الأسود 🖤 الجزء 59 🔥🔥🔥🔥 ( التتمة من بعد 400 لايك ❤️ القصة غادية وكتزيان كتر 🥰) _ بديت كنغوت لاااااا ماتموتيش عفاك غادي نعاونك ، ولكن فاش قلبتها كان داز الحال ماتت بقات فيا بالاخص شوفاتها لي دارت فيا قبل ماتموت كانو بحال طعنات في قلبي كنظن ماعمر يتنسا ليا هاذ المنظر ، شفت في الجندي ديال نمرود وغوت عليه علاش قتلتيها جندي : سيدي الأسود القائد نمرود عطا الأوامر باش نقتلوهم وهاذ البنت كانت مخبعة في واحد البلاصة وسط القرية وفاش شافت كنقتلو في الأهالي ديال الكاريان هربات وامرني سيدي نمرود نقتلها وأنا تبعتها نفدت الأوامر ديالو _ سالا كلاموو جبدت سلاحي تيريت فيه قتلتو وهزيت البنت وأنا دموعي نازلين تميت غادي بيها لوسيعة فين كان شاد نمرود العائلات ديال الكاريان وتما كنتصدم بمجزرة بشعة مايمكنش تشوف فيها كاع دوك الناس مقتولين وكاينة ضاية ديال الدم كبيرة ، نمرود مشا لعند الطومبيلات حطيت البنت و مشيت كنجري عندو وكنغوت عليه علاش أنمرود درتي هاذشي علاش قتلتيهم نمرود : فين الجديد ياك ديما كنديرو هكذا كنقتلو كولشي _ ولكن ماكنديروش هكذا الناس ماعندهم لا سلاح لا والو وكانت مهمتك تجيب غير توقيعات ونمشيو كيف قلتي ليا ماشي تقتلهم علاش أنمرود كان فيهم ولاد صغار نمرود : مال هاذا شنو جاه واش تسطا ...ياك ديما كنقتلو الناس سواء كبار ولا صغار ونتا براسك كتقول لينا بحال الصغير بحال الكبير ولي بالسلاح وحتا العزل شنو تبدل دابا وهاذو كون خليتهم عايشين كان غادي يجينا منهم غير الصداع اللهم نقتلوهم ونرتاحو _ مع قالها دخلت فيه بكروشي لوجهو وعاودتو بطرشة وهو يضربني بكروشي وبقينا شابكينها أنا وياه كروشيات ضربة فيا ضربة فيه ومع دوك الغدايد لي فيا سلختو وطيحتو الأرض هو يهز عليا السلاح وهو طايح و رجالو شافوه هاز عليا سلاح هزو سلاحهم عليا ورجالي ومصطفى كذلك هزو سلاحهم على رجال نمرود بقيت كنشوف في نمرود نظرات الحقد وهو كيباتسم ليا في وجهي نمرود : كولشي ينزل سلاحو حنا خوت أيوسف واش غادي نتقاتلو بيناتنا على ود كلاب هاذي هي الدنيا فيها القوي كياكل الضعيف وحنا أقوياء _ ولكن علاش خدعتيني قلتي ليا ماغديش تقتلهم ودرتي عكس كلامك نمرود : كيبان ليا القتلة لي كليتي في الغابون بدلات فيك شي لعبة أو تضربتي في راسك جاك الزهايمر واش من نيتك الأسود كتقول ليا ماكنقتلوش العزل ولي ماعندهمش السلاح تعقل على منال لي كانت كتعجبني والناس لي معاها في البار كيفاش قتلتيهم تعقل على العائلات ديال الأعداء ديالنا شنو كنتي كدير ليهم راه واخا نضل نقتل ماغديش نوصل لعدد ديال القتلى لي ماتو على إيديك يعني ماعندكش الحق تحاسبني _ مانسيتش ولكن هاذوك كانو عندنا الأوامر باش نقتلوهم ماشي بحال هاذو نمرود : كولشي بحال بحال أيوسف كلهم اعدائنا وخاص يكون عندهم نفس المصير خلينا نرجعوو ونساو هاذشي لي وقع هنا يله نمشيو قبل مايجيو البوليس مصطفى: على الأقل رمضان كان عليك توقف القتل زعما شهر التسامح نمرود : بربي حتا كاملين حماق عاد طاح عليكم الحنان شنو الفرق بين دابا وقبل رمضان راني قلت ليكم بيلا حنا كاملين عندنا مصير واحد وهو جهنم انتحرقو فيها _ طلبت من رجالي ينزلو سلاحهم وركبت الطومبيل وأمرت الشيفور يكسيري حيث خاطري تزيرات عليا ومابغيتش نبقا هنا وكانت ايدي كتعطيني الحريق حيث مزال مابرات ودابزت مع نمرود مصطفى: يوسف مالك أخويا ساهي فاش كتفكر _ بقات فيا البنت شفتيها كيف جات طلبات مني المساعدة وماقدرتش نعتقها إلى ماقدرتش نعتق البنت من جندي واحد كيفاش غادي نعتق ولادي من أعدائي مستقبلا مصطفى: تا أنا بقات فيا ولكن ماديرش في بالك أخويا نتا ماعندك حتا ذنب _ تكيت وأنا كنفكر في داكشي لي وقع وقلبي مقبوط عليا حتا كنسمعو صوت طومبيلات ديال البوليس من ورانا ومن قدامنا وكان عددهم كبير حاصرونا هبطنا من طومبيلات وبدينا مبادلين معاهم إطلاق النار ( الرباط) علي : كنا مجموعين في السحور على واحد طاجين بنين ماشهيتكم فيه كناكلو وكنهدرو الواليدة : فين هو مهدي شفتو تعطل بزاف دامي : معطلاه الخدمة ولكن قال بيلا ايكون قبل السحور علي : هاهو دخل عمرو طويل سناء : مهدي مالك كتبان ماشي هو هذاك علي : وقف علينا مهدي ونظرات الحزن على وجهو نور : مالك امهدي لون وجهك مخطوف مهذي : علي عندي ليك خبار خايبة علي : ياك لباس شنو وقع تاني أودي مهدي : عصابة الذئاب قتلو 215 شخص في واحد الكاريان ماخلاو حتا واحد حي قتلو كولشي سوا كبار أو صغار تخيل معايا حتا من وليدات باقيين كيرضعو قتلوهم وصلوني الصور مرضت في خاطري ماقدرت حتا نشوف داكشي صدقو كتر من الإسرائيليين ، شادة عليهم واحد الكاميرة قريبة لكاريان الأسود ونمرود لي نفذو العملية علي : الأسود وعصابتو طغاو لأقصى حد خاصنا نديرو ليهم حد الواليدة : شتي إلى ماقتلتوهمش عيب تسميو راسكم رجال مهدي : شنو بغيتي نديرو الواليدة نتي كتعرفي أمين كيفاش داير في التخطيط ديالو صعيب أي واحد يوصل ليه ولا يوقفو وبالأخص دابا فاش ولا مع الدئاب لاقي الدعم من شخصيات كبار ممعروفينش ماحيلتنا لذئاب ماحيلتنا الخونة الواليدة : وشنو نمشي نقتلو أنا أرو ليا سلاح على الأقل أنا نحاول ماشي بحالكم نتوما خايفين منو ارو ليا سلاح ياك أنا جبتو لهاذ الدنيا أنا لي نصيفطو القبر نتوما وليتو بحال العيالات ضباط ورئيس المخابرات ماقدين اديرو والو قدام 3 الأشخاص ورجالهم نور : خالتي حادة حاليا مايمكن نديرو والو كنتسناو الوقت المناسب الواليدة : ايوا تسناو حتا يسالي من الناس ويسالي ليكم حتا نتوما وقتل فينا واحد بواحد لوكان كنت عارفة ولدي يولي هكذا كون قتلتو ملي ولدتو اهئ اهئ اش درت أسيدي ربي حتا نشوف كبدتي يولي طاغية هكذا ياسمين : خالتي لا نتي لا أمين عندكم ذنب في هاذشي الذئاب هوما السباب وهوما لي رجعوه هكذا نتي عارفة أمين مستحيل يسمح بحال هاذشي لافاطمة: والله مايمكن هاذشي كيفاش حتا رجعوه هكذا ( الدار البيضاء ) _ قدرنا نتخلصو من رجال الشرطة من بعد صراع طويل معاهم من بعد توجهنا لمقرنا كيف دخلت مشيت نيشان الكافتيريا بديت كنشرب باش نسا لي وقع حيث راسي كان باغي يترطق شافتني سلوى جات عندي كتسولني مالي دفعتها سلوى : هاذا مالو مصطفى نمرود مالكم نمرود : قتلنا ناس ديال داك الكاريان قال ليا علاش قتليتهم وتفاتنا سلوى : ونتا علاش قتلتيهم ياك مهمتك تجيب التوقيعات علاش زدتي من راسك نمرود : صافي لي وقع وقع ماتزيديش عليا ياك القتل هو طبيعتنا حنا الذئاب ماشي مشاش _ بقيت كنشرب حتا فقدت السيطرة على راسي وكنبكي وكنغوت ماعندنا في نعسو الله غادي ينتاقم منا وكيف قتلنا هاذو غادي يجي لي يقتلنا بنفس الطريقة عيتتتتتت سلوى : زيد تنعس أيوسف _ عرفتي أسلوى كانت بين ايدي قتلوها حدا رجلي وجهها باقي بين عيني عيب عليا طلبات مساعدتي وماقدرتش نعاونها ، بديت كنصرفق في راسي علاااااش هاذشي سلوى : شنو كيقول هاذا شكون هاذي مصطفى: عاودت ليها قصة البنت الصغيرة _ بقيت كنعربط ليهم حتا عييت ومشيت بلاصتي نعست طحت كاو وقبل مايصبح الحال فقت على واحد الحلمة خايبة شفت وجه البنت الصغيرة في واحد الهيئة كتخلع وهي كتحاول تخنقني وكتقول ليا علاش قتلتوني فقت مخلوع وكنهج سلوى : بسم الله عليك أيوسف _ جابت ليا كاس ديال الما شربتو ورجعت تكيت كنفكر في ديك البنت مابغاتش تحيد ليا من بالي كنحاول نفكر فشي حاجة أخرى ووالو كنسمع ديك عمي كتعاود ليا حدا ودني ووجها بين عيني ، نضت من بلاصتي مشيت لواحد الركنة في بيت الخزين ديال السلع وبقيت كنبكي بحرقة حتا صبح الحال هزيت طومبيلتي وتوجهت حدا البحر دوزت نهار كامل تما بلا ماكلة وبلا شراب وعقلي مع الجرائم ديولي سلوى عيات تصوني ليا صدعات ليا راسي طفيت عليها التليفون وبقيت جالس بلاصتي حتا ظلام الحال مشيت خديت مهدأ من الصيدلية ورجعت المقر دخلت لبيتي سلوى : والشريف فين كنتي مخليني بغيت نحماق عليك خلعتيني عليك _ كيف كتشوفي أنا بيخير خليني دابا بغيت نعس شربت الدوا تكيت مع نعست حلمت بديك البنت في واحد الشكل عملاق و تبعاني باغية توطع عليا برجليها وأنا هربان وكتقول ليا ماعندك فين تهرب مني انقتلك كيف قتلتوني وأنا كنقول ليها ماشي أنا لي قتلتك ، فقت مرعوب مرة أخرى والموشكيلة هي الدوا بدا يسبب ليا في الهلوسة شفت في المرايا وبدا كيبان ليا شخص كيشبه ليا غير هو وجهو كحل وكيخلع شوية ... شكون نتا الضمير : أنا شيطانك _ ولكن رمضان هاذا كيقولو الشياطين مشدودين الضمير : عندك الحق ولكن في هاذ الحالة نتا الشيطان كنقصد أنا حيث أنا و نتا واحد أنا ضميرك الأسود _ وعلاش جاي لعندي دابا شنو بغيتي مني الضمير : جيث نفكرك في كولشي جيت نعاقبك على جرائمك ههههه _ علاش عاد جيتي فين كنتي من شحال هاذا علاش حتال لدابا الضمير : حيث دابا جا الوقت لي خاصك تعاقب فيه _ واش كاين شي عقاب كتر من هاذا ، مشيت هزيت قرعة الويسكي واخا رمضان وبقيت كنشرب كنشرب باش نساها حتا كاويت في بلاصتي فاش فقت لقيت راسي في بيتي وجالسة حدايا سلوى وتسنيم سلوى : تال ايمتا اتبقا هكذا مالك أيوسف _ معذباني أسلوى صوتها في وداني وصورتها بين عيني مابغاتش تبعد مني غادية تحمقني سلوى : لي قتلها ومامعذباهش هكذا ياك ماشي أول مرة تقتلو شي حد مدة ونتا براسك كتقتل الكبار والصغار شنو تبدل دابا _ هاذي طلبات المساعدة ديالي وزايدون من نهار دخلات تسنيم حياتنا قررت مانبقاش نقرب لدراري صغار سلوى : يله نخرجو نتعشاو على برا ونبدلو الجو ونديو معانا تسنيم تقدر تنسا شوية سير دوش فك هاذ الحالة وبدل حوايجك _ مشيت درت بكلامها دوشت بدلت وخرجنا توجهنا لسلا قضينا ديك الليلة ب 3 بينا أنا وسلوى وتسنيم حاولت سلوى تفوج عليا وبديت كنحاول نتناسى ولكن الله غالب كنكون كنهدر مع سلوى حتا كنسهى ونبدا نفكر في البنت لي ماتت قدامي سلوى : مالك احبيبي _ والو احبيبتي قولي ليا شنو بان ليك نبعدو من عصابة الذئاب ونعيشو أنا وياك وولادنا سلوى : لا مايمكنش نخليو كولشي ورانا _ صافي نساي بيلا قلت ليك شيحاجة تعشينا في ريسطو وشدينا طريق الدار البيضاء مرة أخرى وصلنا عطينا تسنيم المربية وخديت دوا دخلنا نعسو والحمد الله هاذ الليلة ماحلمتش بالبنت الصباح كيف فقت مشيت غسلت وتوجهت لكافيتريا لقيت مصطفى تما بدينا كندويو ونجيبو في الهدرة دوزت معاه شوية الوقت وهو كيحاول يضحكني سلوى : يوسف أجي عندي ليك مفاجئة يله تشوف _ خرجت معاها جردة ليقيتها خدات ليا موطور كواساكي نينجا زد إكس-14 في الأسود عجبني عنقتها وشكرتها على الكادو من بعد قصدنا بيت تسنيم هزيتها بديت لعب معاها سلوى : هاذ البنت بدلاتك أيوسف بزاف _ هاذ البنت أحسن حاجة وقعات ليا سلوى : حسن مني ياك _ بجوج بيكم بقينا عندها تال العشية بيما دق عليا مصطفى باش نتكلم نمرود نمرود : كيبان ليا رجعتي طبيعتك ولعقلك مزيان عندنا واحد المهمة غدا مع الصباح _ ماتبقاش معول عليا أنمرود في المهمات صافي أنا كنساحب من الذئاب نمرود : واش تسطيتي شنو كتقول نتا _ كيف سمعتي هاذا هو كلامي الأخير أنا مابقيتش معاكم وقريب غادي نمشي من هنا خليتو ودخلت بيتي بقيت كنتفرج بيما دخلات سلوى : شنو داكشي لي سمعت واش منيتك كتقول هاذ الهدرة _ اه أنا صافي قررت عييت من قتل الناس بغيت نرتاح و نعيش بعيد على هاذشي ونتي إلى بغيتي تمشي معايا نعيشو أنا وياك وولادنا تبارك الله بغيتي تبقاي هنا بقاي مع عائلتك ماغدي نبزز عليك والو الخيار ليك غدا غادي نمشي من المقر سلوى : نتا خرج ليك العقل وتسطيتي _ ماشي خرج ليا العقل ولكن صافي مابقيتش قادر عييت والله واعدت راسي مابقيتش نهز سلاح مرة أخرى ولا نقتل شي شخص آخر عندك تال الصباح قرري شنو ديري نمرود : سلوى يوسف تكلموا الرئيس هنا باغيكم _ خرجنا عندو لقيتو معصب شوية عليا سلمنا عليه الرئيس : يوسف قالو ليا بغيتي تنساحب مالك _ سيدي الرئيس نتا بمتابة الأب ديالي خدمتك بيما أمكن من قوتي وإخلاص ولكن دابا عييت من القتل كنتمنا منك تقبل مني أني نمشي من هنا مابقا عندي مانعطي هاذ الساعة بغيت نتفرغ لراسي شوية ونبدل سيستيم حياتي وكان شرف ليا أني نخدم تحت أمرك سيدي الرئيس: يمكن ليك دير لي بغيتي نتا بمتابة الابن ديالي وزوج بنتي نتا دابا حر في حياتك وبيبان الذئاب ديما مفتوحين في وجهك أولدي _ شكرا سيدي حيث تفهمتي الموقف ديالي الرئيس : بالنسبة لمهمة غدا اتنفدها نتا انمرود برفقة ختك سلوى يله بسلامة عليكم نمرود : مشا وأنا تبعتو من لور بابا بابا واش من بعد هاذ الجهد لي درنا معاه انخليوه يمشي هكذا على الأقل خلينا نقتلوه الرئيس : حاليا مانقدروش حيث انخسرو ختك حتا هي وتنقالب علينا شتي شحال كتبغيه خلينا نتسناو الوقت المناسب نمرود : كنتمنا تعطيني شرف قتل يوسف شحال وأنا كنتسنا هاذ الفرصة وعمري نسيت شنو دار لخويا عييت منافقو الرئيس : تسنا الوقت المناسب وغادي نقتلوه فاش غادي نشوف الوقت مناسب دابا محتاجينو _ مصطفى خويا جمع ليا رجالي كاملين بغيت نهدر معاهم فهد : يوسف فاش بغيتي تهدر معاهم _ اهلا فهد على السلامة منين خرجتي لينا تاني فهد : عاد وصلت دابا شنو كاين _ دابا تعرف أخويا ، مشا مصطفى جمع ليا رجال ديال الفرقة خاصة وقفو قدامي وقفة عسكرية وبديت كنخاطبهم ... لكل بداية نهاية من بعد مدة ديال العمل معاكم اخوتي وصل الوقت لي غادي نودعكم أنا كنعلن الرحيل ديالي عليكم من غدا وبغيتكم تعرفو أنكم بمتابة خوتي وعمري حسبتكم خدامة ديولي وكان شرف ليا نقودكم حطيتهم تحية عسكرية فهد : شنو كتقول _ كيف كتسمع صافي أنا قدمت الاستقالة ديالي بغيت نعيش حر أخويا فهد فهد : مايمكنش الأسود يغادر بهاذ الطريقة _ لا يمكن بديت كنسلم وكنعنق رجالي واحد بواحد وهوما كاعيين مابغاونيش نمشي عليهم و امرتهم يرجعو بلايصهم ومشيت ريحت كنهدر مع مصطفى وفهد فهد : ايه أخويا يوسف شنو ادير وفين اتعيش _ عندي الحمد الله فلوسي تعيشني حتا نموت والرئيس بمناسبة زواجنا كان عاطينا فيلا في طنجة كادو غادي نعيش فيها نمرود : الله يسهل عليك ماغديش نجادلك في قرارك مصطفى: أنا غادي نمشي معاك أيوسف _ مامضطرش تمشي معايا أمصطفى يمكن ليك تباشر العمل تحت القائد الجديد مصطفى: تا أنا بحالك عييت من القتل و نتا خويا فينما مشيتي أنا معاك تال الموت غادي نمشي معاك عفاك وافق ماتخلاش عليا _ واخا بشرط تواعدني عمرك تهز السلاح مرة أخرى مصطفى: كنواعدك نعيشو حياتنا عادي وبدون سلاح فهد : وبالنسبة لسلوى شنو ادير معاها _ سلوى ضبر راسها عطيتها تفكر من هنا غدا واش تمشي معايا ولا تبقا في خدمتها فهد : كنظن ماغديش تسمح في خوها وباها _ دير لي بغات مابغيت نبزز عليها والو ، بقينا كنهدرو وكنتكيفو حتال 1 الليل تسحرنا ومشيت بلاصتي لقيت سلوى ناعسة تكيت حداها ونعست تال الفجر بديت كنسمع تقرقيب نضت لقيت سلوى كتلبس حوايج المهمات .... ختاريتي يمكن سلوى: خاصني نفد أوامر بابا وكون هاني مهمة بسيطة في طنجة _ ملي ختاريتي طريقك الله يسهل عليك أنا غدا غادي نمشي بحالي سلوى : فين حدك تمشي تقدر تهرب من كولشي إلا مني احبي يله تصبح على خير _ نضت وقفت مشيت معاها تال باب الجردة ودعتها خدات معاها الفرقة الخاصة لي ولات تحت القيادة ديال سلوى دابا نمرود : هي صافي سخيتي بينا أيوسف تهلا في راسك أخويا ومرة مرة تفكرنا والمسامحة إلى قلقتك شي نهار _ مسامحك في الأخير حنا خوت ، تعانقنا أنا وياه ولكن فاش حط ايدو على كتفي حسيت بشي حاجة قرصاتني نمرود : سمح ليا واقيلا الخاتم جرحك _ ماعليكش يله الله يعاونكم ، مشات سلوى ونمرود بلا مانسولهم على شنو غادي يديرو ، دخلت المقر وأنا راجع تجاه بيتي وقبل ماندخل طليت على تسنيم هي لولة كانت ناعسة بستها ورجعت كملت نعاسي الصباح فقت معطل ، مصطفى جمع حوايجك انمشيو مصطفى: واخا خويا _رجعت لبيتي بدلت حوايجي لبست سروال جينز كحل وتيشورت أسود لاصق عليا كيبين عضلاتي وضربت عليه كويرة كحلة وصباط شيلسي كحل ومگانة ونظارات في الأسود كيف قلت ليكم عزيز عليا غير الكحل جمعت حوايجي وبعض الاغراض في باليزة في حين حوايج موهيمات خشيتهم في كرطابل باش لوحوهم في طريق ، فاش قاديت مسائلي خرجت من البيت طرگت تسنيم هزيتها معايا وطلبت من المربية ترافقتي حيث مستحيل نخليها لسلوى هنا ، وأنا خارج كنتوادع مع الحراس ديال المقر لقيت مصطفى موجد طومبيل ولأول مرة نشوفو بلا لباس فريق الذئاب لا تاني مرة من بعد عرسي كان ضارب حطة كلاس .... جيتي فسر العفريت مصطفى: ايوا ضروري انبدلو حياتنا خاص نبدلو لبسنا فهد : فين غادي ايوسف دابا وعلاش هاز البنت _ غادي نرجع تسنيم لواليدها حيث مايمكنش نخليها لسلوى وأنا ماكينش معاها ماغديش نرتاح من جيهتها تهلا في راسك أخويا فهد انتوحشك فهد : حتا أنا ولكن انبقا نزورك اخويا كتجمعنا الصداقة قبل العمل _ طلعات المربية طومبيل و في ايديها تسنيم وحطيت حوايجي في كوفر وعنقت فهد وأمرت مصطفى يتبعني من لور حيث غادي نركب في المطور لي خدات ليا سلوى ، حلو لينا الحراس الباب وتميت متاجه لمدينة الرباط وبالضبط دار الرئيس المخابرات علي وصلنا واحد الدرب قريب ليهم ووقفت وعلمت مصطفى يبقا هنا حتا نتاصل بيه عاد يلحق عليا دار علي ، كملت طريقي لعندهم كيف وصلت حدا الفيلا حيدت الكاسك وبديت كنكلاكسوني عليهم يحلو الباب الذيب : السي علي الأسود هنا بغا يدخل شنو نديرو علي: شنو بغا هاذا تاني شكون معاه الذيب: جا بوحدو بموطور علي : مع كنا مجموعين في الصالون شفت في العائلة ديالي وقلت ليهم سيرو تخباو دامي : علاش انتخباو علي: نتوما عارفين فينما كيجيو الذئاب هنا ضروري كيبغيوو يأذيو شي حد فيكم ، ذيب سير دخلو ونتوما سربيو تخباو نور : هاذي أحسن فرصة نقتلوه ماحدو بوحدو اش هاذ التقة في النفس الكبيرة لي تخليه يجي لعندنا بوحدو علي : واخا عند إشارتي نقتلوه نور : ركب أعلي سماعة وخليك معايا على اتصال نقول ليك شنو دير مهدي : اجيو معايا نتوما علي : داهم مهدي خباهم في قاعة الرياضة وانا مشيت حدا باب الفيلا _ حلو ليا الباب دخلت مع باب الجردة وكندو عويناتي ولاحظت بيلا علي زاد الحراسة وجاب رجال جداد علي : مرحبا بالأسود عندنا _ وليتي مصواب أالسي علي كيفاش البلان ، توجهنا صالون ريحنا وكان معاه الشبيه ديالي وواحد الولد آخر وكاملين باغيين ياكلوني بعينيهم ماكرهوش يقتلوني علي : فاش نقدر نعاونك الأسود _ بغيتك تمحي جميع الأدلة لي كتثبت التورط ديالي في الجرائم لي درنا علي : شحال قدي نمسح وإلى كاع مسحت اتعاود تقتل يعني بحال إلى انخوي الما في الرملة _ دير لي قلت ليك عليه وهذا آخر طلب مني ليك ، وأنا كنهدر معاه هزيت راسي في واحد الغرفة وبديت كنشوف فيها هو يضربني الضو في راسي تخيلت شي لحظات في ديك الغرفة بحال شي رؤيا وحسيت أنا شايف هاذ الغرفة من قبل .... علي شنو كاين في ديك الغرفة أعلي علي : لاصال كنترينيو فيه _ فاش قال ليا صال زاد الفضول ديالي نضت وتميت غادي ليها علي : فين غادي الأسود قلت ليك راها مجرد صال ... شوف أمهدي الأسود متاجه الغرفة لي مخبي فيها عائلتك مالقيتي فين ديهم غير تما المسخوط ديك الساعة بعدهم _ وصلت حداها حليت الباب كلقاها قاعة رياضية ومجموعين فيها عائلة علي شافوني كحلو بالعما تخلعو مني ... نتوما مجموعين هنا وأنا يحساب ليا خارجين سناء كيظهر ليا وليتي بيخير دامي : شنو بغيتي تاني _ ماجوبتهاش بقيت كندور في عيني ولي صدمني وحيرني هو القاعة طلعات كيف شفتها تماما في التخيلات ديالي حليت فمي فيها وانا تالف بقيت كنتقدم وأنا ساهي لتجاه الركنة فين مجموعين فيها عائلة علي وهوما كيرجعو لور حيث خايفين مني كيحساب جايه ليهم باش نأذيهم ولكن لااااا انا غادي تجاه ديك الركنة حيث شفتها في تخيلاتي وانا كنقرب من اتجاه ليزانطيغ هو يبان ليا نفس لانطيغ لي شفت طلع هو تماما ، وليت شاك أنا كنت في هاذ البلاصة وفايت شايفها من قبل وأنا كنشوف في داك لانطيغ لي مصنوع باللوح بدهشة وواحد راس كيقول ليا سير حركو توجهت ليه دزت من بين عائلة علي بلا مانتابه ليهم حيث كنت مرفوع وفاقل يله حطيت عليه إيدي باش نحركو حتا كنحس بموس تغرس ليا في كتفي تلفت بالعرض البطيئ نشوف شكون ضربني وهي تجي فيا الضربة مرة أخرى فوق صدري حتا غوت ... يتبع ( تفاعل وطاكي عشرانك يقراو وجمجمو جميع الأجزاء 💪🏻🙏🏻) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM