المعقد والجريئة الجزء 4 🔥🔥🔥🔥🔥 ( تتمة من بعد 90 لايك طاكيو صحابكم يقراو سكفاندري رجع ) لقا عويطة كيحاول يهرب: حصلتي اعويطة، أيام العز سالاو أوجه الحبس عويطة: ههه سي الكوميسير درتي شي إنجاز فين شديتيني ياك؟ بلاما تفرح بزاف حيت غدي نخرج منها بسهولة ها نتا دبا تشوف صلاح شدو دار ليه المينوط: كون اكيد هاد المرة مغديش تخرج منها بسهولة جات البوليس شدو المهربين قلال الي هربو، مي المهم بالنسبة لصلاح هو فين شد عويطة، داوهم للكوميساريا و جراو معاهم التحقيق ما كملو حتى شي 4 ديال صباح، رجع صلاح لدارو دوش و نعس سي يوسف: صوفيا بنتي فيقي بركة من النعاس صوفيا: بابا صباح الخير سي يوسف: صباح النور أميرتي سمعت بلي مقلقة، البارح مجيتش للعشا صوفيا: علاش؟ سي يوسف: عرض عليا واحد صاحبي نتعشا معاه، بنتي بغيتك تعرفي بلي انا فعلا أول البارح معجبنيش شنو درتي مي وخا هكاك سامحتك و لكن بغيتك تواعديني ابنتي تكون هدي آخر مرة صوفيا: كنواعدك سي يوسف: الله يرضي عليك ابنتي يلاه نوضي دبا نفطرو انا و نتي على خاطرنا راه من 9 و انا كنتسناك صوفيا عنقت باباها: كنبغيك بزاف ابابا بغيت الله ما يحرمنيش منك سي يوسف: امين ابنتي امين صوفيا هبطت مع باباها باش يفطرو، لقات ماماها و مروان و إيناس جالسين كيفطرو، جلست و حتى حد ما هدر معاها، كملو فطورهم؛ مروان مشا للخدمة و إيناس خرجت هي و سعاد بقات غير هي جالسة مع باباها فالصالون: بابا حتى واحد مكيهدر معايا علاش مالي انا شنو درت؟ سي يوسف: عطيهم وقت ابنتي هوما غير واخدين منك موقف دبا ينساو صوفيا: اوك بابا انا درت مع البنات نمشو للبحر ممكن نمشي سي يوسف: اوك مي بلا مشاكل صوفيا: كون هاني، هي نوض نوجد راسي بستو love you so much طلعت لبيتي و هدرت للبنات: الو وجدو رأسكم غاديين للبحر احسان: اوك سارة: ساعة و تلقاينا واجدين صوفيا: يلاه تلاحو لبست دو بياس منمر فوقو شورط دجين و تيشرت، جمعت شعري كعكة، هزيت معايا تبديلة فصاك صغير و فوطة و ايكغون، هبطت ما لقيت حد فالدار من غير الخدامة و دادا سلمت عليهم و خرجت، ركبت اللوطو ديالي و دزت على البنات، سارة لابسة بياس واحدة فوقها كسوة خفيفة و إحسان لابسة دو بياس فالبيض، وصلنا للبحر مكانش عامر بزاف و هكا احسن، جلسنا تشمسنا واحد نص ساعة و كل الوقت سارة و إحسان فارعين ليا راسي بالكوميسر سارة: انا وخا كنت نص مغيبة مي ما عمري ننسا شكلو ههه من داك النوع القاصح ماشي صحاب ماما غطيني سراق الزيت غدي يجيني احسان: ههه وي بصح رجولي بزاف سارة: و داك الصوت الغليظ الي يزعزع الأرض😍 صوفيا: يلاه نوضو تعومو بركة من الهدرة الخاوية احسان: اجي نتي بعدا واش باغة طيحي الدراري بهاد المايو الي كيبرز المفاتن ديالك ههه صوفيا: شغلك نوضي تكعدي مشينا كنجرو تلاحينا فالبحر و بقينا كنعومو بخير و نتراشو بالما، البنات قرروا يدخلو الداخل، انا كنخاف بقيت فبلاصتي كنعوم، شوية حسيت بشي حد من ورايا تلفت لقيتو واحد الدري: هاي الزين صوفيا: شنو بغيتي، شكنتي كدير من ورايا؟ الدري: سلام بعدا صفا عليك؟ شنو سميتك؟ صوفيا: و نتا شنو خاصك بسميتي غدير ليا الحالة المدنية ولا شنو؟ الدري: ههه مالك قبيحة انا غير سولتك، المهم نبداو من جديد، انا سميتي عمر و نتي؟ بقيت كنخزر فيه خليتو و بعدت عليه شوية تبعني: حشومة عليك بغيت غير نتعرف عليك راك حمقتيني، تبارك الله عليك الزين و لاطاي سكسي؛ بقا كيهبط فيا و ينزل بشهوة، كنكره هاد النظرة، عرفت بلي مغديش يخليني على خاطري و هي تجي فبالي فكرة شريرة 😈 بقيت كنتقرب منو و هو فرحان: شنو رأيك نلعبو لعبة عمر: اوك موافق صوفيا: انا غدي نهبط التحت و شوفني شنو غدي ندير و الي درتو ليك ديرو ليا اوك؟ عمر فرح اكثر: اه اه اوك مي خليني انا اللول صوفيا: no chère les femmes d'abord عمر: اوك هدا نظر هبطت التحت و بقيت كنتلمس رجليه بايديا و كنطلع بشوية بشوية لفخاضو و هو عاجبو الحال، شوية حيدت الشورط هو فرح يسحابليه ما عرفت شنو غدي ندير، هزيت الشورط و هربت، هو حاول يتبعني حتى وصلت للرملة؛ هو ما بقاش زاد عرف راسو غدي يتشوه و الناس كاينين، بقا كيغوت: صوفيا رجعي ليا الشورط دبا حشومة عليك شوية و يبكي هدا بحالاش عرف سميتي؟ بقيت كنقلي ليه السم و هو متحلف فيا، ولا وجهو أحمر بحال مطيشة، جاو البنات و عاودت ليهم شنو وقع و هو مزال واقف فالبحر، شوية بان ليا وقف واحد الدري آخر و قاليه شي حاجة، مشا هداك جاب ليه شورط و لبسو: البنات يلاه زيدو يلاه يلاه!!! احسان: فين غدي نمشو حنا يلاه جينا صوفيا: وا نوضي راه جاي عندنا نوضي جمعنا قشاوشنا و ضربناها بجرية خليت عمر ورايا كيغوت و يتحلف فيا ههه وصلنا للوطو التقطنا أنفاسنا و ديماريت احسان: ههه لابد شي نهار دوز فيه شي مغامرة، ما معمرنا غدي ندوزو نهار نورمال بحال كاع الناس ههه صوفيا: حنا ماشي بحالهم سارة: هضاي هضاي ماشي بحالهم ههه احسان: شعلي الكاسيط خلينا نشطو شوية صوفيا: هي اللولة، شعلت الكاسيط جينا فموسيقا ديال shakira chanje كنتشط بقينا كنغنو معاها وخا ما فاهمين الاسبانية و نشطحو سارة: البنات جعت صوفيا: حتى انا الغدا على حسابك ااحسان احسان: فين تبغو تغداو؟ سارة: اممم تشهيت كنتاكي صوفيا: يخخ خايب مكنحملوش سارة: اوك ماكدو صوفيا: ههه اه و نطلبو happy meal بحال الدراري الصغار ياك؟ سارة: ايوا شنو؟ احسان: انا عندي فكرة, ناكلو الحوت صوفيا: اوك مزيان نمشو لشي ريسطو ديال الحوت شنو قلتي سارة؟ سارة: اوك الحوت هي هديك مشينا للريسطو، دخلنا شدينا بلاصة جا السيرفور جايب الموني، طلبنا فريتور و سلاد كلينا و خلصت احسان مشينا للمول درنا فيه و شرينا الي خاصنا من بعد للسينما خرجنا مع الغروب و كان المنظر زوين جلسنا فوق اللوطو نستمتعو بيه، قاطعني التلفون كيصوني هذا بابا صوفيا: وي بابا سي يوسف: بنتي صافي براكة عليك رجعي للدار مروان عندو لينا خبر صوفيا: اوك سارة: شنو بغاك عمي يوسف؟ صوفيا: قالك سيدهم مروان عندو لينا خبر ما عرفت شنو احسان: ايوا يلاه نمشو صوفيا: يلاه، ركبنا اللوطو وصلت البنات و انا رجعت للدار، لقيتهم جالسين فالصالون كاملين و مروان فرحان: اه ها هي جات صوفيا: مساء الخير ياك لاباس؟ سعاد: غدي تولي عمة صوفيا بلا مبالاة: مزيان مبروك عليكم سعاد: إيناس اليوم مشات للطبيبة قالت بلي عندها شهر شفتك ما فرحتي صوفيا ضحكة صفرا: بالعكس هدا احسن خبر سمعتو اليوم مروان جلس حدايا: العفريتة إلا جا هاد الولد غدي ديري عقلك و غدي تولي احسن عمة انا متأكد صوفيا: اممم مالي بنت ليك بلا عقل مروان: نتي عارفة قصدي صوفيا: اوك هي من ناحية مزيانة حيت غدي يجي فاش تلها و تخليني عليك 😒 سعاد: ههه نتي هي المدللة ديالنا و غدي تبقاي هكا ديما شوفو الحمقة غارت من دبا صوفيا: شنو وا ماما مالك فاهمة كلشي مقلوب راه بغيت نقول.. قاطعتهم دادا حورية: العشا واجد تفضلو جلسنا كناكلو و مروان مسكين خايف على ست الحسن و الجمال: حبيبة جلسي بشوية تهلاي ليا فولدي صوفيا: عنيبة 😏 مروان: شنو قلتي؟ صوفيا: خاص العنب جيبوه لينا نديسرو دادا حورية: هي اللولة اضو عيني المهم كملنا داك العشا بسيف حيت قهرتني مياعة مروان تقول هو الوحيد الي متزوج و مرتو حاملة كيفقصني بعد المرات، هدرت مع البنات على الخبر الي خسر علينا أمسية كون غير كان شي حاجة مهمة بعدا؛ بقيت كنتكونيكطا حتى لقيت واحد مسيفط ليا انفيتاسيون بان ليا بعقلو قبلتو فالبلاصة سيفط ليا مساج حسن: hi cv صوفيا: cv lhamdollah et toi? C' qui حسن: m3ak Hassan de Casa et toi? صوفيا: Sofia de Casa aussi حسن: chaft photo dyalk très jolie , a qu'il âge tu es? صوفيا: 23 ans et toi حسن: 27 فين ساكنة؟ صوفيا: pourquoi? حسن: غير سولت المهم عرفيني على رأسك عرفتو على راسي و هو بقا كيعاود ليا راسو بلي خدام فشركة ديال الاتصال و ساكن بوحدو هنا، عطيتو النمرة ديالي و نعست دازت سيمانة و انا و حسن ولينا مقربين بزاف دار معايا اليوم نتعشاو فبلاصة و انا واقفت، اصلا هدشي كنديرو غير باش نعمر وقتي أما هدشي ديال العلاقات الجدية و الحب معنديش معاه و حتى الزواج ما معمراش بيه راسي، قطعت مع البنات و نضت للدوش، دوشت نشفت شعري بالسيشوار، بوكليتو و لبست كسوة بيضة مشبكة من الفوق و التحت دونتيل درت مكياج خفيف، هزيت صاكي و خرجت طبعا حتى حد ما يسولني فين غادية و لا معاش جاية حيت انا الي عندي الحق نوجه حياتي للطريق الي بغيت مي فحدود طبعا، المهم ركبت اللوطو و مشيت للريسطو الي دار معايا حسن لقيتو جالس كيتسناني، سلمت عليه و جلست: أوو زوينة بزاف، الحقيقة احسن من الصور ..يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM