قصة سكفاندري ( قصة حقيقة 🔥) الجزء الأخير لي عصبني وخلاني نحقد ديال بصح وبلوكيتها كنت كنحاول نسا أو غير كنكدب على راسي وكنقول بغيت نسا كيفاش غادي نسا وانا حاط حدا راسي شي حوايج كيتعلقو بيها وكيفكروني فيها كيفاش غادي نسا وانا كل شوية كندخل نشوف تصاورها عشت واحد العداب عشت مايحس بيا غير لي خلقني شعور انك تبغي تنسا واحد الاسنانة لي عشتي معاها عامين من حياتك بالحلوة والمرة الإنسانة لي تخيلتي حياتك معاها وبنيتي أهدافك عليها صعيبة بزاف حاولت مقدرتش ولا عندي صراع داخلي . تا سيفط ليا عشيري حسام انهو تلاقا بيها حيث هوما اصدقاء من الجروب لي قلت ليكم بروجولة حسيت بنار الغيرة شعلات ليا في قلبي واخا عشيري وكنتيق فيه أو هي واخا كنت مفارق معاها معجبنيش الحال حيث كيف قلت ليكم أنا مغيار وبزاف . رجعت سيفطت ليها ميساج ولكن كان فات الفوت حاولت نصالحها ولكن صافي قلبها ومشاعرها بردو من جيهتي داكشي لي قدرت نعرف من كلامها وتصرفاتها وكنحترمها على قرارها الله يسهل عليها في حياتها هي إنسانة ضريفة يقدر مكنتش الشخص لي منسبها أو غلطت معاها بزاف حيث منكرش أني فيا عيوب خايبين وماشي داك الإنسان المثالي مي الحاجة لي كانت فيا زوينة هو أني كنت كنحاول نحسن من راسي ونصلح كاع العيوب باش نكون الشخص المثالي ليها . كلشي بالمكاتب فيها خير يمكن . باقي لدابا معزتها عندي كبيرة واخا مبقيناش في علاقة ومبقيناش كنهدرو بمرة ولكن خلات واحد الذكريات لي زوينين ومكيتنساوش وإجابياتها على حياتي كتار بزاف لقيتها في جنبي في واحد الوقت لي كنت محتاج لي يوقف معايا لقيتها السند فرحاتني في الوقت لي كنت الله لي عالم بيا وبمشاكيلي وقدرت بسبابها وبتحفيزها وهدفي باش تكون معايا نبدا مشروعي ومن كترة حبي ليها قدرت اني مانتبعش طريق الحرام . هاذشي لي كيخليني اني نبقا نحتارمها وتبقا صورتها مزيانة في عيني .كيف كنتمنا أن صورتي عندها تبقا زوينة ونكون على الأقل خليت بلاصتي نقية معاها . واخا من بعد هاذ الفراق وصلت لواحد المرحلة صعيبة وتزادو عليا غير المشاكيل موشكيل تابع موشكيل بديت كنمرض في نفسيتي دخلت تاني في إكتئاب حسيت براسي بوحدي واخا كانو صحابي معايا عن بعد غير الفرق هاذ المرة ماسديتش عليا في بيتي كنت كنمشي الخدمة ولاصال واخا بزز مني وكان لي كيشوفني كيقول هاذا بيخير ضاحك وناشط ولكن ربي لي كان عالم بيا من لداخل كي كنت فاش شفت راسي زدت تأزمت قررت نغيرها من اسفي وقفت خدمتي ومشيت سافرت عند عائلتي نلقا الوناسة وفي نفس الوقت ندوز الوقت مع عشيري حسام لي من نهار جيت وهو معايا ونعم الصديق ديما كيحاول يخلق واحد الجو ديال الضحك من ابسط الحوايج بدينا كنخرجو مجموعين كنضحكو ونغنيو ونشطحو مجموعين كنطلعوها على بعضنا وديما مناقشين أنا وياه كيعاود ليا ونعاود ليه كينصحني واخا نص النصائح ديالو غبية ولكن جاري بيها العمل كيبقا واحد الصديق ماكينش بحالو دوا الاكتئاب واخا كنت كنقول مع راسي علاش حنا عشران واخا مختالفين بحال الشرق والغرب في التفكير ولكن كمعاملة وكتصرفات كلقاه راجل داكشي علاش هو الصديق المفضل . دابا كنعاود ليكم قصتي وقريب نرجع لأسفي وكنحس براسي تحسنت الحمد لله ايوا أسيادنا هاذي هي قصتي الحقيقية وقصت سكفاندري الكاتب ديالكم موالف كنتحكم في بطل القصص ديالي كيف بغيت وندير ليكم نهاية سعيدة بزاف تفرحكم ولكن قصتي تقدر ماترضيكمش ولكن ماعندي ما ندير هاذشي لي كاين نتمنا من الله تحسن ونحقق أهدافي ودعيو معايا . قبل منسالي نعطيكم اخر النصيحة حاولو تبعدو عن العلاقات ونتوما في سن صغيرة وبالأخص الولاد حتا تشوف راسك قادر أنك تكون واحد العائلة ديك الساعة عادي بالي وسرع المراحل وسير تزوج ماشي تكون مزلوط وتحب يقدرو يوقعو بزاف ديال الحوايج يخربقو ليك بلاناتك وتولي معدب كيف طرا ليا ونتوما البنات خدمو دماغكم قيسو الدري رآه باين شكون كيتفلا وشكون معقول غير كتبغيو تكلخو بعض المرات وختارو طريق المعقول . نتمنا تستافدو شي حوايج من قصتي وبالأخص النصيحة ديال تفلا أو تلعب بقلب شي واحد حيث بالنسبة ليك يقدر يكون عادي ولكن هذاك رآه قلبو ومشاعيرو يله نتشافو هاذ المرة في قصة خيالية كنبغيكم كاملين رأيكم في القصة. تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM