الحامي ❤️ الجزء 53 بقا واقف مصدوم نوعا ما من الحركة الي دارت...معنقاه و حاطة راسها على صدرو و كتبكي بصوت عالي...كأنها كتستنجد بيه شادة فالتيشورت ديالو من الجناب و مزيرة عليه...بقا ساجد واقف مدة بدون حركة...هز يدو ببطء و حطها على ظهرها...جرها بشوية للسيارة ديالو و هي مزال مخشية فيه... حل لباب بعدها عليه و دخلها للوطو...سدو و رجع للدار...بقا كيقلب حتا دخل لبيت الي كانت فيه بانا...لقا فيه هاداك مجبد فلرض و الدم تحت راسو...حركو برجلو بان ليه مغيب...ماكرهش كون كان فايق ابرد فيه غير أعصابو...دار خارج جبد الفون عيط على الشرطي صاحبو...عطاه العنوان طلع للوطو و ديمارا...تلفت عند بانا لقاها متكية على جنب... شعرها مغطي وجها نزل عنيه ليديها...كانو مجرودين و عامرين تراب...زير على الفولون بيديه و ضار كيشوف فالطريق...بعد مدة كان قدام الڤيلا حل ليه العساس الباب و دخل...وقف السيارة و خرج ضار للجهة لاخرى حل لبانا لباب...هزات راسها بتثاقل حطات رجلها فالخارج كيف وقفات حسات بالدنيا كضور بيها و الرؤية مضببة...لاحت يديها جهة ساجد و غيبات...شد فيها جات طايحة على صدرو...دوز يدو على خصرها و هزها بين يديه...دخل مع الڤيلا و طلع للطابق الفوقاني حل بيتو و دخل بيها ديريكت للحمام...حطها فالبانيو برفق خدا الرشاشة و بدا كيخوي الما على رجليها و يديها...بدات كتحل عنيها حتا توضحات ليها الرؤية...شافت ساجد مقرض جنبها و هي تقفز ساجد : ماتخافيش بانا : " بقات كتشوف فيه و عنيها غاديين بالدموع " ساجد : انا غنخرج و خودي راحتك...جبتك لهنا باش ختك ماتشوفكش فهاد الحالة دوشي و ارتاحي غانسيفط ليك الحوايج...منين تكملي عيطي على ختك طمأنيها عليك حط ساجد الرشاشة و ناض خرج...سد لباب دوز يدو على شعرو و على عنقو الي كان مشدود...بقات فيه و حس بواحد كمية الغضب فاش شافها فديك الحالة...ماكرهش كن نحر دوك الجوج...نزل و ركب فسيارتو متاجه للمركز...باغي اتأكد بلي غا يتعفنو فالحبس لمدة طويلة ، كيف خرج ساجد حطات بانا يديها على وجها و كتشهق بالبكا...مزال مقادرة تصدق بلي كانت غادة تعرض للاغتصاب...لو ما ربي حفظها و قدرات تهرب...فاش حلات لباب و لقات ساجد...حسات بحال الى شافت الضوء فآخر النفق...لولا مجيؤو كان ممكن تعرض لما هو أسوأ...حتا لو مكانش على يد دوك الي خطفوها...كان ممكن تلاقى بوحوش أخرى فديك المنطقة الخالية بكات حتا شبعات و مع ذلك...كتحمد الله أن ماوقع ليها الأسوأ...مدات يدها خدات الرشاشة و حطاتها فوق راسها كتغسل وجها و باغة تمحي اي ذكرى لهاد الليلة السوداء من عقلها...حيدات حوايجها كملات الاستحمام لبسات پينوار من الي معلقين حلات لباب و خرجات بانو ليها حوايج فوق سرير ساجد ، چلسات فطرف الناموسية و نشفات جسمها...لبسات حوايجها و طلعات لوسط الناموسية تكمشات فراسها و نعسات ، ساجد كيف كمل الإجراءات رجع للدار...طلع لبيت حل لباب و دخل...بانت ليه بانا ناعسة فوق ناموسيتو...قرب كيشوف فيها كيف ناعسة...هز لغطا من الجنب و غطاها...شاف شعرها باقي فازگ مشا سد البالكون و دار الريدو...خرج من البيت و عيط على ختها حينت عرف مزال مافخبارها والو...طمأنها على بانا بلي بخير و علمها كيف تسالي شي خدمة غترجع للدار ⭐⭐⭐⭐⭐؛ دوزات ليبستيك على شفايفها خشاتو فالصاك و وقفات...لابسة جينز طالع مع ديباردو بينك و فوقو جاكيط...لابسة سبرديلة بيضة نفس لون الحقيبة...خرجات من البيت و هبطات مع الدروج...دخلات لكوزينة بانت ليها عائشة كتقاد لعشا آيات : عويشة هاني خرجت عائشة : " ضارت عندها " فين خارجة...و آش هادشي لابسة ؟ آيات : عادي ياك موالفة نخرج بهادشي عائشة : و لكن دابة راك مخطوبة...خطيبك مغاديش تعجبو طريقة لبسك آيات : ماشي شغلو عائشة : " خرجات عنيها فيها " أويلي على الحمقة...نتي ما ديال زواج...غتخرجي للراجل عقلو بحال والو ارجعك لينا من النهار اللول آيات : الي ماقابل بيا كيفما انا...ما عندي ماندير بيه...غا نتعطل عليه راه كيتسنا فالخارج عائشة : فين غاديين ؟ آيات : غنتعشاو على برا عائشة : راكم غير مخطوبين...نقصو شوية من لخروج آيات : صافي انا نقول ليه مخارجاش عائشة : شو على الموصيبة غير مسببة...سيري خرجي خرجتي ليا لعقل...و ماتعطليش آيات : " باستها فخدها " ماغاديش نتعطل عليك الحبينو...عارفة الدار بلا بيا كتجيك مغولة عائشة : " كضحك " الله اعطيك شي عقل آيات : " خارجة " العقل خليناه لماليه حلات آيات لباب و هو ابان ليها أمير واقف جنب اللوطو...و بنت جيرانهم واقفة معاه كتكركر...عقدات حجبانها و قربات عندهم ناوية تنتفها آيات : " كتشوف فيها " كاين شي مانقضيو ؟ ....... : آيات لباس عليك ؟ آيات : حسن منك أمير : آيااااات آيات : " ضارت شافت فيه " شنوو...لاش واقف مع هاد خيتي ؟ ........ : كنا كنعرفو بعض شحال هادا آيات : " هزات حاجبها " ياااك...مزيان الله يسر ضارت راجعة للدار و هو اجرها أمير من دراعها...بغات تغوت و هو اخنز فيها...جرها دخلها للوطو و ضار ركب...ديمارا خارج من الدرب و خلا لاخرى واقفة كتشوف...بقات آيات ساكتة و مربعة يديها...شافتو مغاديش اهضر و هي ضور عندو... آيات : كنتي مع ديك الكلبة*** ؟ أمير : من نيتك كتسولي...ماشي حينت قالت كنعرفو بعض راه كنت معها أمير : مغاديش نستغرب...راك مدوز منهم عداد...عارف هاديك مكاين شي واحد فالحي متصاحباتش معاه...و منين مابقاش بان ليها فيهم انتاقلات لمالين لحديد...كلشي عارفها شنو كتسوا...دابة غتمشي تقول ليهم كنت كنعرف خطيب آيات أمير : و تقولها حنا سوقنا فشي حد...انا معاقل حتا على سميتها...شفتها شي جوج مرات فاش كنا كنقصرو فالكلوب...كانت كتجي مع واحد صاحبنا آيات : شافتك مع لبنات ؟ أمير : و شنو...غنكون مع الدراري مثلا ! آيات : تفووو عليكم أمير : " حبس لفران و ضار عندها " آيات متجبدنيش...انا ماشي خبيت عليك شي حاجة معاود ليك على شنو كنت كندير...مادريش بحال الى كنت مخبي عليك...و هادشي كان شحال هادا قبل حتا ما نمشي لأمريكا آيات : " الصمت " شافها سكتات و هو اديماري...غاديين فصمت حتا واحد فيهم مابقا هضر...وقف اللوطو شافت آيات فين كاينين و هي تنطق آيات : لاش جايبني لهنا...رجعني للدار أمير : " حل لباب " نزلي كان داخل للدار...ضار بانت ليه باقة فاللوطو تنهد و رجع جرها معاه...طلعو لفوق لبيتو حل لباب و دفعها للداخل...بقات واقفة و جامعة فمها بحال الدراري الصغار...حيد الجاكيط ديالو لاحها فوق الفوطوي و چلس أمير : آجي چلسي آيات : مابغيتش نچلس أمير : آياات بلاما تكبري الموضوع...آجي بقات كتقرب بشوية و چلسات فالجنب لاخر ديال الفوطوي بعيد عليه...ضحك و جرها بخفة حتا لصقات معاه أمير : عرفتي منين كتكوني مغوبشة...كتشعلي فيا لعافية آيات : " بعدات وجها عليه " تجامع اسي...حنا فين و نتا فين أمير : بغيت نعرف واش مثيقاش فيا...واش انا الى غندير شي حاجة غنديرها قدامك حماقيتي انا شفتك تعطلتي خرجت من اللوطو...و ماعرفتها منين خرجات ليا...كيف قالت ليا السلام و نتي تخرجي من الدار آيات : كنت ناوية نشطب بيها الدرب على طولو...من صغري مكنحملها...كانت كتغير مني حينت شعري حسن من شعرها...عندها شطابة و دايرة ليها لون زعفران بحال الهوارات أمير : هههه واعرة مع راسك آيات : و شنو...كلشي الدرب كيحتارموني و عاطيني التيقار أمير : نتي كيف الكمشة و كيخافو منك! آيات : ماتحگرنيش...الي جبداتني تلقاني...واخة نعرف دقة فيها و دقة فيا...لمهم مانسمحش فحقي أمير : " دور يدو على خصرها " أااححح على مشيشتي الشرسة آيات : هو الصراحة كيخافو من نجم الدين ههههه أمير : هههههه بقا أمير كيقرب و عنيه مابين عنيها و شفايفها قاس نيفها بنيفو و غمض عنيه كيستنشق ريحتها...ميل راسو شوية و قعو في المحضور انتاقلو من قبل هادئة لعلاقة جسدية هز أمير راسو و شاف الدموع هابطين من عنيها غطاها بليزار قبل راسها و ناض...لبس البوكسر و دخل للحمام...وقف مزير على عنيه و كاره راسو...منضر آيات و دموعها كيطيحو بدون صوت ضرو فقلبو...حل الرشاشة دوش لوا عليه فوطة و خرج...بقا واقف مبلوكي فاش شاف السرير خاوي...خرج عنيه فنقاط الدم للحظةو مشا بسرعة للدريسينغ لبس شورط و هبط كيجري...بان ليه لباب محلول و هو اجري بسرعة...خرج من الڤيلا و هي تبان ليه آيات غادة فالشانطي...عيط عليها تلفتات شافت فيه و هي تبدا كتجري...سمع الصرخة الي طلقات قبل ماطيح فوسط الشانطي...جرا عندها كيف وصل هزها من لرض آيات : " كتركل ليه " هبطنييييي أمير : آيااااات هداااااي آيات : حطنيييييي...ماتقيسنييييش أمير : " خافها تضر و هو احطها " هاني حطيتك غير هداي و ماتجريش آيات : " شافت فيه و عنيها محجرين بالدموع " آخر حاجة كنت باغة ندير هي نعس معاك فالحرام...واخة كنموت عليك لكن كنت باغة نسلمك راسي و انا مراتك...ماشي بهاد الطريقة و بالتخبية...حاسة بلي خنت ثقة ماما و بابا و نجم الدين...مغاديش نلومك حينت حتا انا ليا يد فهادشي...دابة خليني نمشي لدارنا ارحم ليك الوالدين أمير : " جرها عنقها " سمحيليا...حسيت براسي فهاد اللحظة أكبر مكبوت على وجه الأرض...الوحيدة الي كان خاصني نحافظ عليها...خليتها تحس بأسوأ شعور " كيزير عليها " سمحييي لياااا آيات : " انفاجرات بالبكا " أمير : " كيبوس فراسها " ما نقدرش نخليك تمشي فهاد الحالة هزها و تم راجع للدار...طلع مع الدروج و دخلها لبيت آخر...حطها فوق الناموسية و چلس جنبها هز يدها عندو و قبلها آيات : خاصني نرجع للدار أمير : غنتاصل بشروق تقول لماماك غتباتي عندها...و باتي هنا...نعسي فهاد لبيت و انا غادي نعس فلاخر " دوز يدو علي شعرها " الى حتاجيتي شي حاجة عيطي عليا ناض أمير خرج من البيت و بقا واقف من ورا الباب شحال...عاد دخل لبيتو مشا هز ليزار و خشاه عندو فالپلاكار...لبس تيشورت و خرج لبالكون شعل گارو و جبد الفون اتاصل بشروق بقات آيات متكية شحال و هي تنوض...دخلات للدوش حيدات حوايجها بان ليها السليب فيه الدم و هما انزلو دموعها مرة أخرى...بدل تكون أول ليلة ليهم هي من أسعد اللحظات...صدقات ليلة الندامة و تأنيب الضمير دوشات لبسات پينوار و خرجات...تخشات فالناموسية نعسات على جنبها و تغطات...بعد مدة عاد تغمضو ليها عنيها 🍁🍁🍁؛ بقات كتشوف فالشخص الي واقف عند رجليها...ضار عندها كيشوف فيها بطريقة غريبة خلاتها ممرتحاش...حاولات تنوض و هي تحس بألم فكاحلها...عضات على شفتها و هي شادة فرجلها...شافها و هو الوح الغصن و قرب عندها...چلس على شكل القرفصاء و نطق بصوتو الخشن .......... : " مد يدو لعند رجلها " ' Are you okay ' ( واش نتي بخير ؟ ) قمر : " هربات رجلها " ' Don't touch me ' ( ماتقسنيش ) .......... : " شاف رجلها حمرا " ' Your ankle is injured ' ( الكاحل ديالك مضروب ) قمر : ' You helped me thank you...you can go now ' ( ساعدتيني شكرا...امكن ليك تمشي ) .......... : " باصرار " ' I can't leave you here by yourself...It's dangerous ' ( مايمكنش ليا نخليك بوحدك هنا...خطر عليك ) قمر : " بعصبية " ' Just go ' ( غير سير ) اففف على لصقة...يجي نجم الدين اجمعني انا وياه سمعاتو كيضحك و هي تهز عنيها فيه و خنزرات... ......... : آخر حاجة كنت نتوقعها هي نتلاقا بمغربية فوسط غابة فجنوب إفريقيا هههه قمر : " خرجات فيه عنيها " نتا مغريبي !! ......... : الا غير كنهضر بالدارجة هههه قمر : " ميقات فيه " بزعطا ......... : " تفرشخ بالضحك " ههههه ناري شحال توحشت هاد المصطلحات...10 سنين ماسمعت الدارجة قمر : شكون نتا و شنو كادير هنا ؟ ......... : " جبد الشارة الي لابس على شكل سنسلة " الرقيب يامن...ماشي قطاطعي و لا قتال...باش ما تخلعيش قمر : واش داك الحيوان مات ؟ يامن : الى ماماتش غادي ياكلوه قمر : هااا ؟؟ يامن : علاش داخلة للغابة بوحدك ماخفتيش هادا ماشي المغرب...گاع الحيوانات البرية تقدر تصادفي معاهم قمر : كنت كنتمشا و ماردتيش لبال بلي بعدت و منين بغيت نرجع تودرت يامن : يالاه نخرجو من هنا راه طاح الظلام قمر : " حاولات توقف على رجلها و مقدراتش " آااي يامن : ممكن نعاونك قمر : " كتحرك يديها " لا لا لااا يامن : راه الى فورصيتي عليها غادي ضرك كثر و بحال والو ازيد الضرر تحدر هزها قمر ما دوراتش يديها على كتافو...و كتدعي اخرجها من هنا و امشي قبل مايرجع نجم الدين...كانو قراب من الدار غير بانت ليها و هي تفرح قمر : صافي غير حطني هنا يامن : خاص نديك للعيادة...كاينة وحدة قريبة من هنا قمر : لاااا غير حطني و سير كيف كملات جملتها و هي تسمع محرك السيارة ضارت بالعرض البطيء شافت نجم الدين هابط و كيشوف فيهم...من ملامح وجهو عرفات بلي قفراتها بالمعقول...تنطرات من يامن و وقفات على رجلها واخة حاسة بالألم قرب عندهم نجم الدين كيف وصل هبط على يامن لفكو...خرجات قمر عنيها و بدات تصفار و تخضار يامن : " كيحك فالفك ديالو " شرفتي و مافقدتيش اللمسة ديالك نجم الدين : واش الحمار باغي نوضها معاك قمر بقات كتشوف فنجم الدين الي قليل فين كيخسر الهضرة...خاصة قدامها و زادت استغربات فاش شافتهم كيهضرو بحال الى كيعرفو بعض يامن : مالك جاي حامي نجم الدين : نتا هاز مراتي بين يديك و باغي نصفق ليك يامن : " شاف فقمر " هادي مراتك !! نجم الدين : " جرو عندو من لكول " و شوف فيا انا...عشتي فالادغال مع الحيوانات حتا وليتي بحالهم يامن : وا أردا الله يهديك...راه ماكنتش عارف بلي مراتك...و غير عاونتها حينت لوات رجليها و هي هاربة من الثعلب ديال الغابة نجم الدين : " ضار شاف فقمر بنضرة قاصحة " و نتي شنو داك لشي غابة ؟؟؟ قمر : أا...ك كنت كنتسناك منين تعطلتي خرجت كنضور و دخلت مع الغابة بلاما نرد لبال...بغيت نرجع و انا نتلف...و خرج ليا داك الحيوان هربت و تبعني...و فاش طحت كان جاي ليا و هادا ضربو...لويت رجليا و ماقدرتش نمشي...و هادا هزني واخة قلت ليه لاا يامن : يامن...سميتي يامن ماشي هادا قمر : " كتغبن " هئ نجم الدين : مالكي ؟ قمر : هئ رجلي ضراتني نجم الدين طلق من يامن و هبط كيتفحص رجلها...لقاها منفوخة و حمرا...وقف و هزها و تم داخل بيها للكوخ... يامن : واش ندخل و لا نتسناك هنا ؟ نجم الدين : " بلاما اضور " بقا تم يامن : واخة اسيدي نبقا فالخارج و ماندخلش للكوخ ديالي...صاحا تارجليت دخل نجم الدين و حط قمر فوق الناموسية...مشا للدوش جاب اناء فيه ماء سخون و فوطة صغيرة...جلس جنبها و بدا كيكمد ليها لبلاصة الي مضروبة فيها...بقات كتشوف فيه كيف ماهزش عنيه فيها و لو مرة وحدة...ناض رجع داكشي للحمام و جاب بومادة...ماسا ليها رجلها باحترافية و عارف شنو كيدير...عاد دار ليها باندة...كمل و هو اوقف نجم الدين : نرجع و نتفاهمو خرج و سد لباب من وراه...بان ليه يامن هبط للشاطئ نزل فالدريجات ديال الخشب و وقف حداه يامن : تزوجتي و ماعرضتيش عليا نجم الدين : نتا غارق هنا و باغي نعيط ليك تجي تبرز يامن : كيداير ساجد جلال و سهيل...توحشت الشلة ديالنا و أيام الجامعة نجم الدين : كلا و فاش ملهي يامن : تبارك الله مرتك عنيها بحال شي غزالة نجم الدين : " عطاه لجنبو " غادي ندفن مك هنا يامن : تكايس راه مضروب فكرشي نجم الدين : شي قرطاسة ثاني ؟ يامن : ضروري عرفتي معامن تلاقيت فآخر مهمة نجم الدين : شكون ؟ يامن : بن يازيد هههه نجم الدين : من لعرس مباقي شفتو يامن : " مصدوم " ماتقولهاش...صخر حضر للعرس...هادا انجاز عظيم...كيصدمني فيه و الله...هو آخر واحد توقعتو اسبقنا و اتزوج اللول...كنت ديما كنقول نتا غتسبق...الشاب المأدب المثالي مرضي الوالدين...ساع سبقك هههه نجم الدين : جاب الله كنتي تماك...اما كن وقعات شي مصيبة يامن : وصلت بكري عرفتك مزال ماجيتي قلت نضرب دويرة حتا كتبان ليا كتجري و تابعها الثعلب...كان عليك توصيها ماتدخلش ليها نهائياً نجم الدين : ماقلتش غادي تمشي ليها...گاع الى خرجات حدها جنب لبحر...الحمل خربق ليها الدماغ يامن : " ضربو بقبظة يدو على كتفو " آشاوا سي اردا غادي اولي أب ههههه...بغيت نزغرت مي مكنعرفش...اندير ليك ديك تزغريتة ديال الهنود الحمر نجم الدين : ديرها نمشي و نخليك يامن : و طلق البشرة اصاحبي...الزواج شرفك مابقيتي ديال جماعة نجم الدين : سير فحالك بغيت نرتاح...مشيت حتا للبلدة على قبل شي وراق سيفطهم للمغرب غدا و جي تعشا معنا يامن : جري عليا ماشي مشكيل...غدا و الله الى جاي...عارفك طباخ و توحشت ناكل ماكلة ديال لمعقول...ماشي أرنب مشوي فالعافية بلا ملحة بلا كامون نجم الدين : ياكما بغيتي ندير ليك الرفيسة يامن : و الله ماكرهت هههه توادع معاه يامن ركب فسيارتو و مشا...رجع نجم الدين للكوخ حل لباب و دخل...مشا ديريكت للكوزينة جبد لي پاط ردهم اتصلقو و قاد الصوص قطع بيبي و لاحو اتشحر مع الصوص...زاد فوقهم لي پاط من بعدما صفاهم...خوا داكشي فطبسيل و بشر فوقو شوية ديال لفرماج...حطو فپلاطو و جابو لقمر حطو جنبها نجم الدين : تعشاي قمر : " شافتو كيف كيهضر معها ببرود " مافياش نجم الدين : باينة ماكليتي والو...تعشاي قمر : و نتا ؟ نجم الدين : أنا ندوش و نقاد ليا شي ساندويش قمر : انتسناك حتا تخرج مابغيتش ناكل بوحدي نجم الدين : راه غايبرد قمر : " هزات كتافها " دوز يدو على شعرو و مشا للحمام...خدا دوش لوا عليه فوطة و خرج...مشا لبس بوكسر كالڤن كلاين و توجه للكوزينة...قاد ساندويش دارو فطبسيل و جا چلس جنبها نجم الدين : " ضار عندها " يالاه كولي قمر : " عنيها فالتين فيه " ذقتها ماعجباتنيش نجم الدين : و شنو بغيتي ؟ قمر : بغيت غير نعس نجم الحين : اوا نعسي قمر : واخة حيدات ليه الطبسيل من يدو و تكات على صدرو...تمخششات فيه حتا كيحس نجم الدين بشفايفها فوق صدرو...شوية طبعات قبلة تحت عنقو شعلات فيه العاااااافية...صرط ريقو و بعدها عليه قادها فبلاصتها... نجم الدين : قمر بغيتي تنعسي و نعسي قمر : " رجع وجها حمرررر و تحجرو الدموع فعنيها " قمر رجع وجها حمرررر و تحجرو الدموع فعنيها...بعدات للطرف السرير و نعسات عاطياه بالظهر...نجم الدين بقا زاگي ماعرف كيفاش حتا تصرف معها هاكة...خاصة فاش الدموع فعنيها و كيف شافت فيه...عرف بلي قفرها معها...هي في مرحلة صعيبة و جابها لهنا باش ترتاح...صدق جارحها بلاما اقصد... و هو عارف قمر كيف عنيدة و عصبية...خاصة مؤخراً كيفاش دابة غايحلها...حك على ذقنو و هو كيشوف فيها صاقلة...مد يدو و حطها على دراعها نجم الدين : قمرر قمر : " بلاما ضور عندو " بغيت نعس نجم الدين : " قرب عندها و حط ذقنو على كتفها " حبيبة سمحي ليا قمر : " تگعدات و دفعاتو عليها " متقربش ليا ابنادم...فوتني عليك بغييييت نعسسس نجم الدين : " كيشوف فيها كيفاش معصبة " ماقصدتش...بغيتك غير ترتاحي قمر : " خنزرات فيه " بغتيني نرتاح مزيان فهمت...و خليني نرتاح اوكي نجم الدين : و ماتنعسيش و نتي مقلقة مني قمر : أاااافففف...عرفتي شنو انا غنمشي نعس فوق الفوطوي هزات مخدتها بغات تنوض و هو اجرها نجم الدين و خشاها تحتو قمر : " كتركل " و بعاااااد منيييي " كضرب فيه " حيد عليااااا خنقتيني و عطيني التيساااااع...من اليوم مباااااقيش نعس حداااك غنعطيييييك بالتيسااااع طول حياتك...و الله نجم الدين : " حط يدو على فمها " شووو ماتحلفيش...انا ماشي مابغيتش بالفرحات عليا...لكن نتي رجلك مضروبة و " زير على فكو " آخر مرة نعست معاك شفتي شنو وقع ليك...آه كنت موحشك فالمدة الي تفارقنا فيها...لكن مكانش عليا ندير فيك ديك الحالة فالصباح فاش شفتك كتمشاي بالسيف كرهت راسي...هادشي علاش مابغيتش نقيسك قمر بقات كتشوف فيه و يدو حاطها على فمها...متوقعاتش اكون عرف واخة حاولات تخبي عليه...لكن كيفاش تقدر تخبي عليه شي حاجة...و هو أصغر تفصيل فيها حافضو...بقاو كيتبادلو النضرات لمدة و هو انزل نجم الدين وجهو عندها...حيد يدو و حط وجهو على وجها بعض لحضات صفاو الخواطر...تقاد نجم الدين فبلاصتو و خشا قمر فصدرو معنقها...بقا كيلعب ليها فشعرها حتا غفات و تبعها حتا هو ⭐⭐ يوم جديد ⭐⭐ حل نجم الدين عنيه كيشوف من بين شفارو...بانت ليه قمر معنقة المخدة و مكمشة فنعستها...قرب عندها و حيد ليها شعرها من على وجها...خشا راسو فعنقها طبع قبلة و ناض...دخل للدوش عمر لبانيو و دار فيه لي برودري دياولها...سد لما و خرج كيتمشا غير بالبوكسر مشا لعند قمر حيد ليها المخدة و لاحها فلرض...خشا يديه من تحتها خصرها و رجليها...هزها غادي بيها للدوش...بدات كتحل عنيها نجم الدين : صباح الحب قمر : " شافتو هازها " أردا فين غاديين رجعني باقي فيا النعاس نجم الدين : باركة عليك من النعاس...عرفتي شحال من ساعة نعستي...دابة خاصك تفيقي و تحصحي قمر : و حطني بغيت نكمل نعاسي نجم الدين : بغيتي نحطك...أوكي تحدر و خشاها فالبانيو بحوايجها...بدات كتغوت و تذمر و عنيها مبوقين بالنعاس و شفايفها باقي منفوخين...ضحك عليها و دخل لبانيو جلس من وراها قمر : " تكات بظهرها على صدرو مغمضة عنيها " نتا خاااايب نجم الدين : عندك الحق انا خااايب...مقلق مراتي انا مانسوااش قمر : ما تهضرش معيا نجم الدين : هههه انا غندوش لحبيبتي و غانتصالحو بدا كيحيد ليها حوايجها حتا بقات بدوپياس قمر كانت نص فايقة نص ناعسة...كتحس بيه كيخوي عليها لما على كتافها و كيمرر يديه فوق جسمها...حسات بيه باسها فعنقها من اللور و هي توگد قمر : " دورات وجها عندو " لبسالات لا...قلتي غدوش ليا صافي نجم الدين : " مبتاسم " و داكشي الي كندير قمر : وا شد فمك عندك نجم الدين : كيفاش...مانبوسش مراتي! قمر : لااا سمح ليا...علاقتنا مابقاتش كيف كانت من اليوم غنتعاملو بحال الخوت نجم الدين : لوااااه النممم قمر : هادا قراري و احتارمو الله اخليك شدها من خصرها بيديه و دورها عندو ولات مقابلة معاه... نجم الدين : عارف راسك قاصح و مغاديش دوزيها ليا بالساهل...و لكن راه شرحنا ليك السبب قمر : " كتميل فعنيها " ماشي على لبارح...غير انا رشقات ليا و صافي نجم الدين : " صغر عنيه " انا تعلمت الدرس منبقاش نعاود قمر : حتا تجيك الفرصة مرة أخرى...و ديك الساع غير عاود نجم الدين : و دابة انا بغيتك قمر : ماشي سوقي نجم الدين : ضسرتي لمك آجي لهنا جرها من قرفادتها و حاولات دفعو و دايرة فيها عزة نفسي...لكن هو مخلاش ليها فين تفنفن...شدها شدة لعما فالظلمة حتا استسلمات ليه ووقعو في المحضور...لكن هاد المرة كان حذر و حاول مايفورصيش عليها دوش ليها و خرجها ملوية فپينوار...حطها فالفراش و رجع يكمل تدواشو ، خرج نجم الدين من الدوش لقاها نعسات...لبس حوايحو سروال گري مع تيشورت بيض...مشا قاد لغدا لأنو فات وقت لفطور...فيق قمر حتا كلات و رجعات كملات نعاسها...جمع نجم الدين الماعن غسلهم و جبد اللحم من الثلاجة...تبل القطع ديال لحم و قاد سالاد و عاصير و أطباق جانبية ، خرج زربية متوسطة فرشها قدام الكوخ...جاب مخاد صغار و مشا شعل الشواية الي فالخارج...كانت ديجا طبلة فالجردة ديال الخشب ملصقة مع لرض هي و كرساها...حط كلشي فالطبلة جاب الطباسل و الكيسان...سمع صوت سيارة قريب...ضار بانت ليه الهامر ديال يامن لونها كحل ماط...نزل يامن و قرب عند نجم الدين يامن : " تسالم معاه " اهاه على الروايح ماعندي مانقول نجم الدين : سير غسل يديك و آجي عاوني يامن : ياك انا الضيف زعما نجم الدين : زيد تشوي گلاك ضيف يامن : " كيقلب بعنيه " فيناهيا مرات خويا ؟ نجم الدين : " شاف فيه " كيف باغي تشوا...طايب مزيان و لا نص نص يامن : و ناري على شوفات...راه غا ضاحكين نجم الدين : ضحك فحوايج آخرين...سيرة مرتي متبقاش تجبدها على فمك يامن : اوكي فهمت...مانبقاش نعاود هههه...و لكن فين هيا ؟ قالها و بعد على نجم الدين...مشا كيضحك غسل يدو حيد الجاكيط و رجع كيعاون نجم الدين... قمر كانت ناعسة كتحلم حتا دازت من نيفها ريحة زوييينة...حلات عنيها فجأة كتشمشم الريحة حمقاتها...لقات راسها ملوية فپينوار خشات رجليها فبالطوفة و مشات طلات من الشرفة...بان ليها نجم الدين حدا الشواية و الدخاخن طالعة...ريوگها نزلو رجعات بسرعة لبسات دوبياس و فوقهم تيشورت كحل و سروال جينز...مشات للثلاجة خدات منها قرعة ديال المشروبات الغازية ، حلات لباب و خرجات غادة و كتفرنس...قربات و هو ابان ليها الشاب ديال لبارح چالس...شافها و لوح ليها بيدو نجم الدين شافو كيشير و هو اتلفت بانت ليه قمر...شار ليها براسو تقرب عندو مشات بالزربة و قفات حداه كتشوف فاللحم نجم الدين : وينو فاقت النعاسة قمر : فيا الجووووووع نجم الدين : ههههه بغيتي سالاد راها فالطبلة اللحم خايب عليك مخاصكش تاكليه قمر : " تغرغرو عنيها " ها ؟؟ نجم الدين : " شافها بغات تبكي و جرها عندو " لا ماتبكيش غير ضحكت معاك...سيري جيبي طبسيل نعمرو ليك ضحكات و مشات للطبلة حطات المشروبات بغات تاخد الطبسيل و هو امد ليها يامن يدو... يامن : راجلك حلف مابغى اعرفنا...انا يامن صاحب راجلك من شحال هادا قمر : " سلمات عليه " قمر العابيري يامن : متشرفين و مبروك عليكم البيبي قمر : الله ابارك فيك هزات الطبسيل و رجعات عند نجم الدين عمرو ليها...تعلات على صباعها و باستو فخدو و هي فرحانة بالأكل...عمر ليه حتا هو و انضمو ليامن...تعشاو فجو الضحك و المشادة بين نجم الدين و يامن...الي فينما لقا الفرصة فين اشد فنجم الدين كيستغلها...عاود لقمر على أيامهم و شنو دوزو فمراهقتهم مرات تضحك و مرة تغوبش خاصة الى جبدو سيرة البنات بقاو لوقت متأخر مساخيينش بداك الجو...جالسين فالزربية جنب شعلة ديال النار...قمر كانت كتسمع ليهم مجمعين حتا غفات و هي حاطة راسها فحجر نجم الدين...تحرك لبرد و كان الوقت متأخر ناض يامن غادي فحالو...توادع مع نجم الدين الي شكرو على اعارتو الكوخ ديالو ، غادر يامن و هو اهز نجم الدين قمر للكوخ...حطها فبلاصتها و ضار تخشا جنبها و نعس ⭐⭐⭐⭐⭐؛ ناعسة و كتقلب من جهة لجهة...كلها عرقانة و كتحرك بحال الى مطاردة من شي حد...قفزات من بلاصتها و غوتات شادة فرقبتها كتحاول تنفس...دخلات صفاء كتجري لبيت منين سمعات غواتها صفاء : بسم الله عليك...غير كتحلمي بانا : " كتكحب و الدموع غاديين " ماقدراش نتنفس صفاء : آجي نخرجو شوية للجردة...باينة شي حلمة خايبة هادي جراتها و خرجو للجردة مشاو لأحد الكراسي...چلسات صفاء بانا صفاء : غانمشي نجيب شي حاجة تلوحيها عليك راه لبرد و نتي عرقانة رجعات صفاء للدار...و بقات بانا بوحدها الي وقتما تفكرات شنو وقع كطلق العنان لدموعها...ماقداش تبكي قدام ختها و لا تعاود ليها كتحاول ما أمكن تصرف طبيعي...لكن الي داز عليها مكانش قليل وقتما سدات عنيها بالليل...كتبان ليها ديك الغرفة و داك الي حاول اغتاصبها...يومين و هي كتشوف نفس الكابوس...حتا كرهات النعاس ساجد واقف فالبالكون ديالو كيشرب...شافها جالسة كتبكي و فاش بدات تمسح فوجها منين شافت ختها راجعة...دارت عليها صفاء كاپ صوفي و چلسات جنبها كدوز يدها على ظهرها خبط ساجد الكاس مع لرض و دخل للبيت...هز الفون و دار اتصال...كمل المكالمة و بقا كيلعب بالفون فيدو ، شوية دخل لگاليري بقا كيشوف فصورتها الوحيدة الي بقات عندو...سيلفي خداوها نهار فازو بأول مشروع مع بعض من بعد الأزمة الي مرات منها الشركة...عرضاتو قمر للغداء على حسابها و تماك كان باغي اعتارف... حتا تراجع مرة أخرى و كانت من أكثر الأشياء الي ندم عليها فحياتو...حس بلي كيخون صاحبو و هو محتافظ بصورتها...دابة هي صارت زوجتو و أم ابنو...و مع ذلك مقادرش انساها واخة كيحاول بكل جهدو...تأمل الصورة لبعض الوقت و ظغط على مسح و تمحات الصورة من الفون ديالو ☀☀ أصبحنا وأصبح الملك لله ☀☀ فاق ساجد بكري هبط لجيم ترينا لمدة ساعتين...طلع لبيتو استحم لبس حوايجو...هز الكونطاكت و هبط...مشا لاكاب صونا فالباب شوية خرجات عندو صفاء صفاء : صباح لخير موسيو ساجد ساجد : صباح لخير...كلمي ليا بانا انا كنتسناها فاللوطو...قولي ليها تلبس و تخرج عندي بلاما اتسناها تجابو رجع للوطو...صفاء دخلات مستغربة عند بانا لبيت...چلسات جنبها و فيقاتها بشوية صفاء : بانااا...فيقي سي ساجد بغاك بانا : " فتحات عنيها " شكون ؟ صفاء : سي ساجد المدير ديالك...قاليك لبسي و خرجي عندو بغاك بانا : " ناضت " باينة غيجري عليا...يومين مامشيت للشركة صفاء : اويلي على غيجري عليك...متقوليهاش حتا بالضحك دخلات للدوش غسلات وجها و سنانهاخرجات دغيا لبسات جينز و تريكو طويل...جمعات شعرها كوت شوڤال و خرجات...بان ليها ساجد واقف جنب سيارتو...قربات عندو حادرة راسها بانا : السلام عليكم...كنعتاذر حينت غيبت هاد اليومين...كنت ناوية نرجع اليوم للخدمة و الله ساجد : شنو جاب لخدمة للهضرة " حل باب اللوطو " طلعي...غاديين لواحد لبلاصة بانا : " مفاهمة والو " ف فين ؟!! بلاما اجاوبها مشا ساجد للجهة لاخرى ركب...شافها مطلعاتش و هو اعيط عليها بصوت عالي حتا قفزات...ركبات و يديها كيترعدو غير بوحدهم...ديمارا ساجد اللوطو و تحرك...بقاو غاديين فصمت بانا بغات تسولو لكن ماقدراتش...بعد مدة وقف ساجد اللوطو جنب بناية كبيرة...حل لباب هبط و ضار جهتها حل ليها لباب ساجد : هبطي بانا : " نزلات و هزات راسها فالبنابة كتشوف فالبلاكة الكبيرة و شنو مكتوب فيها " لاش جينا لهنا ؟ ساجد : ثيقي فيا و يالاه استغربات من هاد الكلمة الي قال...و دخلات معاه بدون تردد...طلعو للطابق الي فيه العيادة...توجه للاستقبال كيف قال ليهم شكون و هو اسمحو ليه بالدخول...ضار عند بانا قال ليها تبعو...توجهو للمكتب الي كان بابو كبير من الزاج...دق ساجد و دخل و بانا من وراه... هز راسو بان ليه ساجد داخل و هو انوض مستقبلو بابتسامة خفيفة...شخص طويل بجسم رياضي ضخم...عنيه كلون السماء أزرق صافي...شعرو بني و حروفو شهبين شوية لكن ملامحو قاسية كتوحي على قوة شخصيتو لابس سروال أسود مع تيشورت قطني بيض تسالم هو و ساجد بعناق رجولي و شار ليه يجلس...دار ساجد عند بانا الي واقفة بعيد و عيط عليها...قربات عندهم حادرة راسها... ساجد : هادي هي لبنت الي هضرت ليك عليها .......... : " مد ليها يدو " مرحبا بيك ساجد : " شاف فبانا " هادا الدكتور ركان السليماني...و هو الي غيساعدك بانا : " مدات ليه يدها مترددة " دكتور !! ركان : باينة ما قلتي ليها والو...انا طبيب نفسي...جابك عندي ساجد باش ندردشو شوية...عاود ليا على شنو وقع ليك...و قلت ليه اجيبك بغيت نهضر انا وياك ...ممكن ؟ بانا : " حركات راسها بآه " ركان : مزيان " شاف فساجد " تسنا فالخارج حتا نعيط عليك ساجد : أوكي خرج ساجد و عارف مخليها فأيدي آمنة...فاش شاف وضعها و بكاءها داك النهار فالجردة...عرف بلي الي وقع ليها مأثر عليها بزاف...داكشي علاش اتاصل بركان الي معرفة قديمة...عاود ليه عليها و طلب منو ركان اجيبها عندو طلب ركان من بانا تچلس فوق الصوفا...چلس مقابل معها و بدا كيسول فيها...بدا بأسئلة عادية بحال فين خدامة معامن عايشة...حتا تطلقات معاه مشا داك الجليد و بدات كتهضر عادي...نساها واش هو طبيب نفسي و باغي اكشف على حالتها...سولها على النهار الي تخطفات فيه شنو وقع و طلب منها تعاود ليه كلشي بالتفصيل...بدات بانا كتعاود و الدموع هابطين على خدودها...مد ليها ركان علبة كلينيكس و مركز مع كل حاجة قالتها...كيف سالات طرح عليها أسئلة واش كيجيوها كوابيس بالليل...واش ولاو عندها تخوفات من أنها تخرج...أكدات على كلامو بالايجاب بعدما سمع لكلشي عيط على ساجد ادخل حل لباب و انظم ليهم ركان : أحسن حاجة درتي هي جبتيها...الآنسة بانا بنت شجاعة و مغاديش تخلي هادشي اسيطر على حياتها...انا متأكد غتجاوز هاد المرحلة بسهولة...و الى مكانش عندك مانع...ممكن ترجعي عندي مرة أخرى ؟ بانا : " حركات راسها بآه " ركان : مزيان...ارتاحي ليك واحد الأسبوع ممنوع ترجعي للخدمة مغاديش تهرب " شافها كتشوف فساجد " هضرت معاه و حتا هو متافق...سو مكاينة خدمة حتا ترجع بانا القوية الجلسة الجاية غتكون بعد ثلاث أيام أوكي ساجد : شحال من جلسة خاصها ؟ ركان : ماشي بزاف...انا متأكد بانا غترجع كيف كانت...خاصها غير مساعدة صغيرة خدا ركان الفيكس و عيط على المساعدة... ركان : دي معاك الآنسة بانا تعمر شي وراق المساعدة : اوكي موسيو خرجات بانا مع المساعدة و هو اقرب ركان عند ساجد ركان : فين كتعرفها ؟ ساجد : موظفة عندي فالشركة ركان : صافي ؟! ساجد : آه و شنو ؟ ركان : و گاع الموضفين الي عندك كتعاملهم بنفس الطريقة ! ساجد : و نتا مالك...ديها غا فخدمتك...خلينا فالمهم...كيف جاتك حالتها ؟ ركان : البنت باينة انطوائية بزاف...و الي وقع ليها زاد خلاها تغلق على راسها...خاصها شي حد الي شد بيها و اعاونها تخرج من العلبة الي سادة على راسها فيها...حالتها ماشي صعيبة خاص غير تهضر و تفاعل مع الناس باش تقدر تجاوز الي وقع ليها ساجد : ماعندها حتا حد من غير ختها...والديها ميتين و حتا العائلة مكيناش...هي الي خدامة على ختها و ولدها ركان : عندها نتا ساجد : " شاف فيه " شنو كتعني ؟ ركان : ههههه...زعما ها نتا غتوقف معها حينت هي الموظفة ديالك ساجد : باركة من الطنز...البنت بقات فيا و كنعاونها...ماتمشيش بعيد ركان : هاكة كتبدا...كتبقا فيك و تعاطف معها و بعدها كطيح على زنافرك ساجد : باينة طرات ليك و مقسااااح ركان : نكذب عليك وقعات ليا...و تعلمت الدرس بالطريقة الصعبة...لكن ماخرجتش خاسر...عندي فحياتي وحدة الي دات العقل و القلب...بنتي شاهدة ساجد : شفت تصاورها...ماشبهاتش ليك هههه باينة جابت الزين من مها ركان : سير تزمر...عندي مرضى كيتسناوني ساجد : هاهو غادي حل ساجد لباب و هي تبان ليه بانا واقفة جنبو...شافتو و بحال الى تفاجآت...شار ليها براسو امشيو...خرجو من العيادة طلعو فاللوطو و رجعو للدار...حلات بانا لباب و قبل ما تنزل تلفتات عندو بانا : شكرا بزاف على المساعة ديالك...واخة مكانش عليك تدير هادشي كولو...واخة لمجرد موظفة عندك فالشركة هبطات سدات لباب و مشات كتزرب فمشيتها و مزيرة على شفايفها كتحاول ماتبكيش...هو ماعليه حتا حاجة...بالعكس دار كثر من الي خاصو ادير...لكن ماقدراتش تحكم فالشعور السيء الي راودها فاش سمعات حديثو مع الطبيب مستغربة من راسها كيف حسات فاش سمعاتو قال هي مجردة موظفة و عادي اساعدها...شنو توقاتو اقول مثلا...راه هادي هي الحقيقة هي موظفة و هو مديرها...صح قدم ليها لمساعدة شحال من مرة و ممتنة ليه بزاف...لكن علاش حاسة بالغضب من هضرتو...شنو واقع معها ، للحظة نسات كلشي و شغل تفكيرها غير جواب ساجد...دماغها تخربق و حاسة براسها معارفاش شنو كيوقع ليها...مبعدة إحتمال تكون كتحس بشي حاجة من جيهتو...رغم ان الإشارات كلها توحي بذلك...لكنها كتهرب من هاد الفكرة ما أمكن...و باغة تذكر مكانتها شكون هو و شكون هي...كتعاقب راسها بنفسها...كيفاش حتا تجرأ تحس من جهتو بشي حاجة 🍁 بعد مرور عدة أيام 🍁 كان كيجري فالتريدميل و حاط لآيباد قدامو كيقرا فالتقارير...صونا الفون شاف المتصل و هو اوقف الآلة...جاوب على الفون و هز فوطة صغيرة كيمسح بيها وجهو بدر : وي ؟ نجاة : فين كاين ؟ بدر : فلاصال نجاة : ديك الساع منين غادي قولها ليا...نتلقاو تماك بدر : راك عارفة ماعنديش وقت محدد...وقتما كان عندي وقت خاوي كنجي ليه نجاة : آه فهمت...اليوم عندي خاوي بالليل...نمشيو نتعشاو فشي بلاصة زوينة بدر : الواليدة باغة تعرف عليك نجاة : " بفرحة " بالصح !! حتا انا متشوقة نتعرف عليها بدر : صافي لعشية غاتمشي معيا للدار نجاة : أوكي...نخليك تكمل باي حط بدر لفون و توجه لغرفة التبديل...دوش و بدل لبس سروال كحل مع تيشورت بيض بلا كمام...نشف شعرو هز الحقيبة ديالو جمع فيها كلشي و خرج...ركب فسيارتو و اتاجه للمستشفى حط اللوطو و غادي داخل مع لباب...لمح شروق من بعيد كتمشا بسرعة و شعرها الأشقر كيلعب بيه الريح ، بقا كيشوف فيها شحال و ماحس برجليه حتا داوه عندها...يالاه بغات تحل لباب ديال سيارتها و هي تسمع اسمها...ضارت شافت بدر و تصرفات عادي بدر : شنو كاديري هنا...جيتي تشوفيني ؟ شروق : للأسف لا بدر : وايلي و شنو عندك هنا ؟ شروق : جيت على حساب التحاليل الي درت بدر : آشمن تحاليل ؟؟ شروق : " هبطات راسها " قالو ليا عندي لوكيميا بدر : " خرج فيها عنيه " شنووووو ؟؟ ل لوكيميااااا شروق : " شافت وجهو و مقدراتش تحبس الضحكة " هههههههه...ناري وااااع...خاصك تشوف وجهك فهاد اللحظة...غا ضحكنا معاك...جيت شفت الطبيبة ديالي و درت فحص عادي هههه كيف كملات هضرتها قرب عندها...شد فدراعها و زدحها مع اللوطو و يديه مزيرين عليها هزات عنيها فيه لقاتو رجع حمر و عروق يديه منفوخين بدر : نتي كلشي عندك ضحك...صدقتي مبرهشة مع راسك...و هادشي علاش مايمكنش نشوف فيك ك امرأة شروق : " بلعات الغصة " مبرهشة و عاجبني راسي...على الأقل كنتصرف على طبيعتي و كاين الي عاجباه هاكة...ما محتجاش نبدل من راسي على قبل حتا واحد...و أحسن حاجة درت هي تجاوزت شعوري اتجاهك و وافقت على عرض جواد بدر : " بين سنانو " شنووو ؟؟؟ شروق : " بابتسامة " جواد عرض عليا الزواج و أنا وافقت...لعقوبة ليك نتا و هاديك الطبيبة بدر : " بقا كيشوف فيها مصدوم " كيفاش مخطوبة ! كتفلاي و لا شنو ؟ شروق : " نطرات يدها " و علاش غنتفلا الزواج ماشي ديال الضحك...و كنتمنا من هنا لقدام تحضي تصرفاتك معيا...وليت مع شخص آخر و ماعندكش الحق تشد فيا...خليت ليك الراحة دكتور بدر ضارت حلات باب سيارتها و طلعات...ديمارات و زادت مخليا بدر متبع ليها العين...مامصدقش الهضرة الي قالت ليه و لا كيف تصرفات معاه عرف بلي غلط فاش قال ليها ديك الهضرة لكن مابغهاش تضحك فموضوع جدي بحال لمرض هو من الخوف الي حسو من جهتها خلاه اقول ديك الهضرة امكن فات الحدود فاش تصرف معها هاكة...و بغا اعتاذر حتا لقات عليه خبر خطوبتها من شخص آخر...هنا عرف و تأكد ان الي كيحس بيه من جهتها ماشي مجرد فضول او إعجاب...فكرة تزوج من واحد آخر خلاتو اعرف شنو نوعية الشعور الي كيحس من جهتها...هاد المرة قلبو الي طغى على عقلو و وصل ليه إحساس انو هي شخص مهم فحياتو لكن واش فات الأوان على هادشي...و مع ذلك هو مستحيل اخليها تزوج من غيرو...دخل للمستشفى و دماغو مبلوكي...كيفكر كيفاش حتا اخرج من هاد الوضع بلاما اجرح وحدة و لا افقد ديك الي بغا...خاصو اتصرف قبل ما نيت افوت الفوت ⭐⭐⭐⭐⭐؛ بعدما دوزر أيام عديدة فكايپ تاون...أيام حلوة و أيام مرة...بعد لمرات كيكونو سمنة على عسل و بعد المرات مشادين...خاصة بسبب التقلبات المزاجية ديال قمر...نجم الدين ولى غير كيسايس معها و كيتجنب اقلقها حينت هو الي غيعاني جمعو حوايجهم و شدو الطريق للمطار...كان يامن تماك عطاه نجم الدين السوارت و شكرو...ودعوه و دخلو وصل وقت رحلتهم...دازو من الإجراءات و صعدو على متن الطيارة...بعد ساعات طويلة وصلو للمغرب...خرجو من المطار لقاو أحد موظفي نجم الدين جاب ليهم السيارة مد ليه السوارت و غادر...حط نجم الدين الشانطات فالكوفر و طلع...ضار شاف فقمر الي كانت متكيا على الكوسان سادة عنيها و حالة فمها...ابتاسم و قرب عندها باسها حتا غوتات قمر : آاحح قسحتيني نجم الدين : و جمعي فمك الى مابغتيش نقسحك " غمزها " قمر : " زيرات على شفايفها " هاهو...هاپي نجم الدين : ههههه شحال كيوووت...غير ديال لعضان قمر : وليتي متوحش غير كتعض نجم الدين : " تنهد " ماشي لخاطري قمر : هاد المرة تعاودها...نعضك حتا انا نجم الدين : عضي بوسي ديري الي بغيتي ماعنديش موشكيل هههه بقا شاد فيها باش متنعسش حتا وصلو للدار جات سارة خدات الحقائب طلعاتهم...شد نجم الدين فيد قمر و طلعو لبيتهم...كيف حل لباب بقا كيشوف فيها و مراقب رد فعلها...آخر مرة كانو هنا وقعات بيناتهم المشادة و كان غيطيح ليها لبيبي...بانت ليه كتشوف فالبلاصة الي نزفات فيها و لمعو عنيها بالدموع...جرها عندو و عنقها نجم الدين : " كيهمس حدا وذنها " نساي...من اليوم فصاعداً نخلقو غير الذكريات الزوينة...و طول ما انا حي غنحارب على قبلك و على قبل هاد العلاقة...و نسيك فالذكريات السيئة قمر : " دورات يدها على كرشو " حتا انا غاندير ما فجهدي باش نحافظ عليك و على ولدنا...و مغادي تفرقنا الا الموت نجم الدين : " زير عليها " حتا الموت مغاديش تفرقنا بعد عناق طويل و قبل لطيفة دخلو دوشو...و نعسو من تعب الطريق مافاقو حتا لليوم الآخر ناض نجم الدين بكري قبل قمر و قادها فبلاصتها...لبس حوايج الخدمة هبط فطر و اتاجه للشركة دوز النهار كولو مابين اجتماعات و الخدمة الي كانت كتسناه...كيف كمل اتاصل بقمر قال ليها توجد راسها...غيجي ليها و امشيو لدارهم وصل نجم الدين لقدام الڤيلا و صونا عليها خرجات عندو قمر لابسة سروال مع قبية كحلا و عريضة...ففترة الحمل كتلقا راحتها فالحوايج الواسعين...طالقة شعرها و دايرة مايكاپ خفيف...حلات لباب و طلعات باست نجم الدين من خدو و تحركو...وصلو للدار خرجو من السيارة و شد فيها من خصرها كلشي خارج كيطل و عاطينها للتبرگيگ... حل لباب و دخلو خرجات عندهم عائشة كتعنق و تبوس...خاصة قمر مبغاتش طلق منها...دخلو للصالون فين جالس عبد الرحمان...سلمو عليه و چلسو مجمعين حتا نطق نجم الدين نجم الدين : فيناهيا آيات ؟ عائشة : فبيتها...هاد الأيام غير سادة عليها...و قليل فين كتجلس معنا...حتا داك لهبال مابقاش فيها...زعما تكون دارت عقلها نجم الدين : انا غنطع عندها قمر : نمشي معاك ؟ نجم الدين : " مد ليها يدو " يالاه طلعو بجوج بدا كيدق نجم الدين فالباب شوية و هو اتحل...شافت فيهم آيات و تبسمات ابتسامة خفيفة...نجم الدين بقا كيشوف فيها شحال حتا تلاحت عليه عنقاتو...بادلها العناق كيضحك حتا سمع صوت بكاها و هو ابعدها قابلها معاه نجم الدين : مالكي ؟ آيات : توحشتك هئ نجم الدين : هادشي علاش كتبكي ؟ آيات : " حركات راسها بالإيجاب " نجم الدين : متأكدة ؟ آيات مقدراتش تشوف فيه مزال...رجعات عنقاتو و كتحاول تحبس دموعها لا يحس بلي شي حاجة واقعة نجم الدين : " كيمسح على شعرها " بكاية...نتوما بجوج كتر فيكم البكا بعدات عليه آيات و سلمات على قمر...مسحات دموعها و هبطات معاهم...تجمعو على العشا قمر عجبها الأكل كلات حتا تكوانسات...تلفتات كتشوف فنجم الدين بان ليها حاضي آيات الي غير كتنقب و ساهية...حتا قمر حسات عليها بلي بيها شي حاجة...كملو عشاهم استغلات قمر ان نجم الدين مجمع مع باه... جرات آيات و طلعو لفوق لبيتها...سدات لبيت و جراتها چلسو فوق الناموسية قمر : مخاصمة مع أمير ؟ آيات : لا قمر : و مالكي...شنو واقع ؟ آيات : والو قمر : مايمكنش...أكيد شي حاجة واقعة...و الكل حاس غير من تصرفاتك و حالتك ماشفتيش الهالات الي تحت عنيك و وجهك الي شاحب...شعرك باينة فيه شحال هادا ماغسلتيه...هادي الي قدامي ماشي آيات الي كنعرف...و حتا نجم الدين لاحظ...طول لعشا و هو حاضيك آيات : " نزلات دمعة من عنيها " انا و أمير صافي سالينا قمر : شنووو...علااااش بالسلامة ؟ آيات : " الصمت " قمر : شوفي الى ماهضرتيش غانمشي عندو هو نسولو آيات : " كتبكي " الغلطة ديالي...انا الي مامنعتوش هئ حتا وقع الي وقع قمر : " مصدومة " ش شنوو وقع ؟؟ آيات : نعست معاه قمر : " بقات غير كتشوف فيها " امتا هادشي ؟ آيات : سيمانة هادي قمر : عاودي ليا بالتفصيل شنو وقع...كيفاش و امتا يالاه آيات : " عاودات ليها على الي وقع " قمر : و شنو قال ليك هو من بعد الي وقع آيات : مقال والو...منين صبح لحال جابني للدار و مشا...يومين و انا سادة عليا حتا لخدمة مامشيتش ليها و طفيت الفون ديالي نهار شعلتو لقيت لي زاپيل ديالو...و كنت كنتسنا اصوني مرة أخرى...لكن 5 ايام هادي و معاودش اتاصل قمر : الى عاتبتك مغادي تغير حتا حاجة...لكن هادشي مغاديش ابقا هاكة...انا الي غنتصرف آيات : " شدات ليها فيدها " پليز مابغيتش نجم الدين اعرف قمر : نتي حمقة...نقولها ليه باش امشي اقتلو...بغيت نعرف حاجة وحدة...واش كتبغيه و باغة تكوني معاه ؟ آيات : " حركات راسها بآه " قمر : أوكي...و دابة نوضي ضربيها بتدويشة و جمعي عليا خناينك...ماشي هادي هي آيات الي كنعرف...مايمكنش نصلحو غلطة بغلطة أخرى و هداك ليا معاه هضرة أخرى آيات : " عنقاتها " من ديما كنت كنقول ما محتاجة لا أخت و لا صديقة...لان نجم الدين كان ديما فجنبي...لكن من بعدما وقع هادشي لقيت راسي بوحدي...مانقدرش نعاود ليه على شنو وقع و بلي خدلت ثقتو...حسيت بالخنقة حتا هضرت معاك...دابة عاد عرفت نجم الدين علاش كيبغيك لهاد الدرجة...نتي غييير الصورة الي خديت عليك قمر : انا عندي أخت و من ديما كنت كنحس بالوحدة...سو عارفة شعورك...من اليوم حسبيني ختك الكبيرة و انا غندير نفس الشيء...و اي حاجة مثقلة عليك انا هنا...يالاه مسحي دموعك آيات : " كتمسح فوجها " شكرا قمر : نتي أخت حبيبي و اي حاجة كتخصو غانبغيها و نحميها...خاصة نتي ماكتعرفيش شحال كيهضر عليك...قال ليا هو الي كبرك حتا ولفتيه كثر من والديك...و وليتي تلصقي فيه فينما مشا ههه آيات : نجم الدين هو مثالي الأعلى...هو خويا و بابا و صاحبي...من الحوايج الي خلاوني نكرهك فالأول هو بوعدو عليا فاش دخلتي لحياتو...حتا فاش كان مع ناهد مكانش كينساني...لكن نتي تلفتي ليه الجرية و ولى غير تابعك و نسا كلشي قمر : فقيهي صحيح هههه آيات : ههههه قمر : هانتي ضحكتي...و نوضي دوشي خنقاتني ريحتك...و جمعي بيتك ريحتو بحال ميتة شي جيفة ميتة آيات : و لا تزيديش فيه...بيتي بزاف عليك قمر : بغيت نجبدك و دغيا شعلتي هههه آيات : " داخلة للحمام " فراسك واحد الحاجة قمر : شنو ؟ آيات : غلاضيتي " سدات لباب " قمر : " حلات فمها " واخة على مك...راه حاملة زعما...عادي اتزاد الوزن ديالي...انا جاية نفوج عليك و نتي باغة تنكديها عليا خرجات قمر من البيت و هبطات عندهم...بقاو جالسين شوية و هما انوضو غاديين... عائشة : و باتو هنا نجم الدين : لا غير خلينا نمشيو " شاف آيات نازلة من الدروج " كنت طالع عندك آيات : هاني جيت أحبيبي...غاديين ؟ نجم الدين : اممم " جرها درعها " صاڤا ؟ آيات : " مبتاسمة " بخيييير العشير نجم الدين : " باس جبهتها " هادشي الي بغيت آيات : شوف مراتك كيف كادير فينا تلفت نجم الدين و هي تبان ليه قمر كتشوف فيهم و معبسة...طلق من آيات و مشا عند قمر عنقها نجم الدين : الحب ديالي غارت هههه...الله اعاونكم جر قمر خرجو و طلعو فالسيارة راجعين للدار...وصلو و طلعو ديريكت لبيت...خلات قمر نجم الدين حتا دخل للحمام...هزات الفون و اتاصلات بأمير...دارت تلاقى معاه غدا و قطعات...بدلات عليها لبسات شوميز فالمارون و تخشات فبلاصتها...خرج نجم الدين لابس شورط فقط...هز لبيسي و تكا حداها...بقا خدام فيه تلفت بانت ليه قمر نعسات...بقا حتا كمل خدمتو حط لبيسي طفا الضو...جر قمر عندو عنقها من اللور و نعس ☀☀ يوم جديد ☀☀ چالس نجم الدين على طبلة ديال الفطور...هز الفنجان كيشرب فقهوتو و كيقلب فالفون سمع خطواتها هز راسو و هي تبان ليه قمر هابطة مع الدروج...جرات كرسي و جلسات جنبو... نجم الدين : علاش فايقة بكري ؟ قمر : عندي بزاف مايدار هاد النهار نجم الدين : بحالاش...ياك الموعد مع الطبيبة عندك غدا قمر : بغيت نمشي نشوف شروق و نديرو شوپينغ...شحال هادا ما شريت شي حاجة نجم الدين : و ردي لبال لراسك قمر : اوكي نجم الدين : " وقف " خاصني نمشي...فطري بشوية عليك و خلي الفون حداك قمر : مافياش غا نشرب غير عاصير نجم الدين : ضروري تفطري كيفاش مافيكش ! قمر : نجم الدين واش بصح غلاضيت ؟ نجم الدين : علاش هاد السؤال...و گاع الى غلاضيتي راه عادي قمر : " بحزن " يعني غلاضيت نجم الدين : " جرها حتا وقفات " واخة تولي دبوزة غتبقاي أجمل وحدة فعنيا...نتي حاملة و طبيعي اتزاد وزنك شوية...ماتخليش هادشي ياثر عليك و ماتحاوليش تنقصي الماكلة " حط يدو على كرشها " ماشي غير بوحدك الي كتاكلي...حتا هو خاصو اتغدا باش اكبر فأحشاءك...يالاه جلسي و فطري مزيان...كن ماكنت زربان غنوقف عليك حتا تاكلي قمر : " بابتسامة " صافي غا نفطر كيف قلتي ليا " تعلات على قرون صباعها و باستو فمو " هادي للحظ نجم الدين : " شدها من فكها و زير حتا خرجو شفايفها و باسها بالجهد " احح هادي هي الي غدوز ليا النهار قمر : " حاطة يدها على فمها " وحش نجم الدين : " ضربها على طرمتها " حتا نرجع و نوريك الوحش كيف داير خرج طلع فسيارتو و اتاجه للشركة...چلسات قمر و فطرات على خاطرها...طلعات بدلات حوايجها هبطات خدات سيارتها من الگاراج و خرجات...توجهات لدار أمير حلو ليها لباب و دخلات...هبطات من اللوطو و هو ابان ليها أمير چالس فالجردة...مشات عندو هو غير شافها وقف و حل يديه مستقبلها بابتسامة وصلات عندو و نزلات عليه بصفعة لوجهو خلاتو مصدوم قمر : هادي هي الرجلة ؟! أمير : " مخرج فيها عنيه " شنو واقع...مالكي جاية شاعلة ؟ قمر : شوف نتا...شنو فنظرك الي غيخليني نتصرف هاكة ! أمير : ماعرفتش علاش كتهضري ؟ قمر : كنهضر على آيات...آيات خطيبتك خت راجل ختك...الي ثاق فيك و خلاها أمانة عندك باش تحميها و تكون معها راجل...ساع صدقتي شماتة أمير : ماشي كيف فهمتي قمر : شنو غنفهم ها...شنووو...مافيك ماتصبر حتا تزوجو...ولا غرضك غير فداكشي...منين هاكة عطي التيساع لبنت و سير رجع لعاداتك لقدام و نعس معامن بغيتي حتا حد مغادي احاسبك...لكن باش ضحك عليها هي...هادي مغاديش ندوزها ليك...و انا براسي غنتكلف بيك...غنخليك على الضس و ندخلك من فوقها للحبس كتسمع أمير : آش كتخربقي...نتي فاهمة الموضوع غلط...شكون قال ليك انا ضحكت عليها و لا غنسمح فيها...آيات هي البنت الي باغي نتزوج بيها قمر : و علاش زربان على عمرك...عرفتي الحالة الي لقيتها فيها...و زايدها متاصلتيش بيها مخليها تفصل و تخيط بوحدها أمير : 3 أيام و انا كنتاصل و مكتجاوبش قلت نخليها حتا تهدا شوية و نمشي نهضر معها قمر : من هادشي كولو خاصكم تزوجو أمير : من غدا الى بغات قمر : " بقات كتشوف فيه " غنحاول نقنعهم اسرعو موعد العرس بلاما اعيق شي حد واخة نجم الدين كيقشعها طايرة أمير : عندي شي حاجة أخرى بغيت نقولها ليك قمر : شنو هي ؟ أمير : غنرجع لأمريكا قمر : كيفاش ؟؟ أمير : ماما ساءت حالتها...خاصها عناية و ناس محترفين اقابلوها...كاين مستشفى فنيويورك سيفط ليهم وراقها من بعدما تحولات لمستشفى الأمراض العقلية...هنا غادي غير تزيد تسوء حالتها...تماك غادي اهتمو بيها و غنكون مطمئن عليها...و حتا لفرع الي فتحنا تماك خاص الي اقابلو قمر : و هادشي فخبار آيات ؟ أمير : كنت ناوي نقولها ليها حتا وقع هادشي قمر : واخة صعيبة تبعد على عائلتها...لكن هي كتبغيك و مانظنش تمانع تمشي معاك أمير : كنتمنا توافق...حينت مانقدرش نخلي مي هنا فهاد الحالة و مانقدرش نبعد على آيات قمر : اكون خير 🌸🌸 بعد مرور شهر 🌸🌸 نازلة فالدرج و شادة فقفطانها من الجناب...قفطان فالبيج من تصميم شروق جا مناسب مع جسمها...بسيط و انيق فنفس الوقت...لابسة معاه كعب عالي فلبيض مرصع من الجناب...طالقة شعرها الي زادت عليه اكستنشنز خلاوه ابان طويل...دايرة فراسها تاج من الورود جا مناسب مع الطلة...و ملامح وجها الفاتنة بارزين بمايكاپ خفيف عاطيها طلة طبيعية خرجات مع باب الڤيلا كتشوف فالحاضرين منتاشرين فالحديقة...الي مجهزة بكلشي...نجم الدين اصر على ان زفاف ختو اكون عندو فالڤيلا...و وقف على كلشي واخة كان معتارض على تسريع موعد الزفاف...لكن قمر قنعاتو بحجة انو لازم ارافق الأم ديالو لأمريكا...هاد الخير الأخير الي جاهم صعيب اتقبلوه...لكن منين وافقات آيات تمشي معاه مكان عليهم غير ارضخو لقرارها بقات قمر واقفة كتشوف فالناس...حتا حسات بيدين عنقوها من اللور...لكن الريحة مختالفة على ريحة نجم الدين نزلات عنيها كتشوف فاليدين الي على كرشها...غير شافتهم و هي ضور بسرعة كضحك قمر : لمك خلعتيني شروق : كيف جاتك التعنيقة امم...تسحلتيها اسحابلك نجم الدين هههه قمر : " كتشوف فقفطان شروق " الي شافنا غيقول التوام...لابسين بحال بحال هههه شروق : هادو فيهم جوج فقط...دفعة محدودة غير ليا انا و توأمتي قمر : شفتي آيات كيف طلعات...جات فنيونة بالتقليدي شروق : امتا حتا انا نبرز و نجلس فداك الموقع الاستراتيجي...فخبارك العروسة هي الي كتبرگگ كلشي و ماكتزكل حتا حاجة...كلشي كيبان ليها من البرزة واخة هي محط الأنظار و كلشي جاي اشوفها كيف طلعات و اشوفو سيد الرجال الي دات...شتي انا راه الى مكان تيتيز و الله لا برز معيا قمر : ههههه...حاسة بلي نوبتك قريبة شروق : ياكما تيقتي الكذبة الي كذبت على خالك...راه الدري ماعرض عليا لا زواج لا والو غير مارضيتش و لحتها ليه فوجهو باش نوريه اطيح من قيمتي قمر : لا متاكدة تعلم الدرس شروق : كيفاش...مافهمتش قمر : " جراتها " من بعد و تفهمي توجهو للطبلة الي فيها العائلة...قمر بان ليها نجم الدين واقف مع الدراري بدر و ساجد بقات كتشوف فيه كيف واقف و خاشي يديه فالجيب...لابس الكلاص كومپلي كحلا مع تيشورت بيض و شعرو رادو اللور...شروق شافتها حالة فمها فيه و كتفرنس...ضحكات عليها و جراتها جلسو فالطبلة جنب العروسة... شيرات قمر لآيات الي جالسة متبثة بقفطان أبيض مرصع من جهة الصدر...دايرين ليها تسريحة عصرية نصف شعرها مطلوق و النصف لاخر مجموع بشكل جميل...مزينة بحلي من الفضة و دايرين ليها مايكاپ سموكي خلاها تبان أنضج...مرسومة ابتسامة على شفايفها و باينة عليها فرحانة امير جالس جنبها لابس كومپلي رمادي و حتا هو محلق على الحالة...جاو مناسبين مع بعض و الكل فرحان ليهم...عائشة غادة و جاية كترحب بالضياف...لابسة تكشيطة فالشيبي مع فولار و وجها عليه النور...امرأة طيبة و بشوشة و محبوبة من عند الكل ، الكل فرحان و الناس ناشطين...شروق قربات عند قمر و همسات ليها فوذنيها شروق : شوفي ديك المشعكة...ماشي هي ابتسام بنت خالة نجم الدين...مابان ليها تشطح غير حدا الطبلة الي چالسين فيها الدراري قمر : حمارة ماعندها نفس...بهدلها نجم الدين و عطاها خل وذنيها و مزال جاية وجها قاسح شروق : تفو على أشكال...اسحاب ليها الي لوزات غيولي الطايح كثر من النايض ماكتعرف حتا تشطح فقساتني قمر : خليها تجذب گاع مداها فيها حد شروق : " وقفات " مغاديش نخليو ليها الساحة زيدي نوريوها الشطيح على أوصولو قمر : لا منقدرش...نجم الدين مغاديش يبغي شروق : و غير زيدي...غادي نشطحو غير بالقياس و نفقصوها جرات شروق قمر و مشاو لوسط الساحة ابتسام كانت كتشطح هي و شي و حدينات...بانت ليها قمر و هي تخنزر فيها و دارت كتوشوش لدوك الي معه شروق بدات كتشطع مع الريتم و كتحرك فقمر...حتا طلقات حتا هي و اندامجو مع الموسيقى...ولات الأنظار كلها عليهم عيالات و رجال كلشي كيشوف فيهم...بدر شاف فين كيشوف الكل و هما ابانو ليه بجوع عاطينها للشطيح هاك بلاك...حرك نجم الدين الي كان عاطي للساحة بظهرو شاف فيه نجم الدين و هو يدير ليه بدر ضور...ضار شاف فقمر كتشطح تصدم دوز عنيه بان ليه كلشي كيشوف فيهم...دغيا جمع الوقفة و اتاجه لعندهم...وقفات ابتسام فاش شافتو جاي و كتسنا تفرج فيها...تمشا بهدوء حتا وصل لعندهم...شروق شافتو واقف من ورا قمر و بدات كضور فعنيها قمر جاها الضحك على حركات شروق...خاصة فاش شافتها كطلع حجبانها لفوق...مافهماتش بلي كتعطيها إشارات تشوف من وراها...حسات قمر بيد شدات فيها من جنب خصرها...وقفات و ضارت و هي تساطح مع صدرو...هزات عنيها ببطء عارفة شنو تابعها...تلاقات عنيها مع عنيه و دارت ليه ابتسامة متوثرة نجم الدين : " تحدر عندها " حبيبة باركة عليك...زيدي تجلسي قمر : و واخة...نمشي نچلس فبلاصتي نجم الدين : لا...غاتجي تجلسي حداية قمر : نمشي نطل على لميمة خليتها جالسة فالصالة فلداخل نجم الدين : راها جالسة مع لواليدة قمر : و واش درت شي حاجة ؟ نجم الدين : لا مدرتي والو...هاد الشطيح انا الي راجلك و ما عمري شفتو...حتا شفتو مع بنادم قمر : شروق هي " ضارت تنعت فشروق لقاتها طارت من حداهم " نجم الدين : " شد فيدها " تحركي جرها معاه و الكل متبع ليهم العين...كاين الي كيضحك و عجبو منضرهم و كاين الي بغا ياكل راسو و من بينهم إبتسام...جر نجم الدين لقمر الكرسي...جلسات حادرة راسها و بدات تلعب بيديها...جلس جنبها و دار يدو على ظهر الكرسي الي جالسة فيه هي و قرب عند وجها...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM