الساعة تشير إلى 22:00 ليلا وفي وسط حي شعبي من مدينة سانتوس البرازيلية منظم أحد أكبر رأساء المافيا في البرازيل وأحد نزال مجوعين فيه أقوى وأمهر رجال في لعبة قتال الشوارع وهاذ النزال كيتنظم كل شهر في نفس البلاصة و كينظمو الرئيس Rokho وهو أكبر تاجر مخدرات وأسلحة في البرازيل غير باش يحارب الملل ديالو وفي نفس الوقت يمارس الهواية ديالو وهي القمر كيكونو معاه كبار الشخصيات كيقمرو مجموعين على المقاتل لي غادي يخرج عايش من الحلبة تحت أنظار جميع سكان داك الحي لكينتاميو لعصابة Rokho وهاذ المرة غادي يكونو نزالات مختالفين حيث لأول مرة كيتنظم شي نزال ماشي الهدف منو المتعة أو القمر وإنما تحدي بين رئيس Rokho والمنافس ديالو Martino لي قرروا أنهم يديرو واحد الهدنة ويساليو العداوة لي دامت بناتهم مدة طويلة . اليوم جيت نتفرج في هاذ النزالات حيث الرأساء مخليين أي واحد من العموم يتفرج باش كلشي يشهد على صداقتهم تحت حراسة مشددة من بعد ماعرفتو شنو واقع ونمشي نشد بلاصتي حيث كاين الزحام وأنا كنتمشى بالزربة ماغدي نخرج غير في واحد خونا كلو وشامات وتخاسر وهو يدفعني وهز سلاحو عليا وبدا يغوت
مشرمل1 : مالك عور ماكتشوفش ولا بغيتي نحل ليك عينيك باش تولي تشوف مزيان
- سمح ليا اسيدي ماشفتكش مادرتهاش بلعاني
مشرمل2: زيد خليه رآه غير شيباني كوراه ناقص عندو الشوف وزايدون حنا معطلين تحرك ماعندناش الوقت
مشرمل1:عندك الزهر غادي يبدا النزال سير بحالك
_ مشاو خلاوني وأنا كملت طريقي عندي الزهر كانو غادي يصفوها ليا ( بالنسبة اللغة رآه كنهدر بالبرازيلة ) كملت طريقي وبقيت كنتخشا ونتزاحم مع بنادم حتا شديت واحد البلاصة مزيانة كيبان ليا منها كلشي أول حاجة نتابهت ليها هوما الرأساء بقيت حاضيهم وكنشوف في التصرفات ديالهم كيبان عليهم فرحانين ولي زاد ثار الإنتباه ديالي هي وحدة من السربايات لي كانت كتسربيهم . ملاك بصفة إنسان غزالة طيح النجمة من السما شهبة الزين ولاطاي مع لابسة غير شورط قصير كيبين المؤهلات ديالها بقيت حاضي معاها وفي نفس الوقت متبع الأجواء الحماسية شوية Rokho و Martino تيراو 2 طلقات في السما باش يبداو النزال . وداكشي لي كان بدا النزال لول تحت تصفيقات الجمهور الحاضر لي كاملين كيغوتو وكيشجعو المقاتل لي ختارو ومن بعد 10 دقائق سالا نزال بفوز المقاتل ديال Rokho لي هتزت الحلبة بعد الفوز ديالو . من بعد ساعة ديال المگانة كان وصلو لنزال الخامس والاخير هو لي غادي يحدد هوية الرابح حيث النزلات الأربعة سلاو بتعادل 2 ل 2 بدا النزال الخامس لي كان متكافأ بين الطرفين ولكن في النهاية سالا لصالح المقاتل ديال Martino لي بدا كيشطح بالفرحة وكيصفق
مارتينو : ربحتك أروخو قلتها ليك عرفت بيلا أنا لي غادي ربح
روخو : مبروك عليك ومبروك علينا هاذ الصداقة اخويا وبمناسبة الفوز ديالك طلب مني أي حاجة
مارتينو: بالنسبة ليا صداقتنا اهم من كلشي ولكن بغيت هاذ السرباية نديها معايا
روخو : كان عيني فيها الليلة ولكن منقدرش نخسر ليك جاتك ديها حسبها وحدة من الخدم ديالك
مارتينو : كنشكرك وباش تا أنا منخسرش لخويا الجديد نخليك تستمتع بيها شوية إيهو نتي قربي هنا
السرباية : نعم أسيدي
مارتينو : شطحي لينا
_ خدم ديدجي واحد الأغنية محمسة وبدات ديك الملاك كتشطح ليهم واحد الشطيح خطير ديال لي بواط وكتحلون عليهم بجوج مرة كتقرب من مارتينو ومرة روخو كلشي ناشط وكيدونصي معاهم واحد الوقت كتبان ليا كتلامس صدر مارتينو بطريقة رومانسية وشهوانية وباستو في عنقو كيبان ليا السيد ترخا وعجبو الحال وتكا راسو لور مبقاش تحرك ودغيا مشات ريحات في حضن روخو وكتقرب منو وبعد لحظات قليلة ناضت كملات شطيحها ورجعات ورا الفوتاي ديال روخو فين كيتواجد الحارس الشخصي ديالو وفي لحظة كيبان لينا الدم نازل من عنق روخو وعنقو محلول وطاح من بلاصتو أييه الخوت ذبحاتو ومارتينو مابقاش تحرك تاهو يعني قتلاتهم بجوج بدون مينتابه ليها شيواحد . دغيا ضربات الحارس الشخصي ديال روخو لاح هوتو ورا المنصة الشرفية وضربات الحارس الثاني براس و حيدات ليه السلاح تيرات فيه يلاه ناضو شي وحدين بغاو يتريو فيها وهوما يطيحو بحال الدبان بداو يتيريو فيهم شي قناصة من الفوق تخلطات الدعوة وشبكات القرطاس من جميع البلايص أنا تحنيت وبديت مراقب غير السرباية لي كتبان ليا كتسلت هربانة دايرة بحال زواق خفيفة تبعتها بلا ماتعيق ... غير خرجنا من داك الحي جبدت التيليفون تاصلت بواحد الرقم قلت ليه دابا . قطعت كملت طريقي تابع السرباية تقريبا لمدة 20 دقيقة وأنا وراها حتا دخلات لواحد الدار كبيرة مهجورة دخلت من وراها بديت كنتسلت وكنقلب عليها حتا كتبان ليا من واحد التقب ديال واحد الغرفة بدلات حوايجها دغيا وحيدات الشعر المستعار لي كانت دايرة كان شعرها الحقيقي أسود بدات كتغسل في وجهها باش تحيد المكياج لي كانت دايرة من بعد هاذشي لي حيدات الشعر وديماكات أنا كنسحب كلامي هاذي ماشي ملاك وإنما ولات عبد المالك دابا ههه غير كنضحك بالعكس كيما كانت باقة أية من الجمال قررت نستاغل الانشغال ديالها وبديت كنتسلت جيهة الباب باش نشدها هزيت الموس ديالي مع دفعت الباب بشوية بغيت ندخل خرجت راسي بشويةو طليت مابانتش ليا وانا نزيد 2 خطوات القدام ... يتبع
للمزيد من القصص تابعونا على :
انستغرام : www.instagram.com/9isasrm
الواتساب : whatsapp.com/channel/0029VaicQtDKLaHqQiLXua02
مسنجر : web.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق