كتبان ايا واحذ الطريفة ديال الحشيش قداش محطوطة فالماريو تخلعت أنا تزعزت فاللول كيصحاب ليا شي خشبة حتى قسم خونا واحد الطرف عاد عرفتو حشيش و كانو تما جوج تيليفونات و مسطرة(17) و شي فلوس كثاار و واحد اللعيبة معرفتهاش شنو هي المهم هي كانت بحال شي دوا قال ليا سميتها ليكسطا و كيتاجرو فيها توفيق:الساط حنا كنتحركو مع واحد المافيا جديدة هنا فآسفي درناها بيناتا حنا 20 واحد و باقي خاصينا الدراري واش تذخل معانا نتا وصاحبك دغيا ضرت فيه وقلت ليه واش نتا مريض الساط حنىراهدراري نقيين واخا نبانو ليك ولاد الخيرية -توفيق : وا نتاتعرف اعشيري المهم وقتما بغيتو تدخلو مرحبا ولكن كون معول غدير كولشي إلا القتل .. مشيت عند يونس عاودت ليه لافير و قال ليا نسا الساط داكشي خوي منو بالك ويالاه راه كيتسنانا ماريو تحركنا عند ماريو كان قريب المغرب .. ماريو: فين المهندسين دياولنا تعطلتو فين كنتو -غا مع الطريق راك عارف المركوب قليل ماريو: يالاه يالاه سربي هز الطابليا اللوغو .. اجي بعدا شكون غيليڤري فيكم ليوما كان ديك النهار نوبي يونس مشا هز الموطور و عمرت ليه الورقة ديال les ordres وهو يتوكل على الله .بقيت أنا كنسربي فالكليان حتى لديك 23:00 وهوما يدخلو شي خوتنا مرفحيين بلاصاو واحد الBM حدى المحل المهم هوما واحد الراجل ومراتو ومعاهم بنتهم تقريبا قدي بنتهم هااااربة بالجهد ...معمر شفت بحال داك الزين ديال ديك البنت .وا الزين جا تال عندها وهو يدير pause .قصيرة وعامرة وشعرها كيرلي و سمرة ديك السمورية ديال نيكي ميناج اما العينين و الفورمة بزاااف .بقيت حال فمي شي ثواني حتى كنضور كنلقا ماريو كيتسطا عليا بالضحك ماريو: ياودي ياودي المهندس عولنا عليك بكري -طلعت واحد التنهيدة عالم بيها غا الله و انانقول و قرطااسة يا خويا جا السرباي لاخر يسبقني باش يزرب عليهم وهو يشدو ماريو وقال ليا سير نتا مع وقفت عليهم قلت تايهوم شحب الخاطر .المهم كل واحد شنو طلب وانا وليت طيارة معمرني خدمت بهاذ الطريقة ..ماريو مورايا غي شاد فكرشو و كيضحك ..وكيما العادة خديت من عندهم الخلاص و ما خديتلا نمرة لا والو حيتمعاها والديها و خوكم خضر فداكشي ديال الفتشياتش ..المهم جا يونس و سدينا المحال وتحركنا فالطريق كان كيعاود ليا على شي فيلا ناااضية وصل ليها البيتزا ولقا تما شي قرطااااسة ولكن كبر منو .. غير هو مصخوط خدا النمرة .واقيلا كيبان ليا نزيد عندو السوايع .وبقا كيهضر ولكن الصراحة انا مكنتش كنتصنت ليه حيت بالي بقى غير مع ختنا ... ندمت علاش ملمحتش وبقيت كنقول مع راسي خاصني نتلاقاها و أنا نفكر الكاميرات اللي فالمحال ديال ماريو ..تما رتاحيت شوية قلت كاين أمل نلقاها ....و رجعت بحال الناس 😂😂 المهم نعسنا الغد ليه مشيت ديريكت للمحال عند ماريو واخا مكنخدمش بالنهار بقيت كانعاود فالكاميرات حتى بانت ليا ال BM ديالهم وبقيت كنزومي على الماتريكول حتا قربت وهو يبان ليا ماتريكول ديال الدولة مكتوبة فيه (ج)تما عرفت باها خدام فالجماعة مشيت ديريكت عند يونس قلت ليه يالاه معايا نقضيو واحد لافير ....مشينا خدينا طاكسي وبقينا سامرين حدا الجماعة بانت ليا ال BM تما وتسنينا تا خرج باها مع شفتو بلا قلبي كيضرب الرش بالفرحة و حسيت بعقلي خدام ماعلينا هو تحرك بطموبيلتو وحنا تبعناه بطاكسي و هو يدخل مع شي أحياء شكيت واش حنا فآسفي google maps و مافيهش هاذ الأحياء بقيت غا حال فمي فالديور تا وقف حدى واحد الڤيلا مع وقف وهو يبدا كيقول يونس ميمكنش قلت ليه كيفاش ميمكنش يونس:الساط هاذي هي الدار ديال الساطة اللي خديت عندها النمرة -وااايلي ياكما تكون ختها ولا شي حاجة يونس:شكون عرف .بلاتي بلاني نصوني عليها تخرج صونا عليها و قالت ليه راه بابا كين فالدار منقدرش نخرج ..وأنا نقول ليه المهم عرفنا الدار مرا خرا نرجعو بيما سكسفت الحالة وضربت الحطة مجاتش نلقاها بحال هكا ... قال ليا صافي يلاه .تحركنا وقلبناها ضحك فالطريق ..بقا كيقول تخيل اساط ناخدو الخواتات ناري بزااف واش غاعهاذي صدفة ...مع وصلنا لقينا الدراري خارجين و مخليين لينا الغدا .تغدينا وبقينا كنوجدو للقرايا حيت بقات غي شي 15 يوم ...مشينا جبنا البوليكوبات و بقينا كنوجدو حيت كيقولو العام الثاني صعيييب على العام اللول...بيما وصلات وقت ماريو ...تحركنا انا ويونس للخدمة عاوتاني و كانت عندي ليڤريزون ....قيد ليا ماريو العناوين وهزيت المطور و بديت كنفرق و معمر زهري وقف معايا شي وقفة بحال ديال ديك النهار ... هزيت الورقة نشوف العنوان فين غندي الكوموند حتى كيبان ليا العنوان ديال ختنا ....ناري قلبي بدا كيفرفر و فرحت بزاف ... قلت صافي ليوما نزعم ....المهم مشيت دقيت وبقيت كنتسنى شوية ولكن زهري رجع كيما كان مخرجاتش ختنى اللي كنت باغيها تخرج...ختها هي اللي حلات ليا الباب مع شافتني قالت ليا فين يونس ...😂😂 عاد فهمت ختها كدوموندي هاذشي غا باش تشوف يونس ...شرحتليها بلي كيكون نهار يه نهار لا وشكراتنيو بغات تضور معاها .جبدات خمسين درهم مداتها ليا و خوكم معطلهاش خديتها بالخف و درتها فجيبي كيسحاب ليها زعما غا نحشم و ديك الهضرة😂😂...ولكن انا ناشف لاصواب لا تالعبة ماعلينا كملت لي كوموند اللي عندي ومشيت للمحال عند ماريو ضور معانا حيت كانت اللخر ديال الكانزة حيت هو كيخلصنا كل 15 يوم ...سدينا المحال وحنا نتحركو: -وختنا طايحة فيك العود يونس: شفتيها شنو قالت ليك -والو سولاتني عليك يونس :شنو قالت ليك بالرجولة -والله مقالت شي حاجة ..يالاه سربي راسك راه باقي تابعانا لانطريما مشينا بالخف هزينا حوايجنا وتحركنا لاصال درنا واحد الحصة دايزها الكلام مع جيت خارج و انا نبدا كنتبوزا فواحد المرايا ...ناري قداش وليت وغير عام ديال لانطريما و طاكوس عند ماريو وكنت كناخد الواي بروتين مرة مرة ...المهم دوشنا فلاصال و خرجنا ... وصلنا للدار وكيف العادة الدراري مكينينش صراحة بدا كيخلعني هاذشي ديالهم قلت ليونس خاصنا نبدلو الكرا ولا نشوفو شنو نديرو ... قال ليا غا صبر الساط راه بقات غا عامين سد عينيك حلها راك تما ...قلنا صافي ماشي مشكل .. داز الصيف دغيا وبدات القرايا تاني .مشينا حضرنا السيكانة اللولى كانت غا ديال التعارف يعني كيجمو الطلبة ديال s1 (العام اللول ) مع الطلبة القدام كيسولوهم و داكشي المهم كانو دايرين لينا قاعة كبيرة والحلاوي والعواصر غا مگلبين وكولشي مزيز و مسكسف على الحالة ... المهم بدينا كيجيو عندنا الطلبة ديال s1 واحد اللحضة كنضور عيني كتبان ليا ختنى ... اه هاديك اللي شفت عند ماريو واقفة مع شي دراري من السيكيون ديالنا كتسول فيهم دوك الدراري تا هما مرفحين ولكن داخلين لهاذ المدرسة غا بالمعارف و الصنطيحة .. مشيت خداهم وبقيت طالق و دني وكنسمعهم غا طالقيناها على الدرية ..سمعت واحد فيهم قال بسمة ..الله أخييرا عرفت سميتها . مشيت عندهم زعما راه باغي نسلم على الدراري ولكن أنا غراضي بختنى ..مع وقفت حداهم واحد خونا ضور وجهو عرفتو كيتمتم عليا حيت أصلا محاملنيش انا ويونس حيت قرايا ومكنحاشوهاش ليهم و وخا هكاك دار ليا الضحكة الصفرة وسلمت عليهم و وصلت عند ختنى بالاه مديت يدي وهي تخليني بلاكة وقالت ليا سمح ليا منقدرش نسلم عليك ...دغيا جمعت يدي باش ميشوفني تا واحد و أنا نزيد وخليتهم. صراحة شداتني البكية ومرضيتش واللي زاد بقا فيا هو شفتها خالقاها مع خونتا و كيلعبو ليها بيديها وعااادي .علاش هوما باش حسن مني .جريت يونس قلت ليه يالاه نغيروها الساط يونس: يالاه جينا اصاحبي خلينا نضبرو على ريوسنا -تا زيد راه طرا ليا واحد البلان ركبنا فالطوبيس والطريق كاملة و أنا كنشكي عليه و مسكين هو كيواسي فيا وكيقول ليا تانتا الساط راه موجودين تمشي وحدة وتجي وخدة تهلا ليا غا فراسك ...دورت هاذيك الجملة فراسي لقيت بلي فعلا انا ماشي علاء اللي كنعرف اول مرة تعصبني شي بنت و لكن فعلا وليت كنبغيها.... ماعلينا بقيت كنمشي ل ENSA العام كاامل مكنسوق ل تا واحد مديها غا الفقرايا ولانطريما وليت قد الغول انا وكنتخلع فراسي حتا يونس ولات عندو فورمة هاااربة حيت هو طويل عليا شوية ...بسمة خويت منها راسي .ولات زايد ناقص كدوز من حدايا غاع مكنعبرها والأغلبية كانت كتكون مع خوتنا ....المهم داز عام ناضي و كمل دغيا وكيف العدة فرغعنا النقط ....هاذ العام مسافرنا ل حتى شي بلاصة بقينا خدامين غا مع ماريو والنهار كندوزوه يا إما مسركلين ولا كنوجدو للقرايا حيت كان باقي لينا عام وناخدو الديبلوم ...الدراري ولاو مكيدخلو تال واحد الوقت فاللليل وكيدوزو النهار كامل ناعسين و كيفيقو بالليل يبروكوليو ......بقا حياتنا هكا الصيف كامل ...تال واحد النه ...كيف العادة خرجنا من عند ماريو مع شي الوحدة و مشينا قاصدين الدار ....فاش قربنا نوصلو كتبان ليا الجوقة مجموعة حدا الدار فاللول مزعمناش نقربو انا و يونس نمشي و لكن من بعد قررنا نمشيو نعرفو شنو واقع .... لقينا البوليس ولابلانص حدا العمارة فاش ساكنين ...سولت واحد فالجيران قال ليا بلي لقاو شي بنت مقتولة فدارها.... -اه عرفتها فتيحة ديما كنتسخر نجيبليها البوطة وكضور معايا معرفتيش شكون قتلها وعلاش و كيفاش الجار: هانتا كتشوف شي ولد الحرام غصبها فشبابها وذبحها وهرب -معرفتيش شنو السبب اعمي الجار: كيقولو لقاو الدار مقلوبة يمكن شي شفار ولا شي عصابة جلسنا شوية وهو يجي عندي واحد الكوميسير ...قال لينا واش كتسكنو هنا اولدي قلت ليه آه قال ليا عفاك بغينا نسولوكم على شي حوايج -مرحبا الكوميسير: اول حاجة لاكارط ديالك عطيتو لاكارط دوزها فواحد الماكينة فسطافيط وجابها ليا .وهو يبدا كيسول فيا الكوميسير:واش كتعرف الضحية فايت ليك دويتي معاها -اه كنعرفها فتيحة الله يعمرها دار ديما كنت كنسخر ليها وكدور معايا واخا كانت مسكينة الكوميسير: شنو كانت.... -كتنت كتحرك فالبيران ...يعني كتبيع راسها الكوميسير :آه صافي صافي فهمت المهم كنشكروك على هاذ المعلومات خلاني بلاصتي وبقيت مصدووم شي دقايق كنتفكر الذكريات مع ختنا اللي ماتت ...شوية وأنا نوض مشيت عند الدراري هاذ المرة لقيتهم فالدار و ليقيتهم فشكل ماعجبونيش .... قلت راه يمكن غا مصدومين من الخبر اللي نزل بحال الصاعقة علينا كاملين ... ناض يونس وجد لينا اندومي بالخف ومشينا ننعسو ...انا بقيت الليل كاااملو كنفكر وكنقول مع راسي شكون غادي يكون قتل البنت بحال هكا وكنقول أول وحدين غيشكو فيهم فالعمارة هوما أنا ويونس حيت ولاد الخيرية .... بقيت هكاك حتى لواحد الوقت عاد جاني النعاس.. الغد ليه كنفيق مع شي الطناش غا حيت فيقني يونس نمشو للجامع باش نصليو الجمعة .مشينا صلينا وجابت لينا واحد الجارة كسكسو ناااري شحال بنين هاذ كسكسو ديالها كدير فيه شي وصفة هاااربة انا كنبقا حدا الگصري حتى كنلحس صباعي .ماعلينا تغدينا وخرجنا نمشو لاصال حيت نهار الجمعة كيكون عامر بالليل ...درنا تاني حصة معتبرة .. وفالفيستير كنسمع شي وحدين داويين على ختنا اللي ماتت .قال ليك بلي تشفرات ليها شي سنسلة ساااويك فيها شي حجرة ديال الزئبق الأحمر الروحاني .المهم هاذ اللعيبة ساااوية ديال بصح ...وهي دير ليا فراسي طنن ..تفكرت بلي كنت كنشوف فعنقها واحد السنسلة فيها واحد الصنيديقة ديما كانت كضحكني ديك الصنيديقة ولكن مكنتش عارف واش ديال الزئبق ....مشيت للدار تعشينا وبغينا ننعسو ولكن انا نفس الشيء مبغاش يديني النعاس...واالو الليلة كاملة وانا كنفكر فبلان السنسلة و علاش هاذ الشفارا قتلو ختنا على سنسلة جبدت التلفون ذخلت ل google وانا نكتب الزئبق الأحمر تما فين كانت الصدمة لقيت بلي هو حاجة نااادرة وغاالي بزااف حيت كيجدب المساعدة ديال الجن فداكشي ديال استخراج الكنوز (ثف ثف دكرنا السمن والعسل 😂😂) تما عاد عرفت علاش قتلوها ... بقيت هكاك كنقلب عليه تا زيراتني واحد البولة .نضت مشيت للطواليط قضيت الغرض وفاش كنت راجع بقيت كنسمع التوشويش فبيت الدراري قلت اجي نخلعهم ..بقيت كنتسلت حتى وصلت حتى الباب جريتو باش نحلو نخلعهم و تمى كانت الصدمة صدقت أنا اللي مخلوع ..باينة غتكونو عارفين شنو بان ليا ...ايه هاذيك المصخوطة اه اه السنسلة مع شافوني خباوها بالخف هي وشي جداول فواحد الورقة ولونهم تبدل بديت كنوعوع وكنقول نتوما اللي قتلتوها اولاد الحرام وهو يجي واحد فيهم سد ليا فمي قال ليا سكت راه غتفضحنا متقول والو ...ولا غتبعها .مع سمعت هاذ الهضرة وانا نلبد قلت ليه متخافش اساط ولكن حقي معاكم ...قال ليا كون هاني اصاحبي غير خبارنا تبقى هنا .انا كنت داير فبالي الغد ليه نمشي نعلم البوليس قلت ليه ديك الهضرة غير باش ميصدقش مفرّشني تا أنا .ماعلينا مشيت بلاصتي باش نعس ولكن النعاس والو كنتسنا غا الصباح يوصل المهم معا وصل الصباح كنت غادي نقصد الكوميسارية نعلم بيهم ولكن عيط لينا ماريو قال اينا باللي الدراري ديال النهار مكينينش وبغانا نرومبلاصيوهم ويضوبل لينا الخلاص....قلت مع راسي صافي تال الليل ونعلم البوليس ...المهم الخدمة كاملة و أنا كنفكر فبلان خوتنا وكيفاش غادي نقولها ليونس ....جريتو لواحد القنت عاودت ليه البلان وقال ليا العشية نمشو عند البوليس ...المهم داز النهار طلقنا ماريو نمشو نتعشاو.تحركنا للدار وفاش وصلنا طرا واحد البلان .....اللي بدل ليا حياتي 180 درجة ..مع وصلنا لقينا الجوقة قدام الباب والبوليس كيتسناونا ام الدار معا شافونا جاو جمعونا بنص و مينطونا ....بقيت كنقول شنو واقع ...شنو واقع ....وهو ينطق واحد الكوميسير قال ليا تال تما وتعرف ...داوما الكوميسارية مع الدخلة هبططونا لواحد البيرو فلاكاڤ بقينا كنتسناو فيه تما شي نص ساعة والبرد ومالابسين والو واحد الشوية وهو يدخل واحد الأنسبيكتور باينة فيه شي واحد كرايضي حيت الكوميسارية كاملة كتهز ليه salut جا دخل عندنا البيرو هو وواحد آخر صحيح وسدو البيرو وجا حدنا: الشاف: سمعو اوليداتي اللي نطولوه نقصروه غادين تقولو ليا معامن خدامين بالخف باش حتا أنا نتعاون معاكم فالمحكامة ...متافقين يونس :كيفاش شرحو اينا شنو واقع الشاف : سمع اولدي راه سناني طيحتهم مع بحالك بلا متبقى تريگل عليا ... غادي تقول ليا شكون معاكم وسربيني راه معنديش الوقت قلت ليه والله الشاف ماعارفين شنو واقع ...وهو يجبد واحد الميكة بيضا فيها ديك الطريفة ديال الحشيش اللي شفت فالماريو ديال الدراري الشاف: هاذ الموصيبة لقيناها فالماريو ديالكم ..يالاه قولو ليا معامن خدامين -الشاف راه والله ما ديالنا راه ديال الدراري اللي كاريين معانا الشاف: راه الدراري اللي معاكم هوما اللي تاصلو بينا وعلمونا بلي كتاجرو فهاذ الزمر مع شي عصابة -بقيت كنبكي وكنطلب فيه وكنقول بلي والله ايلى كنقول الصراحة و خاطري ربي اللي عالم بيها حسيت بالشمتة والتبيديقة ديال الدراري وتفكرت بلات ختنا ولكن واخا تقولها ليهم مغاديينش يتيقوني. حيت خوتنا غيكونو غبرو السنسلة ...اوا هي هاذي جيت نفطر بيهم وتغداو بيا 😞😞 بقيت كنبكي وكندعي ربي اللي خلقني يخرجني من هاذ الموصيبة واللي زاد أكد للبوليس هو ملي عرفونا حنا ولاد الخيرية ...رجعات بيا السمطة اللور وندمت على المهار اللي فكرت نقتل فيه مرات الواليد..وحلفت حتى غادي ننتاقم من الدراري واخا تكون آخر حاجة نديرها ... ماعلينا بقا معانا الشاف الليلة كاملة گاع وسائل التعديب جربهوم معانا والو واش قلنا شي حاجة. بقينا كنقولو والله ما ديالنا راه ديال الدراري....تعصب الشاف وتم خارج وكيقول مبغيتوش تگرو اوا صافي موعدنا المحكمة....داونا للسيلون ديال الكوميسارية...دوزنا تما شي سيمانا لا ماكلة مقادا لا نعاس مقاد بيما وصل نهار المحاكمة ....جاو داونا فواحد سطافيط ومعانا شي بوليس لابسين اللباس ديال السيڤيل ....مع وصلنا لقينا القاعة عاامرة وفيها شي دراري كيقراو معانا و الناس الليكانو كاريين معانا ...تما عرفت راسي صافي تشوهت... ولكن الدراري اللي كانو كاريين معانا مكينينش.... سولنا القاضي على سمياتنا وكنياتنا واللعيبات ... وقال لينا واش عندكوم شي محامي ...يالاه بغينا نقولو لا وهو يخرج واحد خونا اللور قال بلي هو المحامي ديالنا المهم بدا كيسول فينا وحنا كنجاوبو بصراحة ولكن الأدلة ضدنا .. واخاداك المحامي ناضي ...مسكتش ملي ذخلنا وهو داير خدمتو... واحد شوية وهو يقول لينا القاضي واحد نص ساعة و ينطقو بالحكم .....مشينا ديريكت عند داك المحاميسولناه شكون مسيفطك ..قاللبينا بلي الدراري الليسيفطوه و بيلا هوما اللي خلصوه باش يتكلف بالقضية ....يلاه بغيت نشنق عليه وهو يكالميني يونس قال ليا صافي دابا اللي عطا الله عطاه خلي السيد راه مدار لينا والو...شوية وهو يدخل القاضي ..قلبي بدا كيفرفر مليار فالثانية بقوة الخلعة ...شوية وهو يقول واحد الجملة طويلة معقلتش عليها ....عقلت غا بلي قال حكمت المحكمة حضوريا و جنائيا على المتهمين بعقوبة ..... يتبع -الساط طلع قرا الفوق ضرووري 😉 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM