الحامي ♥️ الجزء 45 🔥🔥🔥🔥 ( الجزء 46 بعد ساعة شدو بلايصكم وتفاعلو 🔥🔥🔥) وصل نجم الدين للدار حط اللوطو و دخل طلع لبيت ديريكت حل الباب و هو القا مريم واقفة جنب ناموسيتهم...تسمرات فاش شافتو دخل و جمد ليها الما فالركابي نجم الدين : شنو كديري هنا ؟ مريم : جيت ناخد الحوايج الي خاصهم اتغسلو نجم الدين : راهم فالدوش مريم : اه اه نجم الدين : خرجي باغي نبدل...رجعي ليهم من بعد حدرات راسها و خرجات...غادة فالكولوار و يديها كيرجفو...هبطات لتحت دخلات لبيتها سدات الباب...و خشات يدها فالجيب جبدات القرعة الي هزات من المجر كتشوف فيها جبدات الفون و طاپات اسم الدوا...خرجو ليها المعلومات و بدات كتقرا...قدرات تعرف بلي الدوا ديال القلب...و بالظبط الناس الي جراو جراحة زراعة القلب...و خاص ياخدوه طول حياتهم باش ميوقعوش ليهم حتا مضاعفات استغربات مريم لأنو مكانت عندها حتا فكرة بلي قمر فايت دارت عملية...وعملية صعيبة بحال زراعة القلب...ساقت لخبار فاش وقع ليها حادث سير...و عند هنا توقفات معرفتها بالموضوع...لأن نفس اليوم الي وقع لحادث هي اختفت بدات كضور العلبة الي فيدها و كتشوف فيها...بملامح غامضة...بزاف ديال الحوايج كيضورو فراسها مريم : خاص نرجعو لبلاصتو قبل ما ارجعو للدار حلات القرعة و خدات حبة...غلفاتها فورقة و حطاتها عندها فالبلاكار...خشات القرعة فالجيب و خرجات...سمعات اللوطو ديال نجم الدين عرفات بلي خرج...طلعات لفوق دخلات لبيتهم و رجعات القرعة فين كانت...مشات للحمام حلاتو و دخلات...لقات السلة الي فيها لحوايج و كانو فيها حتا الحوايج الي كان لابس نجم الدين هزات القاميجة ديالو قرباتها لنيفها...غمضات عنيها كتستنشق ريحتو و معنقة القاميجة...تبسمات و هي كتذكر نجم الدين...فاش كيلقي عليها السلام و هو داخل و فاش كيشكرها على أبسط الحوايج...رجعات القاميجة للسلة و هبطاتها لغرفة التصبين ⭐⭐⭐⭐⭐ چالسين فالجردة و هو ابان ليهم بدر داخل...شروق غير شافتو و بدات كتقاد شعرها...قمر شافت فيها جابت ليها الضحك...وصل عندهم بابتسامتو المعهودة سلم على فاطمة باس ليها راسها...داز عند قمر باسها من خدها و مد يدو لشروق...سلمات عليه و دغيا سحب يدو بدر : ارتاحيتي شوية المشيشة قمر : شبعت راحة ههه.. عاد جيتي من الخدمة و لا كنتي فشي بلاصة اخرى بدر : " ضحك " علاش كتقلبي من السبيطار لهنا قمر : لا غير بغيت نعرف فاطمة : و حاول تجي فحالك بكري...نهار تزوج راه لمرا مغاديش تصبر على التعطال ديالك بدر : وا الواليدة الى كانت عندي عملية مغاديش نخليها باش نرجع بكري للدار...و زايدون المرا الي ماتصبرش على نوع الخدمة ديالي ماعندي ماندير بيها فاطمة : اناري عليك...صافي ماقلنا والو...سير تعشا و طلع ترتاح بدر : " خربق شعر قمر " عاودي رجعي...متغبريش قمر : أوكي دخل بدر للدار و هي تقرب شروق عند قمر شروق : خالك طبيب ديالاش ؟ قمر : طبيب الجهاز العصبي شروق : وااو...يعني ديال المخ و الأعصاب قمر : اه شروق : كنحس بالأعصاب هاد الأيام ميمكنش تشدي ليا عندو شي موعد...و لا نمشي على غفلة و ندير بلي تلاقيت بيه صدفة قمر : بدر من النوع الي كياخد خدمتو على محمل الجد...سو غير فوتي بلاصة خدمتو شروق : اففف و كيف ندير حتا اشوف فيا...كيتعامل معيا بحال الى مكيناش قمر : هو هكاك داير...كيعاملك باحترام و لا بغتيه اتعنب عليك فاطمة : شنو كتوشوشو نتوما ؟ قمر : والو الميمة " شافت فالساعة " تعطل نجم الدين شروق : " كتنغز فيها " توحشتيه ! قمر : " خنزرات فيها " آه...و نتي أش مشا ليك واقف كيخاد نفسو لابس شورط كحل مع تيشورت بلا كمام گري...دار عند الداري من وراه فاش سمعهم كيضحكو سهيل : زعما راك عاد تزوجتي...لله منين جبتي هاد الجهد كولو نجم الدين : واخة نكونو لاعبين كرة السلة متخليوش 7 البيوت دخل عندكم سهيل : شتي فاش جيتي نتا و ساجد ف فرقة وحدة...عرفت خربات علينا دار نجم الدين شاف ساجد واقف بعيد كيكمي...محيد التيشورت و لابس غير الشورط فالبلو...واخة البرد محرك جنب البحر...الا و كلهم عروگات من بعد ماتش ديال الكورة الي لعبو نجم الدين : هو هداك...انا مشيت سهيل : الله اعاون اسي لعريس متغبرش علينا تم غادي نجم الدين لجهة سيارتو...الدنيا خاوية كاين غير لحديد ديال الدراري تماك...تلفت من وراه و هو المح سيارة كحلة واقفة بعيد...بقا واقف كيشوف شوية تحركات اللوطو و دازت بسرعة مغادرة المكان...ماقدرش اشوف شكون داخلها... حل باب السيارة ديالو و طلع...ديمارا متاجه للفيرمة مسافة الطريق و كان تماك...هز الفون و صونا على قمر كيف قطعات معاه قمر ناضت ودعات جداها و خرجات هي و شروقسلمات عليها شروق و ركبات فسيارتها...حلات قمر الباب و طلعات قربات لنجم الدين بغات تبوسو نجم الدين : عرقان قمر : " باستو فخدو " ماشي مشكيل...كيف دوزتي النهار بلا بيا ؟ نجم الدين : داز مكفس قمر : ههههه...شكون ربح بعدا ؟ نجم الدين : شكون فنضرك قمر : أكيد أردا ديالي الي ربح...شي نهار ديني معاك نتفرج فيك نجم الدين : " تبدلو ملامح وجهو " كايكونو غير الدراري...ماعندك لاش تمشي قمر : انا غير حينت بغيت نتفرج فيك كتلعب خدم نجم الدين اللوطو و تحرك...معاودش هضر غاديين فصمت...وصلو للدار سكت اللوطو و هبطو...قمر معجبهاش الحال كيف هضر معها...نزلات و طلعات لبيت دخلات للدريسينغ كتبدل...خرجات و هو ابان ليها داخل...مشافتش فيه هزات الفون ديالها و هبطات للجردة دخل نجم الدين للحمام دوش و خرج لاوي عليه فوطة...مشا للدريسينغ لبس سروال كحل و هز فوطة كينشف شعرو مبانتش ليه قمر فالبيت و هو انزل كيقلب عليها...خرج للجردة بانت ليه چالسة فالفوطوي و كتلعب فالفون توجه لعندها و چلس جنبها...مداتهاش فيه و هو اقرب و لاح يدو من ورا ظهرها...و خشا راسو فعنقها قمر : " بعدات " نجم الدين : " خطف ليها الفون من يدها و حطو فالطبلة " سمحيليا ماعرفتش شنو وقع ليا حتا هضرت معاك بديك الطريقة قمر : عادي نجم الدين : " شدها من فكها ضورها عندو " ماتهضريش معيا بهاد البرود...انا اعتاذرت ليك قمر : " تغرغرو ليها عنيها " انا ما قلت حتا حاجة غالطة...حتا تجاوبني بديك الطريقة نجم الدين : " جرها خشاها فحضنو " شووو ماتبكيش...انا ماقصدتش...كنحاول نتصرف عادي...خاصة معاك حينت عارف كيف تربيتي كنحاول نكبت الغيرة الي كتحرق فيا كل مرة نشوف الرجال كيشوفو فيك...عرفتي اليوم فالإجتماع كيف كنت...كنشوف الرجال كيشوفو فيك باعجاب و خاصني نتصرف عادي حاولت نظبط راسي غير بسيف و مانبينش...و مستحيل نديك معيا لبلاصة فيها دراري صحابي نصهم زلالة...واخة ميقدروش اشوفو فيك شوفة ناقصة لكن انا مانبغيش قمر : " هزات راسها و شافت فيه " درتي هاكة حينت غرتي عليا! نجم الدين : " حك راسو " اممم قمر : " تبسمات " نجم الدين : كضحكي...غادي تخرجي ليا لعقل شي نهار قمر : " حطات يديها علي لحيتو " حتا انا كنموت من الغيرة منين كنشوفك كتهضر مع شي وحدة...ماكنحملش فكرة أنك تشوف فيها و تضحك ليها نجم الدين : عمرني ضحكت مع شي وحدة قمر : سي...راه شفتك نجم الدين : شكون هادي ؟ قمر : " الصمت " نجم الدين : و هضري شكون هادي الي ضحكت معها ؟ قمر : " بصوت منخفض " مريم نجم الدين : " ضحك بصوت عالي " واش نتي حمقة...علاش غادي تغيري حينت ضحكت مع مريم...هاديك آخر وحدة تغيري منها قمر : " شافت فيه عاقدة حجبانها " جمع فمك و متبقاش ضحك مع حتا وحدة " هزات عليه صبعها " حتا فالخدمة كتسمع نجم الدين : " عض على شفتو " وينو على المغيارة ديالي...صافي منبقاش نضحك مع حد قمر : هاحنا غادي نشوفو نجم الدين : منين فيها نيت...حتا انا عندي مانقول قمر : شنو ؟ نجم الدين : متبقايش تسالمي مع الرجال بالوجه...و نقصي من كثرة التعناق مع خالك قمر : " خرجات فيه عنيها " راه عادي نجم الدين : لا معاديش...الى بغيتي نكون فرحان...ديري هادشي الي قلت ليك قمر : " شافتو كيهضر بجدية " أوكي نجم الدين : هكاك الله ارضي عليك نجم الدين عرف كيف اوصل ليها بشنو حاس بلا ميبان متعصب و اغمق عليها دقة وحدة...بغا امشي معها خطوة خطوة حتا ترجع تبعد على الحوايج الي مكيرضيوهش هي دابة مراتو و باغيها تكون حذرة فتصرفاتها مع الآخرين خاصة الرجال الحديث كولو الي دار بيناتهم داز على مسامع مريم...الي كانت واقفة جنب باب ديال الكوزينة و كتسمع عليهم...الجنون بداو انقزو ليها فوق راسها فاش سمعات قمر جبداتها...و جواب نجم الدين كان بحال طعنة فقلبها...دخلات كلها كتغلي لبيتها و چلسات تبكي فصمت يوم جديد ❌ حلات قمر عنيها و ضارت للجهة لاخرى...كان نجم الدين باقي ناعس...هزات يدها حطاتها على وجهو و بدات كدوزها على لحيتو الخفيفة دوزات صبعها على شفايفو بشوية...و هي كتأمل وجهو بحب...بعدات يدها بسرعة فاش شافتو حل عنيه نجم الدين : " قلبها تحتو " شنو كنتي كديري ؟ قمر : " كترمش فعنيها " والو...شنو غاندير! نجم الدين : بحال هاكة مثلا هبط باسها و ندمها علاش حتا قربات ليه...كن مكانت تابعاهم الخدمة مكانش غادي اطلقها هزها و دخلو للدوش دوشو بجوج عاد خرجو لبسو حوايجهم و هبطو مشادين...بانت ليهم سارة كتحط لفطور چلسو فطرو و ناضو كل واحد ركب فسيارتو و اتاجه للشركة ديالو...قمر كيف وصلات عقدات اجتماع...علنات فيه على رجوعها لكن مبغاتش تاخد الرئاسة و رشحات أمير بلاصتها...الكل تصدم من قرارها حتا من أمير الي مقالت ليه والو قبل...كيف كملات الإجتماع طلبات من أمير و وهب اتبعهوها للمكتب...دخلو كيف سدات قمر الباب و هي تهضر وهب وهب : صافي تزوجتي و مابقا عندك ماديري بالشركة قمر : انا غنرجع للشركة...لكن فقط كوحدة من مجلس الإدارة...مغاديش نقدر على مسؤولية الإدارة كيف قبل...و وفري هضرتك حينت مغادي تزيد والو أمير : واش فكرتي فهادشي مزيان قمر : متأكدة من قراري وهب : " باستهزاء " و انا نبقا فبلاصتي و لا مطرودة هههه قمر : حياتك هاديك...ديري فيها الي بغيتي كنت كنتمنا نسمع من جدة بلي مشيتي شفتيها...ساع عمرك تبدلي...و غايجي النهار الي تندمي فيه خرجات قمر و مشات لمكتب ديالها الجديد دخلات من الباب اللوراني و طلعات لفوق حلات بيت النعاس و سدات الباب...مشات للمجر ديريكت حلاتو و هزات القرعة...جبدات بلاستيكة و خوات فيها الكينات الي كانو فالقرعة...جبدات كارطونة ديال الدوا فيها كينات فنفس الشكل و اللون...حلاتها و بدات كتخويهم فالقرعة عاد حطاتها فالمجر كيف كانت...بدات كتجمع داكشي فالبلاستيكة و هو اتحل الباب ، سمعات الباب تحل ارتابكات و هو اطيح ليها داكشي فلرض...الحبوب كلهم تشتتو حيدات شالها و لاحتو عليهم فلرض...هزات عنيها و هي تنفس الصعداء ملي شافت سارة خنزرات فيها و وقفات عليها عند الباب مريم : فين داخلة ؟ سارة : فين كنتي...من الصباح و انا نقلب عليك مريم : مشيت نتقدا شي حاجة سارة : و خارجة بكري مريم : و نتي لاش كتسولي...سوقك سارة : غير سولت مريم : سيري شوفي شغلك...و خليني نجمع البيت سارة : حيدي بعدا غير جلابتك مريم : ديها فالجهة الضاراك خبطات عليها الباب و رجعات كتجري...جلسات على ركابيها حيدات الشال و بدات كتجمع فالكينات...دارتهم فالبلاستيكة و خشاتها فصدرها...جمعات البيت و هبطات لتحت مشات للطواليت الي جنب الكوزينة...حلات لاشاص خوات الكينات و طلقات عليهم الما... ⭐⭐⭐⭐⭐ وصلات العشية خرج نجم الدين من الشركة...و اتاجه لشركة العابيري هبط و دخل...طلع للطابق الي فيه مكتب قمر...خرج من السانسور غادي لمكتبها و هو اتصادف بأمير...تسالم هو وياه و بقاو كيهضرو عادي...حتا نطق أمير أمير : ممكن نهضر معاك فواحد الموضوع نجم الدين : ايه مرحبا أمير : يالاه ندخلو للمكتب عندي مشاو للمكتب چلس نجم الدين فالفوطوي...و أمير جلس مقابل معاه...استجمع شجاعتو و هضر أمير : بعد إذنك بغيت نجي نطلب يد ختك آيات نجم الدين : " بقا كيشوف فيه " فين كتعرفها ؟ أمير : مكنعرفهاش...شفتها فالعرس ديالك نتا و قمر نجم الدين : " بقا ساكت " أمير : شنو قلتي...عارف واخد عليا نضرة فشكل...أنا ماعندي حتا علاقة بداكشي الي دارت الأم ديالي لقمر...قمر ختي و معزتها كبيرة و لا ممكن نفكر نآديها...كن بغات ترجع للمنصب ديالها كنت غادي نساحب بهدوء...انا ماباغي شركات و لا فلوس...عندي مشروع آخر خاص بيا...رجعت لهنا غير على وجه الشخص الي رباني نجم الدين : " وقف " انا غنفاتحها فالموضوع و نشوف رأيها...و ديك الساع نرد عليك أمير : واخة شكرا غادي نتسنا اتصالك خرج نجم الدين و اتاجه لمكتب قمر حل لباب و هي تبان ليه غادة جاية و هازة الفون...تلفتات فاش سمعات الصونيت ديال تيليفونو قمر : عاد كنت كنتاصل بيك نجم الدين : " قرب باسها " جيت قبيلة و تلاقيت بأمير كنت عندو فالمكتب قمر : امم فاش هضرتو نجم الدين : " شادها من خصرها " لاح عليا قنبولة ولد اللادينة قمر : شنو قال ليك ؟ نجم الدين : ههه تخايلي...بغا اخطب آيات قمر : " خرجات عنيها " شنوو!!! نجم الدين : كيف سمعتي قمر : واش كيعرفو بعض...زعما قصدت واش نجم الدين : فهمتك...حتا انا معارفش...خاص حتا نهضر مع شنيولة هو الأول قمر : الى كانو كيبغيو بعض...پليز وافق نجم الدين : حتا نشوف...يالاه نمشيو هزات صاكها و هبطو...وصلو للدار دخلات قمر هي الأولى...داز نجم الدين للكوزينة طلب منهم اطلعو لعشا لبيت...مشا للمكتب هز منو شي وراق و طلع لبيت...بانت ليه قمر خارجة من الدوش لابسة شوميز و فوقو پينوار...و مشات چلسات قدام المرايا كتنشف شعرها قرب عندها و شد الفوطة كينشف ليها شعرها سمعو الدقان فالباب عطا الإذن و دخلات مريم هازة پلاطو...شافت فيهم و زيرات على الپلاطو بيدها حطاتو فوق الطبلة و خرجات نجم الدين : " باسها فعنقها من اللور " نوضي تعشاي جرها مشاو جلسو فوق لي فوطوي...تعشاو و ناض للمجر حلو و هز القرعة ديال الدوا...مدو ليها هو و كاس ديال الما...شرباتو و رجعو لبلاصتو رجع عندها و هزها غادي بيها للناموسية قمر : ياك عندك الخدمة نجم الدين : مابقات خدمة...بغيتك دابة ✴✴✴ بعد مرور ثلاثة أيام ✴✴✴ كان چالس فالمكتب لوقت متأخر...ناض خرج و مشا لماشين ديال القهوة...بغا اخدمها و تعكسات ليه...خبط بيها و زاد دوز يدو على شعرو مرجعو اللور...دخل للمكتب جبد گارو شعلو و دار بالكرسي مقابل مع النافدة سمع الدقان فالباب قال دخل و مدخل حد.ناض حل الباب مبان ليه حتا واحد...بغا اسد الباب و هو اشوف كوب ديال القهوة محطوط فلرض...و الفار طالع منها تحدر هزو لقاه سخون...سد الباب و دخل حطو فوق المكتب و چلس فوق الكرسي كيشوف فيه... واقفة متكية على الحيط فلخر ديال الكولوار شادة فقلبها كتنهج و تعاود بانا : اففف جاب الله تعطل...كن راه حصلني...نمشي نهز صاكي و نخرج فحالي دارت مع الضورة و هي تلقاه واقف...مشا منها اللون و حسات بالبولة غتنزل ليها...شافتو هاز الكوب فيدو و عاقد حجبانو ساجد : هادو فعايلك ؟!! بانا : " بتلعثم " أا...لاااا " حدرات راسها " آه ساجد : " كيخويه فلرض " تعاوديها مرة أخرى...تلقاي راسك خارج الشركة...كتسمعي بانا : أ انا ماقصدتش...ش شفتك و وبغيت ن ساجد : " قاطعها " قصدتي و لا ماقصدتيش مكايهمنيش...بحال هاد الفعايل راه حافضهم عطاها بالظهر و و مشا للمكتب...هزات يدها كتنش على وجها و حابسة دموعها...آخر حاجة بغات هو افهمها غلط...كانت دايزة من حدا غرفة الاستراحة فاش شافتو مدابز مع لماشين ديال القهوة...حتا دخلات لمكتبها و ناضت رجعات مدابزة معها حتا خدمات...بغات دق و تعطيها ليه لكن خافت من ردة فعلو...داكشي علاش حطاتها و تخبات و داكشي مناش خافت طاحت فيه...نيتها كانت صافية و دارت هادشي لأنها ممتنة ليه على الخدمة الي عطاها...دخلات للمكتب هزات صاكها و خرجات...هبطات فالسانسور و خرجات من الشركة...غادة فالطريق كتشوف فلرض و ساهية سمعات حس خطوات من وراها حركات بؤبؤ عنيها للجنب و لمحات خيال شخص طويل من وراها...تسلل ليها الخوف و بدات كتزرب فمشيتها بلما تعيق...تأكدات بلي تابعها شي حد لأنو سرع فخطواتو حتا هو...زيرات على الصمطة ديال الصاك و كانت مستاعدة طلق رجليها للريح...حتا حسات بيد شداتها من دراعها بقوة و ضوراتها تلفتات وراها بانا : تابعني حتال هنا شنو بغيتي عندي دعيتك لله عقدتيني فحياتي ........... : مكانش ساهل عليا نعرف فين خدامة " كيقرب " و هانا عرفت ههههه " طلع عنيه فالمبنى " اممم خدامة هنا...كيف درتي ليها " شدها من دراعها و جرها عندو " ياكما عطتيهم المقابل حتا دخلوك! بانا : طلق منييي...عطيني بالتيساااااع ........... : " بين سنانو " شكون هادا الي نعستي معاه حتا دخلك لهنا هضري شكووووون بانا : " كتألم من قبضتو " ماشي سووورقك حياتي هادييييي...شنو بيني و بينك...فوتني عليييك ........... : شتي نهار نحصل عليك كديري شي حاحة غنحرك...سمعتي...تجري حتا تعاي غاترجعي ليا و تولي ديالي...كرهتي و لا بغيتي بانا : " نزلو دموعها " عمر داك النهار غايجي...نموت و منكوووونش مع واحد بحالك ........... : " مقرب وجهو ليها و كيكشكش " كن شي بنت لحرام اخرى الي قالت هاد الهضرة...كن سلخت مها هنا " كيدوز يدو على شعرها " لكن نتي باغيك تكوني حلالي...وا جمعي فمك قبل ما نهرسو ليك دايز ساجد من الشارع و لمحهم جنب الطريق بانت ليه بانا مع شاب طويل و أسمر...كانو قراب لبعضياتهم...بدون اهتمام رجع شاف فالطريق و كسيرا ⭐⭐⭐⭐⭐ وقف السيارة خرج و حل لباب بالساروت...دخل للصالة بانت ليه عائشة و عبد الرحمان چالسين كيتفرجو...سلم عليهم و چلس معاهم شوية...سول على آيات و طلع عندها لفوق...دق فالباب و دخل بانت ليه چالسة فوق الناموسية...مربعة رجليها و حاطة البيسي قدامها نجم الدين : شنيولة آيات : آخيرا تفكرتيني نجم الدين : " سد الباب دخل و تكا حداها " شنو غاندير بيك آيات : آه عندك الحق...شكون انا...انا غير آيات البرهوشة الي كنت ميدوزش النهار الى مهضرتي معيا و لا طليتي عليا...دابة كاينة قمر الي نساتك فختك نجم الدين : " شنق عليها بدراعو " الناس كيكبرو و اديرو عقلهم...نتي العكس...شحال عندك دابة 20 و عقلك ديال وحدة عندها 10 سنين آيات : طلق مني...و دخلت ف 21 ماشي 20...شي نهار تنسا سميتي نجم الدين : ههههه شكون نتي ؟ آيات : " بعدات عليه كتقاد شعرها " هاهاها ضحكتيني نجم الدين : " بجدية " كيف غادة مع الخدمة ؟ آيات : مزيان...لقيت داكشي الي بغيت لكولكشن الجديدة فيها جوج بياسات من تصميمي نجم الدين : مبروك آيات : مالك كتشوف فيا بدوك الشوفات...كتخلع نجم الدين : أمير العابيري كتعرفيه ؟ آيات : " تبدل فيها اللون " أا نجم الدين : خو قمر...أمير آيات : آه هداك...عقلت عليه...م مالو ؟؟ نجم الدين : طلبك للزواج آيات : " تسرط ليها لسانها " نجم الدين : مكنعرفوش مزيان مي بان ليا شخص معقول...و جا طلبك من عندي...قلت ليه نهضر معاك و نرد عليه...شنو قلتي ؟؟ آيات : ج جا عندك...و وطلبني للزواج...امير!! نجم الدين : اممم آيات : " خافت نجم الدين اسمع دقات قلبها الي كيضربو على الجهد " نجم الدين : " وقف " فكري و ردي عليا لخبار خرج من البيت و خلى آيات فحالة صدمة مزال ممتيقاش داكشي الي سمعات...كيفاش مشا هضر مع نجم الدين...يعني هو كيبغيها و ماباغيش اتفلى عليها...واش فعلا داكشي الي قال صحيح و مشاعرو اتجاهها حقيقية و هي طول هاد المدة كانت كتعذب و هي كتحاول تنساه...و صدقو ناواياه اتجاهها صادقة...حسات براسها غبية الي معطاتوش فرصة و سمعات ليه...فخضم هاد الأفكار توسعو عنيها و طلقات غوتة على حقها و كتضرب فراسها. آيات : نااااارييي خوياااااا عااااااق بياااا وااااااع عرف بلي كنعرفو بعضضضض و تشوهت اعباد الله...دوك الشوفات الي دااار فيا قبيلة...و ميمتي على فضييحة...سير يا أمير بغيت ليك موصيييبة...لا لا الله انجييه دخل بالسيارة حطها فالباركينغ و طلع لفوق حل باب البيت و دخل...مبانتش ليه قمر طل على البالكون مكيناش...عرف غادي تكون فالدوش...حل لباب و دخل حتا كيتصدم بالمنضر الي قدامو...بانت ليه قمر طايحة فلرض بفوطتها...بقا واقف مكوانسي للحظة و فجأة مشا عندها كيجري طاح على رجليه و هز راسها كيضرب على خدودها...شافها محلاتش عنيها و هو اتزير عليه قلبو...هزها بين يديه و خرجها حطها فوق الناموسية نجم الدين : " بصوت كيرجف " قمرر حلي عنيك قمررر حط يدو على نبضها حس بيه ضعيف...جميع السيناروات الخايبين جاو فبالو...الى وقعات ليها شي حاجة غايحماق...جات فبالو غير الجراحة ديال القلب و تزاد خوفو أضعاف ناض بسرعة دخل للدريسينغ جاب سروال و تيشورت...ماعرفش كيف دار ليهم حتا لبسهم ليها...هزها و هبط كيجري حطها فاللور ديال السيارة...ركب و خرج من الڤيلا غادي زاف. كل دقيقة اتلفت عندها و ارجع اشوف فالطريق مدازش بزاف ديال الوقت حتا كان قدام أقرب مستشفى...هبط هزها و دخل كيجري للمستعجلات...جابو بياص حطوها فيه و دخلوها لبلوك...بقا واقف و بدون حراك غير يديه الي كيترعدو ، كانت مريم واقفة جنب الدروج فاش شافتو هبط هاز قمر...كانت حاسة بشعورين مختالفين...فرحات حينت داكشي الي بغات وقع...قمر ماشرباتش الدوا لأيام...و فوضعها حالتها ماكتبشرش بالخير...و حاسة بالحزن فاش شافتو كيفاش خايف عليها...و شكلو و هو هابط كيجري بيها تمنات فقلبها توقع شي حاجة الي تخلي قمر تبعد من طريقها...لأن صبرها نفذ و مبغاتهاش تزيد معاه نهار واحد...وقتما طلعو لبيتهم تچلس تبكي و تغدد و هي كتخايل قمر ناعسة ففراشو...لدرجة تعمات بالغيرة و الحقد و معارفاش شنو دارت ، دازت نصف ساعة و هو كيتسنا خبر عليها...حس بالوقت توقف عندو و معارفش كيف اتصرف...كيطلب فخاطرو تكون بخير و مايوقع ليها...خوفو تزاد أضعاف فاش شافها فديك الحالة...شاف الباب تحل و خرج الطبيب...قرب عندهم بخطا مسرعة نجم الدين : فاقت ياك...فاقت الطبيب : متخافش الزوجة ديالك بخير نجم الدين : و علاش كانت مغيبة...شنو وقع ليها شنو عندها ؟؟ الطبيب : تهدن...آجي معيا و نشرح ليك سبق الطبيب و نجم الدين تابعو و كل ساعة اتلفت جهة الغرفة...دخلو للمكتب و طلب منو الطبيب آجلس نجم الدين : " بقا واقف " غير قول شنو كاين الطبيب : چلس بعدا نجم الدين : " بنفاد صبر چلس و شاف فيه " الطبيب : حالتها مستقرة دابة...ماعندك علاش تخاف...فاش جبتيها كانو دقات قلبها غير مستاقرين...درنا ليها شي فحوصات و عرفت بلي فايت جرات عملية زراعة القلب نجم الدين : آه...شي عامين هادي الطبيب : استاشرت طبيب القلب الي عندنا فالمستشفى...و كيف شكيت كان عندها ضيق فشرايين القلب المزروع...و هادا غالبا كيكون بسبب عدم تناول الأدوية الي توصفات ليها بعد العملية نجم الدين : لكن هي كتشربو يوميا الطبيب : ضروري تاخدو بدون انقطاع تجنبا لأي تختر فالدم و بعدها ممكن اوقع فشل للقلب المزروع...بعض المرضى كيمرو سنوات و كيقطعو الدوا...و كيوقعو ليهم مضاعفات الي كتشكل خطر على حياتهم نجم الدين : " دوز يديه علي وجهو " شنو المعمول ؟؟ الطبيب : خاص تشوف طبيبها الي دار ليها العملية...و تبع معاه حتا تستاقر حالتها و مايبقا عليها حتا خطر...خاصة فحالتها دابة نجم الدين : " شاف فيه بتساءل " كيفاش حالتها دابة!! الطبيب : مافخباركش...مرتك حاملة... يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM