الحياة الغامضة
الجزء الثالث
( التتمة من بعد 250 لايك جمجمو وطاكيو صحابكم باش رجعو القمة )
مشيت بحالي لدار لقيت امينة كتفرج سولتها على خويا قالت ليا ناعس طليت عليه ومشيت تكيت بلاصتي وكيما العادة عمرت تيليفوني على وقت الخدمة وتكيت حتا صونا تيليفوني فقت درت كسكروط وخرجت بحالي الخدمة ديالي مع وصلت كيبان ليا البواط خاوي على غير العادة والوسط ديالو فيه ماطريال ديال جروب جاتني عجب و الخدامة واقفين وواقف عليهم الباطرون قصدتهم
الباطرون : مرحبا سي امين الحالة هي الحالة ديما جاي معطل
_ لا الباطرون هو هاذا الوقت لي دايرين معايا وقتي ضابطو لا أقل ولا أكثر
الباطرون : كتفهم عليا ولا شنو
_ حاشا الباطرون قلت لي كاين راني محتارم وقتي
الباطرون : ماعلينا مافيا لي يكتر معاك الهدرة . سمعوني ليوم البواط كاريينو شي ناس مهمين بزاف نبغيكم تحمرو ليا وجهي مانبغي حتا شي موشكيل وحاجة أخرى ليوم منبغيش العشوائية كل واحد غادي يسربي طابلة وحدة لي غادي نكلفو بيها
_ قلت مع راسي هاذا مابقاش بواط ولا قاعة الحفلات شكون هاذ الناس لي الباطرون دار على ودهم هاذشي باينة بوكو عاقة أو عندهم سلطة ... مشيت بدلت حوايجي وريحت في واحد القنت حتا بداو كيدخلو الناس ( غير لي عندهم الانفيطاسيو ) ولي تار الانتباه ديالي هوما لي معروضين غير شباب يعني مزال صغار ماعلينا بدات البواط كتعمر والجروب حتا هوما دخلو ومعاهم واحد الراقصة زعرة وبيضة ولحمها بحال الحليب وبياسة الإخوان باينة غادي تخلي الطايح كتر من النايض ... دراري بداو كيسربيو في الضياف إلا أنا حيث الطبلة لي مكلف بيها مزال مجاوش ماليها شوية وهو يبان ليا الباطرون شاد تيليفون خارج كيجري قلت ياكما واقعة ليه شيحاجة ولكن مع دخل كنتصدم واش عرفتو شكون لي داخل معاه لينا والكليكة ديالها وشي كردكورات بقيت مصدوم تاشنو كيديرو هاذو هنا بقيت حاضيهم حتا ريحو في الطابلة لي مكلف بيها أنا قلبت وجهي وعيطت على واحد دري سميتو هشام من دراري لي خدامين معايا طلبتو نتشونجاو قلت ليه تكلف نتا بهاذ الطبلة وافق ومشيت أنا البلاصة لاخرة مابغيتش نتحرج قدامهم وبالخصوص مع داكشي لي وقع الصباح ماعلينا وافق بديت خدام حتا كنسمع الباطرون كيعيط مشيت لعندو لواحد القنت
الباطرون : امين باش كلفتك ياك قلت ليك نتا لي تسربي ديك الطبلة
_ ولكن بحالي أنا بحال هشام شنو الفرق مابغيتش الباطرون نسربي دوك الناس
الباطرون : ماكين ما والكن بغاوك نتا سير تكلم ليهم
_ صافي واخا قلت مع راسي هاذو ملي بغاوني القضية فيها إن وأخواتها تميت قاصدهم حتا وصلت وانا نحذر عينيا ... شنو تشربو شنو نجيب ليكم
سمير : الواحد كيولي زوين فاش كيتكعكع شتو دابا كيف ولا حاذر عينو وكيدوي بشوية بحال الولية
سيف : وايه الموسخ لاخر خدام غير سرباي وكيتهز على سيادو دابا عرفتي المكانة ديالك
_ أنا كنسمع كرامتي كتمس وغير كنزير على وكنحاول نتحكم في راسي باش نسكت وماندير والو ...
سندس : Guys متخلوهش يخسر لينا صواري ديالنا ميستاهلش ... سير جيب ليا واحد كوكتيل
_ جمعت الطلبات ديالهم كاملين ومشيت نجيبهم ليهم وخاطري ضراني كتشوف كيفاش بنادم حگار لأقصى دراجة بديت كنتسنا داكشي يوجد وهوما ناضو كيشطحو مع ( الجورب ) مزهيها بالشعبي وكيشتتو الفلوس على الراقصة وعلى الجروب ماعلى بالهمش زاهيين ... مشيت حطيت داكشي فوق الطبلة كانت خاوية مع كاملين كيشطحو ورجعت ريحت في واحد القنت شوية وهي تعيط ليا لينا ... قصدتها مع وصلت عندها وهي توقف عندي قربات وهازة كاسها في ايدها
لينا : بغيت نطلب منك السماحة على الهدرة لي قالو ليك صحابي
_ ماجات فين تكملها حتا كبات عليا كاس ديال العصير
لينا : اوبس سمح ليا ماقصدتش عفاك سمح ليا عفاك
_ عرفتو في اخر لحظة تحكمت في راسي كنت غادي نسبها .... ماكينش موشكيل ...مشيت دغيا لطواليط مسحت داكشي وقصدت البيت لي كنبدلو فيه هزيت واحد القميجة لبستها ودرت بارفان ورجعت لخدمتي عاودت عيطات ليا لينا مرة أخرى مشيت
لينا : عفاك جيب لينا 2 قراعي ديال vodka نحليو بيها الگلسة و سمح ليا مرة أخرى وباش نعبر ليك على الأسف ديالي خود هاذ الفلوس
_ ماشي موشكيل اختي ... الفلوس كانت فوق الطبلة مع بغيت نهزها وهي دفعها بصبعها طاحت الأرض بداو كيضحكو وأنا ماشي من العاگزين هزيتها ومشيت نجيب ليهم داكشي لي قالو مع جبتهم بديت كنكب ليهم في كيسانهم
لينا : كب ليك شي كاس حتا نتا
_ لا مكنشربش وانا في الخدمة ... بغيت نسولكم علاش هاذ الحگرة كاملة واش هكذا كتعاملو مع لي معندوش شنو يحساب ليكم راسكم غير عندكم شوية الفلوس مطلعين نيفكم لسما رآه كاع اخرتنا قبر
لينا : حنا ماجيناش ودرنا معاك هكذا غير هكاك تفكر شنو قلتي في ليسي شكون يحساب ليك راسك تهين ليا صحابي رآه نتا لي كتبان لينا بحال شي حشرة واش مكتعرفش شكون أنا وشكون با
_ اه ايوا دابا هاذي هي مشكلتكم تقلقتو على ديك الجملة اه سمحو ليا كنت غالط حيث دابا فاش عرفتكم كيبان ليا دبان حسن منكم سمعي امدموزيل لينا لي كنعرف عليك دابا هو أنك ممربياش وأنا لي غادي نعاود ليك التربية وكوني شكون بغيتي تكوني ماكيهمنيش ... وهاذ الفلوس لي كتعيقي بيها هاكي ربحي بيها وانا نجبد الفلوس لي لاحت ليا قبيلة ولحتها ليها على وجهها بقات غير كتشوف فيا ومصدومة ودغيا غفلني واحد من دوك الكليكة بواحد الكروشي شنقت عليه ويله بغيت نضربو ورجعت ايدي قلت مع راسي ماشي هنا حيث غادي نخرج على خدمتي إلى دابزت ومع رجعت ايدي عاودني بكروشي أخرى لنيفي حتا سال دم وانا نشنق فيه وجاو فكونا لي كاردگور لي كانو مع لينا وانا غير كنغوت واخا عليكم والله ماتبقا فيكم كاملين الهدرة ماشي هنا
سيف : سير يا دمدومة ماتهز حتا دقة غير كتغوت بحال الكلاب
لينا : زيدو زيدو نمشيو عجباتكم هاذ الفضيحة تفو على ليلة
زينب : نتي لي بغيتي نجيو هنا
الباطرون : عافكم سمحو لينا على هاذ الموشكيل غادي نصلحو غير ريحو كملو سهرتكم
_ خرجو بحالهم و مهدروش معاه وهو يجي عندي بدا كيصبن فيا وأنا غير ساكت وكنبرد في راسي لا نعود مخرج سمي في هاذ الباطرون ديال الكرطون ... حتا من المعروضين بداو كيخرجو والجروب لي معاه الراقصة كيجمعو في المطريال
الباطرون : جمعو هاذ الروينة ونتا غبر من قدامي مانبغيش نشوفك قدامي هاذ ليلة
الراقصة ( ملاك ) :نيفك كيسيل أخويا تسمح ليا نداويك الى مكانش عندك موشكيل عندي علبة الاسعافات الأولية وعندي خبرة في بحال هاذ الحلات
_ بلا مانعدبك غير خليك
الراقصة : ماكين لا عذاب لا والو اخويا هاذا واجب
_ قربات ليا بدات كتمسح داك الدم لي في نيفين وانا كنشوف فيها وساكت وعوينات عندها كيسكرو أية في الجمال هاذ ختنا
الراقصة : عندك الزهر على شوية كان نيفك يتهرس مي الحمد الله مزيان
_ جبدات ورقة وستيلو وكتبات ليا واحد الدوا في ورقة
الراقصة : الى عطاك نيفك شي صداع خود هاذ الفنيد يكالميك
_ شتك كدوي بحال إلى طبيبة
الراقصة : كنت طبيبة غير وقع واحد الموشكيل وخرجوني ومع تحنسرت خدمت هاذ الخدمة
_ اه هكاك كنشكرك اختي ... السمية ؟
الراقصة ( ملاك ) : ملاك ونتا
_ اسم على مسمى ماكدبش هاذا لي سماك وبتاسمت ليها ... امين ومديت ليها ايدي باش نسلم ... سلمت عليها واقيلا غادي نبقاو نتشاوفو بزاف مستقبلا
ملاك : كيفاش وعلاش
_ على لي شافك باقي يقدر يحيد الشوفة عليك ... بتاسمت وحدرات عينيها ووقفت ...شديني غادي نطيح شداتني الدوخة
الراقصة (ملاك ) : اويلي مالك ريح رتاح
_ والو غير فاش كنشوف الخوخ كندوخ بدات كضحك و مشات وانا دخلت بدلت حوايجي باش نمشي بحالي كانت ديك الساعة شي 2:15 ديال الصباح بدلت وبقيت مريح شوية كنفكر في شنو ندير مع هاذ البراهش لي حگروني بقيت كنفكر كيفاش نرد الصرف حتا لقيت البلان وتميت خارج من البيت لي كنبدلو فيه حتا كيبان ليا الباطرون شاد واحد القنت وكيضرب الطاسة بقيت كنتسلت حتا خرجت من البواط... وتميت غادي على رجليا و سمعت واحد الطومبيل كتكلاكسوني عليا من لور وقربات حدايا ومع زاج فيمي مبانش ليا شكون لداخل حتا تحل وانا نلقاها ملاك
ملاك : اكين طلع نوصلك
_ في لول رفضت قلت ليها غير سيري لدار أنا غادي نشد طاكسي
ملاك : فين غادي تلقا طاكسي دابا طلع نوصلك اخويا وزايدون معطاتنيش خاطري نخليك غادي على رجليك ونتا في هاذ الحالة
_ طلعت وسديت الباب ... شكرا ليك بزاف غير هو عندي ليك سؤال ... علاش بضبط أنا
ملاك : كيفاش علاش نتا
_ علاش زعما أنا لي درتي معايا هاذ الجيست نتي تبارك أية في الجمال وأي واحد ميكرهش يدوز معاك شوية الوقت ويكون بلاصتي شوفي غير في البواط شحال كان مجموعين عليك ديال العنابة
ملاك : غير حيث نتا بقيتي فيا هاذا ماكين
_ اه واخا كنشكرك ... بقينا داويين حتا وصلنا قدام دارنا يله بغيت نزل
ملاك : قيد نمرتي إلى حتاجيتي شيحاجة صوني ليا
_ صافي فاش نبغي نشط نعيط ليك تشطحي ليا ودرت فيها واحد الابتسامة شريرة هه
ملاك : هههه صافي غير وجد ماتعلق وأنا موجودة قيد قيد 06 ( كتسناو نكمل النمرة الله يمسخكم )
_ شديت النمرة وقبل ماتمشي ...يتبع
تابعوا باقي القصة واكتشفوا قصصًا أخرى عبر :
الفايسبوك : www.facebook.com/9isasRM
الواتساب : whatsapp.com/channel/0029VaicQtDKLaHqQiLXua02
مسنجر :
www.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق