ذكاء مافيوزي الجزء 10 

ايييه اسيديييي ...خليناها منين قصدنا الناضور.... جمعنا حوايجنا لحناهم فالطموبيل وبقينا ضاربين دوك الجلالب....وحاضيين مع الباراجات حيت معانا هاذ المونتيف هارب من الحفرة...واااااا شحال بعيدة هاذ الطريق يا خويااا...ركبنا مع شي الجوج ديال العشية وطاااح الضلام ومزال ما وصلنا....أنا مرضت ديااال بصح...يونس عيا وعطاني نسوق شوية حتى داتني عيني كنت غانقلبهم.... قلنا نضربو شي نعسة فالطريق....ها هاذيك ضربنا واحد النعييسة ممرحااا وحنا نشدو الطريق....مشينا لواحد البلاصة سميتها العروي...ودخلنا معا شي پيستات لشي عروبية تمااا...تما فين لقينا جدو...راجل عياان و مقابل شي غنيمات حتى يدي مول الأمانةأمانتوو....متخيلوش شحال فرح ملي شاف مجيد سلم عليه وذخلنا حط لينا شي سمن و شي عسل ...ماشهينكوم والخبز ديال الشعير نعام اسيدي....المهم تبرعنا مع راسنا....سمعتو كيديوي هو وياه بالريفية ما فهمت تا گرام من داكشي اللي كيقولو ماعلينا سالينا القص ورجعنا اللور وهز مجيد التلفون شعلو...أول مرا يشعلو من شحااال هاذي من قبل الحبس...جبد واحد التعبئة دخلها ..وصونا على واحد عشيرو باااينة عندو الجذور فالأرض..قال ليه يسيفط ليه شي واحد يخرجو برااا المغرب...قال ليه واخا بعد غذا غادي يكون عندك...تما فين جمعنا مجيد ...قال لينا كين واحد الراجل ف (ماربيا: اسبانيا) غي هو و مجيد اللي عارفين فين دافن مجيد دوك الأحجار....قال لينا الى وقعات ليا شي حاجة سيرو عند داك الراجل والنص ديال غتاخدوه الربع ديوه لمرتي والربع حلال عليكم...لاح ليا واحد الورقة فيها العنوان ديال داك الراجل وتحت منو واحد الجملة ...مفهمتهاش حيت بالإسباانية..خديت الورقة لحتها فجيبي وهزيت التلفون ديال مجيد دخلت لبلاصت التصاور كنلقاه مصور مع شي مرا وشي ولد عرفت واش هاذيك هي مرتو اللي قال لينا وااااو شحال قرطاااسة....ناريي تفكرت بسمة نااااري غتكون كااااعية عليا ديااال بصح ....شديت عند مجيد مكالمة ....وصونيت عليها -الو ... شي راجل: الو شكون معايا -مكيهمش تقدر تدوز ليا بسمة الراجل:شكون نتا الشريف اللي كتسول على مرتي سمعت بسمة جايا وكتقول بزز مني...بزز مني واحد الشوية كنسمع خونا كيسرفق فيها وهي كتبكي....مغاديش تحسو الفقصة ديالي خصوصا وأنني منقدرش نرجع حتى ندير داكشي علاش جيت...ماعلينا قطعت و أنا نمشي عند مجيد بقينا مجمعين تال نص الليل وأنا نقول ليه...قول ليا هاذ التيليفون نااضي بشحال تقديتية مجيد: تا لا راه هذاك جابو ليا الكولونيل يامات الخدمة -تا كيفاش الكولونيل...زعما ميتبعكش بيه مع قلتها ليه وهو يجمع الوقفة بدا كيطل فالشرجم.كيما توقعنا ...خونا سيفط لينا شيوحديت بواحد الطموبيل بحال ديك اللي تبعاتنا فالصحرى...مع شفتها ....لا لا مابلتش هاذ المرة ولكن الدم برد ليا فالركابي...واااع على مشاكيل..ناض مجيد صونا على شي عشيرو فالدوار قال ليه جمه الناس ديال الدوار يجريو على خوتنا...حيت أصلا هوما معندهومش مع البراني...بقينا شوية حتى كيبانو ليا الناس ديال الدوار هازين شي عواد فيهم العافيا...وقاصدين الطموبيل .والحجر كيتشاير مكين غا الله يعطيك الصحة...خوتنا خافو فالبلاصة دورو الروايض وهربو...الله أخييرا نقدرو نهربو...ولكن بلاتي كينا طريق وحدة هي اللي كتدخل للدوار...وغااالبا خوتنا غيكونو كيتسناونا حداها....الحل الوحيد هو ندوزو عافطين ونتلفوهوم فشي بلاصة فالناضور...المهم ركبنا فالطموبيل وحنا نكسيريو بالجهد....ودزنا من حداهم بالزربة.ولكن معامن نتا ...فالبلاصة خوتنا كانو حدانا...بقينا هربانين وذخلنا مع واحد البيست فالغابة....واحد شوية حتى كيبانو ليا خوتنا فالجنب ديالنا...محسيت بالطموبيل حتى تهزات من بلاصتها...وبدات كتكركب حتى ضربات فواحد الشجرة...فالبلاااصة نضنا كنجريو مع الغابة انا ويونس بقينا كنجريو ومجيد مورانا كيعرج...شوية تا كنسمعو بوووم صوت القرطاس...سمعت واحد الغوتة باقا ليا فوذني ل دابا...تمنيت كون مسمعتهاش...كنضور مورايا كنلقى مجيد غارق فدمو....وراكم عارفين الكمالة....خليناها منين كنا مخبيين فالكوخ....بقينا قاطعين الحس واحد المدة حتى مبقينا كنسمعو والو وحنى نخرجو من تحت الناموسية...يلاه تمينا خارجين من الكوخ وهوما يبانو لينا خوتنا مخبيين فالشجر...رجعنا تخبينا مور الباب واحد 5دقايق..وهو يقصدنا واحد فيهم...يلاه ذخل مع الباب تلاح عليه يونس سد ليه فمو ونيفو حتى داه ربي ...هزينا ليه السلاح...وهوما يتمو صحابو جايين هز يونس واحد الجرف كبير ومشا جاب الدورة من الشرجم ديال الكوخ...غفل واحد فيهم جابو دودة...وهزيت أنا السلاحشيرت على لاخر بيه ....جات ليه فالكرش.طاح للأرض ماقدر يدير والو ...مشيت قصدتو باش نكمل عليه...وصلت حداه وبدا كيزاوگ فيا نعاونو ...وقال ليا بلي عندو ولادو كيتسناوه...ضرت عند يونس قال ليا سربي طلقنا..وأنا مع باقي فيا السم ديال خوتنا متسوقتش لهضرتو..وطيت ليه عو عنقو برجلي حتى بانو ليا عينيه خرجو من بلاصتهم ....ومشيت للجثة ديال مجيد هزيت تلفونو وكارط گيشي ديالو وتحركنا... مشينا ديريكت لمراكش..خلصنا واحد الميكانيك...باش يقاد الطموبيل ومشينا وجعناها لماليها فآسفي....ها حنا رجعنا ثاني لنقطة الصفر عاوتاني...لا سكنى لا خدمة وهاذ المرة لا قراية لا مستقبل وباقي خاصنا ننتاقمو...دابا البلان اللي بين عينيا هو نخرجو من المغرب فأقرب وقت...قصدنا ديريكت أگادير...قطعنا فواحد الكار.سميتو أشكيد...من آسفي حطنا فإنزگان مع الربعة ديال الصباح..شدينا طاكسي بيضة الأكادير بعشرة دراهم هي اللي كانت فجيبي...مع وصلنا مشيت لأقرب گيشي.تيريت واحد 200 درهم ومشينا باش نقصيو...الكرش هي اللولى أخويا...هزيت التلفون فينما كان شي گروپ واتساب ولا فيسبوك ديال الحراگة دخلت ليه باش نستافذ قبل ما نغامر...المهم قريت شي بلانات فالباركو وشي بلايص فين كيتخباو الحراگة ودخلنا نتوكلو على الله...بلاتي بعدا نشرح ليكم السيستيم ديال المرصة كيفاش داير...فأگادير كينين جوج مرصات وحدة قديمة ووحدة جديدة..اللقديمة كيكونو فيها غا الشالوطيات ديال الحوت...والجديدة هي فاش كينين الباركوات اللي كيمشو لبراا حيت كيديو السلعة وداكشي...ماعلينا .كينة طريقة وحدة باش نذخلو للمرصة الجديدة...طبعا ماشي من الباب حيت كينين فيه البوليس وكيخلوك ددوز غير الى عندك الرخصة...الطريقة الوحيدة باش نذخلو هي من المرصة الجديدة....مع ذخلنا قصدنا واحد المگازة..تسنينا العساس حتى غفل ومشينا هزينا واحد جوج جيليان لبسناهم ودرنا راسنا خدامين تما...المهم تحركنا معاهم شوية فالمرصة القديمة...واحد شوية وهو يجي الكاميو كيدي الخدامة للمرصة الجديدة...طلعنا مع الدراري للكاميو واخا بقاو كيديرو فينا شي شوفات ماشي هوما هاذوك...حيت جيناهم غرابين...ولكن ماعلينا....المهم مع وصلنا قسمونا على جوج ديال الفراقي وكل فرقة مع باطو...ومن زهرنا كين واحد غادي للداخلة وواحد غادي ل (لاس بالماس)....حنا حيت زهرنا ماشي راجل سيفطونا لهذاك اللي غادي للداخلة...كانت خدمتنا هي نستفو السلعة...ماعلينا طلع لينا الدم خصوصا حيت خدامين فابور ما ديكلارينا لا لاكارطات لا والو...المهم خدمنا ذاك الصباح...وطلقونا واحد نص ساعة نتغداو...مشينا تغدينا وهو يجي واحد الدري كيماركي السميات فواحد الدفتر...مع وصل عندنابغا يقيد سمياتنا وأنا نتكيه مع الحيط قلت ليه حنا جايين هنا باش نحرگو ...تخرج كلمة وحدة منك نوليو فشي طاب وشي ما طاب...بان ليا خونا تخلع وبدا كيترعد...قال ليا متخافش اصاحبي انا معاكم...قلت ليه يالا حنا غادي نمشو للباطو لاخر...جيب شي جوج اخرين لهاذ الباطو...ذاكشي اللي درنا....مشا يونس جاب واحد الرطونة ديال لانشون و شي پاطات ديال السردين...حطيناهم حدى الباطو وبقينا خدامين...مع غفلو علينا درنا ليهم ذيك اللعبة ديال كان هنا ومشا...ذخلنا تحت شي كراطن ديال السلعة وغطاونا شي دراري الله يجازيهم بيخير...وبدا كيضلام داك الزمر....بداا عاوتاني كيتنادم معايا الحال...دازت واحد ساعتين ومزال غاع متحرك الباطو وبداو مصارني كيطلبو الشرع بالجوع ...جبدت واحد الباطة ديال السردين وقسمناها أنا ويونس واخا مدارت لينا والو حيت خاصنا نتكايسو على ذاكشي ....حيت معارفينش شحال غيدوز الباطو من هنا ل لاس پالماس...بقينا كنتسناو تا عيينا و واااالو....مزاال متحرك حتى دانا النعاس....نعسنا واحد شوية وحنا نسمعو طوووط (الصوت ديال الباطو منين كيتحرك) أخيييرا غادي نمشو فين بغينا...بقينا فالطريق تقريبا شي يومين....دازت غا قصص وذكريات...اااه يونس عاد ليا قصتو...ولكن مغانعادهاش ليكم تا تجيبها الوقت وصلنا مع شي الوحدة ديال النهار....بقينا فالباطو حتى ضلام الحال باش ميشوفنا تا واحد....وحنا نخرجو...مع خرجنا كيبانو لينا شي بوليس ديال الجمارك قلنا ننقزو السور....مشينا كنجرييييو و نقزناه بلا ميشوفونا ....الله خرجات سليمة...مع الخرجة ديال المرصة...مشيت عند واحد خونا كنهضر معاه بداك شوية ديال الإسبانية اللي تعلمت من السيريات...انا مزال كنهضر... الراجل:شعاندك اخاي كضار معايا بالسپنيولة -الأخ مغربي....الله على زهر..حتى نتا حارگ الراجل: شكتقول أخاي واش تينا بعاقلاك... -كيفاش...علاه فين حنا الراجل: تينا فطنجة علاش... كنهز راشي فالباب ديال المرصة كتبان ليا ميناء طنجة...🤦🏻‍♂️🤦🏻‍♂️ ...نارييي على بلان😂😂...بقينا كنتفرگعو بالضحك أنا ويونس...مشيت ثاني خرجت شي فلوس ومشينا تعشيا بالبايصار نعام اسيدي و تحركنا للمحطة الطرقية باش نرجعو لآسفي...مع وصلنا...وهو يقول ليا يونس حنا وصلنا طنجة وصلناها ...علاش منريسكيوش من طنجة💡...قلت ليه حتى هاذي فكرة...هزيت تلفوني دويت مع واحد خونا فالواتساب كيحرگ الناس من واحد الشاطئ سميتو سيدي قنقوش 🌊🌊...هذا معرووف عند الحراگة...شدينا طاكسي مشينا عندو تاوينا معاه ودانا لواحد البيت عند شي دراري باش يوريونا كيفاش كتجري الأمور تما....ماعلينا ذخلنا لداك البيت فيه غا الأفارقة والمغاربة اللي وااصلة فيهم للعضم...بقينا كنتسناو شوية وهو يشدني الملل..هزيت التلفون وذخلت لواحد الجروب واتساب ...فيه غا صحاب الحريگ بغيت نسولهم واش نزعم ولا لا و واش نعطيه ذاكشي اللي قال ليا...مع سيفط التصاور ديال البيت فالجروب واتساب...داز عندي واحد الدري بريڤي...قال ليا خويا هاذو غي نصابة..وقال ليا نصحك متغامرش بحياتك..جرب الحرگة ديال تركيا ...بعدا هي على الأقل فيها نسب النجاة كبيرة....اواااه كيفاش تركيا...علاه كيحرگو من تركيا....صونيت عليه ابيل وقال ليا بلي كيدوزو من تركيا لدول البلقان....للحلم اللي هو أروپا...وقال ليا بلي غادي يتحرك هو وشي دراري هاذ السيمانة....مشيت عند يونس عاودت ليه لافير وقال ليا أنا معاك...وحنا نخرجو شدينا الطريق نيشان لآسفي....واخا معندنا فين نمشيو تما......يتبع (العشران والله الى هاذ الأسابيع شاخضة امتحانات ولكن كنلقى الفرصة فاش نكتب...باغي حاجة وحدة هي تفرگعو شي تفاعل هااارب) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM