الأسود 🖤 الجزء 14 🔥🔥🔥🔥 ( التتمة من بعد 340 لايك قرا وتفاعل وطاكي عشرانك يقراو احسن ماكين في القصص ❤️🥰💪) مريم : هاي هاي على طيحة شحال زوينة ديال شي فيلم تركي رومانسي فدوى: ياختي ياختي كيفاش شدك وخشاك بين دراعو باش ماتأدياش حبيت هناء : هانتي على السيد طلع مساهلش ملاك : ياخويا كي درتي ليها حتا شديتيها جن ، واحد كيشوف ومايقدرش يدير لي درتي نتا _ شي نهار نتفرش ديجا قلتها ليكم ... وليني وحلة كاملين كيشوفو فيا باستغراب منير : كيف درتي ليها غير قول لينا _الحدس ديالي قوي وكنعرف نميز الاصوات وهي كانت قريبة ليا دغيا حكمتها سارة : تبارك الله عليك أسي مهدي ماسمحتيش في سناء حركة زوينة _ اه مانسمحش فيها ، تجي الدقة فيا أنا وماتجيش فيها هي ونفس الهدرة عليكم حتا نتوما نفضل أي واحد فيكم على راسي اخوتي مريم : ديما كدير لينا خاوية في عامرة الجمع كديرو غير باش ماتفرش راسك ...راك فاهم شنو بغيت نقصد ملاك : متأكد بيلا كاملين أتعامل معانا بنفس المعاملة ولا غير سناء سناء : صافي خليوه عليكم ماتبقاوش شادين فيه فدوى: اجي نهدر معاك اسناء ... قولي لي الرحلة قربات تسالي مزال ماشفنا والو من الموضوع لي جينا على ودو سناء : شنو اندير اصحبتي واش نخرجها من فمو بزز هو كيبان عليه كيبغيني ولكن خايف يقولها ماعرفتش شنو ندير معاه فدوى : اوفففف ماكرهت نشدو نقتلو فقصني سناء : اهيتا أنا لي انقتلك إلى قربتي ليه فدوى : ياك الكلبة دغيا فضلتيه عليا واخا سناء : بيب كنضحك معاك نتي حبيبتي وصديقتي الحنونة كنحبك ماحححح عليك فدوى : كنغيرو عليك الزين اتجينا صعيبة ياخدك واحد اخر عنداك يبدلك الحب سناء : منيتك داوية واخا نتزوج كاع عمري نقلب عليكم نتوما خوتاتي حياتي بلا بيكم ماتسوا والو _جمعونا المؤطرين ديولنا وركبنا الجمال مرة أخرى والوجهة المعرض ديال الحيوانات والزواحف لي كيعيشو في الصحراء ، وصلنا المعرض بدينا كنستكشفو المكان لي كان كبير وزوين وعامر حيونات وزواحف وكل حيوانات والزواحف حداهم سميتاهم و معلومات عليهم وكاين لي منقارض هاذي سينين حاطين الهيكل العضمي ديالو ، وصلنا حدا وحدة من الزجاجات ديال الزواحف كان فيها حنش خضر غير شافو أيمن بدا يغوت أيمن : ناري مي هاهو الحنش لي عضني _ بدينا كنضحكوو عليه مسكين ولات عندو فوبيا من الأفاعي حمزة : بوعععع هاهو ايخرج يعضك مرة اخرى هرب أيمن : سير اصحبي غيرها بعد مني برهوش مع راسك منير: خليه عليك أحمزة ، غير زيد متخافش ماعندو كيف دير يخرج من هنا _تصورنا مجموعين ورجعنا الخيام حطو لينا فطور الوداع لي هو كسكروط هزينا حوايجنا ركبنا الجيب وتاجهنا لمكان تواجد الكار لي جينا فيه . حطينا حوايجنا في الكوفر وركبنا وكانت ساعة كتشير ل 20:13 شدينا بلايصنا في الكار وبدينا كنتحدتو هناء : دازت رحلة زوينة كعما سخيت نرجع لأسفي كون غا بقينا سامي : تا أنا عجبني الجو هنا نقي وزيد عليها كنا مجموعين مع بعضياتنا مسخيتش بيكم فدوى : سكت نتا لي صدقات ليك جيتي سيليباطير رجعتي اونكوبل بسيف ماتبغيش ترجع سامي : عاند وماتحسدش ههههههههه فدوى : (سناء لي درنا على ودو الرحلة مادوا ماتكلم معاك في موضوع الحب ، ولي حشومي وماعندوش مع البنات رجع مصاحب ) سناء : سكتي ماتفكرينيش جينا على الخاوي ريم : سامي اجي ريح حدايا بغيت نتكلم معاك _ سامي جاتو من الجنة والناس مشا ريح حدا ريم وصحبتها حسناء جات جلسات حدايا ، سناء ورانا غارت بقات كتخنزر في البنت جمعات فمها وطلعات حاجبها مابغاتش تجي حدايا شي وحدة سناء : مريم عفاك سيري ريحي حدا البنت وخلي مهدي يريح حدايا بغيت ندوي معاه _ سناء كدوي وكتخنزر فيها نضرة ديال الغيرة حسناء فهمات البلان وحتا هي بقات كتشوف فيها شي شوفات بحال إلى بغات ضارب سناء : زيدي خرجي فيا عينيك كوليني حسناء : الله يستر اختي حتا العميين ولا يتخاطفو عليهم الناس سناء : عاودي اش قلتي منى : كيف سمعتي ولا يمكن حتا نتي ماكتسمعيش واقيلا كاملين كتعانيو من الإعاقة سناء : ايوا أجي نوريك الإعاقة العوجة _ سناء زربات عليها جراتها من شعرها كتنتف فيها ، حكماتها مع كانت وراها وحسناء جالسة مخلتهاش تحرك و مبقاتش بغات تطلق منها ضربات ليها صنطيحتها مع الكرسي بوقلاتها حسناء بقات كتغوت، أنا بقيت كنتفرج ناضو دراري والبنات كيفكو فيهم بزز حتا حيدوها ليها تصدمت في سناء مشات ديك الضرافة شرباتها العصير سناء : والله ماتبقا فيك نوريك تستهزئي بينا حسناء : غير بلاتي يا العقروشة المجعورة غفلتيني وحتا نشدك _ بصراحة عجباتني فيها اولا حيث هانتني ، وتانيا زوينة تشوف البنت لي كتبغي تحامي عليك رآه شيحاجة لي واو مريم : صافي اصحبتي تكلماي سناء : خليني نبرد فيها غدايدي _ بدلات البنت البلاصة وريحات بلاصتها واحد صحبتها أخرى ، وأنا ومريم تبدلنا البلايص جلست حدا سناء لي كانت كتشوف في حسناء وكتقلي ليها السم حسناء : الله يستر بحالك ماخاصهم مرزوگة خاصهم يمشيو مولاي براهيم يتعالجو من الجعرة تفو على ماركة سناء : هاهاها أنا بزاف عليك أنا لالاك سناء وشللي بيها فمك والى ماسكتيش غادي نجي نعاود ليك شي نتفة فاعلة تاركة وديك الساعة اتشوفي الجعرة ديال بصح سكتي حسن ليك _ صافي سناء خليها عليك ماتسوقيهاش سناء :اوففف عصباتني ماكنحملش بحال هاذ الماركة ، كتعيب في الناس كون غير كانت تحمر الوجه هي دايرة بحال شي طعريجة مزوقة ومزال كتهدر _ شكرا حيث دافعتي عليا سناء : مابينتناش هاذشي مانقدرش نخلي شي حد يتنقص منك _ اخليك ليا الزين مايحسابش ليا أنك واعرة كتسلخي البنات سناء : أنا ضريفة ولكن لي جبدني يلقاني _ وحنا كنهدرو طلق لينا الشيفور مزيكة وشد بينا الطريق بدينا كنغنيو ونسفقو ، داز وقت قصير بنادم بدا كيعيا مابقاش الجهد والمورال بحال فاش كنا جايين ، سكتو الموسيقة وبقيت كندوي مع زين ديالي وكنتعاودو أنا وياها حتا داها النعاس وهي متكية على كتفي وأنا كنتأمل في ملامح وجها وشحال زوينة بديت كنقاد ليه شعرها وبستها في جبهتها وبقيت حاضيها حتا داني النعاس 7:15 ديال صباح كنا في اسفي المؤطر: على السلامة رحلة كانت زوينة موعدنا رحلة أخرى إن شاء الله _نزلنا من الكار توادعنا مع بعضياتنا وسلمنا على دوك الكليكة لي تعرفنا عليهم صالحنا سناء مع حسناء ومشينا لبلاكة الطكسيات ومع صباح بكري واسفي مدينة النعاسة كانو الطكسيات قلال بقينا كنتسناو حتا جاو شي وحدين سبقنا البنات هوما لولين مشاو من بعد كل وحد فينا حنا دراري قصد دارهم ، خديت طاكسي حطني حدا باب دار خلصتو ولكن فاش نزلت بغيت نحل الباب لقيت بيلا ماعنديش ساروت نسيتو في دار ومالين دار ناعسين ناري على بلان مابغيتش نفيقهم ، تكيت على العتبة ونعست حتا سمعت الباب تحل مع جوايه 9 فقت مفزوع كان الواليد نضدت بست ليه فوق راسو الواليد : واش نتا مريض مالك ناعس على برا ، مناش ونتا هنا _ من 7:30 نسيت ساروت و قلت مانفيقكمش الواليد : إلى فيقتينا اطير منا شي يد ولا رجل دخل أولدي وماتبقاش دير هكذا راك ماشي مقطوع باش تنعس في الزنقة _ دخلت مباشرة لبيتي بدلت حوايجي و كملت نعاسي مافقت تال 16:00 نضدت سلمت على الواليدة وريحت كناكل في غدايا و كنعاود ليها على تفاصيل الرحلة وانا فرحان وحتا هي فرحات حيث كنت فرحان الواليدة : ماغديش تخرج تشوف صحابك ليوم _ لا تافقتا تال غدا عاد نتشاوفو ليوم كلشي عيان اتلقاهم ناعسين ... ساليت ماكلتي وطلعت سديت عليا الباب ما نعاودش ليكم كي داز هاذ نهار ممل بزاف توحشت صحابي وحسيت براسي وحيد ، أكيد كاملين حسيتو بهاد الشعور من قبل من بعد شي تسافيرة أو تخييمة زوينة ، بقيت غير كنتفرج في البيسي هاذ النهار وتليفوني لايحو في الأرض حتا بغيت نعس عاد قلبتو كلقا بيلا كنت داير ليه صيلونص وعندي بزاف ديال ليزابيل من سناء و سامي وأيمن سبقت دراي هوما لولين عرفت منهم أنهم باغيين يطمأنو عليا عاد دزت لسناء باش نطول معاها الجماعة مع صونيت جوبات تگرعات عليا بدات كتغوت سناء : من صباح وأنا نصوني ليك ونتا ماعلى بالكش حتا مافكرتيش فيا هاذشي لي نسوا عندك امهدي ياك ماحشوماش عليك _ لا ماشي هكاك توحشتك والله ولكن مع العيا دوزت نهار كامل ناعس وكنت داير صيلونص تيليفون بالغلط حتا قلباتو الواليدة دابا وقالت ليا بيلا عندي مكلمات عدريني نتي عارفة حالتي وماكنديرش هادشي بلعاني سناء : على الأقل فكر أنك تاصل وتسول فيا _ غمقت عليها بالهدرة وحزرتها حتا تكلمات وهي مسكينة حالها ساهل دغيا كتفش هدرنا شوية وقطعت ، وتكيت بلاصتي باش نعس بقيت كنفكر في ذكريات وانا كنبتاسم حتا داتني الغمضة وهكذا دازت 5 يام كاملة لقائات مع الكليكة حدا لافاك وليوم الخميس نهار زيارة ديال خويا قصدنا رباط دخلنا لحبس بدينا كنهدرو معاه خليت مالين دار يهدرو هوما لولين ويطمأنو عليه فاش سلاو كلامو قربت حدا ودنيه بديت كندوي معاه بيني وبينو عاودت ليه على سناء وكليكة ديالي من نهار عرفتهم ،( الحقيقة في دقيقة ) امين ( المزيف ) : ولد العبد مكبتها تيتيز بصحتك ولكن عنداك الحب يخليك تنساني هنا _ تا لا الساط كون هاني على نتا رخيص عندي أمين ( المزيف ) : ايوا عنداك الساط سربي راني مليت هنا بغيت نخرج نشط معاكم _سلات زيارة توادعنا معاه بالبكا وشدينا طريق اسفي وصلنا معطلين تعشينا برا غير دخلنا لدار ديريكت لنعاس ، مع داتني الغمضة صونات ليا سناء فيقاتي من النعاس قالت ليا بيلا بغات تطمأن عليا من ورا مارجعت من طبيب حيث في نهار زيارة خويا كيحساب ليها أني كنمشي عند طبيب .... نتي داير بحال سحت ليل كيبان ليك غير ليل تصوني فيه سناء : وباز لوجهك نتا لي كتجاوبني تال ليل اتخرج ليا عقلي _ سمحي ليا الآلة غير كنكون مشغول وصافي مابقيتش نعاود سناء : مسمحاك امهدي توحشناك ديما كتبقا بلاصتك خاوية حتا أنا توحشتكم والله ... كلمنا الجماعة شوية ونعست الصباح فقت فطرت وريحت كنتفرج في دراغون بول وليت متبعو يوميا ماكنزگل حتا حلقة فيه غير سالا تعصبت بديت تفو ياما تفو ، مرض كي داير الواليدة : مالك أولدي أش واقع _ و غير مع هاذ الرسوم عام وانا كنتسنا كوكو يوصل كوكب ناميك ومزال ماوصل ماشي غاتعصب الواليدة : وباز خلعتيني يحساب ليا شيحاجة _ ماديش عليا الواليدة حطي ليا نتغدا رآه قرب الوقت لافاك الواليدة : دروك أولدي _ تغديت وبدلت حوايجي وخرجت لبلاكة الطوبيس ركبت وفاش وصلت حدا لافاك قصدت القهوة هي لولة شربت قهوتي وريحت كنتسنا دراري يتجمعو بقيت متلف الوقت مع حمد السرباي غير صوناو ليا خرجت عندهم سلمت عليهم عطاني حمزة گيتار ديالو بدينا كنغينو واحد لحضة طلبات مني سناء نعطيها گيتار سناء : فراسكم تعلمت گيتار سمعو _ بدات كتعزف وكتغني لينا ديسك ديال Oum lik كتشوفوفيا وكتغني سناء : بغيت نقول ليك شحال من كلمة بغيت نغني ليك شحال من نغمة... بغيت نشهد ليك ونقول ليك شحال كنبغيك ومعاك عشت وحلمت وتمنيت وحققت ومزال ومزاللل بغيت نطوف ونشوف معاك بلدان وبحور .... _ سالات ديسك وبدينا كنسفقو ليها منير : ناري سناء شنو خرج منها بشاخخ صدمتينا فين تعلمتي هاذشي سناء : في الكونگفو ههههه _ بدينا كنمدحو فيها فرحات وحدرات عينيها بالحشمة ، وهكذا دوزنا عشية هربانة كيف ديما فاش بغينا نمشيو أنا وسامي وقفو عليا مريم وفدوى مريم : مهدي حنا انوصلوك اتمشي معانا ليوم _ واخا ... ودعت بقية الكليكة وأنا وسناء مريم وفدوى مشينا بطومبيل سناء لنفس القهوة ديال ديك المرة ريحنا ب 3 بينا في واحد ركنة كالم جا السرباي ضومنضينا 3 عصير بناشي وبقاو كيشوفو فيا وكيبتاسمو بقيت متشوق نعرف شنو باغيين مني فدوى ومريم: يله اسناء سير سير سير _ ياكما لاعب المنتخب وأنا في خباريش 🤣 مريم : لاعبين حنا هههه سناء : أنا لبغيتك أمهدي بغيت ندوي معاك في موضوع مهم كي خصنا... كح كح مريم : اه انمشي طواليط ونرجع يله معايا افدوى _ شفت غير كتجو هنا كتبغيو تمشيو طواليط واش طواليط ديال هاذ القهوة زوينة لهاذ الدرجة مريم : اه زوينة بزاف ولكن عنداك تاني تبدا تغني أولويز رآه ماشي داكشي لي على بالك غير تهنا فدوى : احنا انجيو كملو جماعتكم _ واخا سيرو وتعطلو باش نتوحشوكم مريم : باغي غير تهنا منا واخا أسيدي _ ايوا اسناء شنو الموضوع لي بغيتي دوي معايا فيه سناء : حشمانة كيفاش نقولها ليك _ غير دوي عادي ماكين مناش تحشمي واش واقعة ليك شيحاجة سناء : لا لا ماوقع ليا والو ولكن ماعرفت كيفاش نقول ليك أني ، اوف أسيدي ربي كيف اندير حشمت _ بدات كتصوت بيديها على وجها بحال إلى جاها الصهد وكانت متوترة ... دوي خلاص مالك شطنتيني سناء :زعما اصحبي هاذشي خاصو يجي منك نتا وماتسببش ليا هاذ الاحراج كامل ، مهذي لي بغيت نقول اني أنا... يتبع ( قرا وتفاعل مع جميع الأجزاء ❤️💙) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM