الحياة الغامضة
الجزء الثاني
تمينا غاديين دايزين من حداهم حتا قربت ليهم وانا نقول ليهم أول مرة نشوف الدبان مجموع على العسل هو ينقز واحد فيهم قالي كيفاش شنو قلتي
حسام : ماشي معاكم اصحبي الدري عينيه مزاگلين رآه حول مادوش عليه ... امين يله المسخوط واش من نيتك باغي تجبد عليك الصداع بعد عليهم
_ أنا بقيت ساكت وكنفكر كيفاش حتا قدرت نقول ديك الهدرة مي بصارحة معجبنيش الحال نشوفها معاهم الغيرة من النهار لول باينة قودتها الإخوان حالتي صعيبة
-حسام قول ليا الساط باها فاش خدام
حسام : على حساب ماكنعرف رجل أعمال
_اه مزيان... طلعت مع حسام المطور قلت ليه البلاصة فين ساكن وبالصدفة ساكن غير قريب مني حطني قدام الباب وخديت منو النمرة وزاد بحالو ودخلت لدار مع دخلت جا خويا الصغير لعندي كيجري
سعد : خويا جيتي فين كنتي
_ هزيتو وبديت كنلعب معاه بالمناسبة عندي غير أخ صغير في عمرو 3 السنين هو لي بقا عندي في هاذ الدنيا هو كل حياتي
امينة (الخدامة) : مسكين توحشك من قبيلة وهو يسول عليك ويبكي ممولفش تخليه بوحدو
_ اه مولفني غير أنا تهلاي فيه مزيان عفاك ... هاذي الخدامة سميتها امينة ... باقة صغيرة عندها تقريبا 28 عام عندها حقها في الزين وليوم اول نهار ليها ديال الخدمة معايا كتقولو مع راسكم كيفاش هاذ خونا مقودة عليه وداير خدامة مضطر غير على ود خويا صغير ماعندي كيف ندير ليه ضطريت اني نجيب خدامة حيث المدرسة والخدمة كياخدو ليا الوقت كامل نسيت ماقلت ليكم بيلا خدام سرباي في بواط دو نوي دابا ملي غادي تبدا الدراسة ماغديش نبقا نعس شتو حياتي عداب كرهتها أنا ماعيش غير حي في هاذ الدنيا واخا كنبغي نبين الضحكة مي حياتي مكتفرحش
امينة ( الخدامة ) : امين خويا الغدا واجد واش نحطو
_ واخا ختي امينة غير حطيه ... بدينا كناكلو فاش سالينا هزيت سعد غسلت ليه وتميت غادي بيه لبيت نعسو
امينة : خويا امين هاني نمشي نقضي واحد الغراض دابا الله يهنيك 5 تلقاني هنا
- بسلامة عليك ... كملت طريقي لبيت دخلت حطيتو فوق الكاتري بديت كنهر فيه وكلعب معاه عنقتو و بقيت كنغني ليه حتا نعس في حضني بقيت كنشوف فيه مسكين هاذ الملاك الصغير لي ماليه حتا ذنب محروم من حنان الأم والعائلة صعيب هاذ شعور بزاف هو لي كيبقا فيا ... حطيت سعد جنبي وعمرت تيليفون على 6 العشية وجبدت عليها بنعسة حتا وصل الوقت صونا تيلي فقت وفيقت سعد لقيت امينة موجدة كسكروط كليت ومشيت بدلت حوايجي . سلمت عليهم وخرجت بحالي ومع الخرجة ديال الدار كتبان ليا واحد البنت في العشرينيات مريحة اونفاص مع الدار حالتها مكرفصة قصدتها نشوف مالها فاش بديت كنسول فيها لقيتها بحال إلى حمقة شوية حدها قالت ليا دور معايا عطيتها شي بركة وتميت غادي على رجلي تال الخدمة ( مابعيداش بزاف 15 دقيقة على رجل ) وصلت لبست الطبلية وبديت الخدمة ماكين غير الابتسامة والكلام الحلو كيف العادة باش نطلع نهاري غير بالبولڤوار كيما كنعرفو هاذ البلايص كيجيو ليهم صحاب العاقة ماعلينا بقيت خدام حتا وصلات 5 ومشيت بحالي لدار عمرت تيلي مع 9 بحساب ليسي و جبدت عليها بنعسة مافقت تال 11 واخا سمعت تيلي فاش صونا مع 9 مقدرتش نوض وطفيتو وكملت نعاسي ... نضت لقيت الفطور موجود فطرت وشديت تيلي بديت مسركل في الفايسبوك حتا طلعات ليا واحد الباج ديال قصص سكفاندري دخلت قلت نبدا نقرا نشوف داكشي كيف داير ساعة ناضي بقيت كنقرا واحد القصة من كترة التشويق بقيت معاها حتا ساليتها ومن بعد دخلت كنتفرج في ملخص ديال الافلام بيما وصلات ديك 13:00 حطات امينة الغدا كليت وطلعت كنبدل حوايجي وهو يطيح فيوالي حسام تاصلت بيه باش يلوحني معاه درت معاه نتلقاو حدا دار من بعد 15 دقيقة وداكشي نيت لي كان وصل الوقت خرجت لقيتو ... فين العود أليز
حسام : فوق السلك نتا صافا مالك ماجيتيش الصباح
_ غير العيا ديال الخدمة كنخدم بليل مكنساليش بكري
حسام : اه الله يصاوب وصافي فاش خدام بعدا
_ بقيت كنعاود ليه حتا وصلنا ليسي تمينا داخلين لقينا سميرة قدام الباب كتسنا سلمنا عليها ودخلنا الكلاس كان خاوي ريحت لور وحسام وسميرة قدامي حطيت دفاتري وخرجت نشرب وضربت مريشة رجعت كلقا الكلاس عمرات كاع طويلات عمرو وبالصدفة ديك ختنا لي شفت لبارح لقيتها ريحات حدايا فرحت قلت مع راسي الحصة غادي دوز زاهية تميت غادي لبلاصتي يله بغيت نريح وهي تقول ليا
لينا : عامرة اخويا البلاصة
_ لا رآه بلاصتي هاذي هانتي دفتاري حاطو فوق الطاويلة ... دفعات الدفتار بيديها حتا طاح الأرض
لينا : دفتارك هزو وهنينا قلت ليك عامرة
_ بقيت غير كنشوف في هاذ الجيست لي دارت حاسة براسها مزيان تحنيت هزيت الدفتار هو يتما داخل خونا لي كان معاها
لينا : ايه أيمن اجي اجي ها بلاصة
_ غير سمعت ديك اجي وأنا نوض دغيا ريحت في البلاصة
لينا : تانوض تگعد الموسخ دويت معاك تفو مافيك نفس
_ ضربت ايدي مع طاويلة وبديت كنغوت عليها تاشكون يحساب ليك راسك نتي لي دوي معايا هكذا داك الفشوف والعياقة خليها في داركم ماتجيبهاش علينا رآه كاع ولاد 9 الشهور إلى مامربينكش واليديك نعاود ليك التربية ... عرفتو عرقت ليها مزيان بقات غير كتشوف نقز داك ميخي لي معاها
أيمن : حتا نخرجو ونشوفو ديك البلا بلا غادي تبقا ولا كتجيبها غير على البنات
_ الى عندك شيحاجة وريها ليا دابا نخرجو الاستاذ : هاي هاي مريحين في كوري أنا ماكينش مزال حتا ماقلنا بسم الله باديين بالفوضة ... نتا لي لقدام نوض اولدي عيط على الحارس العام
_ دخل الحارس العام بدا كيبلابلي علينا وبالأخص أنا قال ليا نشوف منك شي تصرف اخر نسيفطك ... واستاذ شتك كتخشي ليا الهدرة غير أنا تا مالهم هوما ماعليهمش الله
الحارس العام : الكلام موجه ليك نتا لي باقي مستجد ديك السيبة لي كنتي موالف دير في مدارس آخرين ماديرهاش لينا هنا هاذي مدرسة معروفة بالانضباط تعاود نفس الجيست غادي تعرض لمجلس تأديبي سمعتيني
_ تاهاهي خليتها ليكم باينة عام غادي يدوز كحل نهار لول يعطيك العربون كملت كلامي وخرجت بحالي والحارس العام كيعيط ليا وأنا كعما مسوقو مشيت بحالي لدار لقيت ...يتبع
تابعوا باقي القصة واكتشفوا قصصًا أخرى عبر :
الفايسبوك : www.facebook.com/9isasRM
الواتساب : whatsapp.com/channel/0029VaicQtDKLaHqQiLXua02
مسنجر :
www.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق