الأسود 🖤 الجزء 39 🔥🔥🔥🔥🔥 ( الجزء الماجي من بعد 370 لايك ❤️ ) _ وأنا ساهي قاطعت سناء السهو ديالي سناء : حبيبي مالك واقف بوحدك _ كنشوف في صحابي تقريبا رحلة سلات غادي نتفرقو ماسخيتش سناء : اه احبيبي هاذ لمة زوينة واخا غادي نتفرقو ولكن انرجعو نتلقاو كيف كنا ومن بعد زواجنا ضروري نعاودو شي رحلة أخرى _ إن شاء الله حبيبتي يكون خير سناء : امين تبعني والى شديتيني نخليك تبوسني _ أمممم قولي باغة نبوسك وصافي لاش اتهربي العفريتة يله أجي لهنا ، مع هربات تبعتها شديتها عنقتها من بعد تكيتها في رملة بستها وبقيت متكي ليها على رجليها وكنهدرو وحنا شادين ايدين بعضياتنا سناء : ماكنتش كنتخيل نعيش هاذ الرومانسية ولا نزعم مثلا نشد في ايد الراجل لي كنبغي وانا على برا الدار حيث أنا من نوع لي واخا مطلوق حشومي ولكن فاش عرفتك كلشي تبدل _ حتا أنا من نوع لي حازم وحزوزي ومعاك نتي تبدلت تخيلي مالين دار ماكانوش كيزعمو يهدرو معايا على أي حاجة كنت من داك نوع لي مزير على راسي وديما تخنزيرة سبقاني تبدلت من ورا الموشكيل لي وقع ليا سولي مهدي يقول ليك سناء : ايوا الحمد الله ملي تبدلتي فراسك البرفان لي كدير زوين كيحمق وحتا نتا كتحمق ماكرهتش ناكلك ارا دوك ليدين نعضهم _ بدات الحميمقة ديالي كتعض فيا ، والشريفة جهلتي كيبان ليا انشري ليك كمامة ديال الكلاب سناء : هاك زيدك إلى ماخليتش فيك سيكاتريس باش انتسما كنبغيك مهدي : أمين يله الساط انمشيوو نسهروو في واحد الكافي _ سولتو على اشمن كافي قال ليا بيلا قال ليهم المؤطر كاينة قهوة زوينة فيها الجروب كيغني الشلحة والشعبي اندوزو فيها ليلة الأخيرة ... توجهنا ليها مع دخلنا لاحضنا أن القهوة مافيهاش الكراسة الجلسة في الأرض ، حاطين ميدات صغار ومخاد جلسة أمازيغية والجروب كيغني تاغروبيت ريحنا الأرض جاو السرباية خداو الطلبيات ديولنا وحنا كنتموسقو لجروب ومرة مرة كنوضو نشطحو مجموعين والزوينة هي فاش ناض مهدي ودامي كيشطحو على واحد ديسك ديال الشلحة الهربة ... شوية دخلو وحدين كيغنيو گناوة ناضت سارة وملاك كيشطحو وكيتحيرو وحنا كنضحكو عليهم دوزنا ديك السهرة واعرة شبعنا شطيح ورجعنا لأوطيل مع 23:50 تجمعنا على وجبة العشاء المؤطر طارق : للأسف الرحلة سالات وصلنا لنهاية كنشكركم على تعاونكم وكنحييكم على هاذ الرحلة الشيقة لي نتمنا ماتكونش الأخيرة معانا غدا غادي نفيقوكم في الوقت ديال ديما 8 صباح نفطرو ونخرجو نريحو شوية في البحر نبدلو الجو من بعد نرجعو نجمعوو حوايجنا و 12:00 نديرو الانطلاقة إلى مدينة اسفي مفهوم _ سالا الخطاب ديالو تمينا غاديين لي شومبر ديالنا سناء : أمين ماسخيتش بيك يله نخرجو برة نريحو حدا البحر بغيت نبقا معاك شوية _ ايه علاش لا ، مهدي سامي جمعوو الكليكة و نتشاوفو حدا البحر وماتعيقوش باش كايتجبدش لينا الصداع مع المؤطرين سامي : كون هاني اعشيري _خرجت أنا وسناء من لوطيل وتوجهنا لبحر وحنا مشادين في بعضياتنا وكنضحكو ، وصلنا فرشت واحد الفوطة ريحت وسناء تخشات قدامي وانا معنقها من لور بعد لحضات كيبانوو ليا الكليكة كاملين جايين مجموعين ريحو حدانا دامي : كنضن حتا واحد ماساخي يرجع لأسفي منير: شكون غادي يبغي يرجع اصحابي وحنا مولفين بعضياتنا خاصنا شي رحلة فيها شهر يله يله تقدنا ريم : والله ماسخينا الوقت داز كيجري سامي : ولابد من الفراق الخوت ولكن حنا ماشي غادي نتفرقو غير ماغديش نبقاو شاركين السكن كيف دابا ، ارجعو لأسفي وغادي نرجعو نتلاقاو حدا لافاك ومزال انعيشو ايام زوينة ونزهاو فدوى : بصح و مزال عرس سناء وأمين تاهو يدوز ناضي ياسمين : سعداتكم نتوما حدا بعضياتكم أنا لي بعيدة دامي : غادي نجيو عندك غير تهناي مريم : امين ملي اتزوج سناء اتبقا تخليها تجي عندنا _ معلوم انجي أنا وياها نتوما خوتي وحبابي ماغديش نتفرق عليكم وباب داري مفتوح ليكم كاملين لي بغا يجي عندي يجي ويريح شحال ما بغا مرحبا بيكم كاملين حمزة : حتا قلنا ماغديش نستعملو الكيتار في هاذ الرحلة ساعة مكتاب يدوز وقتو معانا ، خويا امين شد لينا شي ديسك موسقنا أنا بعدا توحشت نغمة ديالك أيمن: ماعليكش جبتيه معاك كتفكر الساط حمزة : ايوا شنو كتعرف عليا 2 حوايج مكنفرقهمش التيتز والكيتار _ بدينا كنغنيو وكنستمتعوو وكنبروفيتيو ماكيسيمو في االوقت لي بقا لينا هنا ، ضحكنا شطحنا غنينا بيما وصلات 3:30 ورجعنا لوطيل توادعنا ودخلنا لي شومبر نعسو ، بدلت حوايجي وشديت بلاصتي وانا كنتفكر الأيام لي دوزت هنا وكنبتاسم ، احسن ايام حياتي دوزتها في هاذ 3 يام بديت كنشكر الله على هاذ الصحاب لي عطاني وبدلو حياتي لآفضل ، وأنا كنفكر نعست الصباح فقنا مع 8 فطرنا وخرجنا البحر ضحكنا لعبنا تصورنا مع بعضياتنا كيف ديما وقدرنا نصالحو سناء وياسمين معجزة وقعات ، وصلات 11:30 مشينا لأوطيل هزينا حوايجنا درناهم في الكار وركبنا 12:00 كيف قال سي طارق درنا ديبار من أكادير نحو اسفي جلست حدا سناء وحنا كنتعاودو على شنو نديرو في العرس و مواضيع اخرى من بعد 4 السوايع وصلنا الصويرة وكانت الساعة كتشير الى 16:10 ، وقفنا حدا واحد الريسطو باش نستارحو وناكلو ، وداكشي لي كان بدينا كنتغداو بيما وقف عليا الذيب قال ليا أن الطومبيل ديالو خسرات ليه وبعيد على شي ميكانيكي دامي : أنا نعاونك تصوبها بلاتي نسالي ماكلتي وهاني معاك الذيب : حضرة الضابط كتفهمي في الطومبيلات دامي : وي وبزاففف _ سالات دامي ماكلتها بيما الكار بغا يديماري ... دامي اش غادي ديري الكار ايمشي دامي : ماعليش أنا انبقا معاه حتا تصاوب الطومبيل ونلحق عليكم _ ودعتها أنا و مهدي طلعنا الكار وديمارا سناء : مسكينة دامي ضريفة بزاف عزيز عليها تعاون الناس _ هاذشي علاش عزيزة عليا قلبها بيض هاذ البنت في شكل سناء : توحشت ماماتي بطا عليا ايمتا نوصل _ حتا أنا توحشت مالين أيمن : صافي ادكتورة اترجعي لخدمتك سخيتي بينا ياسمين : والله ماسخيت بيكم ماكرهتش نبقا معاكم ديما ولكن الغالب الله هناء : كيخص تجي عندنا مرة مرة عنداك تغبري علينا وليتي ختنا ووحدة منا ياسمين : مستحيل نتفرق عليكم _ من بعد ساعة من مغادرة الصويرة عطاني خويا تيليفون قال ليا تفرج في فيديو ديال دامي فاش كلات العصا خديت منو تيليفون بديت كنتفرج سناء خشات وجهها معايا تفرج معايا وفجئة طلقات واحد الغوتة سناء : هي هي أمين والله حتا هي ماكنتش كنتخيل هاذي هي سلوى خت أحمد ماغديش تفرق علينا بغات تقتلني _ سمعت كلامها تصدمت وحرت في نفس الوقت ، رجعت فلاش باك وتفكرت كيفاش كانت كدوي معانا والقوة ديالها وزدت تأكدت اني كنت حمار ملي ماشكيتش فيها أن وحدة بديك القوة تقصدنا بديك الطريقة مراقبانا من لفوق بلا مانحس ، و الغريب في الأمر هو علاش مادرت حتا ردة فعل حدها بغات تلعب كونبة مع دامي شنو كان الهدف ديالها بداو كيدورو ليا في راسي الألاف ديال الاسئلة ... عطيت تيليفون لمهدي وبديت كنحاول نطمئن سناء أنها ماغدي يوقع ليها والو معاها مهدي : أمين هاك دامي بغات تهدر معاك _ دامي مالك ياك لباس ؟ دامي : كنصوني ليك علاش ماكتجاوبش في تيليفونك _ داير ليه صيلونص ياك لباس كيبان ليا صوتك ماهواش اش واقع دامي : أمين سمعني مزيان دعوة مخربقة بزاف ماكين مايتخبا اخويا واخا صعيب نقولها ليك ولكن _ دوي ياك لباس شنو واقع ليك خلعتيني دامي : الله يصبرك باك الله يرحمو مسكين و مك مخطوفة داوها المافيا و الرئيس سعد حتا هو مات _ غوت بجهد حتا كلشي سمعني شنو كيفاش با مات واش كتفلاي ولاشنو كديري ليا برانك دامي: البركة في راسك أخويا هاذشي لي عطا الله جعل محبتو صبر ، مافيا الذئاب رجعو ونفدو مهمات مختالفين في عدة أماكن موصيبة كحلة خاص نردو البال البركة في راسك اخويا اخويا أنا دابا جاية عندك _ دموعي نزلو من بلاصتهم وحسيت بدنيا وقفات ترفعت وعقلي غاب ، الكلكية تجمعو عليا كيسولوني مالي وأنا غير ساكت كنبكي في صمت ... اخيب خبار تقدر تسمع هي وفات شي واحد من واليديك قلبي تشوا من لداخل مهدي : امين وأمين عفاك شنو واقع جاوبنيييييي ... آلو دامي شنو كاين جاوبينا _ بانا مات أمهدي ومك مخطوفة خداوها رجال أحمد سامي : ياك قتلتوهم كيفاش رجعو مهدي : مايمكنش هاذشي لي كتقول لينا بابا مايمكنش يموت ويخلينا _ مشاا الواليد اخوياااااا مشاااا لااااااااااااااااااااا باياااااااااااااااا مهدي : اهئ اهئ خاص نتاقموو منهم خاص نقتلوهم مايمكنش يقتلو الواليد لا لا لا اخويا مايمكنش اخويا كاين شي غلاط سامي : مهدي جاتو بحال الصدمة ولا ميدخل ويخرج في الهدرة ، الصبر اخوتي الله يرحمو إن لله وإن إليه راجعون الله يصبركم مهدي : مخاصكش تخلي دم الواليد يمشي هكاك خاصك تنتاقمو ليه وأمينننننن والزبل دوي معايااااا راه غادي نحماق _ سكت وا سكت أمهذي راه داز الحال صافي داز الحال على الانتقام غادي لحقو عليه جميع سمع شنو فوقك دابا سناء : هاذا صوت الهيلكوبتر شنو كيعني هاذشي _ سمعت صوت الهليكوبتر قريب لينا عرفتهم الذئاب وتفكرت كلام الحارس الشيباني ديال أحمد فاش وصاني و قال ليا حضي ديما من الهليكوبتر هاذا هو تكتيك باش كيحاصرو و كيقضيو على الأعداء ديالهم ، شفت في سناء سناء بنضرات حزن وجاوبتها على سؤالها ... يعني وصلو لينا سناء : اهئ اهئ موشكيلة صافي _ جبدت سلاحي من الكرطابل ديالي وبديت كنطل من الشرجم هوما يبانو ليا رجال منقزين من الهيليكوبتر لي كانت قدامنا بالمضلات وقراب يوصلو الأرض ، أمرت شيفرور يزيد السرعة وتاصلت بطومبيل الأولى ديال الفرقة الخاصة ديالي تحمينا من القدام و2 لآخرين يبقاو لور ، نفدو كلامي وكلشي كان مخلوع سبقاتنا طومبيل ديال الفرقة الخاصة جات قدامنا من بعد دقيقة ونصف نفجرات طومبيلتهم تهزات حتال السما وتحطات تيراو فيها ب بازوگة من القدام ؤ الشيفور ديال الكار حبس واحد الفران كان ايقلبنا.... شفت قدامنا بالزربة بانو ليا مافيا الذئاب سادين شانطي بطومبيلات ديالهم وكنضن كتسائلو باش عرفتهم مافيا الذئاب ؟ حيث لابسين نفس لباس ديال الرجال لي هجمنا عليهم في القرية في تونس ، كانو لابسين لباس ديال المهمات رمادي غامق وعليهم لوغوو ذئب .... بدينا كنسمعو صوت القرطاس ورا الكار كانو رجالي مبادلين معاهم إطلاق النار بديت كنغوت على لي معايا في كار باش يتحدرو ويتخباو تحت من الكرسي ديالهم وهوما وكيغوتو وخايفين مشيت كنجري لزاجة لوراينية ديال الكار نشوف شنو واقع تصدمت بانو ليا مافيا الذئاب لي نزلو بالمضلات قتلو أغلبية رجالي وشدو البقية رهائن رجعت كنجري لقدام ديال الكار لقيت بيلا المجرمين حاصرونا من جميع النواحي وكيتقدمو شوية بشوية تجاهنا بديت كنتيري طيحت فيهم 4 وهوما مابغاوش يتيريو في الكار نهائيا جاتني من الجنة والناس بقيت كنتيري و كنقتل فيهم حتا كنسمع في مكبر الصوت بصوت خشن نمرود : أمين هبط من الكار مابقا عندك فين تمشي راك تحاصرتي _ ماتسوقتش ليه بديت كنتيري في أي واحد كيقرب لينا نمرود : اخر مرة نعاود كلامي نسمع قرطاسة أخرى خارجة من سلاحك نفجر الكار بكاع لي فيه ماكنضكش بغيتي نديرها ونقتل صحابك _ بديت كنشوف في الذئاب لي محاصرين المكان من كاع البلايص ، هزيت عيني في الركاب لي معايا في الكار وصحابي ودرت فيهم نضرة مطولة وتم عرفت بيلا هاذي هي نهايتي وكانت أول مرة في حياتي نحس بالخوف الشديد نمرود : اخر انذار أسي أمين هبط ولا نفجر الكار مابغيتش ندوي بزاف _ مشيت كنجري بست سناء لجبهتها وحيطت ايدي على كتف مهدي ، وقلت ليهم سامحوني وتميت نازل سناء : أمين لا أمين عفاك بقا _ حليت باب كار نزلت وقفو عليا وحدين من الذئاب طلبو مني لوح سلاحي لحتو ، شدوني دارو ليا المينوط وجلسوني على ركابيا قدام الكار من بعد طلوع الكار نزلو صحابي والركاب كاملين وكلشي كيغوت وانا الدموع على عيني دموع الحصرة بابا مات وحتا حنا واقيلا انموتو مابقاش فيا راسي قد مابقاو فيا لي معايا ، جلسوهم على ركابيهم حدايا هوما يخرجو 2 من واحد طومبيل كبيرة ولد وبنت كانو لابسين نفس حوايج رجالهم غير هوما وجههم كان مكشوف والصدمة أن البنت هي سلوى لي غلبات دامي نمرود : كنفرح فاش كنشوف العائلة مجموعة ليا الشرف أسي أمين نتلقاك نهار كبير هاذا مدة وانا كنتسنا هاذ لحضة التاريخية _ شنو بغيتي المجريم شكون نتاااا نمرود : سؤال زوين هاذا نعرفك بارسي أنا سميتي نمرود خو أحمد لي قتلتي كنضن سناء فايتة شيفاني أنا لوسك ياك أنسة _ جيتي دابا تنتاقم لخوك ياك ايوا نتاقم أنا لي قتلتو بيدي نتاقم مني أنا بوحدي اش بغيتي هاذو لي معايا سلوى : سكت ماتكونش فيك الهدرة بزاف نخليو موضوع خويا لي قتلتي هو الاخير حتا نتحاسبو معاك على حوايج اخرين البوكوص نمرود : رونتيها هنا وجيتي عندنا تال تونس وكملتي روينتك ، سناء لي جيتي تعتق و قتلتي خويا على ودها كنت عارف انها مزال حية في السبيطار وخليتها براحتها مابغيتش نأديها ماتسوقتش ليها بمرة وكنت غادي نخليها ترجع المغرب نتا تسرعتي جيتي رونتيها ودرتي الفوضى ، نقول ليك واحد الحقيقية أن من أشد المعجبين بيك من مدة طويلة وانا مراقبك وعارفك شنو كتسوا وشنو قادر دير وصيت خويا مزيان فاش عرفت أن سناء حبيبتك باش يرد لبال لراسو وماتصنتش ليا عند بالو انهو إلى كان في دولة أخرى ماغديش توصل ليه _ خوك ماشي راجل لي واخد وحدة مابغاهش بزز و فاش خداها تكرفس عليها سلوى : داكشي علاش خلينا في سبيطار وماقلناش ليه بيلا مزال حية نمرود : نتا أمين تقدر توصل لأي واحد كيما كان وفينما كان في نفس الوقت ساهل يوصل ليك الواحد عندك نقط ضعف بزاف شنو يحساب ليك ماغديش تعاقب على داكشي لي درتي ، كجزاء ليك على روينة ديالك جينا روناها وخاصك تشكرني حيث أنا ضريف خليتك حتا تخطب وتسافر مع راسك وتليتك نتا الاخير عطيتك شي ايام باش تعيش السعادة وتفرح قبل ماتودع الحياة _ شنو كتقصد بالاخير شكون قبل مني نمرود : بوزيان الكلب ديالنا قتلتو حيث فشل في مهمتو وخلا واحد بحالك يدخلو الحبس سعد الخائن قتلتو كيحساب ليه ايلعب معانا وغادي ندوزوها ليه العمراني لي قال ليك بلاصة خويا قتلتو وباك تانتا قتلتو عندنا 4 الأشخاص هنا والديهم ماتو ... الله كتبكيو بقيتو فيا البركة في راسكم تأطرت _ بقيت غير ساكت ومصدوم وأنا مغلوب على حالتي واش نحزن على موت الواليد ولا على راسي ولا صحابي لي طايحين موشكيل كبير دموعي بقاو نازلين بحال الشلال مابغاوش يحبسو نمرود : سي أمين مك حتا هي في ضيافتنا سمعت و اتزاد عندك اخت مزيان تقدر تنفعنا تولي شي جندية قوية بحال ختي سلوى و متخافش غادي نتهلاو فيها _ مي المجريم ماعندها حتا دخل والواليد لي قتلتوه مادار والو علاش شنو ذنبو علاش ماجيتوش عندي أنا دوي حسابكم معايا أنا ماشي مع الأبرياء نمرود : حسابك هو الأخير وبالنسبة ليهم هوما دنبهم الوحيد أنهم والديك اش ندير ليهم أنا ، مليت من كترة الهدرة دابا ندوزو لفقرة النشاط ... يتبع ( قرا وتفاعل وطاكي عشرانك يقراو معاك قصة ماضية 🔥🔥🔥🔥) #قصصمغربية تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM