💫💜 قصة_المحلل 💜💫 #الجزء 54 : 💥💕 صفاء:ما شاء الله زوين بزااف ...:بتربى فعزك احبيبة ان شاء الله نكبرو ولادنا بجوج ...صفاء(بابتسامة):شوف يديداتو شحال صغار ...:هه اكيد غيكونو صغير هو كلو صغير ...صفاء:شنو نسميوه ...:غنسميه يحيى على اسم الاب ديالي ...صفاء(دارت صبعها وسط يديدات البيبي):يحيى ولدي ....فاقت صفاء مفزوعة على صوت اذان الفجر وهي كتردد الاسم على لسانها ...صفاء:يحيى ...اسماء:شكون هدا ...صفاء(شافت فيها مخلوعة):خلغتيني ...اسماء:وراه من قبيلة كنفيقك ونتي مكايناش هنا ...صفاء(مسحات على وجها):محسيتش بيك ...اسماء:وشكون يحيى ...صفاء:معرفتش كنت كنحلم حلمة زوينة(هزات يدها كتحسس صبعها)احساس زوين بزااف ...اسماء(بابتسامة):سعداتك كتحلمي انا غير كنحط راسي كنعس ههه نوضي توضاي باش نصليو ...صفاء:واخا سبقيني ...خرجات اسماء وخلاتها كتشوف فالفراغ حاسة بفرحة فقلبها من خاد الحلم واخا مشافتش الشخص لي كانت كتخاطبو ولكن احساسها بالتربية لي كانت فيديها كأنه حقيقي ناضت مبتاسمة مشات توضات ولحقات عليهم لبسات اسدالها ووقفات حدا مها وختها و هيثم وقف باش يصلي بيهم..كملو صلاتهم وكل واحد طلع لبيتو وهي بقات تم رجعات سهات والابتسامة مفارقاتش شفايفها تفكرات صلاة الاستخارة لي دارت وشكات واش الشخص لي حلمات بيه هو نفسو صهيب فيقها من شرودها ختها لي جلسات حداها ...اسماء:ختي شفتك من صباح ونتي مبسمة اش تما ...صفاء:والو ولكن حاسة بفرحة فقلبي ...اسماء:ههه ميكونش الحب زعما مع انني كنآمن بلي مكاينش شي حاجة اسمها حب ...صفاء(بابتسامة):بالعكس الحب كاين غير طلبي الله يعطيهلك مع الانسان لي يستاهل ...اسماء(بتنهيدة):شكون يستاهل بالنسبة ليا اعظم حب هو حب الرسول عليه الصلاة و السلام لأمنا عائشة ...صفاء:اكيد حب عظيم(شافت فيها)عارفة قصة التمرة؟ ...اسماء(بشوق):لا قوليهالي كيعجبني نسمع قصص بحال هاكا ...صفاء(بابتسامة):فيوم من الايام جات عائشة رضي الله عنها عند الرسول عليه الصلاة و السلام وسولاتو من تحب اكثر في زوجاتك يا رسول الله ابتسم الرسول وجاوبها:انت يا عائشة؛قاتلو اذا اخرج عندهم وقلها امامهم؛ابتسم الرسول مرة خرا وعطاها تمرة قاليها:في الليل اجمعيهن ولا تخبري احدهن انني اعطيتك تمرة؛خلاها الرسول وخرج ومر على جميع زوجاتو سولهم على احوالهم وعطى لكل وحدة تمرة ووصاها باش متقولها لحد؛و فليل فاش جا ولقاهم مجموعين سولاتو عائشة نفس السؤال مرة خرا من تحب اكثر من زوجاتك يا رسول الله...ابتسم الرسول وقال:صاحبة التمر احبها اكثر..وكل وحدة من زوجاتو فرحات بحبهو ليها ...اسماء:😍ما شاء الله اللهم صل وسلم عليك يا حبيبنا ...صفاء(بابتسامة):عليه الصلاة و السلام ...اسماء:بقاي تعاوديلي قصص بحال هادو كيعجبوني ...صفاء:كون جلستي غير هنا وتهزي كل نهار كتاب اكيد غتلقاي فيه قصص لي يخليوك متخرجيش من هنا ...اسماء(ضورات عينيها):انا دابا مسالية الحفاضة مبقاتش غنبالي بيهم غير هوما ...صفاء:ان شاء الله(خدات يدها)كنتمنى بابا يوافق باش تكملي قرايتك ...اسماء(بتنهيدة):انا كتر اختي دابا مأجلة الهضرة فالموضوع حتى يقرب التسجيل فلافاك ونهضر معاه وان شاء الله يكون خير ...صفاء:ان شاء الله يا رب.. صهيب:انا غنمشي داير مع خالد باش نقادو الوراق ...نبيل:هضرتي معاه فقضية الشراكة ...صهيب:وي شحال هادي وهو نيت لي اقترح عليا باش نتشاركو معاه فشركتو نيت بغاو يكبروها ...نبيل:مزيان منلقاوش حسن من خالد ...صهيب:يلاه انا مشيت(بصوت عالي)فرح ردي البال لريم ...شيماء(خرجات من الكوزينة هازاها):هايا معايا ...صهيب(بابتسامة):سمحيليا ا شيماء مكنبغيش نعيق عليك ...شيماء:متقولش هاكا ولا نتقلق واش انا برانية عليكم ...نبيل(عنقها جنب):هانتي كتشوفي ...صهيب:هه سوقكم خاوي انا مشيت ...خرج من الدار والوجهة كانت شركة لي مأسس خالد وهيثم وهي شركة مختصة بكل ما هو متعلق بأجزاء السيارات...دخل مع باب الشركة وقف كيشوف حتى وقفات عليه وحدة ...البنت(بابتسامة كطلع وتهبط فيه):سلام ...صهيب(هبط النضاضر على عينيه):سلام ...البنت:احم واش ممكن نساعدك فشي حاجة ...صهيب(كيقلب بعينيه ومكيشوفش فيها):خالد ...البنت:اه موسيو خالد واش عندك معاه موعد مسبق ...عصباتو بقوة الاسئلة عطاها بالضهر وجبد تليفونو دوز النمرة هضر مع خالد علمو بلي وصل وضار عندها ...صهيب:صافي هضرت معاه شكرا ...البنت:احم ماشي مشكل تبغي شي حاجة خرا؟ ...صهيب(جمع ابتسامتو حيت حس بيها باغا غير طول الهضرة وصافي):لا يمكن ليك تمشي تشوفي خدمتك ...قبل متعاود تهضر كان خالد عندهم تسالمو سلام رجولي وضار خالد عندها ...خالد:فاطمة الزهراء صافي غير سيري كملي شغلك ...حنات راسها ومشات بلا كلمة وهو طلع معاه للبيرو رحب بيه ...صهيب:نهضرو فموضوع الشراكة هو لول عاد تمشي معايا باش نقاد الوراق ...خالد(هز التيلي):وي بلاتي نعيط لهيثم باش يحضرنا ...صهيب(تكا على الكرسي):اوك ...من بعد ما عيط خالد لهيثم بقاو كيهضرو حتى دخل هيثم بابتسامتو لي تلغات اول ما جات عينو على صهيب شاف فيه وشاف فخالد ...هيثم:شنو كيدير هدا هنا.. هيثم:شنو كيدير هدا هنا ...خالد(وقف مبتاسم):هه برد برد كنقدمليك صهيب ولد عمي ...هيثم(باستغراب):ولد عمك!!كيفاش هدا را هو ...خالد(حابس الضحكة): #المحلل ...صهيب(خنزر فيه):بلا متبدا ...هيثم(جلس مقابل معاه):كيفاش قضيتك نتا ...صهيب:راني شرحت كلشي قدام باك ...خالد(رجع بلاصتو):ونزيدك مشا لداك الشماتة ورباه مزيان ...صهيب:مزال هديك غير قرصة ...هيثم(بابتسامة):وايلي انا اصلا باقي محلف عليه نهار تشديت وجا للدار كيدير الشونطاج باش يرجع ختي ...صهيب(ضرب فيه تخنزيرة ونطق بلا ميحس):معندها فين ترجع ...هيثم(طلع حاجبو):باقي طامع انها تقبل ...صهيب:علاش لا الحلال ماشي عيب ...هيثم:مقلتش العكس ...خالد(جالس وسطهم داير يدو على حنكو):ساليتو ولا مزال(شافو فيه)احم المهم هيثم ا صهيب هو الشريك ديالي فالشركة يعني موافقتو على انك نتا ونبيل تكونو شركاء جداد معانا ...صهيب(شاف فهيثم):من شركاء لنساب مستقبلا(غمزو) ...هيثم بقا كيشوف فيه شحال وهو يبتاسم ...هيثم:دزتي فوجه القتلة لي عطيتي لداك الحيوان ...صهيب:وباقي حسابي قتليك ...هيثم(مدليه يدو):حسابنا ...وقفو تسالمو سلام رجولي وهوما تيضحكو حتى قاطعهم خالد ...خالد:فرحت حيت تفاهمتو ولكن عطيو التيساع للمشاكيل ياك كلها شد طريقو شنو مزال ...هيثم(بغضب):مفديتش فيه الضرب لي ضربها ...صهيب(شاف فيها بزربة):شكون ضرب!!!صفاء؟ ...هيثم:اه الشماتة بربي لدوزتها ليه ...بدات نفس صهيب كتعالى وهو كيشوف فيه ...صهيب:ولد *** ...خالد:بففف تلاقيتو الا باغي تقضي شغلك يلاه داير مع الولد من هنا لنص ساعة ...صهيب:يلاه(شاف فهيثم)خاصني شي جلسة معاك ...هيثم(بابتسامة):مرحبا ....#عند_صفاء ضلات النهار كامل وهي فتخمال الدار الفوقانية هزاتها وزيدات معاها تا اسماء ...اسماء(كتنكر):بففف هدشي باش كنكره العطل ...صفاء:خوي الوسايد وسكتي راه من قبل رمضان ما خملنا ...اسماء:اوا اختي راه غير 4 شهور لي دازو ...صفاء:مماتش نبقاو حنا جالسين حتى يبانلينا الدود خارج من تحت السدادر ...اسماء:لواه اللفاعي ...شافت فيها صفاء وضحكات عليها بلا متجاوبها تعاونو على الشغل حتى اذن الظهر خلاو لي فيديهم ومشاو توضاو ومعاهم حتى زهور لي من نهار دكشي لي وقع ولات مكتعطلش صلاتها ولا تعجز عليها كملو صلاتهم ورجعو لشغلهم كملوه دغيا بينما جا عبد الغفور و هيثم للغدا..وماهي الا ساعة حتى كان الكل ضاير بالطبلة وهيثم ملي دخل وهو كيشوف فصفاء وفاش تشوف فيه يحدر عينيه بزربة جتى كملو غداهم طلع لبيتو وجمعات هي الطبلة وخلات المعان لاسماء تغسلهم ومشات عندو دقات فباب بيتو حتى سمعات إذنو عاد دخلات وسدات الباب موراها ...صفاء:ياكما برزطتك ...هيثم:لا غير متكي شوية غنرجع للخدمة خاصاك شي حاجة ...صفاء(جلسات بجنبو):فوسطكم مخاصني والو بيخير الحمد لله ...هيثم:طول العمر ان شاء الله ...صفاء(بقات ساكتة شوية وهضرات):بغيتي تقوليا شي حاجة ...هيثم(بابتسامة):عرفتي شكون شفت اليوم فالشركة ...صفاء(بمزاح):بشرى هه ...هيثم:هه لا صهيب ...غير قال السمية وركز فملامحها لي سرعان ما بان عليهم التوتر حدرات عينيها ورجعات شافت فيه ونزلاتهم مرة خرا وهي كتفرك صباع يديها مع بعضهم ...صفاء(نطقات بصوت متوتر):ااه بصح ياكما شي مشكل آخر ...هيثم:لا صدق هو ولد عم خالد وبشرى ...صفاء(شافت فيه بصدمة):ولاد العم!!ياه على صدفة ...هيثم(بابتسامة):علاش متقوليش القدر........ #يتبع........♥️🔥 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM