مشيت واحد القاعة ديال التداريب وبديت كنشوف في النتيجة لي وصل ليها العميل ديالنا وأنا كنتفرج وفرحان من النتيجة حيث كيبان ليا مقاتل مع 10 رجال صحاح بالعصيات ديالهم وشبع فيهم عصا وحتا كاع إلى جات فيه شي دقة مكيحسش تقول رجل آلي ماشي بشر داكشي ديال شاروخان فاش كيكون واكل قتلة العصا وكيجعر على حبهم ... السي حسان فرحت من بعد ماشفت هاذشي لي قدامي داكشي لي كنت كنتمنى هو لي لقيت حسان : كيف تافقنا كامل مكمول رجعناه شبه آلة صحيح لواحد الدرجة مكتصورش وهاذشي كيرجع للمدرسة الصينية ونزيدك حاجة أخرى ذكي تقدر تعول عليه في أي حاجة _ مزيان عيطت ليه بسميتو ( صهيب ) هو يجي عطاني السلام ووقف قدامي وقفة عسكرية وبديت كندوي معاه بيلا غادي يرجع معايا المغرب اليوم غير كملنا ودخلت أنا وحسان واحد الكافي كاينة تما وبدينا كنستحضرو في الذكريات القديمة لي دوزنا أنا وياه حتا قرب وقت الرحلة ديالنا كان صهيب جمع حوايجو سلمت على حسان وودعتو وطلعنا الطومبيل نيشان المطار دخلنا كشاو لينا الباسبور وريحنا في غرفة الاستقبال حتا وجدات الطيارة قصدناها شدينا بلايصنا ولي لاحظت في صهيب انهو ماكيهدرش وغير مخنزر تقول باغي يضارب أنا خليتو على خاطرو مابغيتش نهدر معاه حتا نوصلو المغرب وديك الساعة غادي يهدر بلهلا يطريه ليه ... درت ليزيات وغمضت عيني مع العيا داني النعاس مافقت حتا قربنا نوصلو بقيت ملاهي الوقت كنقرا في واحد المجلة حتا وصلنا لمطار الرباط نزلنا لقينا الشيفور ديالي و رجالي في المطار كانت ديك الساعة 2:30 ديال الليل حمو : مرحبا سيدي فريد توحشناك _ زعما توحشتيني ولا غير تنافقني كوراه تهنيتي مني فاش مشيت حمو : حشا أالسي فريد شكون لي كيسخا بيك نتا خويا وحبيبي على راسي وعيني وبلاصتك كبيرة دغيا كيبان الفراغ الى مكنتيش _ الله يخليك ليا أالسي حمو ( حمو هو الشيفور ديالي ومساعد ديالي وفي نفس الوقت صديق ديالي من أطيب خلق الله ) .... أمرت رجالي يديو صهيب للمقر وأنا ركبت مع حمو في الطومبيل قاصدين الدار ... قول ليا أالسي حمو كي دايرة الأمور حمو : كلشي بيخير تال ديك الجنية لي رجعات حمقاتني وباقة كيما هي كبرات جسمانيا وعقليا لا ويحساب ليها مزال عندها 7 سنين _ ونتا لي ضصرتيها عليك في الصغر هاهي كبرات وبقات معاك هكذا حمو : عادي غير كنضحك على شحال عندنا من سناء توحشتها كانت معمرة الدار فاش مشات خوات البارح مريحة كتشعبط فيا قلت ليها ابنتي مشات الصحة وهي تقول ليا مزال دك ودردگ خاص نزوجوك وغادي تصغار شحال وحنا نضحكو _ هههه هاذ المسخوطة باغية تبيعك العجل دير بكلامها وشوف شنو غادي دير ليك مراتك حمو : وايه حياتنا كاملة دوزناها قرطاس وحرب مع الرجال وفي آخر يماتي تقتلني مراتي خايبة حتا في المعاودة ههه _ بقينا مجمعين حتا وصلنا قدام الفيلا ديالي نزلت وقلت لحمو يمشي تال غدا مع الصباح حلو ليا السيكريتي الباب دخلت في الظلمة و كنتمشا على صباع رجلي باش منديرش الحس ونفيق مالين الدار غير قربت لبيت النعاس هو يتشعل الضو ديال وسط الدار تخلعت حطيت ايدي على سلاحي درت جيهة الساروت ديال الضو كلقاها غير مولات الدار ... أوف خلعتيني نتي مزال فايقة ( حياتي كاملة وأنا كنتسلت لبلايص صعيب الواحد يدخل ليهم بلا مايعيقو بيا تال داري فينما كنبغي نتسلت نخرج ولا ندخل كتخرج ليا المرا من الجنب السلامة ) عائشة : على السلامة أهاذ الراجل فين هاذ الغيبة تاني _ غير الخدمة خلي تال غدا ونعاود ليك دابا داز الوقت بغيت غير نرتاح ... دخلنا البيت بديت كنبدل في حوايجي ومراتي كتعاوني لبست بيجامة النعاس .... عيشة يا عويشة كيفاش بلانك غبرت عليك شي يامات ونتي تزياني صغاريتي العفيريتة عائشة : سير گلاك نتا باغي تصبرني بهاذ 2 كلمات يعلم الله فين كنتي دايع ومعامن كوراه تابع العيلات وزايدون أنا ديما زوينة غير نتا وليتي شيباني مشا ليك الشوف _ كبرتي ومزال تغيري يخلي لي عويشتي المغيارة على لي عندو نتي يشوف وحدة أخرى كل ماكتكبري كتزياني عيشة : نعس وسكتنا ماغديش ضحك عليا بجوج كلمات ديولك _ بقيت كنحزر فيها بكلام زوين حتا بقات على خاطرها ومشينا الفراش عمرت تيليفوني على 8 ونعسنا وحنا معانقين حتا كنفيق على صوت تيليفوني نضت غسلت وجهي لقيت الخدامة موجدة الفطور بديت كنفطر كليت وشديت قهيوة وبديت كنقرا في الجورنال حتا دخل حمو حمو : قرب وقت الاجتماع _ ريح فطر بيما بدلت حوايجي ... طلعت حلقت على الحالة وتميت نازل كتبان ليا سناء عاد نايضة كتكسل سناء : صباح الخير الواليد _ صباح النور قرب الوقت تعطلي وتشوفي ... خرجنا من الدار نيشان لمقر المخبرات وانا داخل كلشي عطاني السلام قصدت البيرو ديالي وانا نعيط على واحد الضابط بديت مجمع معاه بيما وصل الوقت وتوجهنا لغرفة المحاضرات لقيت جميع أفراد الفرقة الخاصة كاينين لي واصل العدد ديالهم 28 شخص وكاملين لابسين حوايج المهمات ومغطيين وجاهم بالأقنعة طلعت المنصة وقفت قدام الميكرو ... مرحبا بيكم كاملين شحال وأنا كنتسنا اللحظة لي تكونو فيها مجموعين كاملين قدامي عارفين علاش جمعناكم سناء : لا ولكن ماغدي تكونو جمعتونا وإلا وكاينة شيحاجة خطيرة أنس : سيدي سمح ليا على التدخل ديالي بغيت نسولك لي عارف هو أن عدد الفرقة الخاصة هو 30 هنا غير 28 فين هوما 2 لآخرين _ أشرف عندك قوة الملاحظة دابا تعرف ... أول حاجة ديرو هي حيدو الأقنعة يمكن ليكم تشوفو بعضكم . فاش حيدو الأقنعة بداو كيشوفو في بعضياتهم .... كاين فيكم لي كيعرف لاخر وكاين لي أول مرة تشوفوه نتوما هوما احسن 28 شخص تختارتو بعناية وكلكم دزتو من تداريب ومهمات لي صعيبة خلاتكم تكونو على رأس هاذ الجهاز واليوم جمعناكم على أمر مهم وهو غادي تحاربو واحد المافيا لي كبرات بسرعة وكتشكل خطورة كبيرة على المواطنين كيديرو أي حاجة طيح ليكم على البال التجارة بالمخدرات والأسلحة والاعضاء القتل الاختطاف الاغتصاب وحتا عمليات إرهابية وحاليا ولاو مركبين الرعب في المواطنين بسبب خطف وقتل بنات قاصرات داكشي علاش جمعناكم مهمتكم هي تقضيو على هاذ المافيا فدوى : سيدي عندكم معلومات على الأشخاص لي كيشكلو هاذ المافيا _ خدمت داتاشوب وبديت كنوريهم في الصور ديال أعضاء المافيا القائد هو جاد والمساعد ديالو حمزة أشرف : سناء مالك كيبان ليا مصدومة وكترعدي مالك بحال لا شفتي شي جن ... كنشوف في سناء سهات وكترعد بحال شي بنت صغيرة وأنا نغزها سناء مالك سناء : واش معرفتيش دوك 2 أشرف : شكون غادي يكونو بالسلامة غير مجرمين سناء : جاد وحمزة هوما 2 لي ناقصين من الفرقة ديالنا جاد كنعرفو شخصيا قوي وذكي بزاف .... يتبع...