وأجي نعاود ليكم المعانات ديال الخيرية داونا لواحد الشومبر كبيرة دايرة بحال داك السيليون لي كنت فيه داك نهار الفرق بيناتهم هو هنا كاينين كاتريات ههههه غير سمية كتريات وصافي أما غير حديدات مصضيين ولحايف مسخين وخانزين بريحة البول حشاكم وديك الشومبر كتكون من 6 الكتريات وماليهم ماكينينش ماعلينا حطينا حوايجنا وريحنا كنستفو فيهم في واحد الخزانة من بعد ماستفناهم وهي تعيط لينا واحد المربية لي غير سمية مربية وصافي أما هي مفسدة المربية : أدوك 2 قماقم أجيو تعشاو _ مشينا معاها لواحد المطعم لي داير بحال ديال الحباسة عطانا واحد خونا واحد البلا مصضي ديال الماكلة وقال لينا سيرو شدو الصف مع صحابكم خديناه من عندو وبدينا شادين الصف تا وصلات نوبتنا عند السيد لي كيفرق الماكلة حط لينا شوية لوبية والبيصارة وشوية الخبز كارم تقول ليه عام وبنانة خامجة وتفاحة ودانون بقيت غير كنشوف في ديك الماكلة دابا واش هاذشي لي غادي يحيد ليا الجوع تعيف حتا تاكل هاذشي ماعلينا مشينا ريحنا في واحد الطابلة أنا وخويا قصينا . واخا أنا في لول بقيت كنشوف فيها ومتردد كنقول واش ناكل ولا لا حيث معجبنيش هاذشي ووموالفش كناكل القطاني ولكن ضطريت في الأخير ناكلو حيث جاني الجوع من بعد ماسلينا الماكلة وتمينا خارجين أنا وخويا وهو يعيط لينا واحد السيد كيقولو ليه با المعطي ومعاه واحد الطبيب قصدناه با المعطي : ريحو أوليداتي غادي ندݣو ليكم واحد البرا كتقوي المناعة حسام : واش ضروري منها اعمي با المعطي : ضروري أي واحد كيجي جديد كيدݣها أولدياتي بلا متخافو _ دݣو لينا البرا ومشينا لشومبر غير دخلنا بداو كيشوفو فينا الدراري لاخرين وكيرحبو بينا بصراحة دراوش ولكن واحد فيهم لي علام وضحوكي سميتو يونس من بعد ماريحنا فبلايصنا جا ريح حدايا يونس يونس : دابا اخويا باش غادي نوليو نعرفوكم وكتشابهو بزاف _ ساهلة ماهلة فينما تلف حل عينيك مزيان وغادي تبان هاذ التفليقة لي في فوق من ناضري يونس : ههه واخا وشنو سميتكم أخويا _ أنا سميتي علاء وداك كحل العفطة سميتو حسام ونتا يونس : أنا سميتي يونس تشرفت بمعرفتكم ولا مال خوك ساكت وغير كيشوف _ قربت ليه حدا ودنو وقلت ليه ماديش عليه معقد شوية دا دي عليه ... بقينا داويين شوية وكيعاود ليا قصتو كيفاش تا جا هنا حتا بدينا كنسمعو الصفارات والتصفاق يونس : خاصنا نعسو الساط حيث 9 كنعسو ولي فات هاذ الوقت يتعاقب تصبح على خير _ غير قالها طفا ضو وكلشي شد بلاصتو بقيت متكي شوية كنفكر في داكشي لي درت حتا داني النعاس حتا بديك كنحلم بداكشي لي وقع الواليد غير هو حلمت بيلا طاحت عليا الدار معاهم وفقت كنغوت وكنهج وصدقت مفيق تاخويا والدراري وواحد 2 مربيات وبا المعطي دخلو عندنا الشومبر المربية 1 : مالك شنو وقع ليك كتغوت _ غير واحد الحلمة خايبة وصافي المربية : نعس الله يسكت ليك الحس مفيقنا مع 4 ديال الصباح الله يعطيك مصيبة إنشاء الله _ بنت العبد خرجات وهي كتعاير ماعلينا رجعت نعست الغد ليه كنسمعو الصفارات فيقونا مع 6 ديال الصباح فقت مݣلوب بالنعاس عاد زيد ظهري ضرني مع ديك لحافة حيث قاصحة تقول ناعس فوق حجرة ماعلينا مشيت الطواليط أنا والدراري وشي 10 دقايق وحنا نتسناو الطواليطات يخواو عاد وصلات نوبتنا قضيت حاجتي ومشيت لمطعم شديت داك البلا تاني وشديت الصف تا وصلات نوبتي عطاوني بتيبانة وفرماجة وكاس ديال الحليب بديت كنشوف في داكشي وكنقول الله أسيدي ربي الله أنا غير قد الكميشة وضعيف وغادي نزيد نكمل مع هاذ الماكلة ريحت كنفطر في واحد القنت وخويا في قنت . بديت كنقول مع راسي كون غير مادرتش ديك الفعلة على الأقل مع مرات الواليد كنت واكل شارب ناعس مزيان وهنا لا حنان لا ماكلة لا نعاس هاذي هي ديال لي مابغاها كاع يخليها كاع الموهيم من بعد ماكليت جا المدير ديال الخيرية عندي أنا وخويا وقال لينا بيلا ماغديش نبقاو نقراو في ديك المدراسة لي كنا فيها وبيلا غادي نكملو العام في واحد المدرسة أخرى تابعة لخيرية وعطانا شي كتوبة ودفاتر وقال لينا شوية غادي يديكم الترونسبور لمدراستكم الجديدة مشينا لشومبر ديالنا ريحنا واحد 10 الدقايق شوية تاكنسمعو المربية كتعيط قالت لينا نوضو تكلمو خرجت أنا وخويا ويونس ودوك الدراري وأنا نسول يونس فاش كتقرا يونس : كنقرا في السادس بحالك نتا وخوك _ وكيفاش تاعرفتيني كنقرا في السادس يونس : حيث اعلاء كيجمعو دراري في الشومبر على حساب المستويات الدراسية لي كيقراو فيهم يعني شومبرات ديول الأول والتاني ...إلخ _ أه دابا فهمت . طلعنا الطروسبور وقصدنا المدرسة .بعيدة بشي 15 دقيقة ديال الطريق وصلنا لمدرسة الجديدة كتبان ليا تاهي محشرة بحال نيت هاذيك لي كنا فيها غير هاذي زايدين فيها التيرانات ديال الرياضة دخلنا عند استادة العربية درويشة رحبات بيا ومشيت ريحت حدا يونس حيث جينا معاه في القسم دوزنا ديك ساعتين فهمنا فيها مزيان وخرجنا الاستراحة ودخلنا عند أستاذ الفرنسية واحد المعقد بغيت غير نعرف علاش ديما استاذة الفرنسية معقدين ماعلينا من بعد ماخرجنا مع 12 لقينا الترونسبور كيتسنا ركبنا و ورجعنا الخيرية تغدينا ومشينا لواحد القاعة كيقولو ليها قاعة المطالعة راجعنا تال 4 ومشينا وخرجونا التيرانات ديول الرياضة لي في الخيرية وقالو لينا لي عزيزة عليه شي رياضة يلعبها أنا مشيت مع صحاب الباسكيط وخويا كورة بقيت مقصر مع دراري حتا طبت ولكن حسيت براسي فرحان حيث كلقا راحتي في الباسكيط ماعلينا فاش وصلات 6 رجعنا لشومبر ديولنا هزينا حوايجنا ودوشنا وخرجنا لقاعة المطالعة تاني وكانو تقريبا كاع الداري لي في الخيرية مجموعين تما سواء كبار ولا صغار ودارو لينا دوك المربيات فقرة التعارف وعرفت براسي أنا وحسام حيث حنا لي جداد من بعد ماعرفنا براسنا لعبنا واحد لعبة سميتها الديب وكانت أحسن لعبة لعبها في حياتي حيث كتعتامد على الدكاء وقراءة الافكار وبزاف ديال الحوايج . غير وصلات 8 قصدنا المطعم تعشينا بشوية الدجاج حيث نهار الخميس والسبت كيعطونا الدجاج ماعلينا من بعد ما قصينا رجعنا لشومبر وبقيت مجمع مع يونس وقلت ليه كيفاش تا جينا هنا عاودت ليه شنو طرا لينا حتا جينا هنا ويله بدا يعاود ليا حتا هو على شي بلانات حتا بدينا كنسمعو التصفاق والصفارات وشدينا بلايصنا ونعسنا والغد ليه داز نفس الروتين وهكذا دازت 7 سنين من حياتنا ودرنا 18 عام وجا الوقت لي خاصنا نخرجو من الخيرية ونعتامدو على ريوسنا ولكن الحمد الله ماغدي نخرجو من الخيرية حتا خلينا بلاصتنا نقية ودرنا شيحاجة في حياتنا خديت الباك بي 16 وخويا بي 13 ويونس 17 ماعلينا جا المدير دوا معانا حنا شي 30 واحد قال لينا وصلات وقيتنا باش نخرجو وبيلا بقا لينا غير شهر في الخيرية باش نقلبو فين نسكنو وشنو نديرو ومن ديك الوقيتة بدينا كندوزو الكونكورات ديول المدارس العليا لي دفعنا ليهم الموهيم من بعد جهد كبير وشهر ديال العصاب قدرت نتقبل أنا وعشيري يونس في ENSA ديال اسفي وخويا ماقبلاتو حتا مدرسة وضطر يدفع لفاك وماشي لفاك ديال اسفي مشا لأكادير هو واحد صاحبو دارو القانون حيث الحلم ديال الخوادري يولي بوليسي و أنا ويونس قلبنا على الكرا ولقينا واحد البرطمة في واحد العيمارة مع شي طلبة تفاهمنا مع مول الدار و خلصناه في الكرا من ديك الفلوس من داك التعويض لي عطاتنا الخيرية وجبنا حوايجنا من الخيرية وحطيناهم في الشومبر ديالنا لي كبيرة شوية وفيها 2 كتريات مريحين ماشي بحال ديال الخيرية والمويهم كنا حنا 6 في البرطمة لي فيها 3 الغرف وصالون أنا وواحد 2 آخرين دايرين ENSA وواحد 2 لافاك هاذشي لي عرفنا من خلال هدرتهم وبصراحة كيبان عليهم دراورش ماعلينا في ديك تريحة لولة قالو لينا راه كيدرو 500 درهم لواحد الشهر ديال التقضية فيها كولشي والنوبة في الشقا والطياب تفاهنا معاهم على كولشي وريحنا كنجمعو على الماضي ديالنا كل واحد منين جاي حتا تعرفنا على بعضياتنا شوية هو ...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM