الحامي ♥️ الجزء 58 🔥🔥🔥🔥🔥 ( التتمة من بعد 220 لايك طاكيو صحابكم يقراو معاكم 🔥) ناهد : نفدي داكشي الي اتافقنا عليه و غنخليك تعومي فالفلوس ....... : خايفة بزاف ناهد : الى تراجعتي غنحرر فيك عيشتك حتا لخربة الي عايشة فيها غنخرجك منها ........ : صافي باركة من التهديدات...هاني داخلة حطات الطبق فوق الطبلة و رجعات باللور قمر : همم هادشي كيشهي...سارة الله يعطيها الصحة كتعصر لپايلا...اجا مايصبرني حتا يجي نجم الدين...غادي يفرح منين يلقاني موجدة ليه هاد المفاجأة " كتفكر " ندير السينتة على كرشي زعما انا لكادو هههه...لا لا زدت فيه مشات قمر تقابلات مع المراية...كانت لابسة شورط قصير كيوت فالغوز مع تيشورت كحل واسع...كرشها كبرات بزاف كتبان خارجة هزات أحمر شفاه دوزاتو على شفايفها...ردات شعرها ورا وذنيها و مشات للطواليت...مابقاتش كتقدر تحبس البولة و كل ساعة غادة جاية سمعات سارة الصونيت مشات حلات...بانت ليها بنت سمرا و شعرها بوكلي واقفة عند لباب سارة : نعام اختي ؟ ........ : انا إبتسام...بنت خالة نجم الدين كاينة قمر سارة : اه سمحليا ماعرفتكش.وي كاينة تفضلي إبتسام : لا هانية احبيبة سارة : تسناي هنا نعيط ليك على مدام قمر كاينة لفوق إبتسام : لا غير خليك...انا غنطلع عندها...غير سيري شوفي شغلك مشات سارة لكوزينة و مامرتحاش لهادي...لكن هي بنت خالة مول الدار ماعندها ماتقول ليها طلعات إبتسام مع الدروج و مشات لبيت نجم الدين ديريكت...حلات لباب و دخلات مابان ليها حد...قربات من الحمام و هي تسمع صوت الفلاش عرفات قمر فالطواليت ضارت بانت ليها الطبلة فيها الأكل...قربات ليها و جبدات من صاكها قرعة صغيرة خواتها فقرعة ديال العاصير...حركاتها و جات بغات تنوض و هي تضرب الشمعة الي فوق الطبلة بكوعها...حتا طاحت فوق الزربية مشافتهاش مع كانت مستعجلة...حلات لباب بان ليها الساروت حيداتو و خرجات سدات لباب من الخارج سورتاتو و خشات السوارت فصاكها... نزلات مع الدروج و خرجات كتجري طلعات فالطاكسي الي كان كيتسناها و قالت ليه يتحرك ، غسلات قمر يديها حلات لباب و خرجات...شمات شي ريحة غريبة...تلفتات و هي تبان ليها العافية شاعلة فالزربية...بقات واقفة مصدومة و كتشوف فالعافية غادة و كتسرح...رجعات دخلات للطواليت و كتشوف هنا و لهيه...تلفات ماعرفات مادير...بان ليها إناء صغير مشات هزاتو و عمراتو بالما خرجات كتزرب و شادة فتحت بطنها خوات الما فوق العافية و غير ما زادت شعلات...رجعات قمر باللور و كتشوف فالعافية الي منعاكسة فعنيها.شافت فالباب و هي تمشي بخطوات مسرعة...حطات يدها على لپواني بغات تحلو لكن مبغاش يتحل ليها...هنا دخل معها الخوف بالمعقول...خاصة الغرفة كلها عمرات بالدخان و الرؤية مبقاتش واضحة حطات قمر يدها على فمها و بحرا مكتقدر تستنشق الأوكسجين تفكرات الفون حاطاه فوق الكوافوز...مشات بشوية عليها لا تعتر فشي حاجة و هزاتو...و رجعات حدا لباب دوزات رقم نجم الدين و يديها كيرجفو ، نجم الدين كان جاي فالطريق.صونا ليه الفون غير شاف اسم قمر و هو يجاوب فالحين نجم الدين : آلو حبيبة قمر : ن نجم الدين...البيت شاعلة فيه العافية و الباب مابغاش يتحل لياااا نجم الدين : " حبس فران سيك " شنووو ؟!! قمر : كح كح لبيت ديالنا شاعلة فيه العافية و الدنيا عامرة دخاخن و انا مالقيتش منين نخرج...الباب تعكس مابغاش يتحل لياااا كح كح كح نجم الدين : حبيبة...سمعيني مزيان...خرجي لبالكون و سدي عليك سمعتي...بقاي تماك حتا نجي أوكي...بلاما تخافي مغادي توقع ليك حتا حاجة...و ديري هادشي الي قلت ليك قمر : نجم الدين انا خايفة...مابغيتش شي حاجة توقع لولدي " حطات يدها على بطنها و حابسة البكية " نجم الدين : مغادي توقع ليكم حتا حاجة ديري هادشي الي قلت ليك انا قريب نوصل لعندك و متقطعيش أوكي قمر : و واخة هزات قمر التيشورت حطاتو على نيفها...و غادة كتمشا على مهلها ناحية البالكون...الدنيا كلها دخان و العافية بدات كتسرح أكثر...دازت من حدا الحمام كيف حطات رجلها...و هي تزلق فالما الي تخوا ليها فاش بغات تطفي العافية...تسمعات صرختها فوذن نجم الدين قبل مايجي راسها على حافة السرير و فقدات الوعي فلبلاصة نجم الدين : " غادي زاف فالطريق " قمر قمر مالكي...شنو وقع ليك...قمر جاوبيني...قمرررر قمرررررررر ورك على الكسيراتون و مباغيش يفكر فشنو ممكن اكون وقع ليها و لا علاش مكتجاوبوش باغي يوصل عندها و السلام...الطريق ماعرف كيف دار ليها...وصل قدام الڤيلا حل ليه العساس الباب...دخل حبس الفران حل لباب و خرج...هز عنيه فالبالكون كان باقي مسدود و الدخان كيبان من الزاج...خرج عنيه فالبالكون و حط يدو على اللوطو مسند عليها رجليه فشلو عليه و عقلو توقف على التفكير للحظة فجأة ضربها بجريا داخل للدار طلع لبيت...بغا يحل لباب و مبغاش...بعد جوج خطوات اللور و زدحو بكتفو حتا تفرع...بان ليه غير الدخان و العافية شاعلة فنص ديال البيت...دخل كيقلب عليها بعنيه الي رجعو حمرين بانت ليه مجبدة فلرض جنب الناموسية...مشا عندها و طاح على ركابيه...هز راسها لقاها فاقدة الوعي...خشا يديه تحت رجليها و ظهرها...هزها و خرج من البيت حطها فالكولوار فلرض...حط يدو على خدها و ضرب بشوية محاولة منو يفيقها نجم الدين : قمررر حبيبة فيقي...قمرررر هانتي هاني جيت...حلي عنيك و شوفي فيا...قمر فيقييي قمررر حط يدو على عنقها حس بنبضها ضعيف بزاف...هنا صافي تبلوكا بالمعقول...حط يديه على دراعها بجوج كيحرك فيها و عنيه خارجين نجم الدين : قمرررر نوضيييي...علاش باغة تخلعيني علييييك...قمرررر و حلي عنيييك قمر عافاااااك حلي عنيييك طلعات سارة كتجري فاش سمعات صوتو بانت ليها قمر مسرحة فلرض و نجم الدين جالس حداها و كيهضر بصوت عالي فيه بحة من الألم...شافت الدخان خارج من البيت و هي تنزل كتجري...هزات لفيكس و عيطات على الإسعاف و الإطفاء...رجعات طلعات و بقات واقفة مشوكية و هي كتشوف فنجم الدين جالس و معنق قمر عندو ، بعد مدة جات سيارة الإطفاء و من وراها الإسعاف طلعو لفوق...قرب واحد فيهم عند نجم الدين بغا يبعدو عليها و هو يدفعو نجم الدين : ماتقيسهااااش المسعف : خاصها تمشي للمستشفى باش يقدرو ينقذوها و ينقذو البيبي نجم الدين شاف فالمسعف و رجع شاف فقمر و نزل عنيه لكرشها...سد عنيه قرب لجبهتها و طبع قبلة...نزلات دمعة من عنيه و طاحت على وجها نجم الدين : " همس عند راسها " غادي تعيشي بعد و هما يهزوها فوق الحمالة...هبطو و نجم الدين تابعهم كيلوح رجليه بثقل دخلو الاطفائيين و طلعو للطابق الثاني باش يطفيو الحريق ، دخلو قمر لسيارة الإسعاف دارو ليها ماسك الأوكسجين...نجم الدين طلع بجنبها شد فيدها و المسعفين كيديرو ليها الإسعافات الأولية...انطالقات الإسعاف بسرعة متاجهة للمستشفى...كيف وصلو دخلوها للمستعجلات و حبسو نجم الدين عند لباب...بقا واقف بحال الجثة فالخارج...حتا خرج عندو الطبيب و وقف عليه الطبيب : نتا هو زوج المريضة نجم الدين : آه الطبيب : مرتك غتولد ولادة مبكرة...وضع الجنين فخطر خاص ضروري نجريو ليها العملية و نخرجوه...قبل ما يسوء الوضع أكثر نجم الدين : و و مرتي ؟ الطبيب : مانكذبش عليك...وضعها صعيب بزاف الطبيب : وضعها صعيب بزاف...و العملية فيها خطورة لكن خاصنا نخرجو البيبي لان حياتو فخطر نجم الدين : " شد فراسو " شنو باغي تقول الطبيب : حنا غنديرو الي فجهدنا باش نقذو الأم و ولدها...فقط بغيتك تكون عارف بالوضع و توقع اي حاجة نجم الدين : " شاف فيه بجدية " دير العملية و نبغي مرتي و ولدي يخرجو منها حيين الطبيب : هادشي الي بغينا...انا غنسيفط الي يجيب ليك الوراق توقعهم...و انشاء الله اكون خير مشا الطبيب و خلى نجم الدين واقف كيف الحمق...معارف شنو يدير فهاد الوضع و مرتو و ولدو حياتهم فخطر...شنو فيديه يدير من غير يدعي معاهم و يطلب من الله اخرجو بجوج من العملية حيين...جابو ليه لوراق وقعهم و رافقاتو الممرضة حتال لبلوك فين كاينة قمر كتجري العملية ، جلس فوق الكرسي و جبد الفون اتاصل ببدر...بدر كان فالمكتب ديالو هبط فالمصعد و جا كيجري...بان ليه نجم الدين جالس و حاط راسو بين يديه... بدر : " حط يدو على كتف نجم الدين " شنو وقع ؟ نجم الدين : " الصمت " بدر : نجم الدين ! هز نجم الدين راسو و شاف فيه...بدر شاف عنيه مغرغرين و حمرين كيف الجمرة...عرف بلي شي حاجة خطيرة واقعة لقمر...شاف ممرضة خارجة و هو يمشي عندها بدر : شنو الوضع لداخل ؟ الممرضة : كتعرف المريضة دكتور بدر ؟ بدر : اه كنعرفها و طلقينا الممرضة : المريضة ولدات و البيبي حالتو مستاقرة...درناه فالقرعة حتا يكمل تسع شهور بدر : و مو شنو وضعها ؟ الممرضة : خلال الولادة جسمها دخل فحالة صدمة... و وضعها مزال حرج بدر : واخة شكرا مشات الممرضة دار بدر و لقا نجم الدين من وراه...عرف بلي سمع شنو قالت الممرضة لكن وجهو كان خالي من أي تعبير بدر : " ربت على كتفو " قمر قوية غادي تنجا من هادي كيف الي سبقها...و مايمكنش تخليك نتا و ولدها وقفات السيارة قدام المستشفى...نزلات و دخلات كتجري...سولات على قمر فالاستقبال قالو ليها باقة فغرفة العمليات...توجهات لفين كاينة بانو ليها نجم الدين و بدر واقفين مشات عندهم شروق : ناري جيت كنجري...بنت الحرام و الله الى دارتها...كنا كنضحكو و قلت ليها عنداك تولدي قبل الوقت...و هاهي دارتها بالصح هههه واش ولدات ولا مزال بدر : " شد فيها و هو يجرها بعدو على نجم الدين " قمر ولدات و لكن شروق : و لكن شنو ؟؟ بدر : مزال فغرفة العمليات و هاد التعطال مكيبشرش بالخير شروق : آش كتقول...علاش مالها ياك غير ولدات...شحال من وحدة كتولد فشهرها السابع و مكيوقع ليها والو بدر : حتا انا مزال معارف الوضع...و كنتسنا حتا يخرج الطبيب شروق : " كتحرك راسها بلا " هاديك المزغوبة مغادي يوقع ليها والو...غير عزيز عليها تخلعنا و صافي " هبطو دموعها " بدر : " جرها عنقها " ماتبكيش...انا صابر غير بزز...وتشوفي حالة نجم الدين...عمرني شفتو هاكة شروق : عمرها فرحات فحياتها و كملات الفرحة...من صغرها و هي كتعاني...واخة تكون عندها ماشي غير قوة التحمل...مابغيتش توقع ليها شي حاجة...بغيتها تفيق و تكون أول وحدة تهز ولدها بين يديها...و ترضعو و تشكا ليا من انو كيضرها فصدرها...و نضحك عليها و نلبسوه لبيسات الي خدينا انا وياها...خاصها ترجع لينا و الا مغاديش نسامحها خشات شروق راسها فصدر بدر و حابسة راسها من انها تبكي...زير عليها و بدورو حاس بحرقة فصدرو...معارف يصبر راسو و لا شروق و لا نجم الدين الي واقف بعيد و كيشوف فنقطة وحدة بدون حراك بعد دقائق خرج الطبيب و جا لعندهم...بدر قدر يعرف من ملامح وجهو بلي الوضع مكيبشرش بالخير...تقابل الطبيب مع نجم الدين و بدر و بلغهم بالخبر المؤسف 🍃🍃 بعد مرور سنتين 🍃🍃 واقف عند النافدة كيشوف فالناس غاديين و جايين فالشارع...شي ضاحك شي مهموم كلا و حالو...الأيام و الشهور كتمر لكن هو توقف عندو الوقت من داك النهار...مابقا كيحس بحتا حاجة و فقد طعم الحياة...عمرو ينسا كلمات الطبيب الي اختارقو وذنيه...و شلو كل جزء فجسمو من الحركة ، اليوم نفس التاريخ نفس اليوم...يوم تلقا فيه صدمة و فرحة الي ماقدرش احس بيها...فور مشاف ابنو و هزو بين يديه نزلو دموعو...و شعور متناقض فداخلو...ماقدرش يفرح بالابن الي لطالما تمناه و كان متشوق يشوفو...لكن بغيابها هي حتا حاجة مبقات عندها طعم سمع الدقان و هو يتوجه للباب حلو كانت السكرتيرة السكرتيرة : الكل كيتسناك فقاعة الإجتماع خرج نجم الدين غادي بخطوات ثابتة...دخل لقاعة الاجتماعات و جلس فمكانو...فتح الإجتماع الي كان على أوضاع الشركة...الي تحسنات و رجعات أقوى رغم الأزمة الي طاحو فيها من قبل...هنأ نجم الدين الموضفين ديالو على مجهوداتهم و شكرهم...رغم غيابو على الشركة معظم الوقت الا انهم متهاونوش و تبثو اخلاصهم ليه ختم الإجتماع و ناض خارج.داز للمكتب ديالو هز الفون و الكونطاكت خرج و هو القا السكرتيرة عند لباب...مدات ليه علبة مغلفة السكرتيرة : هادي لبراء...عرفت بلي اليوم عيد ميلادو نجم الدين : " شدها من عندها " شكرا هبط فالمصعد خرج من الشركة طلع فسيارتو و رجع للدار...دخل حط اللوطو و نزل...سمع لهضرة كثيرة تلفت جهة الجردة و هما يبانو ليه كلهم جالسين و براء وسطهم ، كاين كل من بدر و شروق...آيات و أمير...وهب و ساجد الي كان حاط براء فحجرو تقدم عندهم نجم الدين نجم الدين : السلام عليكم الكل : عليكم السلام نجم الدين : مالكم مجموعين هنا ؟ آيات : " ناضت كتجري و عنقاتو " خويااا حبيبي توحشتك نجم الدين : " باسها على راسها " امتا جيتو ؟ آيات : اليوم فالصباح...براء دغيا كبر تبارك الله...خليتو كيحبو دابة ولا كيوقف و يمشي لفرك لاخر شروق : الفركة هي نتي آيات : هادا ولد خويا و نتي آش دخلك شروق : حتا انا ولد ختي قرب نجم الدين عند ساجد...خدا من عندو براء و مشا مبعد عليهم...بقا الكل متبع ليه العين شروق : قلت شي حاجة ماشي هي هاديك ؟ بدر : " حط دراعو عليها " لا مي راك عارفة ساجد : هاني راجع...نمشي نقضي واحد الغرض و نجي أمير : ماتعطلش...بغينا هاد النهار ندوزوه مجموعين ساجد : لا مغاديش نتعطل ناض ساجد من حداهم غادي لسيارتو و كيشوف فنجم الدين...طلع و خرج من الڤيلا...وقفات آيات و جرات شروق و وهب دخلو من باب الكوزينة آيات : الولد اليوم عيد ميلادو...خاص نديرو ليه شي حاجة...العام الأول ماحتفلناش بيه...و نزيدو حتا هاد العام وهب : نجم الدين مغاديش يبغي شروق : نتشاورو معاه هو الأول...الى مكانش عندو مشكيل نديرو حفلة صغيرة بيناتنا وهب : آه من الأحسن نسولوه آيات : شكون تطوع وهب و شروق فنفس الوقت : ماشي أنا آيات : وحلتوها فيا عوتاني ⭐⭐⭐⭐⭐؛ بدر : الولد خاصو الي اعتاني بيه أمير : ماعرفتش علاش نجم الدين مقسح راسو حتا لهاد الدرجة...امتا غادي اتقبل الي وقع و اقبل المساعدة بدر : الصراحة صعيبة بزاف...حط راسك فبلاصتو أمير : عارف و حاس بيه...كان ممكن انهار لكن مقوي راسو على قبل ولدو...مي كنتمنا اقدر اتجاوز الأمر...دازت عامين على داك النهار لكحل بدر : حنا و مقادرينش نتقبلوها...وسعاك هو بجوج واقفين كيشوفو فنجم الدين واقف فالجردة هاز ابنو فحضنو و كيلعب معاه البسمة على وجهو كتبان فقط فاش كيكون مع ولدو...من غيرها عمرهم باقي شافوه كيضحك و لا فرح لشي حاجة...عايش على روتين مابين الخدمة و الدار...الي منين كيجي ليها و هو فغرفة ابنو ' براء ' دخل نجم الدين للدار و طلع لفوق...و براء كيلعب ليه فوجهو و يجر ليه كول القاميجة حل باب البيت و دخل...كان بيت آخر مقابل مع بيتهم السابق الي تسد من داك النهار...البيت كان لبراء جهزو نجم الدين فاش كان باقي فالسبيطار...مصبوغ بلونين الأبيض و الزرق مفتوح و فيه بالكون...مساحتو كبيرة و مستاغلين غير نصفها كيف دخلو بدا براء كيتجبد و يلوح يديه لقدام نجم الدين : شنو بغيتي ؟ براء : نننن م ما ما نجم الدين : بغيتي ماما براء : م ما ما نجم الدين : غير كتشوفها كتسمح فيا براء : " كيتعصر " هنن م ما م ماا نجم الدين : واخة هاحنا غاديين عندها قرب نجم الدين للسرير الي كان فالجهة لاخرى او بالأحرى بياص الي مستلقية فيه قمر ناعسة بكل هدوء كيتسمع غير صوت الآلة الي جنبها وجها شاحب و دايز من نيفها تيو ديال الأوكسجين...لابسة لباس ديال المستشفى و مغطية بغطاء أبيض...لو ماشفتيش الجهة لاخرى تقول كاينة فغرفة من غرف المستشفى جلس نجم الدين فالكرسي جنبها و ولدو فحجرو حط يدو على يدها الي مسرحة جنبها. نجم الدين : الأميرة النائمة مزال ماهداك الله تفيقي...براء اليوم كمل عامين...تعلم اقول ماما...و فينما شافك كيقولها براء : " كيتجبد باغي يمشي عندها " مااا نجم الدين : بابا...ماما ناعسة...بغيتي تبوسها ؟ قربو نجم الدين عند وجها...حط براء يدو الصغيورة على وجها و حط فمو على خدها كأنو كيبوسها...رجع بعدو نجم الدين عليها و هو يبدا يبكي ليه و كيلوح يديه عندها...وقف نجم الدين و توجه لبالكون...بدا كيلعب معاه و كيحاول ينسيه حتا سكت...حط راسو على كتف نجم الدين و بداو عنيه كيتغمضو...حس بيه قرب ينعس و هو يحطو فالسرير ديالو غطاه و رجع جلس جنب قمر...دوز يدو على راسها و تحنا قبل جبهتها...حط يدها بين يديه و قربها عند فمو قبلها نجم الدين : عارفك كتسمعيني...واش مابقيتش فيك و نتي كتشوفيني كنعاني كل نهار بلا بيك...عامين اقمر...عامين ماشفتش عنيك و ضحكتك...عامين ماحضنتكش...عامين و انا كنعس فالفوطوي الي مقابل معاك...كنقول هاهي غتحن فيا و تفيق...باش نرجع نعس مرتاح و نتي فحضني...شتي هضرة الطبيب مدخلاتش ليا لراسي و عمرها تدخل...عارفك غتفيقي و غترجعي لينا انا و ولدك...الي كل نهار كيتعلق بيك و حاس بيك...ماشفتيهش باغي يجي عندك...باغي يحس بدفئك و باغيك تهزيه بين يديك و تلعبي معاه ضام يدها بين يديه و حاطها عند فمو...سد عنيه و كيدوزو قدامو گاع اللحظات الي دوزو مع بعض لقاءهم الأول عداوتهم شجاراتهم اعترافها ليه بحبها فالمطار...اعترافو ليها نهار وافقات على الزواج بيه خطبتهم حفل زفافهم ليلتهم الأولى لحظاتهم فالفراش أنفاسها و ريحتها الي مترسخين فدماغو ، ملمس شفايفها دقات قلبها الي كيحس بيهم فاش كتكون فحظنو عيونها دموعها نهار عرفو بلي حاملة...كلشي محفور فدماغو و قلبو لحظة بلحظة...و حتا اللحظات المؤلمة الي عاشها فهاد المدة و هو كيتسنا النهار الي تحل فيه عنيها...رجعات بيه الذكرى لليوم المشؤوم الي سمع فيه أكفس خبر فحياتو 🍁 #فلاش_باك 🍁 بعد دقائق خرج الطبيب و جا لعندهم...بدر قدر يعرف من ملامح وجهو بلي الوضع مكيبشرش بالخير...تقابل الطبيب مع نجم الدين و بدر و بلغهم بالخبر المؤسف الطبيب : تمنيت نقل ليكم خبر حسن من هادا لكن المريضة بالكاد نجات من العملية...وضعها مزال ما مستاقر و جسمها تعرض لصدمة بسبب الاختناق و الولادة المبكرة...مؤشراتها الحيوية ضعيفة...و غالبا غدخل فكومة بدر : " دوز يدو على راسو " كومة ؟!! الطبيب : غالبا...عرفت من السجل ديالها بلي فايتة دايرة عملية زرع القلب...و هادا كيفسر الحالة الي كانت فيها أثناء العملية...نبضها كان بالكاد مستاقر و منين مفقدنهاش فهادي معجزة...كنتمنا وضعها يتحس لكن مباغيكمش تفائلو على والو المريضة غتحول لغرفة الإنعاش هاد الفترة حساسة بالنسبة ليها...يمكن تفيق يمكن لا...دعيو معها مشا الطبيب بعدما لاح عليهم هاد القنبلة...ضار بدر شاف فنجم الدين الي غير ساكت...ماعرف مايقول ليه فهاد اللحظة...عارف حتا حاجة ماتقدر تواسيه و حتا حد محاس بيه...التزامو بالصمت عبر على كلشي...بينما شروق الي كان واقفة من وراهم شادة على فمها و دموعها غاديين مامصدقاش هادشي الي سمعات و ان قمر دخلات فغيبوبة و ممكن عمرها تفيق...بدر حط يدو على كتف نجم الدين و نطق بدر : نجم الدين...خاصك تكون قوي نجم الدين : بغيت نشوفها بدر : مغاديش يخليوك دابة تدخل عندها نجم الدين : ضروري خاص نشوفها...شوف كيف دير بدر : غنحاول...سير شوف ولدك هو الأول نجم الدين : بغيت نشوف قمر قبل بدر : واخة...انا شوية و نرجع مشا بدر عند شروق شد فيدها و جرها معاه دخلو للمصعد كيف تسد جرها عندو و ضم وجها بين يديهظ بدر : شروق باركة من لبكا شروق : كيفاش قمر دخلات فغيبوبة انا مقدراش نستوعب داكشي الي قال الطبيب هئ هئ...آخر حاجة كنت نتوقعها هي أنها تولد بهاد الطريقة و متشوفش ولدها بدر : " كيمسح ليها دموعها " إنشاء الله تفيق...و تفرح بولدها هي وراجلها و هادشي يولي غير ضحك...ربي كبير و غادي اكون معها تحل لباب و هو يقرب بدر باس شروق فجبهتها و شد فيها خارجين...كيف ضارو و هي تبان ليهم نجاة واقفة قدام السانسور و عنيها خارجين فيهم...تجاهلها بدر كليا و داز من حداها جار شروق الي متسوقاتش ليها بتاتا نجم الدين خرج للجردة واقف فنفس لبلاصة الي كان واقف فيها من قبل فاش نعسات قمر فالصبيتار...هز راسو كيشوف فالنافذة الي كانت كطل منها قمر و هي كتشوف فيه و الدموع فعنيها...تذكر ديك الواقعة الي كانت شوية و تفقد فيها ولدهم...كان كيظن أنها غتكون آخر الأحزان...بدون ما يدري ان الي جاي أعظم...جبد لفون من جيبو و جاوب... بدر : طلع للطابق الثالث قطع و دخل للمستشفى طلع فين قال ليه بدر...توجه لغرفة الإنعاش الي فالطابق...لمح بدر و شروق واقفين عند الزاجة...قرب عندهم كيف وصل لاح عنيه لداخل...وإذا بيه كيشوف حبيبتو مستلقية فالباياص كلها سلوكة...منظر ماقدرش يتحملو و خلا قلبو يتزير بدر : رافق الممرضة تديك تلبس قبل ما تدخل عندها...حاول متطولش انجم الدين...هادشي فصالحها هي نجم الدين : غير نشوفها واخة غير 5 دقايق تبع نجم الدين الممرضة حتا لبس لباس معقم و دار الكمامة على وجهو...حل لباب و دخل بخطى بطيئة و عنيه عليها...وقف جنب سريريها و حط يدو فوق من يدها...كانت باردة و شاحبة...دار يدها مابين يديه بجوج و كيحاول يدفئها عنيه مابعدوش على وجها الي كان كيبان بلا حياة...شفايفها لونهم بيض و حتا لون بشرتها تغير...كأنها دوزات دهر فغرفة العمليات...من كثرة ما هو منزاعج من وضعها لكن مقادرش يبعد عنيه عليها...على الأقل هي باقة حية و كتنفس هادشي الي مصبرو... مرو الدقائق بسرعة و كان خاصو يغادر...قبل يدها و حطها بهدوء فوق البياص...نزل عندها و طبع قبلة فخدها نجم الدين : كنبغيك بعد و دوز يدو على عنيه و ضار خارج...بعدما حيد عليه داكشي داوه يشوف ولدو...دخل للغرفة و وراتو الطبيبة انا واحد فيهم...شاف فيه ناعس فالقرعة حجمو صغير بزاف...چلس فالكرسي و دخل يدو لمس رجيلاتو بصباعو...نزلات دمعة من عين نجم الدين رغما عنو...بقا جنب ولدو حتا جات شروق و بدر...شافوه حتا هما عاد غادرو نجم الدين كان باقي فالصبيتار منين جاه اتصال من الدار خرج ركب فسيارتو و رجع للدار...دخل و هو يلقا جوج رجال واقفين وسط الدار مع الخادمة سارة سارة : هاهو موسيو نجم الدين ....... : " قرب عندو و سلم عليه " معاك البوليس...تلقينا خبر من دائرة الإطفاء بسبب الحريق الي شعل عندكم فالدار...و جينا نشوفو واش مفتعل و لا مجرد حادث...ممكن نشوفو البيت ؟ نجم الدين : " باستغراب " مفتعل!! ....... : ممكن اكون شي حد من وراه...داكشي باش خاصنا نشوفو نجم الدين : تبعوني طلع نجم الدين فالدروج و من وراه دوك جوج رجال...دخلو للبيت الي كان كولو كحل معظم الفراش تحرق...و بداو كيقلبو على شي حاجة دل على انو مفتعل...نجم الدين بقا واقف كيشوف فيهم و الهضرة الي قال ليه الشرطي كضور ليه فراسو...بعد مدة رجعو عندو و تمو خارجين و فنفس الوقت كيهضرو ........ : كلشي طبيعي...مكاينش أثار لشي مادة بحال مشتعلة ليصونص...و من البقعة الي فالزربية باينة ان الشمعة هي الي كانت السبب عرفنا بلي نتا اول واحد وصل و لقيتي لباب مسدود...واش شاك بلي شي حد شعل لعافية و سورتا لباب ؟ نجم الدين : لا ....... : " مد ليه بطاقة " هادا رقم الدائرة...الى كانت شي حاجة علمنا...والى شكيتي فشي حد بلغنا نجم الدين : واخة شكرا بقا واقف نجم الدين حتا شافهم خرجو...توجه للكوزينة دخل و مشا وقف على سارة نجم الدين : فين كنتي فاش كانت قمر محبوسة فالبيت و العافية شاعلة فيه سارة : كنت فالكوزينة موسيو نجم الدين نجم الدين : ماسمعتي والو زعما ؟ سارة : و الله ماسمعت شي حاجة...من بعدما حليت لديك البنت دخلت لكوزينة و كيف كملت شغلي مشيت لبيتي...حتا سمعت صوتك و انا نخرج نجم الدين : بنت...انا بنت هادي ؟ سارة : واحد لبنت جات لعند مدام قمر...قالت ليا بلي هي بنت خالتك و سميتها إبتسام نجم الدين : " خرج فيها عنيه " ابتساااام !!! سارة : اه قالت ليا سميتها إبتسام و هي بنت خالتك...دخلتها و قلت ليها تسنا نعيط ليها على مدام قمر...لكن وقفاتني و قالت ليا غطلع عندها نجم الدين : " ضرب يدو مع الپوطاجي " بنت لحرام سارة : " كلها كترعد " م موسيو و واش درتي شي حاجة غلط...ا انا م ماعرفتش شنو نقول ليها...قلت مغاديش تكون كتكذب و كن ماعرفهاش العساس ميخليهاش تدخل...لكن ف فاش خرجات ماشفتهاش نجم الدين : سمعي مزيان...الى رجعو دوك الجوج متدخليهمش مزال و متزيديش معاهم الهضرة...مفهوووم سارة : " حركات راسها بآه " م مفهوم خرج نجم الدين كيزرب فخطاويه طلع فسيارتو و كسيرا مزير يديه على الفولون و عروق يديه بغاو يطرطقو...مدازش بزاف ديال الوقت حتا كان قدام دار خالتو...هبط و وقف عند لباب كيدق بالجهد...تحل لباب كان خالة نجم الدين ابتاسمات ليه بغات تهضر...و هو يدفعها و دخل لداخل نجم الدين : " بعصبية " فييين ديك الكلبة دياااال بنتكك ؟ الخالة : مالك اولدي شنو واقع ؟؟ نجم الدين : " بصوت أعلى " فيناهيااااا بنتكككك ؟؟ طلع مع الدروج و خالتو تابعاه و خايفة لا تكون بنتها دارت شي زبلة...حل نجم الدين البيت و دفعو حتا تخبط مع الحيط...بانت ليه ابتسام جالسة فوق الناموسية و كتصبغ فضفارها...لابسة بيجامة بشورط و ديباردو...ضرب جوج خطوات و شنق عليها هازها بيد وحدة نجم الدين : " مخرج فيها عنيها " ياك الكلبة وصلنا معاك لهادشي...علاش كتقلبي لحمارة تاعت مك هاااا...كتقلبي على الي اسلخ جدبوووك...هي الي متعااااود اليوم مايلقاو مايجمعو فيك الكلبةةةة...الله انعل بو الرجلة لا كانت مع بحالكم جمع لكمة يدو و نزل عليها لوجها حتا تلاحت فلرض...هزات راسها فيه و فمها دايز بالدم ابتسام : شنووو درت ليك حتا تهجم عليا هئ ؟ نجم الدين : لا مدرتي والو غا رشقات ليا عليك شنووووو كنتي كديري فداري السلگووووطة باغة تحفري قبرك بيدك...عند بالك غتفلتي منها و الله لا دوزتها لطاسيلت بووووك هاد النهاااار...واخة نعرف نمشي على مك لحبس بغا يهجم عليها و هي تشد فيه خالتو. الخالة : لعاااار اولدي متضربهاااش...باينة كاين شي سوء تفاهم...راه بنت خالتك هاديك من لحمك و دمك نجم الدين : " بعد ليها يديها " الي يآذي مرتي منعقلش على ديلموووو واخة تكووون ختي كتسمعي واخة تكون ختييي دفعها و تحدر جر ابتسام من شعرها...وقفها و دفعها قدامو متجاهل الطليب ديال خالتو و نواح إبتسام...حل لباب و خرجها دفعها فاللوطو سد لباب و ضار ركب...زاد مكسيري مخلي خالتو كتندب و تقول بنتي مشات... إبتسام عيات ترغب فيه و تقول هي مدارت والو...و وقتما حاولات تقيسو كيضور يحمر فيها حتا كتجمد فبلاصتها...لكن الرعب الحقيقي ركب فيها منين شافتو خارج على لمدينة...و غادي فطريق خاوية حتا وصل لجنب الغابة...وقف اللوطو و ضار حل لباب جرها من دراعها و لاحها فلرض نجم الدين : دابة غتهضري و تعاودي شنو وقع و شنو قاليك لقواد ديال راسك...قبل ماندفن مك هنا حية ابتسام : " وقفات بصعوبة و كتألم فيدها الي تجردات مع الشانطي " نجم الدين ا انا مادرت والو...ه هاديك نجم الدين : شتي تقولي مادرتيش و لا تكذبي و الله مانعقل عليك...هاني حلفت بالله إبتسام : س سمحلياااا عماني الطمع ديالي نجم الدين : " شدها من عنقها خبطها مع اللوطو و مزير عليها " آش كتخرااااي...هضري خلااااص علاش باغة تقتلي مراااتي شنو دارت لييييك...فاش زاحماااتك باش باغة تصفيها ليها ابنت الكلبةةةةة...دوييييي إبتسام : " كتكح " ا انا ما بغيتش ن نقتلها...درت غير د داكشي الي قالت ليا...الطمع عماني و خفت منها دير شي حاجة لو معاونتهاش...ع عفاااك س سمح لياااا نجم الدين : علاااامن كتهضري...شكوووون هادي الي باغة تلبقيها ليهااااا ابتسام : ن ناهد خطيبتك نجم الدين : " رخا يدو " ش شنوو قلتي ؟؟ إبتسام : ناهد هي الي اتاصلات بيا...تلاقيت بيها شحال من مرة...و هي الي هدداتني الى متعاونتش معها غادي تخرجنا انا و ماما من دارنا و تلفق ليا شي تهمة...فالأول رفضت لكن بقات عليا حتا وافقت...و هي الي عطاتني الدوا باش نديرو لقمر باش يطيح ليها البيبي انا منين رجعت الدار رجعات معيا الندامة لكن كان فات لفوت " بدات كتبكي " نجم الدين : ناهد سيفطاتك تسممي قمر باش يطيح ليها لبيبي!! هادشي الي باغة تقولي عرفتي و تكوني كتكذبي إبتسام : و الله مكنكذب عليك هي الي جراتني لهادشي و استاغلات ضعفي...انا ندمت انجم الدين و الله حتا ندمت...و بقيت كنطلب ربي باش مرتك ماتشربش داك لعاصير...سمح لياااا طلق منها نجم الدين و رجع باللور...دوز يدو على شعرو و كيحاول يفهم و يستوعب هادشي الي سمع...جاه هادشي بحال شي حلم خايب مبغاش يسالي ناهد وصلات بيها الحقارة و بغات تقتل ليه ولدو...و الحريق كيفاش حتا شعلات العافية فالبيت و تسد لباب على قمر...رجع شاف فابتسام الي شادة فعنقها و رجليها كيترعدو نجم الدين : عاودي ليا بالتفصيل شنو وقع منين جيتي للدار حتا للحظة الي مشيتي فيها فحالك ابتسام : " عاودات ليه كلشي " هادشي الي وقع أقسم بالله نجم الدين : عطاتك هاديك لفلوس ؟ إبتسام : أا...آه نجم الدين : باغة الفلوس يبقاو عندك...سدي فمك...متبقايش تواصلي معها و أهم حاجة متقوليش ليها بلي عاودتي ليا...كتسمعي ؟ إبتسام : لا لا مغادي نقول ليها والو...كنواعدك نجم الدين : نعرف وصلتيها ليها...ديك الساع ترحمي على راسك جرها دفعها بعيد على اللوطو...طلع شغل اللوطو و زاد...ناضت إبتسام كتبكي و تعيط عليه و كتجري من ورا السيارة ديالو...و ميتة من الخوف...ماحنش فيها و خلاها من وراه فالخلا كأنها شخص غريب عليه...كان معمي بالغضب و ماكيشوف حتا حاجة قدامو ديك الساع ⭐⭐⭐⭐⭐؛ فاليوم الموالي العائلة كلها ساقت لخبار لشنو وقع لقمر...الكل تصدمو من الي وقع و جاو للمستشفى اكونو جنبها و جنب نجم الدين...و من الأشخاص الي نزل عليهم الخبر كيف الصاعقة ساجد...الي حس بالدنيا تهزات بيه...جا كيجري للمستشفى طلع للطابق الي فيه قمر...بانو ليه كلهم عند غرفتها شي واقف شي چالس...قرب للزاجة و طل عليها كان صعيب عليه اشوفها فداك الوضع...كل مكان كيتمنا و هو بعيد عليها انها تكون بخير و سعيدة فحياتها...كان عارف أنها عمرها تكون ليه مدام قلبها مع نجم الدين...و الي صبرو هو انو عارف صاحبو يستاهل حبها و هما بجوج مكتابين لبعض...لهادا بعد عليها باش تعيش حياتها هانية لكن انو يشوفها هاكة من بعد گاع داكشي الي داز عليها...جاتو قاصحة يتقبلها شاف حالة نجم الدين و حال الآخرين...كانت ضبابة سودا نازلة على الكل...و هي فهاد الوضع غابت فرحتهم بالمولود الجديد...و صار كل تفكيرهم معها و كيترجاو أنها ترجع ليهم فأقرب وقت مع مرو الأيام و الأشهر و لا تغيير...قمر مفاقتش و حالتها كما هي...خرج الإبن من المستشفى و داوه للدار...دخل هازو نجم الدين بين يديه و طلعو للغرفة الي جهز ليه...حطو فالكونة ديالو بغا ابعد يدو و هو يشد ليه صبعو قربات آيات الي فور ما سمعات بالخبر جات هي و أمير...وقفات جنب خوها كتشوف فيه هو و ولدو و ابتسامة خافتة على وجها. آيات : خاصك تسميه نجم الدين : عندو إسم آيات : لقيتي ليه سمية...شنو هي ؟ نجم الدين : ماشي انا الي سميتو ماماه آيات : ك كيفاش ؟! نجم الدين : منين خواو لبيت...لقات سارة مذكرة ديال قمر...كانت كتكتب فيها من نهار عرفات راسها حاملة...عمرني شفتها عندها حليتها و قريت كل كلمة وجهاتها لولدنا كيفاش كانت فرحانة و هي كتحس بيه كيكبر فأحشاءها...و كيفاش كانت متحمسة لنهار يخرج لهاد الدنيا و يحطوه عند صدرها...تشم ريحتو لأول مرة و تحس بيه...ملصقة صور الايكو ديالو فالمذكرة و كاتبة اسم من تحتها آيات : " حابسة دموعها " شنو كانت باغة تسميه ؟ نجم الدين : براء آيات : براء...زوينة بزاف و جات معاه...الملاك ديالنا غنسميوه براء نجم الدين : " كيشوف فولدو " براء مرت سنة و قمر مزال فغيبوبة...كلا رجع لروتينو اليومي و الحياة تستمر...من غير عند نجم الدين الي كان مفرغ وقتو كولو لولدو و لقمر و حاجة أخرى...الخدمة كانت متبعها من بعيد...و مابغا حتا حد اعتاني ليه بولدو من غيرو ، اليوم ناض بكري عيط لشروق تجي عندو للدار...لبس عليه جينز و تيشورت و دار فوقهم مونطو گري...هز صاك دار فيه حوايج قلال...سمع الدقان و مشا حل لباب. شروق : نجم الدين لباس نجم الدين : الحمد لله...ممكن تبقاي مع براء غنغيب واحد اليومين شروق : أكيد...شكون يكره يقابل داك الفنون نجم الدين : شكرا اختي دخل هز براء باسو و مدو لشروق...هز الصاك و خرج ركب فالسيارة و اتاجه للمطار...وصل مع وقت الرحلة ديالو طلع على متن الطائرة و قلعات متاجهة لپاريس...بعد ساعات وصلو خرج و خدا طاكسي للأوطيل الي حجز فيه...كيف وصل خدا لكارط و طلع للجناح ديالو...دخل حط الصاك جبد لفون دار اتصال...كمل المكالمة قطع و خرج من الجناح... وقف عند لباب الي مقابل مع جناحو...دق شوية و تحل لباب...شافتو قدامها و هي تصدم و اللون مشا من وجها...دفع لباب داز فيها و دخل...جبد سيجارة شعلها و تقابل مع النافذة نجم الدين : باين ليا عجبك الجو فباريس حتا مابقيتي رجعتي للمغرب ناهد : باش عرفتي انا هنا ؟ نجم الدين : ساهلة كثر ما كتصوري...كنت باغي نجي عندك فأسرع وقت ممكن...لكن مابغيتش نجي بيديا خاويين...داكشي باش تعطلت شويا ناهد : علاش كتهضر ؟ نجم الدين : نتي عارفة و انا عارف شنو كاين...سو نوفرو على راسنا الهضرة " ضار عندها " عرفتي شنو هي أكثر حاجة ندمت عليها...هي لقائي بيك...ماكرهتش نمحي ديك اللحظة من حياتي...و تمنيت كن فعلا متي و بقات ذكراك زوينة...على اني نشوفك قدامي و حاس بالاشمئزاز ناهد : نجم الدين...علاش كتقول هاد الهضرة مايمكنش تكون نستيني...مادوزناش قليل و انا مزال كنبغيك و لا نقول كنبغيك أكثر من قبل و أملي الوحيد هو تسمح لياا نجم الدين : " ضحك بجنب " كيبان ليا عايشة فحالة نكران...و لا عندك مع التمثيل والخبث ولى كيمشي ليك فالدم " قرب عندها " شتي نهار فكرتي تآدي عائلتي سنيتي على حياتك درتي فعلتك و هربتي لهنا بحال الى ماوقع والو...كنتي كتسناي حتا توصلك لخبار الي بغيتي عاد ترجعي...و ديري فيها بريئة مدارت لا بيديها و لا برجليها ههه و هاكي آخر الأخبار داكشي الي بغيتي عمرك غادي توصلي ليه ضربتي ليا أغلى ماعندي و انا غنجيك بنفس الطريقة...الفلوس الي وصلوك لهنا و بعتيني انا و مك و ختك على قبلهم...باااااح...فهاد اللحظة شركة باك واقفة على الإفلاس...واخة خدات مني وقت باش توليو على الضس لكن تستاهلي حياة الرفاهية تبخرات و رجعتي أفقر من كيف كنتي" ضار خارج " آه نسيت هاد الشهر الي كنتي جالسة هنا شوفي كيف ديري تخلصيه و حسباتكم فالبنكة مجمدة...و نزيدك نهار تبغي ترجعي للمغرب غتلقاي البوليس كيتسناوك فالمطار...سو تمتعي بالغربة كيف بغيتي بلا ريال...و لا رجعي لبلادك و دخلي للحبس ، حل لباب و خرج...ناهد طاحت على رجليها و الهضرة تصرطات ليها...عارفة نجم الدين مغاديش يكذب و الى قال الحاجة الا و كاينة...بقات مبلقة عنيها فالخوا و الصدمة باينة على ملامح وجها رجع نجم الدين للمغرب...واخة مبغاش يظلم حد لكن بفعلتها تستاهل الي وقع ليها...و كان متهاون معها لأنها ضرباتو فنقطة ضعفو...منين رجع نجم الدين قرر يرجع قمر للدار جنب ولدها...الي كان كيشوفها مرة فشحال.. جهز غرفة ولدو بكلشي...و رجعات قمر لدارها الي دوزات فيها عام آخر بدون ماتفيق 🍁 #نهاية_لفلاش_باك 🍁 حط يدها و قرب عند وجها...طبع قبلة خفيفة على شفايفها و خرج من الغرفة نازل مع الدروج و هو يلاقا مع آيات آيات : خويا لعزيز نطلبك طليبة نجم الدين : شنو ؟ آيات : اليوم عيد ميلاد براء و حنا مجموعين كاملين...شنو بان ليك نديرو ليه حفلة صغيورة نجم الدين : " بقا كيشوف فيها " ديرو الي عجبكم آيات : بالصح " عنقاتو " شكرا حبيبي...و لكن خاصك تكون معنا...انا والبنات غنوجدو كلشي و فلعشية نحتافلو...أوكي نجم الدين : انا بلا ماتعولو عليا نزل مع الدروج و خرج للجردة...كان بدر و أمير جالسين مجمعين و جلس حداهم. نجم الدين : فين مشا ساجد ؟ أمير : قال ليك مشا يقضي شي غراض...راه غيرجع نجم الدين : ولا ساكن عندي هنا...جاني عجب مانشوفوش بدر : ههههه...لقيتي الي ونسك و كتشكا...باش صدمني...واحد النهار دخلت لبيت لقيتو كيبدل لبراء ليكوش...متوقعتهاش منو أمير : ههههه...هادا هو الصاحب نجم الدين : و نتوما امتا ناويين تبدلو ليكوش ؟ أمير : آيات ماقابلات راسها تقابل ولادنا...باقي الحال خليها حتا دير عقلها...عاد نشوفو لولاد آيات : " خبطاتو على راسو من اللور " بحال الى نتا مطفرو أمير : احح...نتي فينما دزتي من حدايا تبربقي راه غنفلعصك آيات : الى كنتي راجل نوض فلعصني أمير : شفتي خوك و ضصرتي...من بعد و نتفاهمو " غمزها " آيات : " غادة لكوزينة " لعمى انشاء الله 🌺🌺🌺؛ توقفات سيارة الأجرة تحل لباب و خرجات لابسة كعب عالي فلبيج مع سورال كلاص فالاسود و طوب فنفس اللون...شعرها البني زاد طوال و دايرة مايكاپ برز ملامح وجها لبريئة...ملامح وجها مبشورة و نضرتها كلها ثقة ، داخلة للشركة كتمشا بخطى واثقة مكتاسبة احترام الكل بشخصيتها الطيبة و القوية فنفس الوقت...طلعات فالمصعد للطابق السابع فين كاين مكتبها خاص بيها...دازت من حدا مكتب السكرتارية و لقات التحية على لبنات...دخلات حطات حقيبتها و جلسات باشرات فخدمتها و تركيزها فداكشي الي قدامها...مر بعض الوقت ناضت و توجهات لغرفة الاستراحة...داخلة مع لباب و هي تسمع كل من نائب مدير الشركة و أحد الموضفين كيهضرو عليها...توقفات كتسمع لحديثهم خاصة فاش سمعات اسمو الموضف : بانا خدات لقب موضفة الشهر مرة أخرى نائب المدير : تستاهل...مكاينش الي كيخدم أكثر منها الموضف : كاينة...مثابرة و كتنافس الرجال گاع المشاريع الي خدات نجحو و الشركة دخلات من وراها أرباح كثيرة نائب المدير : فخبارك كانت خدامة فشركة العبدلاوي قبل عامين الموضف : لواه...و كيف وقع ليها حتا جات لهنا ؟ نائب المدير : سمعت قدمات استقالتها...و دفعات لشركتنا...لكن الغريب فالأمر اتاصل ساجد العبدلاوي بالمدير و طلب منو يخدمها الموضف : اواه...زعما علاش وصا عليها و هي استاقلات من الشركة ديالو ! نائب المدير : شكون عرف...هادشي ماشي شغلنا فيه...بانا موضفة معنا و برهنات على جدارتها و تستاحق تكون رئيسة قسم المهندسين... يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM