الحياة الغامضة الجزء 30 ماقبل الأخير 🔥🔥🔥🔥 ( التتمة من بعد 400 لايك طاكيو صحابكم يقراو ) وبديت كنجري مافيا لي يتسنا تال غدا ليوم بليل غادي نصفيها ليهم كاملين غير وصلت لباب وأنا نتراجع في اخر لحضة قلت نسمع كلام الواليد واخا غير مرة وحدة في حياتي رجعت بحالي وأنا نتلاقا مع الواليد حدا الباب شافني الرئيس : تاكيف درتي خرجتي من هنا وفين كنتي _ خرجت مشيت لطواليط وهاني رجعت ... بغيت نشوف حسام فين كاين الرئيس : حاطينو في السبيطار العسكري _ يله نمشيو عندو بغيت نشوفو الرئيس : أنا عندي شي شغل غادي تمشي معاك ملاك وشوف متعطلش ماماك بغات تعرف عليك ... ملاك بلا مانوصيك _ صافي واخا خرجت أنا وملاك من السبيطار وقصدنا السبيطار العسكري دخلت لعندو مسكين كيبان ليا ناعس بلا حركة حسام لي كان ديما منشط الوقت وماكيسكتش دابا شبه ميت بقينا مريحين معاه شي ساعتين وخرجنا مشينا الفيلا ديال الرئيس لي هو الواليد حلو لينا السيكريتي باب الجردة دخلنا من بعد كيبان ليا الواليد واقف هو الواليدة قدام الباب غير نزلت من الطومبيل جات عندي الواليدة كتجري والدموع في عينيها عنقاتني وكتبكي الواليدة : توحشتك أولدي بزاف الحمد الله ملي رجعتي لينا _ بقينا معانقين شحال من بعد دخلنا ريحنا في الصالون هي تبان ليا رجاء جاية وهازة ولدي ريان مشيت قصدتها هزيتو بديت كنبوس فيه وسلمت على رجاء ورجعت بلاصتي الواليدة : حفيدي ريان درويش ماشي بحالك الجن فاش كنتي قدو كنتي طيارة ولكن دابا تبارك الله ولدي ولا راجل _ بدات كضحك و كتعاود ليا على الطوفولة ديالي واخا كنت كاعي ومارشقاش ليا ضحكت وحسيت براسي وسط عائلتي غير هو ماغدي نفرح حتا نتاقم ونرجع حبيبة القلب .... بقينا داويين شوية هي تجي الخدامة سولات الواليد واش تحط العشا قال ليها اه بدات تحط وحنا مشينا غسلنا أيدينا وريحنا كناكلو ساليت ماكلتي ومشيت نغسل لحق عليا الواليد ... غدا فين غادي نمشيو الرئيس : دابا سير رتاح وغدا نهدرو في هاشي .... حنان ( الخدامة )عفا بنتي وريه بيتو _ مشيت معاها شفتو ورجعت لصالون ريحت معاهم شوية وأنا نقول ليهم تصبحو على خير حيث كنت عيان ديال بصح . مشيت لبيتي تكيت حسيت بواحد الراحة مدة مابقيتش نعست بحال الناس بقيت كنفكر شوية هو يديني النعاس ماعقلت حتا كنسمع صوت الوالديدة كتعيط نضت مشيت طواليط غسلت وسلمت عليهم وريحت كنفطر غير ساليت ماكلتي هو يقول ليا الواليد هز ديك البلاستيكية فيها شي حوايج لبسهم و تبعني الطومبيل ... درت لي قال ليا وتميت خارج هي تجي عندي الواليدة عنقاتني الواليدة : سير اولدي الله ينقي طريقك من الشوك الله ينجيك من كل شر _ امين الواليدة بستها في راسها ومشيت عند الواليد ركبت الطومبيل وقصدنا المقر دخلنا البيرو وريحنا أنا وياه وملاك الرئيس : ليوم غادي يكونو عندنا 2 مهمات الاولى في اسفي والثانية في جنوب افريقيا _ تاكيفاش جنوب افريقيا شنو غادي نديرو تما الرئيس : تما فين كاين القمر لي مخبي فيه رئيس المافيا جاك وبالنسبة وهاذ المهمة غادي نتا لي غادي تكلف بيها وأنا غادي نمشي لأسفي نشد كريم _ ايه ولينا فين كاينة ماغديش تعاوني نرجعها الرئيس : متخافش لينا كاينة عندي _ كيفاش كاينة عندك الرئيس : اه كيف سمعتي كاينة عندي هي وباها حمد _ اواه من ايمتا وفين كانو حتا شديتيهم الرئيس : أنا مادرت والو حمد لي سلم راسو لبارح شوف هاذ الفيديو _ وراني فيديو كيستجوبو فيه حمد وكيقول ليه بيلا هو سلم راسو حيث باغيين يقتلوه هو وعائلتو ويلسقو فيه كلشي كيف دارو مع الواليد من قبل وفاش عاق بيهم سلم راسو وعطاهم جميع المعلومات لي بغاو في المقابل يحميو عائلتو اخيرا تحرك فيه الحس الإنساني .... قول ليا زعما هاذي متكونش شي خطة دايرينها الرئيس : لا تأكدنا من كاع داكشي لي قال وطلع داكشي صحيح _ قول ليا فين لينا دابا الرئيس : حتا تجي من المهمة وتشوفها _ الواليد بروجولة بغيت نشوف لينا قبل مانمشي المهمة عفاك الرئيس : أسي هنا أنا ماشي باك رآه دوينا الحاجة لي نقدر نواعدك بيها هي إلى نجحتي في المهمة ديالك غادي نزوجك لينا يله شنو بغيتي _ ايه حتا هاذا كلام الرئيس : غادي تمشي معاك ملاك المهمة هي ودراري ديال التدخل السريع _ وزعما دراري جداد عندهم خبرة كافية لهاذ المهمة ياك مزال في فطرة تكوين ملاك : لا هاذو ماشي دراري لي مزال كيتكونو جمعنا نخبة من رجال المخبرات وهوما لي دخلناهم لفرقة التدخل السريع _ صافي واخا ... معاش غادي نمشيو الرئيس : مع 9 غادي تمشيو من هنا وجد راسك .... الموهيم شوية غادي نمشيو ندفنو الشهداء ديالنا يمكن ليكم تمشيو _ خرجنا من البيرو ديال الواليد وقصدنا البيرو ديالي دخلت ليه أنا وملاك وبدينا مجمعين حتا جا عندنا واحد من الضباط باش نتكلم الرئيس مشيت عندو ركبت معاه طومبيل وقصدنا واحد الروضة لي كيدفنو فيها رجالنا مع وصلنا الدخلة ديال الروضة جات في واحد القنت ممعروفش نزلنا من الطومبيل كتبان ليا الروضة خاوية مافيهاش بنادم من غير رجالنا لي دايرين بيها وحارسيناها من كاع البلايص بديت كنتمشا شوية تاوصلت عند القبورة فين غادي يدفنو صحابي ريحت وبقيت كنتأمل فيهم وكنقول مع راسي شو هاذ الحياة لي كنضلو مقاتلين فيها دغيا كدوز واخرتنا قبر شو غير صحابي لي غير داك النهار كنت كنضحك معاهم ليوم غادي ندفنهم دنيا غدارة .... شوية كنسمع صوت الطومبيلات داخلين تلفت كلقاهم طومبيلات نقل الاموات ومن وراهم طومبيلات الشرطة والدرك وقفت حتا وصلو لعندنا بداو كينزلو صنادق لي فيهم جتت ولي تار الإنتباه ديالي هو العائلات ديال الشهداء ديالنا ماكين فيهم حتا واحد لي حاضر هوما رجال المخبرات والشرطة وناس كبار في الدولة سولت الرئيس فين هوما عائلتهم الرئيس : منعنا عليهم الحضور _ ولكن علاش واش ماشي من حقهم يحضرو لدفين الرئيس : ماشي وقت هاذ الهدرة دابا _ بداو كينزلو كل صندوق في القبر ديالو وكيدفنو فيهم وبلا مانشعر دموعي نزلو مرة أخرى بقيت غير كنشوف حتا سلاو الدفين وبدينا كنترحمو عليهم شوية بدينا كنسمعو صوت القرطاس وكاين فينا لي ضرب تحنيت الأرض وبديت كنزحف حتا وصلت واحد القبر تخبيت وراه وهزيت سلاحي ... يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM