قصة المزحة #الجزء 121 : ارثر لقاها من الجنة و ناس: بغيت ندخل عند السيدة ايلاف و لكن ماعنديش موعد, نقدر ندخل!؟ سكريتيرة تلبكات: اه واخا كلس تستارح ها انا نعلمها و دخل عندها. ارثر: اوكي, تقدري ماتقوليش ليها شكون!؟ قولي ليها واحدالشخص باغيه في مسألة ضرورية. سكرتيرة تبسمات: اوكي. و عيطات ليها. سكرتيرة: انسة ايلاف, واحد السيد هنا بغاك. ايلاف: شكون هذا!!؟ عندو موعد!؟ سكرتيرة: لا ماعندوش و ماقالش سميتو, قال مسألة ضرورية. ايلاف دخلها شك يكون هو و لكن قالت موحال: اوكي خليه يدخل. قطعات عليها. سكرتيرة: تفضل ا موسيو ارثر. ارثر: شكرا. دق الباب سمعها سمحات ليه باش يدخل, تنهد و هو يدخل. شافتو و رغم كان عندها احساس انه هو, الا انها قالت مايكونش عندو لوجه باش يجي, بدلات وجهها لوجه الساخر. ايلاف: سيد ارثر كندجي شرفنا, اش حب الخاطر؟ ارثر: ايلاف لاباس!؟ ايلاف: هههه هاد السؤال شحال سمعتو هاد اليامات, بخير شكرا على السؤال. ارثر دخل و كلس في الكرسي لي مقابل معاها. ايلاف: فاش نقدر نعاونك؟ ارثر: ماجايش نهضر على الخدمة, بلاما نهضرو بهاد الطريقة العملية. ايلاف هزات يديها توريه البيرو: سيد ارثر شوف حنا فين, يعني انهضرو على الخدمةومن غيرها ماعندي فاش نهضر معاك, يمكن ليه تفضل. ارثر: ماغاديش نمشي, انا جيت باش نهضر معاك و انا عارفك كن كان شي واحد اخر ماغاديش ترديه. ايلاف:غلط ا سي ارثر, فحالك فحال اي واحد, اي شخص غادي يجي عندي و يبغي يهضر فشي حاجة من غير الخدمة ماغاديش نسمع ليه, لانه هنا ماشي قهوة, و كنظن حتى نتا راك شخص عملي و عارف هادشي. ايلاف: و ميفما عارفة بلي راني شخص عملي, خاصك تكوني عارفة بلي ماغاديش تستفزيني بهاد الهضرة, انا ماغادي نخرج من هنا حتى نهضرو. ايلاف شافت في ساعة: اوكي ملي مصر نهضرو, قول اش عندك دغيا, ماعنديش الوقت. ارثر و برغم تصرفاتها ماعحبوهش الا انه عذرها و خاصو يكون مسالم معاها لاقصى درجة. ارثر: انجيك من لاخر, انا جيت باش نطلب سماحة على داكشي لي فات. ايلاف: سماحة!!؟ ههههه و على داكشي لي فات, اوكي كيف كيقولي لي فات مات و بلاما نبشو فيه و لكن على العموم المسامحة. شي حاجة اخرى!!؟ ارثر: علاش كتعاملي بحال هاكا!؟ انا باغي نبش في الماضي و جيت نطلب السماحة و نصلحو داكشي لي فات. ايلاف:مافهمتش شنو بغيتي توصل بهاد الشي و لكن ا سيدي بلاما تحاول, راه مابقى مايتصلح و انا دابا مزوجة و براجلي و ولدي ماكاين لاش تبقى تجبد الماضي, سير شوف حياتك حتى نتا, الى بقيتي منغامس في الماضي عمرك تزيد القدام. ارثر ضراتو في خاطرو كلمة " مزوجة و براجلي" رغم انه ميت الا انها باقي كتعامل بحال باقي حي و هادشي خلاه يسعر. ارثر: راجلك ماات, لاش باغي غير تزيدي تعذبيني !!؟ و حياتي بلا بيك ماعندها معنى, المستقبل يا غادي يكون معاك يا بلاش. ايلاف نظرة في عينينها بان عليها الحزن و الانكسار فاش جبد عليها راجلها يعني عرف راه ميت و لكن ديغا رجعات وجهها الساخر: و الا كاع مات, شنو كيتبدل!؟ كيبقى راجلي و بات ولدي, زعما شنو عرفتي راجلي مات بغيتي تلقاني لقمة ساهلة دابا,و ا سيدي ماكاين لاش تبقى تزيد تعذب في راسك و بلاما تحلم بشي حاجة ماعمرها غادي تكون و كيف قدرتي تعيش هاد 8 سنين كاملة اتقدر تعيش من بعد. ارثر: ايلاف ماديرش ليا بحال هاكا, عارف راسي جرحتك بهضرتي لي قلت ليك و لكن فراقك كان عقابي و لا فاش عرفتك تزوجتي كان عذابي, ماكفاكش هادشي كامل. ايلاف: سيد ارثر, هادشي لي كتقول دابا مابقى عندو معنى و كيف قلت ليك لي فات مات و انا نسيت هادشي كامل لي كتقول, انا تزوجت و حبيت و ولدت و كملت حياتي و نتا جاي كتقول ليا حاجة مابقى عندها قيمة, بلاما ضيع الوقت على والو, طلبتي سماحة, الله يسامح, ماكاين لاش نزيدو الهضرة و اصلا هاد الحوار خرج على الموضوع و عطيناه اهمية و وقت كثر من القياس. ارثر: هادشي لي كتقوليه عارف ما خارجش من قلبك, عارف بلي باقي كتبغيني كيف كنبغيك.... حبساتو ايلاف و بنبرة قوية: احتارم راسك و عرف بلي كتهضر على عرض وحدة مزوجة, و انا ماغاديش نسمح ليك مازال, صافي خرج عليا مابقينا غادي نهضرو في حتى حاجة مازال. ارثر ناض من بلاصتو: ردة فعلك ا ايلاف بين ليا بزاف الحويج و ها انا غادي نمشي دابا و لكن كوني اكيدة ماغاديش نيمح فيك مازال, و كيفما بغيتيني قبل انت غادي نعاود نخليك تبغيني. ايلاف: غير كتحلم, بلاما تحاول ترجع لهنا مازال. خرج ماجاوبهاش و خلاها كترعد قردات تبقى صامدة قدامو و لكن صافي فاش خرج كاع قوتها مشات, هزات تيليفون. ايلاف: اخخخر مرة تعاودي دخلي هاد السيد عندي و الا جا مرة اخرى جريو علييه. و قطعات تيليفون و هي مازال كترعد, ناضت شربات الما ة رجعات كلسات في بلاصتها......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM