الحياة الغامضة
الجزء السادس
تلفتنا كاملين ورانا فاش شفنا شكون تصدمنا كان الأستاذ ديال الفيزيك هز كاسو لفوق و بتاسم لينا الباطرون عيط على واحد السرباي باش يكب لينا من ديك القرعة أنا درت للأساتذ بيدي إشارة اجي وتما قاصدنا وصل سلم علينا وريح ... أهلا أستاذ لباس عليك
سماعيل الاستاذ : لباس الحمد الله نتوما صافا هي جايين تنشطو
حسام : بغينا نبدلو الجو أستاذ
_ استاذ بغيت نعرف علاش عذبتي راسك ومسيفط لينا قرعة La Vielle Bon-Secours لي كنعرف على هاذ المشروب هو ناذر والثمن ديالو غالي بزاف
سماعيل الاستاذ : عتابرها عربون الصداقة ديالنا
_ بقيت كنشوف فيه وكنقول مع راسي كيفاش البلان ديال هاذ خونا علاش دار هاذ الجيست معانا زعما غير لله في سبيل الله ... أستاذ أول مرة تجي هنا ياك عمري شفتك من قبل هنا
سماعيل الأستاذ : متبقاش تعيط ليا أستاذ قول ليا غير سماعيل حرفية حنا ماشي في القسم ... وهاذي أول مرة نجي هاذ البواط غير سمعت أنها كالم وزوينة قلت نجي نبدل الجو وسبحان الله الصدفة جمعاتنا بجوج
_ اه مزيان أستاذ هاذي بلاصة زوينة عرفتو على عشراني وبقيت أنا وسماعيل مجمعين وهوما باركين كيشربو
ملاك : واش جينا نزهاو ولا نهضرو امين نوض اصحبي نشطحو شوية
_ هاذي بدات تشد فيها السكرة ناضت وجراتني وبدينا كنشطحو شوية تبعنا حسام وسميرة وأنا عيني غير على سماعيل وحتا هو كيشوف فيا معرفتش علاش كنحس براسي مرتاحيتش ليه قلت نمشي نعرف شنو تحت راسو ... ملاك عييت غادي نمشي نرتاح شوية . مشيت وريحت حداه قول ليا أستاذ فين كتسكن وسمعت بيلا راك جديد في ليسي
سماعيل الأستاذ : كنسكن في المدينة الجديدة عاد كريت تما و هاذا هو أول عام ليا في أسفي كنت كنقري في سلا ونتا
_ أنا كنسكن في الكورس وحتا أنا عاد جيت لأسفي مؤخرا كنت منقاطع على الدراسة لمدة 4 سنين وعاد قررت نكمل قرايتي
سماعيل الأستاذ : علاه شحال عندك من عام
_ عندي 25 عام أستاذ
سماعيل الأستاذ : كعما باينة فيك ومزيان ملي قررتي ترجع تقرا نتا إنسان لي ذكي خاص تكمل دراستك حيث غادي تمشي بعيد وأنا غادي نعاونك تشد الباك ديالك
_ الله يحفظك أستاذ شكرا ليك ...وصلاتو مكالمة وقطع
سماعيل الأستاذ : يله بسلامة عليك يله بغا يمشي حتا كيبان ليا حسام مشانق هو اواحد خونا وجا واحد من لور دفعو وواحد آخر جمعو بنص حتا ترفع أنا بان ليا داك الديكور مشيت كنجري تهزيت في السما ودخلت في واحد فيهم برجلي طاح الأرض وشدوني لآخرين مع بجوج مقديتش عليهم سلخوني طحت الأرض هو يجي سماعيل مع تبارك الله عملاق دخل في واحد بدماغ دوخو وجمع لاخر بنص حتا تكلمات القلقولة ديال راسو مع الأرض وشد لاخر بدا كيعطيه تكاهم الأرض بثلاثة بيهم كيدخل ليهم مافكوه منهم بنادم غير بزز تبارك الله وحش تمنيت حتا أنا نكون بلاصتو طلعت أنا وحسام دايرين بحال الوليات شوهنا
سماعيل الأستاذ : أمين ياكما وقعات ليكم شيحاجة
_ لا والو أنا بيخير شوف حسام ياكما وقعات ليه شيحاجة
حسام : لا والو أنا لباس
الباطرون : واش نتا ديما جابد ليا المشاكيل هنا واش ماغديش تعطيني التيساع ياوجه المصايب
سماعيل الأستاذ : تا هنينا اصحبي حتا نتا هاك هاذ الفلوس كتعويض على هاذشي وسد علينا داك الفم كتشوف الدري مضروب ونتا كتنهق بحال الحمار
_ لاح ليه واحد الضمصة ديال الفلوس الباطرون مبقاش دوا حيث سكتو خونا بدوك الفليسات بشااااخ باينة هاذ خونا مكبتها فلوس ... يله نمشيو من هنا تمينا خارجين من البواط
حسام : أستاذ سماعيل شكرا ليك بزاف حيث عاونتينا
سماعيل الأستاذ : ماكينش مشكل حسبوني صديق ديالكم وديك أستاذ خليهوها حتال القسم مفهوم غير هو منبغيش بحال التصرف ديال الصباح باش ميضصروش عليا الثلاميذ
حسام : كون هاني مابقيتيش تسمع حسنا
سماعيل الأستاذ : يله بسلامة عليكم نتشاوفو غدا في الكلاس
_ تهلا في راسك موعدنا غدا .... ركبنا الطومبيل وديماريت وقلت ليهم واش غير بوحدي لي مرتاحيتش لهاذ سماعيل
ملاك : يا ويلي على مرتاحيتش ليه بالعكس درويش مسكين
حسام : كيبان ظريف اخاي أمين
سميرة : أنا بلا ماندوي مابغيت ناخد طرشة أخرى ههه
_ بقينا داويين حتا وصلنا لفيلا لي عايشة فيها ملاك حطيتها وكملت طريقي وصلت كل واحد فيهم لدارو واحد الوقت تميت غادي للدار وأنا نعيق بيلا واحد الطومبيل تبعاني من لور من قبيلة جاتني غريبة أو شكون هاذا لي تابعني زدت في السرعة وبديت كندخل ونخرج من الدروبة حتا جليتو وكملت طريقي للدار دخلت لقيت امينة وريان ناعسين شفت شحال في الساعة لقيتها قربات الجوج دخلت بدلت حوايجي وعمرت تيليفوني على 9 وغير حطيت راسي على المخدة ونعست حتا بدا يصوني تيليفوني غير هو ماقدرتش نوض صونا 5 الخطرات عاد فقت لقيتها 9:35 ونضت كيما العادة دخلت لدوش دوشت وريحت كنفطر أنا وأمينة وقبل مانخرج مشيت بست ريان خليتو مزال ناعس وخرجت دغيا شديت الطريق وصلت ليسي معطل بلاصيت الطومبيل ومشيت كنجري للمكتبة لي حدا ليسي شريت روجيستر الي وصانا عليه الأستاذ وخديت ستيلوات وداكشي لي خاص كامل وتميت غادي لقيت الباب تسد بقيت كندق على العساس وكنطلبو يحل ليا بزز حتا حل وصلت الكلاس ديال سماعيل دقيت عليه حلات واحد البنت الباب ... شاف سماعيل ودار ليا بيدو إشارة على الوقت
سماعيل الأستاذ : تعطلتي سير جيب ورقة من عند الحارس العام واجي
_ أستاذ رآه غير داني النعاس رآه اول مرة
سماعيل الأستاذ : سير جيبها باش مرة أخرى ماتعاودش دابا سير خليني نخدم سدي ابنتي داك الباب
_ سدات الباب وأنا كنعاير فيه في خاطري وليني ميكروب قال ليك صديق ... مشيت عند الحارس العام حتا هو بدا كيتعزز عليا كيقول ليا رآه مكنعطيوش ورقة مع 10 طلبتو وقال ليا هاك شد وآخر مرة تجي عندي قيد سميتي في واحد الدفتر ومشيت دقيت على سماعيل مرة أخرى مديت ليه الورقة ودخلني لقيت بلاصتي ديال البارح خاوية حدا سميرة وحسام وواحد الولد مشيت ريحت حداهم وبدينا منتابهين للشرح وكيف البارح بديت كنجاوب دازت الساعة اللولة وعطانا واحد التمرين نخدموه شوية وهو كيكتب فشي حاجة وغير كيسمع الهدرة كيطمر مع بنادم ماكيبغيش يسمع حس الدبانة واحد الوقت بداو لينا وشي بنات لي مريحين معاها في البياص كيهضرو وهو يطمر معاهم
سماعيل الأستاذ : واش ماغديش تهنيونا نتوما دوك الجوجات رجعو لور بلاصة دوك 2 دراري ... امين نتا ولي حداك اجيو بلايصهم مرة أخرى نسمع حسكم نخرجكم برا
_ أنا غير سمعتها فرحت مزيانة لكوكاب غادي نمشي نريح حدا لينا زربت جمعت ادواتي دغيا باش نجي حدا لينا حيث كانت مريحة في الوسط ديال البياص وداكشي لي درت مشيت كوانيت حداها وبروجولة كنت بحال إلى مدهشر أو خايف بقيت كلعب برجليا بستريس وكنخرج في التمارين لي عطانا
سماعيل الأستاذ : شكون ينوض الصبورة يخرج التمرين ... حتا واحد يعني داكشي لي شرحت كامل مشا بحال إلى كنت كنكب الما في الرملة
_ هزيت صبعي نضت خرجت التمرين فاش ساليت قال ليهم يصفقو عليا وأنا فرحان ههه راجع بلاصتي بحال إلى مخلي إنفجار من ورايا ماعلينا مشيت ريحت وزادنا تمارين آخرين وقال لينا كل جروب يخدموهم مع بعضياتهم نتعاونو بيناتنا وبيلا شوية غادي يدور علينا وهنا كان لإول مرة دوي معايا لينا
لينا : قربو الكراسة باش نخدمو مجموعين
_ داكشي لي درنا أنا قربت ليها بزاف وبديت كنشم في ريحة البرفان وكنشوف في ملامح وجهها عندها وجه ملائكي زعرة بيضة بحال الحليب عوينات كبار بحال ديال الغزالة تبقا حاضيهم ضيع فيهم شنايف منفوخين وحمرين سنينات بيضين رآه بزاف كتسطي بزين بقيت ساهي فيها
لينا : ايهو فين مشيتي واش سمعتي شنو قلت ليك
_ نعم اشنو قلتي اختي لينا
لينا : واش فاهم هاذ التمرين ماقشعت فيها والو واخا تشرح لينا
_ اه فاهمو بلاتي .... بديت كنخرج فيه داكشي كيجيني أنا ساهل بحال شريب الما
زينب : واخويا شتك خدام راسك ماغديش تورينا ولا كيفاش غادي يدور علينا هاذ خونا وغادي يلقانا ماعارفين والو
_ غير صبري اختي نخرج التمرين ونوريكم كلشي ونشرح ليكم كل حاجة كيفاش جات ... وداكشي لي درت غير ساليت وبديت كنشرح ليهم حتا فهمو
كمال : تبارك الله عليك والله هيلا كتعرف توصل الفكرة حسن من الأستاذ
_ بعض المرات كتكون الفهامة من تلميذ لتلميذ أحسن وأسهل ... بديت كنتفلسف عليهم بيما جا عندنا الأستاذ بدا كيشوف داكشي لقا عندنا داكشي صحيح وفي نفس الوقت كيعطي أسئلة لي معايا في الجروب كيفاش جات كي درتي حتا خرجات ليك هاذي باش يشوفهم واش فاهمين ولقاهم فاهمين وفرحو بدا كيدور على بقية الكلاس وكيشرح لبنادم حتا ضرب الجرس
سماعيل الأستاذ : بلاتي حتا واحد مايخرج هاذ السلسلة بغيتكم تخدموها في ورقة مزدوجة غادي نعطيها لأمين خدوها وطبعوها خدموها واخا ميكونش داكشي صحيح ولي خدمها عندو +2 نقط في الفرض يله موعدنا الحصة الجاية
_ شديت منو الورقة وتميت خارج وهي تجي عندي زينب
زينب : شكرا بزاف حيث شرحتي لينا قبيلة ... واخا تعطينا السلسلة نطبعوها دابا نرجعوها ليك يله معانا المكتبة
_ ماشي موشكيل اختي ... هاكي مديتها ليها وتمات غادية هي ولينا والكليكة ديالها وأنا جريت حسام باش يمشي معايا مابغاش
حسام : فيا الجوع بغيت نمشي ناكل حتا وكان نطبعوها
_ لي بغيتي مشا ودا معاه سميرة وأنا لحقت على الكليكة ديال لينا مشيت لقيتهم مزال كيطبعو وهي تمد ليا لينا السلسلة الأصلية وقالت ليا شكرا ودارت ليا واحد الإبتسامة زعزعت ليا قلبي ... قلت ليها العفو ومشيت قصدت طومبيلتي يله بغيت ركب وهو يوقف عليا سماعيل
سماعيل الأستاذ : عفاك تقدر توصلني لصال كاين في طريقك خسرات ليا الطومبيل
_ جاتني حشومة ردها ليه في وجهو على ود البلان لي دار قبيلة ولكن كيبقا أستاذي نعكس معاه يعكس معايا اللهم ندير المزيان .... مرحبا طلع ... طلع وكسيريت
سماعيل الأستاذ : ياكما تقلقتي على البلان ديال قبيلة
_ واشنو يحساب ليك زعما هكذا كيعاملو الأصدقاء بعضياتهم
سماعيل الأستاذ : غير سمح ليا وصافي درت معاك هكاك غير باش منضصرش عليا وحدين آخرين أنا بطبيعتي كنبغي نكون صارم في الخدمة ولكن متنساش المزيان لي درت معاك حطيتك حدا البنت لي كتعجبك كي جيتك باش نفتح ليك الطريق ... يتبع
تابعوا باقي القصة واكتشفوا قصصًا أخرى عبر :
الفايسبوك : www.facebook.com/9isasRM
الواتساب : whatsapp.com/channel/0029VaicQtDKLaHqQiLXua02
مسنجر :
www.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق