يقدر ماشي اليوم وماشي غدا وماشي الشهر الجاي ولكن متأكد غادي نوصل الهدف ديالي ونحقق الحلم ديالي ولي هو نترفح وندير الفلوس هاذ المقولة هي لي دايرها ديما في بالي ومأمن بيها واخا الحياة شادة معايا الزكير ومخلياني من المعذبين في الأرض ولكن ماعليش غادي يجي النهار لي غادي يتبدل فيه هاذشي وقبل مانخليكم تعيشو معايا قصتي نعرفكم براسي الإسم ديالي علاء الملقب هايزنبرغ عمري 22 عام ولد أسفي . بكل صراحة أنا مختالف على كاع الأبطال لي قريتو عند سكفاندري من قبل حيث أنا مازوينش في وجهي وماطويلش يعني يله واصل الطول الطبيعي 1.70 ولكن صحيح و مطراسي عندي جسم رياضي بالحكم أني كنتريني فيتنس و نفس الوقت نزق وذكي هاذشي لي كيميزني . كبرت أنا وخويا التوأم في الخيرية من بعد ما مات الأب ديالنا ومراتو في واحد الحريق لي كنت أنا السباب ديالو وباش تعرفو عليا كثر غادي ندير ليكم واحد فلاش باك فاش كانت عندي 11 عام . كيف قلت ليكم كنت عايش أنا والأب ديالي ومرات الأب وخويا حسام في واحد الحي شعبي في العريصة . مقطوعين من شجرة ماعندناش شيواحد من غير بعضياتنا يعني معندناش العائلة . فاش درنا 10 سنين عاد عرفنا بيلا مرات الأب ماشي هي منا الحقيقية وبيلا الأم ديالنا مسكينة توفات من بعد ما ولداتني على حساب ماقال لينا الأب ديالنا بيلا من بعد ماتولدت أنا من ورا خويا بساعة جاها نزيف وماتت وهاذ الجملة حقدات عليا خويا حسام لي كيقول ليا نتا هو سباب موت ماما واخا أنا ماعندي حتا ذنب ولكن كنعدرو حيث بدينا كنكبرو بلا حنان الأم. ومرات الأب مكرفصة علينا بزاف ديما كتعنفنا وكتجبد لينا الصداع مع الواليد واخا كيحاول مايخصرش لينا ولكن بعض المرات كتعمر ليه راسو مزيان علينا وحنا ماديرين والو وكناكلو العصا باطل ولا كيجري علينا برا وبالأخص أنا حيث كنت كنشد معاها الزكير وكتعمرو عليا كتر من خويا وهاذشي لي كيحقدني عليها ومكرهتش نقتلها واخا مزال صغير وعندي غير 11 عام ولكن 2 أسباب لي كيخليوني صابر عليها ومنديرش هاذ شي لي في راسي الأول هو الخوف ديال الصغر تخيلو تاكنهز موس وكنبغي نقصدها وكنبدا نتخلع وفي آخر لحظة كنتراجع والسبب وتاني هو الأب ديالي مع كيبغيها بزاف مابغيتش نضيعو فيها حيث هو عزيز عليا وكنحتارمو واخا كيظلمني ولكن ماعليش كيبقا الأب ديالي وهي ربي غادي يجازيها على افعالها هاذشي لي كنت كنقول ديما ولكن هاذ الفكرة غادي تبدل واحد النهار وغادي تخليني نحقد عليها بالمزيان . واحد نهار الأربعاء فقنا أنا وخويا مع 7:00 بدلنا حوايجنا وفطرنا ووصلنا لواليد بالمطور تال المدرسة وهو مشا لخدمتو . بغيتو تعرفو خدمتو هو خدام في واحد المعمل ديال التصبير شاف ديال الخدامة كيمشي مع 8 الصباح ماكيجي تال 21:00 ديال الليل ماعلينا من بعد مادخلنا للمدرسة مشينا قصدنا القسم ديال أستاذة العربية دخلنا وتما قرينا واحد الدرس على أخطار الغاز والحرائق وكيفاش خاصنا نتعاملو في حالة شمينا ريحة الغاز في الدار وكيفاش نتعاملو مع دوك المواقف ... إلخ . سلات الحصة و خرجنا من عند العربية وبقينا كلعبو حابة في الاستراحة أنا والخوادري وشي دراري ولاد القسم من بعد ماضرب الجرس خويا والدري قصدو قسم أستاذة الفرنسية وأنا واحد الدري عاد بانت لينا الطواليط مشينا قدينا حاجتنا وشربنا وتسركلنا على الأقسام عاد مشينا القسم لقينا الباب مسدود دقينا وبدات تسول فينا فين كنا قلت ليها غير الطواليط وهي تقول لينا سيرو بقاو في طواليط وسدات علينا الباب بدينا مريحين أنا والدري حدا القسم واحد 5 الدقايق بداو مصارني كيغرغرو جاني الجوع والملل قلت لدري بسلامة غادي نمشي لدار نفطر ونتفرج في الإعادة ديال دراغون بول مشيت كنجري تا وصلت لدار كيبان ليا الباب والشراجم مسدودين وبديت كنفكر وكنتخلع حيث غادي ندق على ديك اللفعة وتقدر تكون ناعسة غادي تضربني وتسمعني الهدرة مازعمتش ندق تابغيت نمشي لراس الدرب نريح وأنا نتفكر بيلا خليت الفدريش ديال بيتي محلول قبل مانخرج يعني غير ندفعو بيدي غادي يتحل وحتا من الݣرياج ديال الحديد واسع شوية نقدر ندخل منو مع أنا رقيق ( هاذ العملية كنا كنديروها من صغرنا أنا وخويا فاش كنساو الساروت في الدار ولا كيتسد علينا الباب كيدخل واحد فينا يحل الباب لاخر ) ماعلينا درت لفرصادة لاخرة فين كاين بيتنا مع دارنا فيها 2 فراصد وساكنين غير لتحت ماعلينا دفعت الفدريش بشوية تحل و طلعت فوق الݣرياج دخلت رجليا دخلو وبقا النصف الفوقاني وبديت كنجمع في لحمي وكتافي وكنتعصر باش ندخل . هههه بديت كنكبر على هاذ الدخلة دخلت بزز من داك الݣرياج كان غادي يوحل ليا راسي من بعد مادخلت لحت شكارتي فوق الكاتري بديت كنبدل في حوايجي حتا كنسمع صوت مرات الواليد كتنين حليت الباب ديال بيتي وخرجت نتأكد منين جاي الصوت فاش خرجت لقيت الصوت جاي من بيتها قربت ليه كيبان ليا البيت محلول قلت ندخل نتأكد واش السيدة لباس ياكما مريضة ولا واقعة ليها شيحاجة . ولكن داكشي لي شفت فاش دخلت صدمني وخلاني نحس بالحݣرة لقيت مرات الواليد كتخونو مع سمير مول الحانوت فاش شافوني طاح منهم النص ودغيا غبرو لحمهم. وأنا نغوت قلت ليها غادي نقولها لبابا اللفعة وتميت غادي خارج كنجري جيهة الباب ديال الدار ولكن لقيتو مسورت وأنا نتما غادي لبيتي وانا كنبكي بقا فيا الحال على هاذشي لي شفت يله بغيت ندخل البيت حتا كيبان ليا سمير كيجري جيهة الباب حلو وخرج وأنا نمشي تا أنا بغيت نخرج وهي تشدني سميرة : علاء عفاك أولدي متقول لباباك والو وأنا غادي نتهلا فيك هاك هاذ 50 درهم شري لي بغيتي وإلى خصاتك أي حاجة غادي يعطيها ليك سمير غير ماتقول والو أولدي راك عزيز عليا ونتا بحال ولدي _ لحتها ليها على وجهها . لا غادي نقول لبابا داكشي لي شفت الحمارة واخا ماعرفت شنو تعطيني وهي تبربقني وشنقات عليا هزاتني تال السما ولاصقاتني مع الحيط سميرة : شوف غادي تسد فمك بالخاطر ولا بزز إلى مشات حتا خرجات منك كلمة وحدة غادي نقتلك ونشرب من دمك سمعتيني البرهوش _ حطاتني الأرض بقات كضرب فيا وبان ليا غير واحد الفاز قدامي شيرت عليها بيه جا ليها في سنطيحتها خليتها شادة فيها وحليت الباب وهربت قصدت واحد الدري صاحبي كليت عندو تاشبعت ودوزت معاه ديك العشية لي عندي فيها نص النهار من بعد ما خرجت من عندو مع ديك 19:00 قصدت واحد التيران ديال القرب حدانا بقيت كنتفرج في الماتشات تاوصلات 21:30 كنت متأكد بيلا الواليد غادي يكون جا تميت غادي وأنا كنفكر كيفاش غادي نقولها لواليد فاش وصلت دقيقت هو يحل ليا الواليد الباب وهاز في ايديه واحد السمطة غير بان ليا هازها وسميرة كتبوحط بالبكية ديالها عرفت بيلا عمرات ليه راسو مزيان وبيلا السمطة غادي دور ليا أنا الواليد : مرحبا بسي علاء شنو داكشي لي حاولتي دير لماماك سميرة الحمار ديك الساعة ملي جاتك المراهقة المبكرة سير ديرها على وحدة أخرى ماشي المرا لي معتبراك بحال ولدها _ هاذي ماشي ماما وانا مادرت ليها والو أبابا هاذ ختنا لي لقيتها هي وسمير مول الحانوت في البيت ديالك كيديرو داكشي الحرام والله سميرة : كيكذب باش يبرر على الفعلة ديالو _ بدا كيضرب فيا وأنا كنبكي وكنقول والله تا كنقول الحق راني مكنكذبش عليك أبابا وهو مكيسمعش ليا ديك اللفعة عمرات ليه راسو مزيان الموهيم زوقني مزيان تاولا لحمي كولو زرق وقال ليا طلب من ماماك السماحة وأنا كنتنخسس وقفت مشيت حدا الباب وقلت ليها والله ماتبقا فيك ألفعة غادي نتاقم منك وحليت الباب و خرجت كنجري وكنسمع غير أجي أجي هنا من الواليد و ومع هو عندو واحد الكرش كبيرة مايقدرش يتبعني بقيت كنجري في داك الليل حتا عييت ريحت ستارحت في واحد القنت شوية عاد نضت بقيت كنتمشا حتا وصلت حدا المحطة الطرقية دخلت ليها و بديت كنفكر أني نسافر ونمشي شي مدينة بعيدة ميعرفنيش الواليد ومراتو فين مشيت . بديت كنطلب في الشيفورات وكنقول ليهم ديوني معاكم عفاكم ماعنديش الفلوس بداو كيجريو عليا شوية هو يقصدني واحد الݣريسون قال ليا بغيتي تسافر قلت ليه اه قال ليا يله معايا لبيرو نعطيك ورقة تسافر بيها مشيت معاه لبيرو لي كيقطعو فيه على نيتي وسد الباب وحط ايدو على علبتي وبدا كيتقرص عليا دفعت ليه ايديه وهزيت واحد الزرواطة تما وقلت ليه غادي تبعد مني ولا غادي نقتلك الݣريسون : ياك بغيتي تسافر دير داكشي لي بغيت ونخليك تسافر _ غادي تطلقني ولا نبدا نغوت ليك هنا ونجمع عليك الناس . هو يبربقها معايا وحل ليا الباب وخلاني نخرج الحمد الله خرجات سليمة بقيت كنطلب في الناس يعطيوني نسافر ولاكن تلاقيت غير مع الناشفين جمعت غير 20 درهم بقيت مريح تما في واحد الكرسي شحال حتا بدا كيجيني النعاس فرشت واحد 2 كرطونات في الأرض وتكيت يله بدا يديني النعاس وهوما يتسلطو عليا البوليس كانو دايرين حملة كيهزو المتشردين طلعوني السطافيط وبقاو كيعمرو فيها من بعد ماعمرات داونا لكوميسارية هبطونا لواحد البيت وسدو عليا مع الشماكرية والمتشردين وأنا مخلوع كانبان بحال النعجة وسط الذياب بقيت مكمش بلاصتي شوية خرجني واحد البوليسي وطلعني عند واحد الكوميسير أو واحد البوليسي آخر بداو كيسولوني من ايمتا وأنا متشرد وعلاش . قلت ليه بيلا أنا يله خرجت من الدار غير قبيلة حيث ضربني الواليد وسولني فين ساكن قلت ليه فين . من بعد ما دوا معايا داك الكوميسير قال البوليسي ديوه العنوان لي قال وإلى كان هاذشي صحيح دخلوه لدارهم وداكشي لي دارو داوني بطومبيل تال الدار دق داك البوليسي خرج ليه الواليد البوليسي : هاذا ولدك الشريف الواليد : اه ولدي أسيدي البوليسي : إيوا لاش مخليه يخرج في هاذ الوقت وسط الشماكرية الواليد : هو لي هرب أسيدي وماعرفت فين زاد البوليسي : شوف الشريف هاذ الهدرة ماتقولهاش لينا ولدك وكتحمل مسؤوليتو يله دخلو _ غير دخلني وهو يبدا يضرب فيا عوتاني حيث هربت من الدار كمدتها في عظامي ومشيت بلاصتي وكنفكر في هاذشي لي دارت فيا هاذ السيدة وشنو داز عليا بديت كنفكر أني نتاقم منها و نقتلها ولكن كيفاش ندير وأنا مكنقدرش بديت كنفكر فشي بلان حتا داني النعاس الغد ليه مع 9:00 فيقاتنا مرات الواليد فطرنا ومشينا المدرسة دخلنا لقينا أستاذة العربية مكيناش وخويا والدراري تافقو يلعبو كورة ومشاو لواحد التيران حدا المدرسة وأنا مع ماعنديش معاها مشيت لدار دقيت حلات ليا ديك العقروشة ديال مرات الواليد سميرة : علاش جاي دابا شتك هاذ الأيام وليتي كتجي بكري مكتقراش ولا شنو _ علاش كتسولي بغيتي تجيبي مول الحانوت تاني وهي تبربقها معايا سميرة : سمع البرهوش أنا ماشي مك نهز بهبالك وهنا أنا لي كنحكم دير بكلامي ولا عطيني التيساع _ جبدات معايا بواحد الطرشة أخرى ودخلات لبيتها وسدات عليها الباب وأنا شديت التلفازة وبديت كنتفرج وهي تطيح في بالي واحد الفكرة جهنمية بيما أنا الوليد ماكينش وخويا حتا هو ماكينش قلت نطبق داك الدرس لي قريت لبارح ولكن بالعكس مشيت سديت شراجم ديال الدار كاملين خليت غير واحد الشرجم صغيرو كاين في الكوزينة دايرينو باش تخرج ريحة الطياب لبرا ومن زهري كيبان ليا الساروت ديال بيت الواليد وسميرة مديور في القفل لي على برا سورت عليها بشوية ومشيت دخلت الكوزينة ( ملاصقة مع بيتهم ) وحليت 2 بوطات صغار ودورت ديك البشونة تال اللخر وحليت السوارت ديول الفورنو والفران وخليت الݣاز مطلوق وخرجت من الدار وتسنيت وحد 10 دقايق عاد لحت واحد لوقيدة من داك الشرجم وهي تبان ليا العافية دغيا طلعات ومشيت كنجري تال واحد القنت ريحت وبديت كنتفرج وكيبانو ليا الدخاخن وأنا فرحان احتا كيبان ليا الواليد جاي وجايب معاه خويا وقفو حدا الدار بديت كنقول أو هاذا شنو جابو في هاذ الوقت مشيت كنجري عندهم وحنا كنسمعو غوات ديال سميرة الواليد بدا كيقلب على الساروت ديال الدار مالقاهمش يمكن طاح ليه وبدا كيحاول يفرع الباب بقا مضارب معاه وكيضرب فيه شوية هو يفرعو من بعد ما تحل الباب كتبان لينا العافية شدات في الدار كاملة بدات الجوقة كتجمع والناس كيقولو لينا رجعو لور رجعت أنا وحسام لور وهو رغم تنبيهات الناس باش مايدخلش حبو ليها خلاه يدخل وسط العافية كيحاول يعتق مراتو سميرة بقينا كنتسناو واحد الشوية وأنا مع الناس وكيسولوني شنو واقع حتا كنسمعو ديك باااااققق تلافت جيهة الدار كتبان ليا رابت ...يتبع رأيكم في الجزء الأول من القصة ؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM