راسي بشويةو طليت مابانتش ليا وانا نزيد 2 خطوات القدام و ماعرفت منين جاتني واحد الضربة من لور حتا تقاسيت وسط الغرفة هزيت راسي بواحد الصدمة شفت ورايا كلقاها السرباية كتشوف فيا بواحد الشوفة كلها رعب وهازة عليا سلاحها بقيت كنشوف تا كي دارت ليها في لحظة ولات ورايا واش جنية هاذي بقيت غير كنفكر كي دارت ليها وبهاذ السرعة . هبطات سلاحها خشاتو في سمطة السروال وبتاسمت ليا ومدات ليا ايديها باش تنوضني وبدات كضحك شديت فيها حتا وقفت وهي تعطيني السلام العسكري فدوى : إحترماتي شاف ومرحبا بيك في البرازيل كيبان ليا كبرتي وليت نديرها بيك صافي دغيا طيحتك في الفخ كبرتي _ درتيها بيا هاذ المرة ماتوقعتش انك تغفليني بهاذ الطريقة ولا تحسي أني مراقبك كي درتي ليها فدوى : متناسش اني ترينيت على إيدك ورادة البال لراسي مزيان أو نتا واخا خطير في ملاحقة الناس . مارديتيش البال لواحد البلان . قدرت نشوفك من الانعكاس ديالك في واحد المرايا وتما فين عرفتك تابعني قلت نشوف شنو باغي دير وزيد عليها الشاف واخا الدار مهجورة مركبة فيها كاميرات صغار كيعطيو الإشارة بمجرد حركة بسيطة ديال شيواحد . بقيت حاضياك من تيليفوني غير شفتك جاي قاصد الباب خرجت من داك الباب الصغيور وجيت وراك بلا ماتحس _ ضاربة حساب لكلشي ماعليكش كنفتاخر بيك ابنتي أفدوى تبارك الله عليك ذكية كيف كنعرفك فدوى : نجيو الموهيم شنو لي يخلي رئيس المخابرات بنفسو يجي لعندي ياكما داكشي لي في بالي _ اه هو صافي غادي ترجعي البلاد غادي نبغيوك في واحد المهمة فدوى : ولكن كيفاش غادي ندير مع المافيا لي خشيتوني معاها ماغديش يخلوني براحتي وغادي يبداو يقلبو عليا _ ضربت الحساب لكلشي اول حاجة هوما صافي وصلو لداكشي لي بغاو الأعداء ديالهم روخو ومارتينو صفيتيها ليهم في خطرة وحدة يعني ماغيبقاو باغيينك في والو تاني حاجة غادي نزيف موتك القناصة لي كانو معاك سيفطت رجالي يقتلوهم وغادي يلحوهم في البحر على أساس أن رجال روخو ومارتينو قتلوكم من بعد المهمة ... شوفي هاذ الفيديو . جبدت ليها واحد الفيديو مركب كتبان فيه بيلا تقتلات هي والرجال لي معاها والجثت ديالهم تلاحو في البحر ( كنظن كتقولو رآه يمكن الجثت يخرجهم البحر ويلقاوهم ولكن حنا تقلناهم بالحجر باش يبقاو تحت الما صعيب يلقاوهم ) فدوى : فيديو كيبان حقيقي ماعليكش _ ضروري التخطيط في ضومينا هو أهم حاجة . خودي هاذ التليفون وبقاي بلاصتك من بعد 10 دقايق غادي يجيو رجالنا باش يديوك معاهم فدوى : واخا سيدي ونتا ماغديش ترجع معايا ؟ _ مزال عندي شيحاجة نقضيها يله بسلامة ردي البال لراسك ابنتي ... مباشرة من بعد ماخرجت من الدار المهجورة شديت طاكسي نيشان لدار لكنت مريح فيها هاذ المدة لي دوزت في البرازيل هزيت واحد الكرطابل فيها الوراق لي غادي نحتاج وقصدت المطار شديت الصف باش يطبعو ليا في الباسبور كنت ديجا مقطع تيكي لأمريكا طبعو ليا ( الباسبور مزور حيث مابغيتش شيواحد يعرف اني دخلت لهاذ الدول ) مشيت ريحت في صالة الانتظار لمدة ساعة بيما وصل وقت الرحلة قربات 5:30 صباحا الطائرة ديالنا كانت موجودة توجهنا ليها أنا وباقي الركاب شدينا بلايصنا شوية الطيارة قلعات . من بعد 6 ساعات وصلت مطار واشنطن نزلت من الطائرة وتميت قاصد باب الخروج مع خرجت شديت تاكسي عطيتو العنوان لي يديني ليه من بعد 20 دقيقة وصلنا العنوان المطلوب نزلت من تاكسي وتمشيت تجاه الدار لي غادي نجلس فيها هاذ الفترة لي غادي ندوز في أمريكا وقفت قدام باب الدار جبدت الساروت من تحت واحد المزهرية حليت الباب دخلت و أول حاجة درت هي بدلت حوايجي ومشيت تلاحيت فوق الكاتري عمرت المگانة وانا نعس حيث ميت بنعاس من بعد 6 ساعات كنسمع الصونيت ديال المگانة فقت غسلت وجهي خرجت لواحد الريسطو قريب كليت شيحاجة نسد بيها الجوع ورجعت بحالي بديت كنبدل حوايجي لبست سروال جينز زرق وسبادري بيضة و توني بيض ديال فريق دالاس كاوبويز ودرت الساعة ديالي ورشيت بارفان . ساليت لباسي وقاديت الحطة وليت كنبان بحال شيواحد بيزنس مان أمريكي هزيت كرطابل ديالي درت فيها المنظار وتيكي ديال مباراة دالاس كاوبويز ضد شيكاغو . غادي نتفرج في مباراة ديال الكرة القدم الأمريكية عنداكم تمشيو غالطين ويحساب ليكم كرة القدم لي كنعرفو جميع الكرة القدم الأمريكية كيطلقوها على ديك الرياضة لي بحال الريگبي معروفة في أمريكا بزاف ( بحثو عليها في گوگل ) خرجت شديت تاكسي قصدت تيران وصلت قبل المبارة بنصف ساعة دابا تشير إلى 18:30 مع الدخلة وقوفوني الأمن فتشوني وفتشو الكرطابل من بعد هاذ التفتيش البروتكولي خلاوني ندخل شديت بلاصتي لي كانت مقابلة مع المنصة الشرفية بالنسبة للملعب كان عامر كامل حيث مبارة مهمة للفريقين بجوج . بديت كنتفرج في العرض ديول المشجعات الفريقين لي لابسين كسيوات قصار . عليهم إسم الفريق لي كيشجعو وكيأديو واحد الرقصات وكيغنيو اغاني الفريق كنوع من التشجيع ومعاهم واحد لابس زي تنكري ديال ميكي ماوس مابيناش الهوية ديالو ولكن كنظن انهو ولد من خلال البنية الجسدية لي عندو . من بعد نصف ساعة كيدخل واحد الجنرال من الجيش الأمريكي ومعاه ضيف الشرف ديال المبارة لي سميتو mark رجل أعمال ميريكاني مشهور جبدت المنظار ديالي وبقيت حاضيه حتال وقت بداية المباراة غير بداو بقيت منتابه مع الماتش حتا سلات الجولة الآولى بفوز فريق شيكاغو دخلو تاني المشجعات الملعب مرة أخرى بداو كيأديو الرقصات ديالهم هزيت المنظار ديالي وبقيت مراقبهم واحد الحظة دوك الراقصات ديال فريق دالاس كاوبويز نقاسمو ل 2 مجموعات نص الأول دارو دائرة ونصف الثاني طلعو فوق من كتافهم ودارو دائرة أخرى وبقات وحدة طلعوها فوق منهم ودارت واحد الحركة بهلوانية لي مايمكنش تخيلوها تصورو تهزات ودارت واحد دورة هوائية في السما وخرجات سلاح تيرات في ضيف الشرف mark لراس بواحد دقة و بطريقة إحترافية لي مايمكنش حتا تخيلها بقيت غير كنشوف ومصدوم بحال بحال الآلاف من الجماهير . لاح الشخص لي لابس الزي التنكري واحد القنبلة يدوية على المنصة الشرفية فرتك الجوقة وديك الساعة طفا الضو على الملعب و الدعوة تخربقات الغوات و بنادم كيحاول يهرب من جميع النواحي أنا دغيا سلكت راسي وخرجت من الملعب فرحان ودابا تعرفو علاش... شديت تاكسي وقصدت الدار شعلت تلفازة بداو كيبينو الإغتيال على المباشر والقضية مرونة بالبوليس و fbi كيديرو التحقيقات . من بعد نصف ساعة كيوصلني واحد الميساج في تيليفوني قريتو وحطيت تيلي دخلت مباشرة لدوش هزيت واحد البوماضة كتحيد الزغب درتها لإيدي ورجلي حيدت كاع داك الزغب من بعد ماساليت جبدت مكينة الحسانة حسنت وجهي وخرجت من دوش نيشان لخزانة الملابس وهاذ المرة غادي تصدمو من الحطة لي غادي نضرب جبدت واحد الكسوة قصيرة كتبان مثيرة وواحد الشعر مستعار وطالون . لبست الكسوة وريحت قدام المرايا بديت كنماكي ودرت واحد العكر حمر من بعد لبست الطالون ودرت داك الشعر هزيت ساك صغير درت فيه شي معدات غادي نحتاجهم وبديت كنجرب في المشية وكنشوف في راسي في المراية أناري كنبان بحال صوفيا طالوني إلى شافوني عائلتي ينكروني غيبداو يقولو هاذ الشيباني تاكبر وشداتو الفارة شوهة . خرجت من الدار تميت قاصد محطة التاكسيات وأنا غادي بحال الوليات تبعوني واحد 2 من لور كيتحرشو بيا واحد فيهم قال ليا شيبانية ولحم وحدة في العشرينات ماحملتش راسي شتي في اخر ايامي نسمع هاذ الهدرة كملت طريقي وبقاو لاسقيني حتا وصلنا لواحد البلاصة مظلمة شوية واحد فيهم قرب ليا وحط ايدو على كتفي قال رجيلاتك رطب من الساطة ديالي نشدهم ناكلهم تلفت ليه ...يتبع ....