قصة المزحة #الجزء 138 : في حين كانت جودي و اسو و يسرى و تيما كالسين مجموعين و رجالتهم في قنت اخر مجموعين و ولادهم كانو كيلعبو مجموعين، الباب كان كيدق كلشي على بالو ايلاف وصلات، حتى جات الخدامة عيطات على ادم. الخدامة: موسيو ادم، جا موسيو ارثر كيتسناك في البيرو. جودي دارت فيه شوفات كن كانو قرطاس كن طيحوه، عرفها عاقت بيه و علاش قال ليها باش تعرض عليهم، و قرر يهرب عينيه منها و قال ليهم. ادم: اه راه عيطت عليه و نسيتو، كنت باغيه على شي خدمة. و هرب كيجري لبيرو، دخل ليه لقى ارثر كالس على اعصابو و كيتسنى فيه، غير شافو و ناض من بلاصتو. ارثر: قالت شي حاجة؟ عاقت بيا ؟ ادم: ههه ايييه الحب صعييب. ارثر: ادم، قول اش كاين و بلا ضحك، بغيت غير شي مرة تكون جدي. ادم: واخا، ايلاف باقي ماجاتش، عندها شي شغل و باقين كنتسناو فيها، و كن هاني جودي عاقت بيا و لكن على بالها انا لي عيطت عليك باش نجمعكم، ماعارفاش راك نتا مول الفعلة. ارثر: ايوا مزيان هاكا حسن، و شنو هاد الشغل لي ايكون عندها؟ راه كملنا انا و ياها عاد خرجنا. ادم: ماعرفتش، لي عرفت انها غادي دوز لشي بلاصة هي لولة، كعما سولت، سمعتنا غير كتهضر مع البنات. ارثر: اوكي، المهم انها غادي تجي. سكت شوية و رجع يتأكد ارثر: واش متأكد غادي تجي؟؟ ادم: هههه متأكد راه صفوان ولدها كاين هنا. ارثر: كاين هنا؟؟! ادم: وي ارثر: صافي يالاه نخرجو، و قول ليهم شديتب نتعشى معاكم. ادم: ههه زيد يالاه ارثر: اه بلاتي، ارا شي دوسيي باش نبان جاي على قبل شي دوسيي. ادم: راه خود هاداك الحمر و اصلا خاصك تخدم علييه. ارثر: اوكي. و رجع ياخدو و هضر في خاطرو. ارثر: ايييه ا ايلاف، رديتي كيف المراهق ندير الخطط باش نتلاقى معاك و نشوفك. ادم بحال قرا افكارو. ادم: شكون كان يقول انشوف ارثر كندجي بهاد الحالة. ارثر: ههه وييه، لدرجة انني من نهار سلمت مابقيت كتهز عيني فشي مرا الا ايلاف الوحيدة لي مانقدر نزل عيني عليها، كاننها ملكي، حاجة كتخصني بوحدي. ادم: يكون خير، الله كبير، دابا يجي الوقت و تفرحو مجموعين، يكفي الحزن لي عشتو. ارثر:. هادشي لي كنتمى. خرجو و مشاو لجيهة فين كالسين. ادم: ارثر جا يسلم عليكم، و شديتو باش يكلس يتعشى معانا بزز باش بغى. جودي دارت فيه الشوفة ديال " ها زعما تيقنااك" عاد نطقات جودي: مرحبا بيك سلم عليهم و كلس شوية مع رجال و لكن غير بالجسد اما عينيه كانو على صفوان، هاد الاخير لي ضارب مع سامي على لعبة و كعا و ناض من حداهم، و هنا لقى ارثر الفرصة يتقرب ليه، كيف لا و هو طرف من حبيبتو و اصلا شكون لي مايقدرش يحب هاد الملاك، مشى حداه و لقاه كاعي. ارثر: صفوان مالك؟ صفوان هز فيه راسو و بقى كيشوف بحكم انه فايت غير شايفو و لكم عمرو هضر معاه، و رجع حدر راسو. ارثر لي علاقتو ما دراري صغار منحاصرة غير مع ولاد ادم، ماعرف مايدير معاه. ارثر : عمري هضرت معاك، و لكن انا كنعرفك و كنعرف ماماك و نعرف خالاتك و عمامك. قدر يجذب انتباه صفوان و سولو صفوان: و كتعرف بابا؟ صدمو سؤالو و لكن تمالك نفسو و حط يديه على راسو. ارثر: اه كنعرفو حتى هو. صفوان: و علاش انا ماكنعرفكش؟ ارثر: غير مع الخدمة و صافي. صفوان: واش هو نتا عمو ارثر؟ ارثر: اه هو انا صفوان: سمعت ماما كتهضر عليك واحد المرة مع خالتو جودي. ارثر فرح فخاطرو و ماقدرش يبقى يبوس فيه ارثر: و شنو قالت ؟........ #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM