هزات صاكها وقالت لصاحبتها نوضي نوضي شوفي البلاصة كي معفنة خلي ماكلتهم... مع أنه المحال وخا صغير ولكن نقي وزوين حتى من الديزاين مخدوم بطريقة واعرة.. جات البنت لي خدامة معايا وقالت لي واش تعاملتي معاهم بطريقة خايبة علاش مشاو بديك الطريقة.. سمعها الشاف وجا غوت عليا وخا مادرت والو
كي العادة مع 11 جيت نخرج ولقيت سيف يالله جا وتمشينا بزوج حتى للدار وشرا ليا وبقا حتى ذخلت ومشا لدارو..
دازت شي يومين وكنا جالسين فحصة التيبي كالعادة وجات نفس البنت جلسات ورايا وقالت لصاحبتها يخ تفو نوضي من هنا ريحة الحوت كتعطعط بنادم ماعرفش شي حاجة سميتها الصابون.. وخا أنا والله إلى بنت نقية وماكانت حتى شي ريحة ولكن قصدات تغيضني بديك الهضرة بما أنها شافت المطعم لي خدامة فيها كانديرو السوشي والأكل الأسيوي...
فاش خرجنا ثاني بقينا واقفين شوية كنهضرو وكنت شادة بوليكوب بيد وسيف حتى هو شاد بيد جات وقفات دارت راسها كتسول منير على شي محور وشافت فيدي وفيدو وقالت لي نحلف على يدك حتى يد راجل شارف مقارنة بيد سيف واش كنتي مرقداهم فجافيل مكتعرفيش الكريمات والمرطبات نتبرع ليك والضحكة ديالها باقا فوذني حسيت بغصة فقلبي لاسيما أنني ماعمري هضرتها ولا وصلتها ولا بيني وبينها حتى علاقة باش تعامل معايا هكاك ولكن لي صبرني جواب ندى ليها ولي قالت وباقي عاقلة عليها مزيان "ونحلف على فمك حتى خنز من فم واحد كان يكمي الحشيش ماشي حتى الگارو جربي ترقدي حتى نتي لسانك فجافيل تحيد منو بعدا غا ريحة الزفورية تقول كاتغسل سنانها بصفار البيض" وضربات يدي وضحكنا كاملين... جرات هي صاحبتها من الشمتة وكانت شوية غاتزلق فالدروج وهي كتلفت وتحلف...
بديت كنحس باهتمام سيف الزايد وحنيتو فدوك اليامات، فاش كنكون عيانة ونحط غي راسي فوق الطاولة يقولي مالك فين كايضرك بغيتي شي حاجة، ويخرج يجيب لي قرعة ديال الما وشي حاجة حلوة، نهار الروبو ديالي يجي يشرح لي الدروس لي مافهمتش... حرفيا سيف كان من أقرب وأحن شخص ليا فديك الوقيتة..
كنا جالسين بحال العادة فنهار الروبو ديالي ولي هو روبو ندى حتى هو ختاريناه يكون نهار السبت باش نرتاحو فيه... حتى جبدنا ثاني أنور فالهضرة وقالينا سيف بلي من العام الفايت وهو كايطلب بالإنتقال لهاد المدينة باش يعرف يوازن بين خدمتو كأستاذ وكطالب ويالله تقبل ليه الإنتقال وغايجي يقري فواحد الثانوية هنا...
قلبي دار خدمتو ثاني وبدا الحركات اللولبية ديالي وعقلي مشا بعيد ثاني كايخمم كيفاش وكي غاندير وشنو ومنين...
فالبدية ديال شهر 10 وفالنهار ديال الروبو ديالي كنا انا وندى ومنير وسيف كنجمعو الرحيل ديالهم حيث غايتحولو لدار أخرى بحكم أنور لي غايجي يسكن معاهم... مسالينا تخمال الديور بزوج حتى لوقيتة معطلة
#يتبع..❤❤
ليست هناك تعليقات:
إرسال تعليق