وتميت خارج من المطار هوما يتلقاو ليا 2 من رجالي قدام الباب حمد : احترماتي على سلامتك سيدي سعد : مرحبا بيك أسيدي في باريس _ الله يسلمكم ... ركبت معاهم الطومبيل وقصدنا واحد ديبو مع دخلت لقيت 7 من رجالي تابعين المخابرات عطاوني السلام عطيتهم حتا أنا السلام ومشيت ريحت في البيرو ورجالي قدامي ... فين وصلتو عندكم شي خبار عليهم سعد : هاذا ملف فيه جميع البلايص لي كيمشيو ليهم ومعامن كيتلاقاو ولكن أغلبية الوقت ولاو كيخرجو غير بجوج كنظن هاذشي فات إطار العمل كاينة بيناتهم علاقة وراه رجالنا حاضيينهم من بعيد أي جديد نعلموك بيه _ واخا مزيان وجدو راسكم رآه معنديش الوقت بزاف سعد : كون هاني شاف حنا رهن الاشارة ديالك ... بالنسبة إلى بغيتي ترتاح رآه البيت موجود ووجدت ليك كاع داكشي لي طلبتي مني _ صافي واخا شكرا سعد .... توجهت للبيت عمرت المگانة على 18:30 ضربتها بنعسة و فقت على الصونيت ديالها غسلت وجهي وخرجت لقيت سعد مضوموندي على الماكلة من برا و داير بحسابي كليت أنا وياه حتا كيجي واحد من رجالي زياد : شاف رآه دابا خرجو من الفيلا وكاينين تاني غير بجوج _ مزيان راقبوهم بلا مايحسو بيكم وأي حاجة جديدة علموني بيها ... بعد مرور ساعة كيرجع عندي زياد زياد : مريحين دابا في القهوة شنو الأوامر ديالك _ وجدو راسكم غادي نخرجو ... لبسنا حوايج خاصين بالمهمات غطينا وجاهنا وقصدنا عين المكان ... في جو رومانسي وسط ساحة قريبة لبرج إيفل مريحين عاشقين في واحد الطبلة وشادين في إيد بعضياتهم بطريقة رومانسية وكيهدرو وأنا حاضيهم بالمنظار ديالي من واحد البلاصة قريبة ليهم كمال : شتي شنو قلت ليك إلى خرجتي تبدلي الجو غادي تولي مزيان ريم : لي مفرحني كثر هو أنك نتا معايا وواقف جنبي . كيف كانت غادي تكون حياتي بلا بيك كمال : وتا أنا فاش كنشوفك فرحانة وضاحكة هاذي هي الدنيا ومافيها . شافت فيا بنظرات كلها حب و كتبتاسم ... كتحمقني هاذ الابتسامة ديالك ندير أي حاجة باش ديما نبقا نشوفها على وجهك ريم : أي حاجة أي حاجة زعما كمال : أكيد روحي نعطيها ليك ريم : بغيتك غير تكون معايا وعمرك تخليني وعمرك تشوف في وحدة غيري هاذا الطلب الوحيد لي عندي سعد : القناص ديالنا موجود رآه حاكم الهدف شنو الأوامر ديالك _ بلاتي بديت كنقول مع راسي سمحو ليا غادي نقاطع ليكم هاذ اللحظات الرومانسية وبديت كنحسب 1.2.3 دابا ... مع قلتها ليه عطا الأوامر ديالو لقناص وتيرا فيهم زگلهم جابها في نص ديال الطبلة الولد شد في يد البنت وبداو كيجريو هربانين وناس حتا هوما تخلعو من صوت القرطاس كيجريو ويغوتو . أنا ورجالي تبعنا الهدف ديالنا لي دخلو وسط الأحياء هوما كيجريو وحنا تابعينهم من لور وكنتريو فيهم وحتا داك الولد مبادل معانا إطلاق النار واحد الفترة تلفو لينا وسط 3 الدروبة مع كانو سابقينا ودخلو من واحد الطريق لي كتأدي لثلاثة الشوارع تقسمنا ل 3 المجموعات وتفرقنا بقيت أنا وزياد وسعد كنجريو حتا كيبانو لينا قدامنا مي بعاد شوية بدينا كنجريو قاصدينهم ريم : اح اييي رجلي تلوات مبقيتش قادرة نجري كمال : حاولي أريم رآه قربو لينا ومبقاوش عندي الطلقات بزاف ريم : مقدراش نتمشا سير نتا هرب وخليني أنا وليت عبأ عليك غير سير وخليني كمال : نموتو و نعيشو بجوج أحبيبتي أشمن حياة غادي تكون عندي إلى مكنتيش فيها ... هزيتها من الأرض ضربتها فوق كتافي ومشيت ديتها لواحد الزنقة مظلمة شوية وعامرة بالطرووات و الميكات ديال الزبل تخبينا ورا واحد الطارو وبديت كنطل عليهم كيبانو ليا جايين في تجاهنا ريم : إلى شدونا أكيد غادي يقتلونا كمال : خايفة من الموت ريم : خايفة نخسرك حيث أخيرا عرفت نعيش من نهار عرفتك عاد دقت طعم الحياة كمال : حتا أنا من نهار عرفتك حياتي ولات زوينة إلى كنت غادي نموت ماغديش ندم حيث غادي نكون مت مع الإنسانة لي كنبغي ريم : كمال إلى كنتي بصح كتبغيني سير هرب مزال الوقت فين تمشي عفاك سير سعد : اه كاينين تما الشاف _ بدينا كنتيرو جيهتم وبدا مبادل معانا الهدف إطلاق النار حتا لواحد الوقت مبقاش كيتيري ... سعد تكلم معاه سعد : خرجو سلمو راسكم رآه حاصرناكم ماكينش كيف ديرو تهربو _ عاود كلامو 3 المرات ومبغاوش يخرجو هو يجبد سعد واحد القنبلة يدوية سعد : اخر مرة نهدر معاكم غادي تخرجو ولا نفجر البلاصة كمال : صافي هاني خارج ... ديرو فيا مابغيتو غير خليوها هي تمشي ريم : لا دوني أنا حسابكم معايا هو غير حارس شخصي ديالي ماديرو ليه والو _ جيبوها ليا ... مشا زياد يجيب البنت يله بغا يهاجمو الحارس الشخصي ديالها وأنا نتيري 3 الطلقات في السما هو يتهدن جرها زياد وجابها ليا غير بزز كتعافر و كتغوت دگيت ليها واحد البرا في عنقها في البلاصة غيبات . زياد دوها لدارهم وشددو الحراسة عليها حيدت القناع لي كنت داير وشفت في كمال ... سي كمال دايرين فيها قيس وليلى مسلسل تركي هاذي هي المهمة لي مسيفطينك عليها من حارس شخصي تحولتي شاروخان قلبتيها حب كمال : شاف هاذا نتا حشومة عليك خرجتيها مني خلعة _ أش هاذ الخدمة خيبتي ظني فيك واش سيفطناك تحرسها ولا طيح معاها معولين عليك نتا لي ترد ليها البال صدقتي نتا لي معرضها الخطر فين هوما باقي الحراس كمال : ولكن أسيدي هي لي مبغاتش يمشيو معانا الحراس مكتبغيش تسمع لكلامي _ ماتقولش ليا هاذ الهدرة كولها حيث كون درتي خدمتك كحارس شخصي وقائد الحرس غادي تفرض عليها الحراسة كون كانو عصابة تشارلي هوما لي تابعينكم فين غادي نوليو بلعاني درت هكذا باش نشوف واش نتا قد المسؤولية ولكن الحب ضعفك أخخ علامن معول والله ايلا الرومانسية ديال تيتانيك صافي قاليك قتلني أنا والله كون ماخاسرين عليك دم جوفنا والتكوين الخاص تانديرها بلا مانتردد حمار كمال : سمح ليا أسيدي _ تا أش غادي نسمح ليك غادي ترجع المغرب اليوم قبل غدا ... سعد بغيتك تكلف بيه و يعوضو في خدمتو زياد مفهوم ورجع معاه المغرب تا نتا كمال : ولكن أسيدي _ ماكين ماوالكن غادي ترجع اليوم وهاذ القرار مكيشملكش غير نتا حتا صحابك بداو كيرجعو واحد بواحد كمال : واخا سيدي أنا تحت الأوامر ديالك ولكن نقدر نشوفها قبل مانمشي _ عقابا ليك لا ماغديش تشوفها نساها عمرك مزال تشوفها سعد : سيدي الدراري كيقولو خاص نحيدو من هنا البوليس جايين قصدينا _ مشينا الطموبيل ورجعنا لديبو ريحت في البيرو ديالي وقدامي كمال وسعد كمال : صدمتيني شكون كان كيتخيل أن 308 يجي براسو لعندنا وحتا الطريقة لي وصلتي ليا بيها واعرة فيها الإثارة والتشويق _ قلت مع راسي نمشي نشوف رجالي بعيني ونشوف كيف ولاو من بعد المهمات لي تسندات ليهم ساعة نتا خيبتي ظني أالسي شاروخان عصبتيني ماعرفناك مسيفطينك تحرس البنت او تدخل معاها في علاقة كمال : هاذ الغلط ميتعاودش أسيدي سعد : سيدي كيقولو بيلا الطيارة الخاصة موجودة ومن هنا ساعتين غادي يكونو موجودين الإقلاع _ وجدو ريوسكم ودوزو كمال يشوف ريم قبل ماتمشيو ... بدا كيشوف فيا بواحد النظرة ديال الصدمة والفرحة كمال : بصح تخليني نشوفها شكرا شكرا بزاف سيدي _ سير حيد من حدايا قبل مانرجع في كلامي ... مشاو وانا دخلت لبيت نرتاح كاملين كتسائلو علاش خليتو يمشي يشوفها واخا مقلق منو و رفضت في الأول فكرت مزيان وقررت نخليه يمشي عندها باش يرجع المغرب وهو مرتاح ومهني من واحد الهم لي كبير عكس إلى منعتو الجسد ديالو غادي يكون في المغرب وعقلو غادي يبقا مع ريم اللهم يشوفها . عمرت الهاتف ديالي ومشيت رتاح غير حطيت راسي نعست مافقت تال 7:15 لقيت رجالي مريحين كيفطرو وشهاني واحد الأومليط موجدينو الشيفور : سيدي نوجد ليك فطورك _ غير خليك غادي ناكل معاكم بلا ماتعذب راسك .... كليت ومشيت لبست حوايجي وخرجت من البيت... حمد ( الشيفور ) وجد الطومبيل غادي نتحركو . خرج وأنا مشيت جمعت شي وراق وتميت خارج كنظن وليتو حافظين فين غادي نمشي ( لي طاگا ليا عشرانو نديه معايا لهاذ الرحلة لي غادي تكون الأخيرة قبل مانرجع المغرب ) توجهنا المطار نزلت من الطموبيل ودعت حمد ودخلت المطار كيف العادة كاشيت البسبور وبديت كنستنا وقت الرحلة لي غادي تكون تجاه الصين وبالضبط العاصمة بكين وصل الوقت عيطو لينا باش لتاحقو بالطائرة مشيت شديت بلاصتي من بعد نصف ساعة قلعات الطائرة بديت مجمع مع واحد الناس فشكل ضحوكيين بقينا عاطيينها الهدرة والضحك حتا وصلنا ولأول مرة منحسش بشي رحلة واخا كانت طويلة توادعت معاهم وخرجت من المطار لقيت تاني رجالي كيتسناو عطاوني السلام وركبت في الطومبيل للتوضيح فقط فاش نقول ليك رجالي فراه دوك رجال تابعين المخابرات وحنا موزعينهم على بزاف ديال الدول سواء عندهم تداريب أو مهمات . توجهنا لواحد المقر على شكل قاعدة عسكرية ديالنا نزلت من الطموبيل وأنا داخل جاعندي الصديق ديالي النقيب الأول حسان تبادلنا السلام وتمينا داخلين حسان : تبارك الله على السي فريد فرحت فاش شفتك وغبور هاذي شرفتي اصحبي _ ايه مدة طويلة 7 سنين دغيا كيدوزو الوقت شرفنا اخويا راه 56 عام ماخلينا قدي رآه ريحو تقاعد ولكن المنصب ديالي مافيه تقاعد نتا كيف دايرة أحوالك وأحوال العائلة ديالك حسان : كلشي بيخير هاذ الساعة ولكن ماكين ماحسن من البلاد بطا علينا غير ايمتا نرجعو _ دابا ملي تسالي موهمتك يمكن ترجع وقتما بغيتي... متشوق نشوف A01 كيف ولا نتمنا داكشي لي قلتي ليا يكون بصح حسان : غادي يصدمك كنظن عمرك غادي تشوف شخص بالقوة ديالو والخفة ديالو . أجي تشوف بعينيك _ مشيت واحد القاعة ديال التداريب .... يتبع...