قصة المزحة #الجزء 10 : دوزت دوك اليومين عاطياها غير الماسكات و لي برودويات تقولو غير عروسة صافي حتى نهار لي غادي يجي فيه ميشيل عندنا لبيرو مشيت انا لولة (عمرها كانت ليا) و بقيت نتسنى فيه و عاد طاحت عليا واحد الفكرة بلي انا السيد ماكنعرفوش في وجهو و مسولتهاش اش ايكون لابس و كيفاش انعرفوا و حنا كيجينا كثر من 20 واحد لبيرو في نهار هادي مافكرتش فيها و لكن خصني نركز , مغاربة كتبان فيهم و هو طالياني و عايش في تركيا يعني غادي تبان فيه و بقيت كالسة نخمم كيفاش انعرفو حتى كيفيقني من سهوتي واحد صوت كيتغلل في اعماق القلب ميشيل : ايليف؟! ايلاف: (هزيت راسي و ياريتي ماهزيتو حيتاش طحت انا ا عباد الله, اش منك ا طولة و تجريدة مهم باش مانكثرش عليكم تصورتو اتلقاوها لتحت ) ايلاف ماشي ايليف و شكون نتا ميشيل : ميشيل بان (بان هي انا بالتركية ههه هانتوما كل مرة معلومة ) و سمحي ليا راه مولفين غير ايليف عندنا و جاتني كيف كيف ايلاف: (قلبتها تركية معاه, راه كنفهم ليها مزيان و كنعرف الاساسيات و حاجات اخرى باش ماتصدموش و انكتب كلشي بالعربية بلاما نزيد نطول عليكم بالترجمة) اه ميشيل لاباس؟ ميشيل : بخير و انت ؟ ايلاف: الحمد لله , كيفاش عرفتيني ؟ ميشيل : راه ماما وصفاتك ليا و انا غير جربت حظي و صافي, دابا نقدرو نشوفو الخدمة من بعد و نكملو الهضرة ؟ ايلاف: (ولد الهم فرطني واش انا دايرا كيف الجفاف لي جا يمسح فيا رجليه و لكن اندوزها ليه غير المرة لولة هادي) اه واخا مشينا عند سيبيريور و انا دوري تما كان غير نترجم و نجيب شي ورقة و ندير فوطوكوبي يمكن ليكم تقولو شاوش و صافي و لا حمار طاحونة مهم السيد كالس ماعبرنيش كاع حتى طلع ليا القردة و نخلتو حتى انا ميشيل : ايليف, فين سهيتي ماقلتيش لسيدة اش قلت ايلاف : و اييلاف سميتي و عاود اش قلتي باش نقول ليها ماكنت مركزة ميشيل : قولي ليها واش باقي خاصني شي ورقة اخرى نجمعها ايلاف: قالت ليك لا , يعني صافي المهمة ديالي كملات نقدر نمشي ؟ ميشيل: اه شكرا بزاف على المساعدة ديالك ايلاف: (سير الله يغصبك باقي في هاد الوقت شي واحد كيدير شي حاجة غير هاكاك و انا كنت طامعا فيك ساعة ماكاينش معامن ) ماشي مشكيل بسلامة مشيت لبيرو كنتغدد غير بوحدي و لكن غير كلست مع لبنات تاني و عطيتها معاهم لضحك و تكركير نسيت مشوط الراس كاع , مع 12 كنت خارجة باش نمشي نتغدا حتى كنلقاه واقف قدام الباب متكي على طوموبيل غير شفتو و انا نهز مناخري لسما و ضحكت ليه و دزت معبرتوش حتى كنسمع كيعيط ليا ميشيل : ايي لاف (معكلة و لكن قالها ماقالش ايليف ) ايلاف: وي , واش باقي باغي شي حاجة ؟ مع خصني نمشي نتغدا باش نرجع لخدمة ميشيل : وي بغيتك تمشي تغداي معايا ايلاف: (بصدمة تقولي شداتها غير اللقوة) ميشيل : الا بغيتي طبعا و ماكان حتى مشكيل عندك ايلاف: خصني نعيط لدار هوما لولين نعلمهم مشيت هضرت مع با الحاج ايلاف: الو بابي الحب ديالي واحد لكليان عرض علينا (ماقلتش ليه عرض عليا بوحدي طبعا) و بلاما تسناوني لغدا و راه فاش نجي نعاود ليكم اوكي بسلامة كيتسناوني و قولها معاك لماما بيزو زربت عليه عرفتو ماكيقدر يدير حتى حاجة فاش كنحطو امام الامر الواقع اما كن هضرت معا ماما ويلي بقيت تما ماطلقنيش. رجعت عندو ايلاف: اكي واخا نمشيو ميشيل : و لكن نتي لي غادي توريني فين نمشيو راني ماكنعرف حتى بلاصة هنا , يالاه مشينا (و هو يحل ليا لباب ديال طوموبيل) ايلاف: اوكي نمشيو و لكن ماشي بطوموبيلتك, كاينة واحد الحاجة سميتها طاكسي هو لي غادي نمشيو فيه ميشيل:(تعجب من تصرفي و لكن تقبلو) اكي واخا شدينا طاكسي و ديتو القصبة كطل على البحر فيها القهاوي زوينين و تايكونو خاوين في وقت البرد. كلست و خليتو هو لي يختار بما ان موني فيه الانجليزية و كلست نتحدت انا و ياه و لكن باقا منفخة على لخوا ميشيل : ايوا ماغاديش تعاودي ليا عليك ايلاف : ماكاين مايتعاود اش بغيتي تعرف ؟ ميشيل : واش كاعية على شي حاجة ؟ شفت هضرتك تبدلات على صباح ايلاف: (مابغاتش تبين ليه بلي مسوقة ليه و مهتمة و كعات على التصرف لي دار) لا لا مكاعياش غير مامولفاش نكلس مع شي واحد غريب و صافي ميشيل : ايوا ا لالة هاحنا ماغاديش نبقاو غرباء الا مابغيتيش ,ديري هاد الغذا بحال شكر لداكشي لي درتي معايا و صافي ايلاف: ايوا باش مانبقاوش غرباء خاصني نعرفك او لا ؟ ميشيل : ايوا الالة انا من اب ايطالي و ام مغربية كيف عارفة و عايش في تركيا ايلاف: هادشي عارفينو اتينا بالجديد ميشيل : ههه باش عرفتي هادشي ؟ ايلاف: ها لا غير خالتي لي هي ماماك عاودات ليا ميشيل : اه اكي اش بغيتي تعرفي نقول ليك الالة ايلاف: واش نتا مسلم ؟ ميشيل: (بقا كيضحك قدامي و انا حالة فيه فمي) كنت كنتسناك تسوليني على شي حاجة اخرى و لكن مشيتي نيشان لديانتي (انا تزنكًت ويلي با سيد عاق بيا و انا مالقيت باش نبدا ليه غير بهاد السؤال ) راني مسلم و ميشيل سميتي غير في لاكارط مسميني الواليد على قبل جدي الله يرحمو لي مات 3 ايام قبل مانتزاد اما في دار و ناس لقراب ليا كلشي كيقول ليا محمد و انا ماكرهتش نبدل سميتي و تكون كرسولنا الحبيب و لكن الله يهدي الواليد و صافي مهم هضرت بزاف ها الماكلة جايا و انا فيا الجوع. جات الماكلة و بقيت عاطياها انا و ياه لضحك و الحديث حتى نسينا الوقت و بلي خاصني نرجع لخدمة و عرفت بلي القمعة د قبيلة ماعتابرهاش قمعة و لكن في وقت الخدمة كيكون جدي و عندو الخدمة قبل كلشي و بلي ضريف و ضحوكي غير ضلمت سيد و صافي. رجعت الخدمة بعدما تبادلت انا و ياه الفايس مابغيتش نعطيه النمرة من الدقة لولة و داخلة نفرنس حتى تلاقيت محسن شافنا و مخنزر نخلتو كالعادة و دخلت عند البنات لي عاودت ليهم و فاش رجعت لدار دخلت سالتة و قلت ليهم عيانة و بلي حاسة براسي غادي نمرض عارفة ماما غادي تفتح ليا تحقيق اللهم نزرب عليهم مشيت عاودت لبنات حتى هوما و ديك ساعة سيفط ليا ميشيل ميساج و بقيت شادا معاه الهضرة......... #يتبـــــــــع....... تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM