسلت ماعن رديتها ناضية ( مهم ختكم راه حادكة ماتخافوش عليها و لي عندها شي خوها بوكوص تتفضل مشكورة ) فاش كملت عاد وجدت ليا غير صندويش كليتو و ديك ساعة ارا برع لخدمة اول سلاح هو الشعر جمعتو لفوق و هزيت لبيسي مشيت نيشان لداك سيت ايلاف: و الله ليوم بيا و لا بيك مشيت لعمو كوكل و درت ترجمة و بقيت هادي تعني سمية هادي تعني كنية هادي عنوان بقيت مقاتلة معاه حتى كملت كلشي درت فاليدي و قلت ها انا تهنيت حتى كتخرج ليا باج اخرى فيها معلومات اخرين نعمرهم ايلاف : ياالاه ماكفاتو فيل زادتو فيلة , سير عالله و بقيت تاني هادي تنفع هادي ضر حتى كملت ديك باج تاني ايوا حتى كتخرج ليا باج اخرى ايلاف: و لااااا بزاااف, مالي غادي ندفع لداعش اووو و المخابرات و مافيهاش هادشي كامل مشيت تاني على وعدي و سعدي واهيا ناري هادشي كامل غير معلومات مهم بقيت في داك سيت شي 40 دقيقة مضاربة مع ترجمة من جيهة و مع سيت من جيهة اخرى فاليديت تاني و لكن لقيت دايرين هادي اخر مرحلة هادشي لي بردتي شوية و لكن باش نلقى طالبين ليا تصويرة د باسبور هادي ماكنتش ليا في البال هزيت داك بيسي قلبتو عليا من تما ايلاف: اووووو مرة لولة الالمانية قلنا ماشي مشكيل , مرة ثانية و تالثة غير معلومات قلنا ماشي مشكيل و لكن باش طلبو ليا باسبور هادي لا مانسمحش ليكم (اه ا سيادة عندي 21 عام و باقي ماعنديش باسبور ) ايلاف: و راه غادي نديروه اوو مالنا فاش نكونو غادين غادي نديرو اوطوسطوب لطيارة مثلا مهم صعرت ديال بصح و خليت كلشي نضت ضربتها بتدويشة فاعلة تاركة بردت غير غديدي بعدا (في خاطر وداد و يسرى سيدة ملي بدات تعاود عاد تفكرات دوش ) ايوا خرجت لقيت دار جاو كليت و صليت و مشيت شديت تيلي ما كاين القصص و المسلسلات كالعادة غير ضربات 7 و انا نود لمراية هزيت كاع لمكياج لي عندي حطيتو بقيت هاك بالاك حتى لديك 8:30 درت تحفة فنية في وجهي و انا نخرج عند الواليد ايلاف: بابا عطيني سوارت طوموبيل الحاج احمد : بسم الله الرحمن الرحيم , تي فين غادية في هاد ليل و بداك لوجه ايلاف: جيت زوينة ياك؟ الحاج احمد : الله يمسخك منين جاك زين ابنتي و نتي تخلعي بنهار سيري سيري غسلي داكشي, تقولي غير كنتي تجيري في لحيوط ايلاف : و با الله يرضي عليه عطيني نمشي دغيا و هادشي راه غير لي ميكاب ارتيست لي يعرفو ليه, اشمن جير راه هادا سميتو هايلايت و كونتور و اي... (مخلانيش نكمل الهضرة) الحاج احمد: سيري سيري قبل مانوض ليك و نوريك و الا كانت غير بهاد الحالة و الله ا بنتي لا خرجي و لا عتبتي الباب و مسحي داكشي عاد اجي نهضرو على هاد السيبة و فين باغا تخرجي في هاد الليل صافي عرفت القضية حامضة مشيت نقصت داكشي لي درت و رجعت كلست حداه ايلاف : هاني انا بابا جيت و نقصت ميكاب الحاج احمد : واخا ماشي شي نقيص و لكن بعدا حسن من قبيلة, يالاه قولي ليا فين كنتي باغا تمشي و بديك الحالة ايلاف: و راه كنت باغيا نمشي غير لعند المصور نتصور الحاج احمد : و علاش بسلامة غادي تزوجي و حنى مافيخبارناش ؟ ايلاف: الله يهديك الحاج اشمن زواج (هضرات بشوية) على لقيناه بعدا حتى نتصورو معاه الحاج احمد: راني كنسمعك و يالاه طلقينا و قولي لاش باغا تصاور ايلاف: و دابا بغيت ندفع الباسبور و خاصني تصاور هادا ما كان و القضية طويلة و لكن لي نبغي نقول ليك راه خاصني الباسبور.......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM