قصة سكفاندري الجزء الاول ( قصة حقيقية ♥️ ) ( تتمة من بعد 90 لايك طاكيو صحابكم يقراو ويستافدو 🔥🔥🔥🔥🔥) كاينين بزاف ديال الناس لي عرفو سكفاندري هاذي سنين و قالو سكفانديري لي عرفنا أول مرة ماشي هو ديال دابا داك سكفاندري لي كان عقلو كامل وجهدو عاطيه لصفحة تبدل في رمشة عين مبقاش كيكتب ولا مهتم بالصفحة وحتا إلى بدا قصة ماكيملهاش ولكن حتا واحد ماعارف علاش وعمري ماقلت السبب الحقيقي كنت ديما داير السبة بالخدمة داكشي علاش غادي نعاود ليكم كلشي من زيرو قصتي بدات 3 سنين هاذي من بعد نهاية الحجر الصحي عاقل على أن أول مشكيل كان عندي هو سقطت في الباك داك الضغط ديال اخر عام وأني صافي ساليت مع الدراسة ودنيا ضلامت في عيني السبب لي خلاني نسد عليا في بيتي وقطعت علاقتي مع كلشي تقريبا في الواقع أما المواقع كنت كنهدر مع بعض الناس وباش كنت كنهرس داك الروتين والملل كنخرج مرة مرة نتريني بوحدي وكنرجع نتفرج في السيريات وكنكتب القصص وكنت ديك الساعة داخل في علاقة مع واحد البنت . العلاقة لي مضرباتش مدة طويلة وسلات حيث كنت كنشوف راسي غير غادي نضلمها إلى كملنا تضييع الوقت وصافي كان وجودها في حياتي بحال عدم الوجود ديالها ماكين حتا فرق صارحتها وتفهمات الوضع وسالينا وحنا خوت مصفيين الخواطر من بعد هاذ الخطوة بقيت بوحدي الحاجة لي خلاتني ندير گروب في الوتساب من بعد نهاية واحد القصة ودخلو ليه ولاد وبنات ديال هاذ الصفحة كاين لي غادي يكون باقي عاقل عليه هاذ الجروب لي عرفت فيه بزاف ديال الناس ولي منو ربحت أحسن صديقة عندي وهي أمينة لي كنبغي نشكرها على وقوفها جنبي ديما البنت لي بألف راجل ختي لي مولدتهاش ليا مي .من بعد شهر تقريبا من توقف بين قصة وقصة رجعت نكتب وهاذ المرة بستيل مختالف قصة بستيل ديال البنات سميتها ( التلميدة والاستاذ ) لي جلبات عدد كبير من المتابعات للصفحة من بعد ما كان أغلبية المتابعين ولاد . وفي هذ القصة بضبط تبدلو معاها بزاف ديال الحوايج وعطاتني واحد الإنسانة لي بسبابها عرفت شنو هو المعنى الحقيقي للحب الإنسانة لي بسبابها حياتي تغيرات لأحسن . كيف عادتي مسركل في الفيسبوك من بعد ماحطيت الجزء ديال القصة وهو يوصلني ميساج في الباج ديال واحد المتابعة جات تسول على القصة وايمتا غادي نحط الجزء الماجي صدقنا قالبينها ضحك من بعد مابانت ليا البنت ضحوكية وكدخل الخاطر دينا وجبنا في الهدرة وكملناها في الوتساب تما دخلنا للسخون شفت تصويرتها منعاودش ليكم خوكم طاح على زنفارتو ومع ضريفة وضحوكية زدت طحت فيها الاشكال الوحيد لي كان هي حنا ماشي من نفس المدينة ولكن شكون كان مسوق لمسافات بقينا داويين ديك ليلة تال شي 6 الصباح ومنعاودش ليكم لأول مرة في حياتي نجادب لواحد إنسانة بديك الطريقة فاش بغات تمشي تنعس مسخيتش بيها وحتا فاش مشات حسيت بيها دات ليا عقلي معاها ولي زاد صدمني وحيرني هي ديك ليلة فاش مشيت نعس بقيت ناعس وفايق في نفس الوقت داك الشعور ديال أنك ناعس ولكن عقلك فايق كيفكر هكاك كنت عقلي ديك الساعة كان كيفكر فيها بحال لا خديت شي جرعة ديال مخدر أول مرة وبغيت منو . مزال فقت الصباح وهدرت معاها وأنا فرحان تعرفنا على بعضياتنا مزيان وهكذا دازت تقريبا يوماين وانا غير ماكنزيد نجادب ليها و كتشد فيا الزعطة كتر وكتر وصل نهار الثالث قررت نصارحها بالإعجاب وزربت عليها بديك الدخلة الحامضة ديال نتصاحب معاك وتاهي ماشي من العاگزين زربات عليا ههه شنو كيقول ليكم راسكم غادي توافق ألا أسيادي قالت ليا واحد الجملة لي مزال عاقل عليها لدابا ( أنا كنقلب على حب ماشي تصاحيب غادي نبقاو نهدرو والى كانت شيحاجة من هنا القدام مرحبا ) أنا معجبنيش الحال ديك الساعة ومتقبلتهاش حيث كان واحد الراس كيقول ليا الى مجمعاتكش بيها علاقة ماغديش يكون عندك الحق في بزاف ديال الحوايج مثلا تغير عليها إلى دوات مع هاذا ولاخرجات مع هاذا وأنا من طبيعتي مغيار وبزاف الحاجة لي كنبغيها كنبغيها ليا بوحدي ولا بلاش....يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM