نطق القاضي بالحكم ( ثلاث سنوات) مع سمعتها لحمي بورش و بقيت كنفكر فالمستقبل ديالي والزهر اللي عطاني سيدي ربي... وهاذ ثلاث سنوات على مقالو ليا قليلة فحق الجريمة اللي تنسبات لينا حيت المحامي كان واقف على الصح وعندو المعارف .... داز قدامي الفيلم ديل هاذ 20 عام اللي دوزت كاملة مقاتلة وتمارة وفياق فالصباح وهاذ عامين ديال ENSA صافي كولشي ضاع . قلت مع راسيبلي ربي كيجازيني على الأفعال اللي درت و أول حاجة درتها فبالي هي ننتاقم من الدراري كيفما كان الحال... أنا ديجا قاتل روح فاش كنت صغير.معنديش مشكل نصفيها ليهم كاملين حيت خرجو ليا على حياتي...ضرت نشوف يونس لقيتو شاد فراسو وكيبكي ..صراحة مكينش شي واحد حاس بيه كثر مني فديك اللحظة كنا غير حنا اللي حاسين بالشمتة .جاو شي بوليس مينطونا وحنا نتمو خارجين وسط الناس ... كنهز عيني كنلقا كلشي كيشوف فينا وحاقد علينا بحال الى دايرين داكشي بصح ...كيقولو فراسهم شوف هاذ الدراري كانو غي كيمثلو علينا وهما فالحقيقة شوف آش مخبيين..الشخص الوحيد اللي بقا كيواسي فينا وكيقول لينا صبرو هو ماريو ..حيت هو بوحدو اللي عارفنا كيدايرين ..عامين وحنا خدامين معاه معمر شي صرف ولا شي حاجة ديناها ليه . ماعلينا خرجونا من المحكمة. وداونا فواحد سطافيط كحلة غي ديال الحباسة ومافيهاش الجاج كيطل على برى وداير بيها الگرياج يعني معندكش فين تهرب ...داونا لواحد الحبس كيقولو ليه بابور السيما..تا هو غادين يعرفوه ولاد آسفي..هو حبس قدييم وكبير و ميدخلو ليه غا الأوباش وصلنا بالليل وفارقونا أنا ويونس ..حسيت بقلبي تشد عليا حيت أول مرة منباتش معاه فبيت واحد..ولينا كنتشاوفو غا فوقيتت الساحة. يعني كنتشاوفو غا ديك السويعة فالنهار كامل .ماعلينا دخلوني للشومبر و أنا نتفكر يامات الخيرية داكشي كيتشابه بزاااف الفرق هو تما كلبسو اللي بغينا وكنشوفو برا .عوتاني رجعت لعيشة الخنز والتدواش مرة فالسيمانة الى وصلاتك النوبة وزيدها معندنا على برا اللي يدخّل علينا القفة... مكينا تا لعبة اللي تعطينا واخا شوية ديال الأمل فالحياة تا من الديبلوم اللي قلنا غانشدوه نصوڤيو بيه شي خديمة ...هاهو مبقا نافعنا فوالو حيت صافي دابا الضوسي توسخ...ماعلينا ذخلوني للشومبر كيبان ليا واحد الكاتري فيه الضوبل يعني كاتري فوق كاتري وواحد فيهم خاوي .... مشيت تكيت فيه وبقى كولشي كيشوف فيا و أنا متسوقتش حيت باقي قلبي شاعل من جيهت خوتنا اللي سيفطوني لهنا كنفكر غي فالطريقة باش غننتاقم منهم و شنو غندير مور منخرج من الحبس ...فين غنصد و أنا لاحنين لا رحيم .... واحد شوية وأنا نبدا كنسمع فالغوات جاي من البيت فاش كاين يونس وكنسمع تفرق عليه اداك البرهوش...تما عرفتو متكي على شي واحد بالكروشيات حيت أنا اللي عارف يونس فاش كيكون معصب ريكو و مياكلش معاه 😂😂 (الملولي) ماعلينا حتا أنا ماقدر يقرب ليا تا واحد مور ما شافو خونا كيولا خرّجوه مغيب وكولو دمايات من ديك الغرفة..المهم جرو يونس داوه للإنفرادي واحد السيمانة تعرفت أنا على واحد خونا سميتو مجيد سبحان الله كيشبه لديال قسم ثمانية حتى هو ضحوكي وناشط مع كولشي ومكيجبد الصداع مع تاواحد غير هو كبير شوية فالعمر ماعلينا كنا انا وياه كنجمّعو كنبقا كنعاود ليه كيفاش تا جينا لهنا وعلى حياتي ومعاودش ليه بلان الوالد طبعا حيت كان سر بيني وبين راسي... بقيت كنعاود تا كملت وقال سير الساط جيب حقك وماديرش فبالك عيش اللحظة دابا حتا تجيبهم الوقت ..فاش سالينا سولني واش كتكمي قلت ليه لا وهو يمد ليا وحد الباكية ديال الگارو باش نتعامل بيها حيت تما العملة ديالهم هي المخدرات.... فاش كان غادي لبلاصتو قلت ليه -ونتا مغاديش تعاود ليا مجيد:هههه شلا ميتعاود الساط سير تنعس راه كيصفرو هاذ الكلاب ...تا تجيبها الوقت ونعاود ليك -كنتسناك الساط مجيد: قصتي قصاا غا بقا تسنا -بقى راسي ضارني بغيت نعرف شكون هاذ مجيد وأشنو قصتو ...ماعلينا دات السيمانة دغيا حيت توانسنا أنا ومجيد المهم وصل المهار فاش غادي يخرج يونس من الإنفرادي...كنت غادي باش نتلاقا بيه وفالطريق بان ليا خونا اللي فرشخو يونس داك النهار ..شفتو مد لواحد خونا شي غبرة بيضة فميكة (الكوكا) و داك خونا مد ليه واحد الراس ديال الموس مديور فخشبة وضاير بيها الشمبرير ... وهو يبان ليا قاصد يونس ..معا شفتو قرب ليه وأنا نتبعو جريتو من اللور مع بغيت نلسّق ليه...... حتى كنحس بالكلوة ديالي قاستها شي حاجة باردة والنفس ولا كيطلع ليا بصعوووبة شفت فكرشي كنلقا خونا رشگ ليا داك الموس فكرشي والدم كيترش و انا كرمت بلاصتي وبداو عينيا كيتسدو .... آخر حاجة شفتها هي يونس شاد خونا وكيدخل ليه حتا غيبت ... -واش العشران معاكم يونس أنا اللي غادي نكمل شنو وقع مور ما غيب علاء ... المهم انا معا كملت من خونا وخليت سنانو فالأرض مشيت ديريكت عند علاء بقيت كنبكي وكنقول متموتش اخويا نتا اللي عندي . علاء فيه كولشي بالنسبة ليا ...من الصغر وحنا عشران أنا وياه هو اللي كان مونسني ومصبرني فهاذ الدنيا ...بقيت كنغوت وااعيباد الله جيبو لابيلانص... وهو يجي واحد خونا سميتو مجيد شدو ونعسو على الجنب وبقا كيورك ليه على يديه قلت ليه زگا اش كدير...قال ليا سكت راه أنا طبيب وعارف شغلي مزيان .بقينا كنتسناو واحد المدة عاد جاو صحاب لابيلانص بقيت بغيت نمشي معاه ولكن مخلاونيش حيت انا حباس ومعندي معاه حتا شي صفة قرابة...رجعت لبيتي وريحت بلاصتي وبناذم كيجي يواسي فيا .تعصبت وجريت على كولشي وبقيت بوحدي ..بقاو كيجو قدامي تصاور علاء وداكشي اللي دوزنا ..الخيرية و يامات ماريو و ENSA بقيت كنقول مع راسي الى وقعات ليه شي حاجة مغاديش نولف بلا بيه تخيل تمشي ليك شي رجل ولا شي يد ...هذاك تماما هو الإحساس اللي كنت حاس بيه ...بقيت كانحمل لراسي المسؤولية حيت كان كيحاول يدافع عليا ... واحد شويةو أنا نوض بقيت كنغوت بالجهد وكانقول ليهم ها عشيري قتلتوه شنو بغيتو مازال ... عطونا التيساع من نهار ذخلت ونتوما حاضييني باقي يوصلني شي واحد نكرفص مو ....ومن داك النهار ولا كولشي كيحتارمني حيت عرفوني مكنفكرش فداكشي اللي كندير وحيت تباركلاهعندي فورمة ناااضية من يامات لانطريما مع علاء.... ماعلينا بقيت كنغوت حتا حسيت براصي غايتفرغع واحد الشوية وهوما يجيو البوليس داوني ثاني للإنفرادي...تما عالم آخر بقيت غي كنبكي حتى داني النعاس ...الماكلة كيلوحوها ليا من تخت الباب بحال الى كينين فالقرون الوسطى...بقيت هكاك ووقتما وقعات ليا شي حاجة كنزيد نحقد على خوتنا الل دخلوني لهنا ومغادي نتهنا حتى ننتاقم ... ولا راسي حمر وكنحس بالنار شاعلة ليا فمخي بقوة السم اللي لداخل ديالي ...بقيت هكاك حتى داني النعاس ...الغد ليه فقت على صوت الباب اللي كيدقوه عليا برجليهم طبعا وشي ماكلا غي باش منموتش... المهم دازت سيمانة وهوما يجو شي بوليس معمرني شفتهم فالكاشو داوني ديريكت ركبوني فالسطافيط وداوني للمحكمة قالو ليا بلي غيزيدوني شي مدة على قبل أعمال الشغب اللي كنت كندير....مفهمت تا لعبة دغيا بدات المحاكمة وهاذ المرة مكين لا محامي لا والو أصلا منحتاجش حيت زادوني غي ست شهور ....فاش كنت خارج من المحكمة يلاه بغاو يدخلوني للسطافيط و هو يبان ليا واحد من دوك خوتنا كيراقبني من بعيد نااااري كيوليت ديك اللحظة عاد حسيت براسي مسجون ديال بصح حيت هو حدايا وأنا مقادر ندير ليه والو 🤦🏻‍♂️😞 ... ركبوني فالسطافيط وغاديينبيا فالطريق وأنا نبدا كنفكر كيفاش خونا عرفني عندي محاكمة ليوم ..100% غيكون شي واحد كيوصل ليه الخبار ضرووري نعرف هاذ خونا اللي كيوصل الخبار ....ماعلينا وصلنا للحبس مشيت بلاصتي نزل عليا واحد النعاس معمر جاني بحالو نعست تقريبا من الجوج ديال العشية تال الصباح ديال الغد ليه فقت غا تعشيت حيت إجباري ....المهم ملي فقت خرجونا للساحة كيبانو ليا واحد الجوج حاضييني ....بقيت كنقول واه عادي أصلا هنا شي حاضي شي...ولكن خوتنا محيدوش عينيهم عليا ....من داك النهار وأنا راد منهم البال ليصدقو غادريني...ماعلينا دغيا دازت شهرين ومكينة تا خبار على علاء.. توحشتو بزااف مشيت عند واحد البرليسي تما قلت ليه واش يقدر يجيب ليا شي معلومة قال ليا واخا ممنوع ولكن غاندير فيك هاذ البليزير مشا واحد خمسة دقايق وهو يجي قلل ليا الساط عشيرك مزال غيبوبة ومرة مرة كيقرب يموت فاش كيتقطع ليه النفس كون مكيكونوش حداه الفرمليات كيديرو الواجب كون راه ودعتيه طبعا أنا نزل عليا هاذ الخبر بحال االصاعقة ماقديتش نحبس البكية ...ونزيدكم بلان أنا فاش ماتو واليديا و هادي قصة بووحدها كانت هي المرك الوحيدة فاش بكيت قبل منبكي على هاذ المخلوق ديال علاء... المهم بقيت حاضي معا خوتنا اللي كيشوفو فيا واحد النهار فالساحة بان ليا واحد فيهم غادي للطواليط دازت مدة قصيرة وهو يتبعو لاخر...قلت فراسي كين تما شي بلان وانا نوض تبعتهم وريحت حدا الباب وبقيت كنتصنت وكنطل عليهم من واحد البلاصة مغطية... جبد واحد فيهم التلفون من**** ديالو حيت حتا الميني كيقلبوه لينا كان لاويه فواحد الميكة غليضة....تفووو🤮🤮 شفت ذاك المنظر كنت باغي نتقيا ليهم تما جاب الله شديت خاطري الهم خوتنا صوناو على واحد النمرة وسمعتهوم كيهضرر معا شي واحد غادي يهرّبهم من هنا سمعت واحد ليهم كيقول كون هاني اخويا توفيق خونا غنصفيوها ليه ولكن حتى نظمنو راسنا غنخرجو ...تما عرفت واش هاذ الجوج هوما الأوباش اللي علمو الدراري بلي عندي المحاكمة كنت غانذخل عنذهم نشري معاهم الصداع ولكن خفت من جوج خوايج خفت لا يصدقو زايديني شي ست شهور أخرى وخفت لايصدقو خوتنا حاكميني ويصفوها ليا .سمعت واحد فيهم قال بلي كيتسناو علاء يخرج باش يصفوها لينا بجوج... مشيت كنجري باش ميشوفونيش سبقتهم ريحت فواحد القنت شوية وهوما يبانو ليا داخلين للساحة...بقيت شاد واحد القنت واحد جوج دقايق وهوا يجي عندي داك الراجل اللي قلت ليكم سميتو مجيد جا سلم عليا وقال وسولتي واش كينا شي خبار على علاء......قلت ليه بلي مزال كومة اللمهم دينا وجبنا فالهضرة وهي تجي ليا فبالي قلت ليه كيفاش نتا طبيب وكين معانا هنا شنو وقع ليك......قال ليا قصة طويلة شي نهار نعاودها ليك هاذ خونا غامض بزاااف مفهمت فيه والو ....المهم كملات الوقيتة اللي كيعطونا نخرجو فيها وانا نقصد بلاصني جبدت من محفاضتي واحد الكتاب كنت مذخلو بالتخبية ديال داكشي ديال les macines thermique هاذو شي حوايج كنا كنقراوهم يامات ENSA كان كيعجبني هاذشي بقيت كنقرا فييه حتى داني النعاش بقيت هماك واحد الشهر ودينا كنقول ليوما غادي يجي علاء ولكن مكيدخلش ....ديما نفس الشيء...واحد نهار التنين مع الصباح جا عندي البوليسي فوقيتت الزيارة قال ليا بلي شي واحد جا يزورني.....فرحت وتخلعت فنفس الوقت بقيت كنقول شكون هاذا اللي غادي يزورني وأنا من الخيرية للحبس معندي لا حباب لا والو....تخيلو شكون لقيت كيتسناني..... لقيت ماريو مسكين جاب معاه واحد القفة وفيها شي بروتين قال ليا رجع تريني شوية راك بديتي كضعاف ناااري هاذ ماريو مسكين شحال الله يعمرها دار ....جاب ليا واد جوج باكيات ديال الگارو باش نبقا نتعامل تما...وبقينا كنجمعو وكيسول فيا وكيقول ليا المحال كي والو بلا بيكم امتى غترجعو راه الدراري توحشوكم قلت ليه قريب أبا ماريو ...وبقينا هكاك حتا جا البوليسي قال لينا سالا وقا الزيارة....صراحة مسخيتش بيه ماريو هو أطيب خلق الله دغيا كيدخل للخاطر وعطاه الله واخد القبول فشكل كولشي كيحماق على ماريو....مع خرج هو مشا فحالو ومشيت أنا عند شي دراري كيتحركو ميسكيلاصيون فالشومبر عندنا كانو مصاوبين شي دامبلز بالسيما ومضبرين على شي بارات وعلقين واحد البارفيكس قلت ليهم نتحرك معام قالو ليا مرحبا مع أنا كنبان واقف عليهم فرحو منين قلت ليهم نتريني معاكم ماعلينا دوزنا واحد الحصة من داكشي ولكن طبعا مدوشناش ....بقينا هكاك كنجمعو العرق دديال السيمانة وندوشو نص ساعة بالنوبة🤦🏻‍♂️🤦🏻‍♂️ ومع ذلك كولشي صابر مكينش اللي كيدوي بقيت هكاك واحد الشهر آخر و والو مكيناش شي خبار على علاء أي حخاجة كنديرها كنتفكرو صراحة دازت هاذ ربع شهور دازت عليا صعيبة.....بدا ميدخلتي الشك بلي مات ومخبيين عليا حيت مجاتنيش طبيعية يبقى غيبوبة ربع شهور مشيت ديريكت عند مجيد باش نحيد الشك قلت ليه واش معقولة بناذم يبقى غيبوبة ربع شهور قال ليا آه ايلا جاتو الضربة فالراس تقدر توصل تال عامين ....تما رتاحيت شوية وبقيت واحد السيمانة أخرى وأنا صابر واحد النهار مشيت نفطر خديت الپلا ديالي يلته غادي وهو يجرني داك البوليسي اللي كنت سولتو على علاء قال ليا بلي علاء فاق اليوما جريتو عندي كنت غانبوسو بقوة الفرحة البوليسي: الرجوع لله أوليدي راه حنى رجال -هههه سمح ليا الشاف والله الى غي مع الفرحة دابا قول ليا شي طريقة باش نزورو الله يحازيك بيخير البوليسي : خاصك تذفع طلب وشوورف واش غيتقبل حيت قليل فين كيقبلوه -صافي الله يجازيك بيخير مشيت ضبرت ورقة وستيلو وقاديت واحد الطلب ناضي فيه التحلوين وداكشيوديتو المدير ديال الحبس سيناه وحطو فواحد البرا وحطو جنب البيرو...وتحركت دوزت واحد السيمانة وأنا كنتسنا يردو عليا و وااالو ....وتقول واش وصلات شي حاجة مشيت فوقت الإستراحة عند المدير باش نسول على الطلب مع ذخلت كنلقى البرا باقا فبلاصتها من داك النهار مسيفطها فين ....وأنا نبدا كنكشكش عليه ...بديت كنغوت ونعربط على البلان اللي دار ليا حتى جاوالحراس داوني للشومبر....بقيت بلاصتي كنتغدد عليه حتا داني النعاس الغد ليه فوقيتت الساحة دزت من حدا البيرو ديال المدير بلعاني باش نضرب على البرا واش كين تما.....مبانتش ليا عرفتو واش سيفطها ...واشوووف هاذ المسؤولين عندنا شحال كامونيين ..كون معربطش عليه غتبقا الورقة تما الى يوم يبعثون....مدارتش السيمانة حتى وصلني الرد مع حليتو كنلقى بلي عندي نص نهار اللي هو ديال غدا نمشي نشوف فيه علاء..ويكون معايا حارس ونمشي بالمينوط... انا مهمنيش داكشي قد مهمني نشوف علاء.... الغد ليه فايق فرحان مشيت دوشي حيت كانت نوبتي ولبست حوايج السيڤيل الله شحال توحشت نلبسهم لبستهم وخرجت فرحان داوني فسطافيط عادية هاذ المرة و مشينا لواحد السبيطار بعيدعلى الحبس بشي ساعة ديال الطريق مع وصلنا داوني للبيرو سينيت شي وراق وخرجت مشيت قاصد الغرفة فاش كين علاء....طليت عليه من الحاج كيبان ليا ناعس ومركبين ليه السيروم وشي خيوطا خارجين من فمو ...شفتو وأنا نفرح عرفتي شحال هذا ما شفت هاذ الزمر توحشتو المهم مابغيتش نفيقو قلت خليه حتى يفيق .... بانت ليا واحد الفرملية دايزة وهازة التلفون ..... الله شحال توحشت نتسركل ففيس بوك ونقرى القصص ديال السكفاندري المهم هاذ خونا كيكتب القصص كنت متبعو يمات كنت ساكن مع دوك ولاد ****** وتوحشت نذخل الأنستغرام ويوتيوب والفضائح.....😞😞 مكرهتش كون كنت بلاصتها ....نضت فالبلاصة مشيت قصدتها قلت ليها عفاك أختي واش تقدري تخليني نحل عندك فيسبوك غي على مينوض صاحبي مسكينة هي ضريفة فالبلاصة عطاتو ليا واخا بالمينوط وداكشي.... كنذخل للفيس بوك كنلقى السكفاندري لاح بزاااف ديال القصص فا كنت فالكاشو...ولكن خسارة منقدرش نبداهم حيت غادي نرجع تاني لديك الحفرة و دخلت للميساجات كنلقى بسمة مسيفطا ليا ميساج فيه سس فين غبرتو نتا وصاحبك...عرفت بلي الخبار دياللنا موصلاتش ENSA حيت أصلا مكناش مداخلين مع بناذم ....معلينا خليتها معلقة و أنا نذخل للأنسطغرام كنتسركل ...شوية وهو يقول ليا الحارس اللي معايا يلاه راه بغيت نتغدا الى باغي حتى نتا تحنجر شي حاجة وأنا كثاااار من علاء كرشي ديما جابدا ليا الصداع مشيت عطيت التلفون للفرملية وخرجنا مشينا لواحد السناك حدا السبيطار دومونضا واحد جوج طاكوس انا خسيت بالمعدة ديالي بدات كتصفق شحاال هذا ماكلات شي حاجة مقادا واحد شوية وهو يحطهوم ذخلت فذاكشي طول وعرض خونا حيد ليا المينوط واخا ممنوع ولكن شافني معذب وكوولشي كيشوف فيا المهم كملنا الماكلة ومشينا لقينا علاء يلاه فاق مع دخلت عندو بديت كنسلم عليه وفرحان ولكن اللي غريب هي علاء مفرحان موالو...كان غي كيشوفني كيفرح ولكن هاذ المرة مدار حتى رياكشن...سولتو قلت ليه مالك الساط ...وهو يقول ليا....يتبع الخوت القصة مزال مبداتش حركو لينا شوية التفاعل راه بااقي أحداث كثيييرة . تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM