الحياة الغامضة
الجزء الثامن
وكنسمع كيقول ليهم جبدو كاع داكشي لي عندكم وسكتو وهوما كيطلبو فيه وكيغوتو باش مايأذيهمش أنا بقيت جاي بشوية بشوية حتا قربت ليه وضريتو برجليا على ظهرو ب حر جهدي طاح الأرض ودفعت الموس وبقيت كنشتف عليه سلختو مزيان حتا ولا كولو دمايات
لينا : أمين صافي خليه رآه غادي تقتلو
_ أنا متسوقتش بقيت كنعطيه ... هاك لوالديك باش تعلم تبين الرجلة ديالك على البنات الشماتة تلقتو وناض هرب حتا وصل لراس الدرب وقف
الشفار : عقل عليا والله ماتبقا فيك ديرها فين تجيك
_ والله ونشوفك مرة أخرى حتا نذبحك .... ههه اليوم لأول مرة مانكلش العصا ماعرفت منين جاني هاذ الجهد تمجهدت ... لينا ياكما وقعات ليكم شيحاجة
لينا : حنا بيخير شكرا ليك
نرجس ( أم لينا ) : كنشكروك أولدي كون مانتا يعلم الله شنو كان غادي يوقع لينا
_ العفو هاذا واجب
لينا: يله نمشيو من هنا ونهدرو ... أمين تمشي معانا القهوة إلى مكانش عندك مشكل
_ نمشي معاكم علاش لا ... جاتني من الجنة عندي الزهر فين غادي تمشيو
لينا : معرفتش أي بلاصة كالم
_ كنعرف واحد القهوة زوينة يله نمشيو ليها
ولكن بعيدة شوية خاص نشدو تاكسي
نرجس : ماشي موشكيل غير نحيدو من هنا
تمينا غاديين شوية حتا وصلنا الشانطي الرئيسي شدينا تاكسي وقصدنا القهوة دخلنا ريحنا جا عندنا السرباي كل واحد كومونضا شنو بغا وبدينا داويين ... لينا مايحسابش ليا عندك ختك
نرجس : ضحكتيني واخا مافيا لي يضحك واش مزال كنبان صغيرة لهاذ الدرجة
_ اه علاش جيتوني كتشابهو قلت مع راسي غالبا غادي تكوني ختها
نرجس( أم لينا ) : الشبه كاين ولكن أنا ماشي ختها أنا ماماها
_ اواه ... سمحي ليا خالتي مشرفين
نرجس : ماكين موشكيل أولدي ... لينا كعما عرفتيني على الولد
لينا: هاذا أمين كيقرا معايا .... امين شكرا ليك بزاف ولكن بغيت نعرف شنو كنتي كدير تما
_ كنت غير كنتمشا وسبحان الله ربي جابني ليكم والحمد الله ملي مادار ليكم والو
لينا : الحمد الله ولكن رآه خدا ليا السنسلة ديالي وهي أعز ماعندي كادو من عند جداتي الله يرحمها كون خدا أي حاجة وخلا ليا السنسلة
_ ديك الساعة قوليها ليا فاش كنت حاكمو
لينا : مع الخلعة نسيتها
_ ديكلاري وإن شاء الله غادي يشدو الشفار ويرجعوها ... شنو كنتو كديرو نتوما في ديك البلاصة خاوية بوحدكم لي كنعرف عليك ألينا مكيفارقوكش الگردكورات ومالك قبيلة في الكلاس
نرجس : دوك الگردكورات الله يتبعهم الخلا خنقونا
لينا : غادي نعاود ليك شي هدرة وتبقا بيناتنا
_ عاودي كلامك في بير
لينا : أنا وماما هربنا اليوم من الدار حيث تخاصمنا مع بابا . ماما مسكينة شحال ماشافت برا حبسها بابا في الدار ماكيخليهاش تخرج بداعي أنها عليها تهديد وانا داير عليا حراسة مشددة كيف كتشوف كردكورات فينما مشيت وحتا وسط المدرسة حاط وحدين كيدورو فيها إلى لاحظتي كل مرة كتلقا شيواحد قريب من القسم كيصاوب شيحاجة أو مريح مقابل مع الكلاس هاذشي خنقنا ملينا هاذ الحياة واليوم لي خلاني مقلقة هو باغي يزوجني لولد واحد صاحبو لباس عليه وباغي يبزز عليا وأنا مبغاش حيث كنبغي سيف وهاذ العشية فاش سافر بابا أمر رجالو ميخلونيش حتا أنا نخرج حتا بلاصة حتا يجي ... ومن زهرنا الكردكورات غفلو وهربنا ليهم باش نبدلو الجو
_ أنا كنسمع كلامها وأنا مصدوم ولي صدمني كتر هي اخر جملة قالتها ضراتني في خاطري تشوف البنت لي كتبغي كتبغي واحد آخر صعيبة ... ايه وشنو غادي ديرو دابا وباباك الى ساق الخبار كيفاش غادي يتعامل معاكم
لينا : غادي غير نبدلو الجو ونرجعو وبابا مكنظنش يسيق الخبار حيث الكردكورات غادي يخافو على راسهم وغادي يخبيو تخنقت من هاذ العيشة
_ بصراحة صدمتيني يحساب ليا عايشة حياة الرفاهية معاك كردگورات طومبيلات الشكال والنواع والضحكة ديما في وجهك.
لينا : ليسي هي البلاصة الوحيدة لي كرتاح فيها
_ باباك باينة فيه واعر وسمحي ليا نقول ليك واحد الكلمة باباك حگار مكنحملوش الله ينتاقم منو
لينا : على نتا فين كتعرف بابا
_ ياك سيفطيه ليا ديك الخطرة وراه كرمني تهلا فيا شبعوني دوك الوحوش لي معاه عصا
لينا : اويلي ايمتا هاذشي مافخباريش
_ نهار جيت عندكم مضروب وطلبت منكم السماحة حدا المدرسة ماعقلتيش
لينا : والله مافي خباري شيحاجة وماقلت ليه والو سمح ليا بزاف اخويا
_ تفو على كلمة واش أنا مراضع معاها تقول ليا خويا لهم العصا ولا نسمع منها كلمة خويا ... ماعلينا بقينا داويين واحد الوقت هزيت تيليفوني لقيت 10 ديال ليزابيل من عند حسام وسماعيل .... تاصلت بسماعيل
سماعيل : فينك الساط خلعتينا عليك يحساب لينا غير واقعة ليك شيحاجة
_لا أنا بيخير نجي ونعاود ليكم فينكم نتوما دابا
سماعيل : حنا في دارك اصحبي رآه كنتسناوك بان متعطلش
_ صافي واخا نسالي غراضي ونجي . قطعت تيليفوني وخشيتو في جيبي
لينا : خويا أمين الى كنتي زربان أو عندك شيحاجة يمكن ليك تمشي
_ معنديش شيحاجة مهمة
نرجس : خلي الولد مونسنا بصراحة رتاحيت ليه ظريف كيبان ليا بيلا حسن من گاع دوك المبعصصين ديال صحابك
لينا : ماما بديتي تاني
نرجس : نتي عرفاني صريحة ابنيتي ولي في قلبي كنقولو ... قول ليا أمين كيف غادي مع الدراسة
لينا : ماما أمين متفوق في دراستو ذكي هو لي كيشرح ليا بعض المواد
_ بقينا داويين في موضوع الدراسة شوية دازو ليا الموضوع العائلة ... عاودت ليهم بيلا واليديا متوفيين وأنا كنخدم على راسي وعلى خويا وعاودت ليهم بلان الخدمة لي طردت منها بسباب لينا وكيفاش لقيت الخدمة الجديدة بدات لينا كضحك وخسرات عليا نتا لي جبدتيني
لينا : ايوا شتي دابا خاص تشكرني بسبابي لقيتي ماحسن
نرجس : ولدي أمين الى حتاجتيني فشيحاجة ديال الفلوس أو شيحاجة كيما كانت قولها لينا تقولها ليا حسبني بحال خالتك
_ مصاريفي قاد بيها مي شكون يعرف نقدر نبغيك فشي حاجة مستقبلا
نرجس : الى بغيتي أي حاجة ماترددش ... لينا يله خاص نمشيو دغيا وصلات 22:30
لينا : اه قبل مانسا عطيني نمرتك تبقا عندي من اليوم غادي تولي حتا نتا صديق ديالي
_ ايه مرحبا ... عطاتني تيليفونها قيدتها وتمينا خارجين وقربات لعندي نرجس
نجرس : عفاك أولدي دير عينك في ليسي
_ كوني هانية اخالتي .... أو كيفاش بلان هاذي قالت ليا هاذ الجملة شنو كتقصد ماعلينا تمينا خارجين مشيت بغيت نشد ليهم تاكسي وقفنا عند الشانطي كنتسنا شوية بان ليا واحد الطاكسي جاي شيرت ليه وقف تماو غديين باش يركبو تقريبا فاتوني ب 2ميترو ووقفو وتلفتو ليا
لينا : أمين بسلامة عليك تصبح على خير
_ بسلامة عليكم ماجيت فين نكملها حتا كيبانو ليا في جنبنا واحد خونا داير كمامة كيشوف فيهم ورقت بيلا عندو سلاح يله جبدو وبغا يتيري أنا جريت وكنقول عنداكم مع تيرا تلاحيت عليهم لحتهم الأرض والقرطاسة جات ليا جيهة صدري طحت الأرض كنتألم ولينا ونرجس كيغوتو يله باغي يعاود يتيري وهي تجي ليه قرطاسة لراس بقيت غير مصدوم من داك المنظر دغيا جات واحد الطومبيل مرسيدس v _classe نزلو منها شي رجال لابسين بحال الزي ديال قوات خاصة هزوه وكسيراو
لينا : أمين أمين نتا بيخير ماما عيطي الإسعاف دغيا
_ ماتبكيش أنا بيخير .... بديت كنحس بالدوخة وبضبابة في عيني وقفات واحد الطومبيل بداو كيجرو في لينا ونرجس وهوما كيغوتو مابغيينش يمشيو بديت كنحاول نوض قدرت نوقف ولكن ماقديتش نتمشا بدا كيثقال عليا الجسم ديالي وكنحس براسي مبنج ولكن قدرت نميز واحد من لي كيجروهم كان واحد من الگردكورات ديالها ديك الساعة طمأنيت على الأقل هوما في أمان وطحت الأرض ومن تما مابقيت عاقل على والو حتا حليت عيني في السبيطار لقيت واحد الفرملية حدايا بدات كتعيط للطبيب جا شافني بدا كيقلب ليا عيني ... فين أنا وشنو كندير هنا
الطبيب : حاول ترتاح دابا بعدا الحمد الله على سلامتك
_ وهو كيدوي وأنا نتفكر كاع داكشي لي وقع ناري على بلان اشنو داني أنا لهاذشي كامل ملي ولات القضية فيها الفرادة مابقا مايتقال .... بقيت كندور وجهي على الشومبر وكان واحد الجاج كيبين الكولوار وأنا نتصدم من داكشي لي شفت بانت ليا ...يتبع
تابعوا باقي القصة واكتشفوا قصصًا أخرى عبر :
الفايسبوك : www.facebook.com/9isasRM
الواتساب : whatsapp.com/channel/0029VaicQtDKLaHqQiLXua02
مسنجر :
www.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق