💫💜 قصة_المحلل 💜💫 #الجزء 64 : 💥💕 وصل نهار السبت يعني عقد صفاء وصهيب كان كلشي حاضر وكلشي فرحان و اولهم صهيب لي مقاداه فرحة ليها فمدة قصيرة ولات مكانتها كبيرة عندو بصوابها وأدبها وتربيتها حتى كلامها لي كلو موزون وعلى صواب دائما..كان كلشي حاضر فدار عبد الغفور حتى كلتوم وبناتها..عقد عليهم العدول وقبل متزغرت شي وحدة فيهم وقفات صفاء وطلبات منهم باش ميزغرتوش احتراما لفتيحة لي باقي حرقة ولدها مبرداتش وتا هوما مرفضوش وأيدوها الا صهيب لي معجبوش الحال او نقولو غيرتو تحركات لو مكانش عارف لي وقع بيناتهم كان غيقول بلي باقة شي حاججة فقلبها ليه ولكن عارفها كتصرف بعقلها وكتحكم ضميرها...مشا العدول وجلسو هوما مجمعين قاتلهم ريحانة باش يمشيو يهضرو فالصالون على خاطرهم دابا ولات مرتو من حقهم يبقاو بوحدهم ودكشي لي كان خرجات صفاء وموراها صهيب دخلو للصالون جلسات وهي حادرة راسها وهو قبالتها حاط يدو على ركابو ومشابكهم كيشوف فيها ويحمد الله فداخل ديالو انه لاقاه بيها بالنسبة ليه هادي حاجة غيبقى يشكر حميد طول حياتو وهي لي تشفعلو عندو وتخليه يدعي ليه بالرحمة...خرجات تنهيدة من قلبو قبل ميزعم ويقبط يدها بين يديه خلى حناكها يزيدو يحمارو كتر ماهوما حمرين وتعلي عويناتها فيه ...صهيب(باس راحة يدها ونطق بصوت حنين):مبروك عليا نتي كنواعدك ا صفاء نسيك فلي فات ونخليك ديما فرحانة معايا حيت هدشي لي تستاهلي وحدة بطيبتك وأخلاقك متستاحق الا تكون أميرة فدار راجلها وملكة قلبو وهدا ملكتيه من اول نهار شفتك فيه فعلا نتي نعم الزوجة عندي فيك ثقة كبيرة انك غتصوني دارك وتصوني بنتي فغيبتي حيت هي دابا بنتك حتى نتي ...صفاء(متوترة من لمستو):احم اكيد ريم بنتي و الام هي لي كتربي وتسهر ماشي غير لي كتولد ...صهيب(بابتسامة):ولكن هدا ميمنعش انني باغي وليدات منك ...صفاء(ابتاسمات وتفكرات الرؤيا):ان شاء الله ...صهيب(ناض قرب باس راسها وهو باقي شاد يدها ورجع جلس):نتي اليوم غتمشي لدارك مبغيتكش توتري ولا تحشمي نبيل ومرتو غيكونو فدارهم لتحت ونتي الفوق واكيد معانا فرح نتي عارفة هي ختي و ...صفاء(قاطعاتو):هديك دارها قبل متكون داري ومتحتاجش تهضر بحال هاكا بالعكس انا اكتر حاجة كتعجبني هي العائلة تكون كبيرة ومجموعة حين هاكا تربيت فدارنا ديما مجموعين ومكيفرقنا غير النعاس ...صهيب(عاود باس راحة يدها):عارفك بنت الاصل والخير ومنحتاج نوصيك على والو وحاجة خرا نتي كنتي طلبتي مني ان صداقك يكون سورة من القرآن وانا لبيت ليك الطلب ديالك ولكن صداقك لي غنعطيك انا محفوظ ...صفاء:انا مبغيت منك والو يكفي انك تواعدني عمرك تجرحني ولا تمد يدك عليا ولا تمس عائلتي بشي كلمة حيت هوما اكثر حاجة ممكن تهرسني ...صهيب(زير على يدها):مستحييييل انني نديرها بلا متحتاجي طلبي مني والديك هوما والديا وهوما ناس طيبين ماشي ديال العيب يعني غنكون ولد الحرام الا قللت عليهم الادب شي نهار ...صفاء:احم حاجة خرا ا صهيب بغيت نطلبها منك ...صهيب(عجباتو ملي طلقات معاه وركز فإسمو لي خرج من فمها وهادي اول مرة):نتي آمري مطلبيش ...صفاء:الامر لله احم المهم نتا عارف بلي عرس هيثم وبشرى بقاتلو غير 3 ايام الصراحة بغيت نطلب منك انني نبقى هنا حتى يدوز العرس ...صهيب:سمحيليا ولكن منبغيش مراتي حبيبتي تبات بعيدة عليا من بعد ما ولات ملكي وديالي(شافها حدرات راسها وهو يطلعو ليها)نتي غتجي لدارك وصباح نجيبك لهنا وبقاي حتى تنعسيهم ونجي نديك اش قلتي ...صفاء(بابتسامة):هه واخا شكرا ...ناض صهيب وقفها وعنقها باس راسها مبيناتناش الشكر نتي دابا مراتي ...صفاء(بعدات عليه وقلبها غيسكت):نمشيو عندهم ...صهيب(بابتسامة):نمشيو علاش منمشيوش...... #يتبع......♥️🔥 تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM