قلت ليكم البنات بقينا كنخملو الديور بزوج ماسالينا حتى لوقيتة معطلة مشينا تعشينا ومشاو معايا حتى جبت سوارت المحال باش كنحل فالصباح ورجعو معانا منير وسيف حتى وصلونا ومشاو بحالهم

مدازوش 3يام حتى عرفنا بلي أنور جا وبدا كيقاد وراقو مع إدارة الثانوية لي خايخدم فيها، وتما تفكرت أول مرة جا فيها لليسي ديالي وكيفاش كانو البنات كاملين طايحين فيه وعلى راسهم أنا.. كنت كنتسنى الفرصة غير إمتا تجي ونتلاقاه ولكن والو ماحدو كايقرب وهو كايبعد فنفس الوقت.. هاهو معايا فنفس المدينة ونفس البلاصة ولكن ما قاداش نشوفو

واحد السبت كنا جالسين أنا وندى غير فالدار كانخملوها ونصبنو حوايجنا وكنهضرو وهظرة تجبد هظرة حتى عتارفات ليا بلي كايعجبها منير ونا هادشي كنت عارفاه ولاحظتو شحال هادي نضرات الإعجاب ماتخفاش عليا فاش كنكونو جالسين تضل تشوف فيه غي هو نكونو نضحكو تركز عليه غي هو يحتاج شي حاجة تحضرها ليه تديها فيه تجبد معاه الهضرة كتحاول تبقى قريبة منو ما أمكن ولكن هو ماعرفتش فديك اللحظة لي كنت كنشوفو فيه هو نضرتو لينا كخوتو فقط بغات تعتارف ليه قلت ليها ماشي دابا حنا مزال صغار خلي غير حتى نشدو الإجازة بعدا زائد الحب وهادشي ديال العلاقات غير غايخرب صداقتنا لي كايتضرب بيها المثل.. ونا كنهضر معاها تفكرت التهور ديالي والإعتراف لي صيفطتو الأنور.. كيفاش كنت غبية لديك الدرجة.. كيفاش خليت العاطفة وروح المراهقة تتحكم فيا وتخليني نصيفط الأستاذي رسالة إعتراف.. كون ورا داكشي للإدارة. كون.. كون... شنو هي النضرة لي غايهز عليا... هنا بالضبط غايتبدل حماسي لشوفتو.. لتهربي من لقائو فأي فرصة غاتجي.. حيث كنت حشمانة من ردة فعلو... من نضرتو ليا...

واحد النهار كنت خدامة وجا خالي للمدينة لي كنت فيها وبحكم أنه ماعارفش الدار لي وليت ساكنة فيها مع ندى مشا لفاك لعل وعسى نبان ليه حيث عيا مايصوني ليا ونا تيليفوني كنت دايرة ليه صيلونص كانت الساعة 4 هكاك خرجنا من لافاك ونا كان خاصني نمشي للخدمة سلمت على منير وندى وسيف ومشيت قطعت الشارع، فداك النهار كان سيف غايمشي معايا ولكن كان مشطون مع واليديه لي كانو غايرحلو لهاد المدينة بحكم خدمت باباه لي غاينتاقل فجأة ولي قرر يجيب معاه مراتو ومو مدام ولادو بزوج فهاد المدينة..

قطعت الشانطي ومشيت للخدمة وهادشي خالي تابعني كيراقب...

ذخلت الخدمة ولبست الطابلية باش كانغسل الماعن لقيت لافابو عامرة يالله درت الصابون بديت كنغسل حتى كنسمع الشاف كايهضر مع شي حد فالباب عندنا لذاخل وكنشوف خالي ذاخل وجات عينه فعيني وحسيت بعرق بارد نازل على جبهتي من الخلعة قاليا تبارك الله على بنت ختي هادشي لي مصيفطينك ديريه هنا.. هادي هي القراية لي جيتي تقرايها، غسيل الماعن عند عباد الله، هضرتو بهضرتي كنحاول نشرح ليه بلي الخدمة ماشي عيب ونا مابقيتش باغا نبقى نحس بالعبئ عليه.. وبلي مداياها فقرايتي.. قالي واحد الجملة كنسمعها لدابا " نتي ماشي ثقل عليا أنا كاندير ما فجهدي باش فاش نتلاقا باك نقوليه ماقصرتش فحق ولادك.. " دار يديه فجيبو ورما ليا فلوس على وجهي وقالي هادشي لي كتخرجي ضربي الكرفي على ودو.. وخرج ونا عينيا غرغرو وقلبي كثر خرجت وراه لا شعوريا ودزت على الكليان كنجري كايبان لي غير خالي قدامي وشديتو فالزنقة بست ليه يديه وعنقتو كنبكي وحتى هاديك أول مرة نشوف خالي حتى هو فنفس حالتي وقلت ليه بلي خيرو سابق عليا ماكنتش غانكون فحتى بلاصة دابا كون مكانش هو لي وقف فضهري وساندني فقرايتي وعمرو خصصني من شي حاجة وخلاني فنفس المرتبة مع ولادو وكثر طلبت منو السماحة حيث كل مرة كان كيسول عليا كنت كنكذب عليه وخلاني نواعدو بلي غانخرج من ديك الخدمة..

رجعت حيدت الطابلية وعتاذرت من الشاف وشديت فلوسي عند البنت لي جمعاتهم ورجعت مع خالي للدار لي دوزت معاه مابقا فديك العشية حتى جات ندى ومشا لوطيل حيث مابغاش يبات معايا احتراما ليها وهادو من بين المواقف لي ماعمرهم يتنساو ليا...

واليدين سيف ستاقرو وكراو دار متيسعة بما لقاو شي حاجة ملائمة يشريوها وحتى سيف سكن معاهم لا هو لا خوه و منير رجع كرا دار على قدو بوحدو.. كان هو من داك النوع لي عزيز عليه الكالم وراحة البال ويدوز وقيتة زوينة مع لي عزيز عليه وماعندوش مع الناس بزاف من غيرنا حنا الثلاثة وداكشي لي كان عاجب ندى فيه ..... درنا أپيل جماعية حنا الثلاثة منير ندى وأنا كنخططو فيه لعيد ميلاد سيف لي قرب ومشينا على خطة كان موجدها منير ولي كان قتارحها عليه أنور بأنهم يديرو ليه حفلة صغيرة فدارهم الجديدة ومنها تكون احتفال بعيد ميلادو ومنها بانتقالهم لهاد المدينة ومنها ترقية باهم فخدمتو ومنها تجمع العائلة...

بقينا ديك الليلة كلها كتخططو غانشري ليه هادي لا أنا غاندي ليه هادي ماماه غاتكلف بالحلوة وخوه غايجيب هادي.....

لي كنت كنفكر فيه كثر داك الوقت هو أنه هاد المرة لا مهرب غانتلاقا بأنور غانتلاقاه

#يتبع..