ذكاء مافيوزي الجزء 8 و 9 

 شحال هذا معاودت ليكم قصتي بقا غي يونس كيعاود ليكم تقريبا 4 شهور وأنا غيبوبة فاش نضت كنت فاقد الذاكرة...فعلا الحاجة اللي خلات الذاكرة ديالي ترجع هي السنسلة....مع شفتها رجع ليا الفلم كااامل ...تفكرت خوتنا وماريو اللي سلمت عليه وبان ايا ضعاف..ومجيد اللي معمرني غادي نرجع ليه الپليزير اللي دار فيا .تخيلو فاللحظة فاش كنت كانشهد كنت غادي نموت صافي وهو يسيفط ليا الله ملاك سميتو مجيد عتقني من الموت ...دابا أنا عايش هاذشي اللي بقا من حياتي بالفضل ديال الله قبل كولشي عاذ بفضل مجيد...مشيت سلمت عليه -وافيين اساط مجيد: فين هاني ليا صافي تفروحتي -تا اشمن تفروحت راه غا كنت فاقد الذاكرة مجيد: واهي ما عي -خلينا من هاذشي دابا فوقاش تعاود ليا قصتك الساط مجيد:خلي ذاك الجمل راقد حتا نخرج من هنا ونعاود ليكم نتا و يونس قصتي -اه مقلتيش ليا بعدا بشحال حاكمين عليك مجيد: سير عند يونس هو غايشرح ليك كولشي -مشيت ديريكت قاصد يونس ولقيت معاه ماريو وصاحبتو دنيا و ديك بسمة اللي ضربات ليا قمعة عااالمية ضرت عند يونس قلت ليه شنو كدير هاذي هنا جرني واحد شوية حتى شرح ليا شنو كين وهو يقول ليا يالاه سير اساط باش ناخدو الخواتات...مشيت عندها باش ندوي معاها ..مع بدينا كندويو كنضور كنلقا خوتنا هربو وخلاوني معاها بوحدنا بسمة: توحشتك -لا باااينة حيت سولتي فيا وما قمعتيني ما والو ... بسمة: لا متقولش هكاك أعلاء أنا راه محسيت بيك تا غبرتي -اه ياك حتا غبرت ومنين ألالة كنت غنسطا على داك البلان اللي درتي محسيتيش بسمة: وصافي الزمر سمح ليا ...راه ....ك..ك.كنبغيك ❤️ منكذبش عليكم حسيت بشي حاجة جديدة تزادت فيا عرفتي شناهي ترجع ليك الحبيبة والذاكرة فنهار واحد...زهرة ومعندهاش هاذ الزهر الاي عندي -قلت ليها شوفي ابنت الناس هانتي كانشوفي حالتي كيداير باش ماشي غدا ولا بعدو تبقاي تمني عليا...تقلقات وقالت ليا آخر مرة تقول ليا بحال هكا...وهي تجي حدايا وباستني ففمي...عاوتاني ناضو الحباسا بداو كيزغرتو ويصفقو...عالااام هاذ المصاخط خاص غا اللي يبدا ليهم...ماعلينا مشات هي وماريو ودنيا ودخلنا ....حنا للشومبر..جرني يونس وقال ليا بلي منين غنخرج خاصني نفكر فشي طريقة نخرج مجيد من هنا وقال ليا شحال عطاه مجيد....بقيت حال فمي دقيقة وأنا نقول ليه أنا معاك الساط...قال ليا بلااتي ولكن خاصنا نكملو واحد البلان قبل ماتخرج......خاصنا نصفيوها لدوك الجوج قبل مايباليو بينا -تا لا أصاحبي بلاش انبقاو غا خاضيين ريوسنا حتى نخرجو من هنا يونس :واخا ولكن رد بالك الساط لا تصدق ضايع -العزز بيك اخويا ... مشيت ديريكت لبلاصتي هزيت واحد الماكينة شفرتها من الكوزينة بديت كنبقشش فيها وكندرها حيت كيعجبنينتعلم لبحال هاذشي...بيما كنخدم فيها وهو يطيح عليا واحد الضيم...معرفتش شنو وقع تفكرت يامات ENSA وكيفاش كانت غادا حياتي ...كان الحلم ديالينختارع شي لعيبة ولا نخدمفداكشي اللي كنبغي ....ولكن سيبابي هوما خوتنا...بقيت هكاك كنتشارجا عليهم تال واحد اللحظة بلا منحس..بديت كنغوت ولاد ***** ولاد***** بقيت هكاك حتى داني النعاس المهم ولات حياتي روتينية كل نهار بلان على بلان كيطيحو ليا فالراس بقيت كنقول سنو غادي ندير فاش نخرج من هنا وخاصني نتسنا يونس حتى يخرج المشكلة الوقت بدات كتقرب وأنا بقا ليا غا شهر ونخرج.....أكثر بلاان كان كيضور ليا فراسي ديك الساعة هو ننتاقم من خوتنا ونخوي هاذ البلاد ...هي بلادنا آه وكنعتزو بيها ولكن اللي شادينها خرجو علينا( عاش الملك أولاد الناس لا نصدقو فهي ما هي) ماعلينا مشيت عند يونس قلت ليه الساط غننتاقمو ونخويو .. يونس: واشمتأكد الزمر كنتي كتقرا معانا ....ميسحابليا فقدان الذاكرة كيكلخ -كيفاش قلت شي عيب يونس: وهذا هو العيب بعينيه... -تا شرح الزبا باراكة من لغة الخشب يونس: واش نتا الساط غادي تشد مليون ديال الدولار$ ومزال كتقلب تحرگ دابا غا قول ليا منين كتكساب العقل شديت كرشي وبقيت كنضحك وأنا نقول بيه هاذي عندك العود...مشيت عند العشران ديال لاصال نتريني حيت باغي نرجع اللياقة قبل مانخرج....دغيا داز داك الشهر....أخيييرا ليوما غنخرج غنمشي نشوف بسمة وماريو شحااال توحشتهم...مع الصباح كيجي عندي الحارس كيقول ليا مبروك...حسيت بالفرحة ونفس الوقت خلعة...حيت غادي نخرجبلا يونس وأنا معندي ما ندير برااا تا لعبة منقدر نديرها ميبان ليا غنمشي نتحرك عند ماريو ونبات عندو فالمحال نيت قبل مانخرج وصيت يونس يحضي راسو وتوادعت معاه وتوادعت مع العشران ديال لانطريما ...ومشيت ديريكت عند مجيت سلمت عليه ولحت ليه واحد الورقة فجيبو بحكم أنه فغرفة حريبة اليور وجات على برى كتبت ليه يضبر على (حمض الهيدروفلوريك) ويبقا يرش منو كل نهار على الحيط ...هاذ الحمض كنت قريت عليه فواحد الكتاب ديال الشيمي بلي كيرشي الحيوط وذغيا كيوصل للحديد وكيهدمو...قالو لينا كيستعملوه فبعض المباني قبل مايهدموها قلت ليه قول لشي واحد يجيبو ليك وبقا ترش منو مرة مرة ...حيت هو كيعرف عشرانو على برا يقدرو يجيبوه ليه قال ليا بلاتي بلاتي هاك هاذ الشيك قضي بيه على مايخرج يونس .......خديت الشيك درتو فجيبي و أنتم خارج تلفت مورايا كيبان ليا يونس غرغرو عينيه ...عاوفو كان ضارب ليا الحساب كيغادي ندوز هاذ المدة حتى يخرج....ماعلينا طرگت البيرو ديال المدير خديت تلفوني ولاكارط گيشي ديالي كانت فيها شي حصيصة من يامات ماريو...وا أخيييرا خرجت ..واش عرفتي شنو هي تشم الهوى ديال براا هاذ النوح من الحرية كيحسو بيه غا الحباسا والعسكر....هاذيك الحرية اللي كتعيش فيها دابا نتا ومعاطيهاش قيمة...كون دوزتي الحبس غاتولي باغي غا تبقا فيها...كنتعجب للناس اللي كيخرجو من الحبس وكيعاودو يرجعو ليه🤦🏻‍♂️...معرفتش منين كيفكرو...ماعلينا خرجت أول حاجة درتها مشيت عند ماريو...مع ذخلت للمحال كنلقا واحد الراجل آخر لا علاقة بماريو...خرجت عاودت شفت ياكما غلطت فالمحال لا لا والله تا المحال هذا مشيت عند ذاك الراجل اللي كبير فالعمر.. -السلام عليكم الشيباني:وعليكم السلام ...سمير آجي شوف السيد اش بغا -لا لا الشريف انا بغيت غا نسولك الشيباني:مرحبا سول اوليدي شحب الخاطر -بغيت غا نسولك على ماريو الشيباني : اينا ماريو -ماريو . ماريو اللي كان خدام هنا الشيباني: مكنعرف تا واحد بهاذ السمية -راه سميتو حسن الشيباني :ااه السي حسن ...اش غنقول ليك اوليدي ..غا ديك السيمانة فاش دفناه أجاركم الله في ميتكم...قضى عليه السرطان...كيجيك شي حاجة ؟؟ -مشيت وخليتو مجاوبتوش حيت كنت تالف معرفت فين غادي نصد ...هاهو ماريو اللي كنت معول عليه داه ربي عندو...مسكين كان مريض بالسرطان وديما كيزورنا ...معمرو شكا علينا ولا قال لينا شنو عندو...الله يرحمك اماريو فهاذ النهار...بقيت غادي محسيت بالدموع حتى بداو كينزلو ليا....ماريو اللي كان واقف معانا فالحلوة والمرة...تفكرت نهار مشيت عندو أول مرة..الله بوحدو اللي عارف اش بيا فديك الوقت...المهم مشيت صرفت الشيك اللي عطاني مجيد ومشيت بتت واحد الليلة فلوطيل...الغد ليه مع فقت مشيت كنقلب على شي دار رخيصة ...تلاقيت وحدة ب 500 درهم فيها بيت وطواليط...الكوزينة ضبر راسكطيب فوق الناموسية ولا شوف شنو تدير...المهم سبقت ليه خمس شهور مشيت تقديت واحد الميدة...وشي ميعنات والخضرة والعطرية....ومشيت جبد شي حرايج مكشترين من البال طرگت واحد السيكليس زدت وسختهم...من بعد وتعرفو علاش....مشيت حطيتهم فالدار وهزيت التلفون درت فيه واحد التعبئة كنت جبتها من الحانوت دخلت واتساب و أنا نسيفط مساج لبسمة...فالبلاصة جاوباتني فيكسينا رونديڤو نهار الحد وبقينا كنجمعو تا وصلات الحداش...للست واحد القبية كحلة وكمامة باش ميعرفني تا واحد وأناقصد الدار فاش كنا كاريين...قلت زعما واش غنلقا تما دوك الدراري نبقى مراقبهم على مايخرج يونس ولكن لقيتهم بدلو البلاصة سلمت على الجيران كاملين واخا كانو واخدين عليا ديك النضرة ديال حباس...ودخلت للدار..كنلقى حوايجنا باقيين كيما خليناهم...طبعا غملو ..ولقيت شيكتوبا وشي ماعن وباطة دالويفي...مشيت جبت واحد الهونضة وجمعت كولشي ديتو لداك البيت واخا ولا مزيير حيت داكشي ماقدوش ولكن غي على مايخرج يونس و نضبرو شي سكنة أخرى...ماعلينا قاديت العشا تعشيت مع شي الجوج لبست ديك الدربالة اللي شريت وطرگت واحد لابوراطوار على أساس باغي شريبة ...خليت خونا تا مشا يجيبها قلب دغيا على الحمض اللي قلت ليكم...درتو فالجيب ديال التجاكيطة ...وشربتت وخرجت....مشيت حدا السور ودرت راسي كنبول وأنا نبدا نخوي فالحمض فواحد البلاصة مقابلةمع البلاصة فين كين البيت ديال مجيد....شافني واحد الحارس قال ليا اداك الشمكار سير بول فشي قنت آخر انا متسوقتش ليه حتى جا دفعني...كنت ديك الساعك كبيت الحمض وكنبول بصح نيت...حيت كون شافوني كنكب فيه نيشان غادين يقشعوني فالبلاصة......يتبع فين خليناها🤔🤔 ....اه صافي تفكرت💡 المهم كبيت داك الحمض فوق الحيط وزدت تحركت...قبل مانتورّق المهم هاذ العملية كنت كنديرها مرة فثلاثة أيااام و فعلا بانت النتيجة...الحيط بدا كيرشى ....نسيت مقلتش ليكم مشيت فزيارة عند يونس ومجيد...سولت يونس فوقاش غيخرج قال ليا معرفت...مجيد مد ليا واحد الشيك آخر حيت دوك الفلوس تقاداو المهم مشيت خلصت الويفي وشريت واحد البيسي i5 المهم قاضي الغراض...انا من صغري عزيز عليا داكشي ديال الهاك..قلت نتعلم واحد شوية فهاذ المدة اللي غا مريح ذخلت لواحد السيت ناااضي سميتو wschool المهم شي حاجة ناااضية ننصحكم الى باغيين تعلمو programming...بديت كنبقشش تما تعلمت شي أساسيات بحال HTML وCSS هاذو غيعرفوهم غا صحاب الديزاين وتيايشارجيت فوطوشوب تا هو كنبقشش فيه....ناري شنو نسيت تلاقيت مع بسمة داك الحد و دوينا وقالت ليا باباها بغا يزوجها صحة مع شي واحد..وهي بطبيعة الحال مبغاتش...أنا قلت ليهاوافقي حيت أنا ممضمونش ليك مزال معطل وماعندي لا دار لا تا لعبة...وزيدها مدوز الحبس..بدات كتبكي وقالت ليا أنا كنبغيت الزبل حيتاش فيك هاذشي ...احححح من اليوم مكين غا الحبس 😂😂 قلت ليها الى باغاني خاصك تصبري معايا قالت ليا انا معاك حتال الموت ...كانت هاذي الحاجة الوحيدة اللي عندي فيها الزهر ❤️❤️كنبغيها والله ...ماعلينا رجعت ل لانطريما حيت تابعاني مغامرة ناااضية ديال بصح.... المهم ولا عندي روتين جديد البيسي لاصال ولا العملية اللي كندير للسور...وخوتنا مزال مخرجوش من بالي ديما كنفكر فالطريقة باش نقدر ننتاقم منهم....واحد النهار جالس كنتسركل فالفيسبوك وهي تطيح عليا واحد الفكرة...قلت آجي نشوف واش باقي الفيسبوكات ديالهم...ذخلت للفيسبوك مع كنكتب توفيق وهو يطلع ليا اون لاين...جابك الله اولد الناس...اجي نفاريو شي حساب...ولكن أنا لا علاقة ليا بهاذشي ديال الويب وكيفاش نجبد بلاصتو...وأنا نتفكر واحد الدري هاكر معلم سميتو مروان ذخل للحبس حيت ختارق السيت ديال شي بنكة...هو خرج قبل مني بشي عام...صونيت عليه بقيت كنسبغ فيه فين شادها واللعيبات قال ليا بلي مشا لإنجلترا عيطو ليه شي شركة ديال الهكر الأخلاقي يعلم ليهم الدراري...شوف عاذ الناس من الحبس داوه لعندهم..شفتي الفرق فين كين .هوما كيهتمو بأشنو فعقلك و أشنو تقدر تعطيهم ومكيتصوقوش للشكل ديالك ولا منين جاي هاذشي خاصنا حنا سنيين ضوئية باش نوصلو ليه.... ماعلينا قلت ليه بصاحتك العود مروان: الله يعطيك الصحة.... امضرا نتا بعدا خرجتي -خرجت اخويا غا هاذ اليامات مروان :اش كيعاود واحد يونس -مزال فالگريا ...قريب حتى هو يخرج.. مروان: نتاقمتي الساط ولا مزال...المهم فاشما حتاجيتيني مرحبا مروان تا هو كان عارف اللعيبة ديال الإنتقام...حيت الحبس كاملو عارفنا مضلومين وباغيين ننتاقمو ماعلينا قلت ليه داكشي علاش معيط ليك بغيتك تجبد ليا البلاصة دياا واحد الفيسبوك قال ليا سيفط السكرين...سيفطو ليه .وا خونا طيااارة فالبلاصة جبدو فين كين...ولكن الصدمة هيا خوتنا كينين على برااا (روما :الطاليان) المشكلة حنا مدوزين الحبس ااامبوسيبل تقبل لينا الفيزاا...ولكن هذا ماشي عذر...غانتبعهم واخا يكونو فكوكب مارس...مغاديش نتفاك بمرة...قلتها ليونس فاش زرتو قال ليا مزيااانة حنا نيت معمر شفنا الطاليان 😂😂 حجة وزيارة...واا خونا غاع ممسوق كيفاش غا يمشي حتى هو باغي غا ياكلهم بحالي ومتهموش الطريقة...المهم رجعت للدار كندير نفس الروتين ...حتى وصل النهار اللي غادي يخرج فيه يونس من الحبس ...مشيت تلگيت ليه -على سلامتك الكلب يونس :الله أخويا الحرية -بعدا لقيتي اللي يتلگا ليك انا خارج بحال الى غادي المنفى ...حتى واحد مطل عليا..يونس: قول ليا وجدتي شي غدا -ناريي فكرتيني سربي المونتيف راه الطاجين غيبرد مع حطيتو خرجت...المهم تحركنا مع وصلنا ذخلنا فالطاجين وحنا نرجعو اللور ...جبدنا عليه حتال للمغرب...فقنا توضينا وصلينا...وبدينا كنجمعو .سولتو على مجيد واش ديما كيدير الحمض فالحيط قال ليا آه وبدا كيرشا كيغطيه غابشي زيف باش ميورقوهش الحراس .... -أجي بعدا باقي عاقل على شي حاجة فداكشي اللي قرينا يونس: باقي شادين شوية -الى دوزنا واحد التيار مجهد فواحد السلك وكبينا عليه الما شنو غيطرا يونس: غينفاج...ج..ر بلاتي لاااا متقولهاش مصخوووط كيفاش طاحت عليك الفكرة المهم هاذي كان قالها لينا واحد البروف ديالELECTRICITY قال لينا بلي يقدر يكون انفجار ولكن ماشي خطيير بزاف..داكشي علاش عاونت بالحمض...قادينا الخطة ...مع الستة ديال العشية كيجي ديما واحد الجارديني كيطلق الروبينيات اللي كيسقيو الجردة...حنا غنمشيو مع الربعة نلوحو السلوكا ومعاهم واحد المولد مجهد ديال التيار باش يبقا يدوز فيهم حتى يسخنو مزيااان ...باش فاش يطلق الجارديني الروبينيات...بااااقق...🤫(المغاربة عدهم الداكا 😂😂) ماعلينا..كملنا الدراسة ديال الخطة ورجعت اللور هزيت التلفون وبقيت مستوووني مع قصص سكفاندري حتى داني النعاس...الغد ليه فقنا مع الصباح تقدينا السلك وجوج مولدات مجهدين ولبست الحوايج ديال الدرابل اللي كانت آخر موة غنلبسهوم...ومشيت انا و يونس هو ذخل زيارة عند مجيد باش يعلمو يخرج و أنا مشيت شعلت السيركوي ولحت ذاكشي فواحد البلاصة مفيهاش الربيع باش متصدقش شاعلة العافية... فالوقت فاش تبدلو الحراس وبقيت كنتسنى يونس حتى خرج...مشينا كرينا واحد اللوكاسيو...وجبناها حدا واحد القهيوة مقابلة مع الحبس وجلسنا كنتسناو ...مع الستة كانتسناو ومزااال خونا محل الروبينيات...تعطل حتى لديك الستة ونص مع طلقهوم كتسمع بااااقق ...وطاحو الحيوطة اللي رشاهم الحمض...بانو لينا الدراري اللي مع مجيت فالشومبر كيخرجو هربانيين والحراس قاصدين الشومبر ديالهم....ولكن مجيد مكينش بقينا كنتسناو واحد المدة وهو يبان لينا خارج كيعرج....مشا قاصدو واحد الحارس باش يشدو و ميخليهش يهرب كيبان ليا غا واحد الجرف حدا رجلي شيرت بيهحاليه فالطينونة ديالو (هاذي كلمة جديدة زيدوها عندكم 😂😂) المهم طاح معرفتش واش سخف ولا مات مشيت هزيت مجيد فوق كتافي .... يونس دار امارش للطموبيل مع ذخلنا وهو يورك •فلاش باك (3 د السوايع قبل الحادثة): يونس :صافي وجدتي كولشي -اه ..كولشي الحوايج المهمة درتهم فالطموبيل بقاو غا شيحوليج مغاديش نحتاجوهم...عارف بعدا فين غنمشو... يونس: غنقصدو الصحرى نتخباو شي يامات على ما يلقى مجيد فين يمشي -صافي يلاه كون معايا راجل -- المهم عفط يونس وقصدنا الصحرى...وقفنا فواحد القهوى فأكادير وأنا نتفكر داك الكيدار ديال حسام ولكن ماشي وقتو هاذي...مديت لمجيد واحد الفوقية قديمة وفيها القب قلت ليه يتخبى فيها باش ميتورقش ...لبسها ومشينا قصينا وشديتا الطريق عاود تاني ... بقينا غااادين حتى فتنا تيزنيت....وحنا نذخلو فواحذ الطريق...غا الخلا والقيفار...ديك الطريق بالنهر وكتخلع ...وزيدهابدا كيطيح الضلام...كندور عند مجيد كنلقاه مبرد السوق .بحال الى حتى حاجة مواقعا....تخلعت أنا تزعزعت...تخيل كينين غي حنا والرملة....وااا ميمتي كون غا بقيت مع مرات الواليد كون دابا مهنيي...وبيييخير ولكن انا اللي درتهالراسي بيدي....المهم باشما غاديين والطريق كتخياب وكتخلع...وكيعاودو عليها قصص بزاااف ديال صحاب المكان ☠️🎎 (الله أكبر طلع البدر علينا 😂😂 كنكتب مع الربعة د الصباح)...ماعلينا كان مجيد كيعاود لينا البلان ديال قصتو بلي كان شي طبيب ديال العسكر و داه شي كولونيل ماجور (هاذي واحد اللعيبة واصلة فالعسكر) باش يخدم عندو فالڤيلا ديالو ...حيت خونا هااااارب داكشي علاش بغاه يكون طبيب خاص ديالو...ماعلينا داك الكولونيل كان مبلي بشي حاجة سميتها الأحجار الكريمة...كان ديما كيشريهم و كيخبيهم فواحد الكوفر...وكان مسير شي مافية واااصلة فالمغرب وداير شراكة مع شي مافيات فالطاليان ...ماعلينا واحد النهار ناض سي مجيد واحد النهار رزاه فشي حجيرات ساوييين بزاااف ديال إقاريضن=الفلوس بالأمازيغ اااه دابا عاد فهمت علاش الكولونيل سيفطو لتزمامارت و زايدها سيفط ليه خوتنا يصفوها ليه..باش ميصدقش فارش الأسرار اللي كان كيعاود ليه.و حنا كنجمّعو.... يونس: الدراري مبغيتش نقولها ليكم حتى نتأكد ولكن راه تابعانا واحد الطموبيل من الخرجة ديال تيزنيت.... ضرنا اللور كتبان لينا واحد jeep 🚙 كحلا تابعانا وبعيدا علينا....منكذبش عليكم صااافي ديك اللحظة خدات الطبيعة ديالي مجراهى وبلت اييه اسيدي طلقت واحد مولاتي البولة سخناتني أنا ومجيد...ضار عندي يونس كيضحك واخا الوقيتة ماشي ديال الضحك ...قال ليا اودي الرجال اودي ...كون عرف الحبس واش دوزتيه نتا گاع ميبقى حبس...ترجل معانا راه لا عبين ناقصين.... -دابا قول ليا شنو المعمول... يونس : على الله ميوقفوناش حتى نوصلو لواحد الڤيلاج قريب هنايا -وا كسيري الساط يونس :قرا السمية ديال الطموبيل باش تابعينا وتكمش...راه واخا نجري بسرعة الضوء ...غا نسا شي حاجة سميتها تهرب ..هزيت يدي للسما وبقيت كنقول ياااربي نفلتو من هاذي..بقيت كندعي والبكية بين عينيا...انا مكيهمنيش نموت....الموت حنا مااملين ليها ...ولكن مباغيش انموت حتى ننتاقم...😞😞 بقينا كاكاك شي نص ساعة .. قال لينا مجيد بلي ورق شي واحد فيهم كان خدام مع الكولونيل فالمافيا اللي مسير ...صافي عرفنا واش جاو على قبل مجيد..فاللول فكرت ندفع مجيد نلوحو ويتفاهمو هوما معاه ....ولكن فكرت فالفلوس اللي غادي نصورو معاه وشنو دوز معايا مسكين فالگريا.....وأخيييرا بدا كيبان لينا الضو ...فرحت كثر من الفرحة ديال الباك...الله ربي شحال كيبغيني 💪🏻....مشنا ديريكت ريحنا فواحد القهوة فيها شوية ديال الناس المهم كتبان مأمنة ..وبقينا كنفكرو ف شي خطة....واحد شوية وهو يقول لينا يونس غنرجعو منين جينا حيت هنا الوجهة ديالنا ممعروفاش...ولكن فين غانمشيو...هنا نقز مجيد قال لينا عندي الفاميلا فواحد البلاصة فالناضور....الله غنمشو للريف..كيعاودو على الريفيات ناضيين... يونس:تا سكتنا الزمر نتا يالاه كنتي غتموت وكتفكر فالريفيات....وختنى شنو درتي معاها... -وا شتييي هانتا بديتي كضسار ...آخر مرة تجع المدام على فمك... يونس :😂😂 عاي هاي كبرتي العاود...ريح ريح نفكو هاذ الحريرة... نضت مشيت للطواليط وبان ليا واحد السرجم تما...مشيت ديريكت عند يونس قلت ليه صافي لقيتها.... ••مجيد فيق أصاحبي فيق باقي محتاجينك لااااا متموتش امجيد....علاش اسيدي ربي گاع اللي كنبغيهوم كيموتو دغيا علاااش...هز مجيد يديه وشهد ومات ...بانو ليا خوتنامزااال كيقلبو علينا ...مكيبان ليا غا واحد الكوخ معرفتش ديالمن جا فوسط الغابة....ذخلنا ليه وتخبطنا تحت الناموسية ديالو ....... •(ثلاثة أيام قبل) رجعت من الطوالبت ومشيت عند الدراري...قلت لمجيد شوف حنى غنديرو راسنا ودعناك و غادي نمشو نسبّقو الطموبيل للقداام بحال الى مشينا...فديك اللحظة نتا خاصك تنوض للطواوليك ...كين واحد الشرجمتما تسنانا حتا نجو نعاونوك تخرج منو....داكشي اللي درنا ...ودعناه وركبنا فالطموبيل تمشينا بيها شوية وطفينا الضواو زعما راه غبرنا خرجنا من الطموبيل ومشينا خرجنا مجيد وحنا نعفطو....😂😂 يالاه شدو البرد دابا ...شديناها من تما حتال مراكش وحنا غا كنضحكو على خوتنا اللي درناها بيهم .... •(يومين قبل) -حنا فمراكش وصلنا البارح فالليل هبطنا قصينا وبنتنا فواحد لوطيل دوشنا وبدلنا علينا حوايجنا وحنا وخرجنا كنتسركلو شوية على حساب مجيد ...طبعا مخبيين حيت الرجال ديال خونا غا مشتتين فالمغرب...وزيد عليها مجيد هارب من الحبس المهم ماعلينا كنا معولين نضربو واحد سيمانا فمراكشو نشدو الطريق للناضور...ولكن طرا بلان آخر .... •(يوم قبل الحادث) فقنا فالصباح مشينا كنتسركلودخلنا لواحد المحال نقصيو....مع ريحنا وهو يبان ليا مجيد تبدل ليه اللون فوجهو...سولتو مالو....وقال ليا بلي واحد اليرباي هنا من الرجال ديال خونا...خبا راسو فالقب ...وجا داك السرباي...معرفتش كيدار حتى شافو...مشاديريكت هز التلفون.عرفناه بغا يعلم المافيا..هزينا جلالبنا حتال البوط وأكتيڤينا موض هشام الگروج ...موقفنا حتال لوطيل معا ذخلنا بدا مجيد كيهز فحوايجو قال لينا خاصنا نخويو داااابت المدينة قبل ما يعرفونا فين كينين...حتى حنى ماشي من العاگزين...جمعنا حوايجنا وقصدنا الناضور....يتبع. (نعود نفكركم الإخوان يكمل التفاعل ...جزء آخر مع الطناش واخا الوقت مزيرة) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM