ما علينا قبل ما يشد حسام الكونجي أنا شديت الطريق للناضور لقيت يونس كين عند خونا...وخونا تباركلاه مزال عايش واخا صحتو قليلة وباااقي عاقل علينا مزياان....دورنا معاه ورجعنا لطنجة...دنيا الطريق كااملة وهي كتبكي على باباها...خصوصا مشا على غفلة....وا دير راسك بلاصتها...تمشي ليك اختك اللي معرفتيها حية ولا ميتة..ويتبعها الوالد ديالك كيفاش غاتحس...هي هاذيك وصلنا لطنجة رتاحيت واحد السيمانة وبدينا كنقلبو على بسمة....تحركنا لآسفي كنقلبو عليها...اوتقووول واش بان ليها الأثر...بقينا شي سيمانة وحنا كنقلبو بيما لحق علينا حسام...حتى هو كيقلب معانا..ولكن بحال الى كتقلب على شوكة فالقش...ختنى تقول الأرض تسرطات وبلعاتها غالبا غتكون بذلات المدينة...تما فقدنا الأمل ديااال بصح...سيفطنا دنيا ويونس لطنجة وبدينا حنى رحلة البحث على الوالدة أول حاجة قالها ليا حسام هي الصندوق ديال الوالد...هاذ الصندوق محطوط فواحد الدار وليه الكود...الكود كنا عارفينو حنى حيت الوالد كان ضااارب الحساب غايجي النهار فاش غادي نعرفو كلشي...ديك الدار معروووفة كان كيتجمع فيها الوالد وصحابو وكيقصرو حيت كان مبلي بالشراب الله يرحمو...قبل ما نمشيو ليها تحركنا للمرصة حيت قال ليك حسام توحش الشواية...هي هاذيك عمرنا المعدة مزياان وحنى نشدو الطريق...وصلنا للسيكتور وجانا داكشي مبدل حيت بيني ووبين ديك الحومة بزاااف وتزادو بزااف ديال الديور وحوايج اخرين .المهم بزز باش لقينا الدار دقينا وخرج واحد صاحب الواليد كبر حتى هو مسكين شافنا فاللول ماعرفناش...قلنى ليه شكون حنى وهو يتلاح علينا كيعنق فينا...وقال لينا الله يرحم القبر وما خلى..ماعلينا ذخلنا شربنا أتاي وريحنا كنجمعو مع عشير الوالد.... صاحب الوالد: مرحبا مرحبا....نهار كبير هذا زارتنا البركة...الوالد ديالكم الله يرحمو مادوزناش معاه قليل... حسام: الله يكبر بيك أعمي...عمي بغينا نسولوك... صاحب الوالد: مرحبا الله ياودي... -واش كتعرف شي حاجة على الوالدة ديالنا...راه فخبارنا كولشي ودابا كنقلبو عليها... صاخب الوالد: اش غادي نقول ليك اولدي...الوالد ديالكم كان كيعاود ليا كلشي...مكم انا اللي عرفتو عليها قبل ما يتزوجو...زاينة كانت امراة الله يعمرها دار...كانو مفاهمين لواحد الدرجة ماتصورش...حتى ذخلات بيناتهم واحد السوسة الله ياخد فيها الحق وهاذ الخبار راه كلشي عارفها كانت دايرة بوم واحد الوقت... -زاينة..الوالدة ديلي سميتها زاينة. صاحب الوالد اييه اوليدي ...الوالدة ديالك شلحة من شي قبائل ديال إحاحان....فالنواحي ديال الصويرة....تما منين جبناها أنا والوالد ديالكم ...باينة عرفتونا فين غادي نمشيو....احاحان تناذي... ذاكشي اللي درنا فاشكنا خارجين سول حسام داك الراجل على الصندوق قال ليه الصندوق وصاني المرحوم ماتشوفوه حتى تبان الوالدة ولا خبارها...وقال لينا حضيو ريوسكم راه احاحان هاذيك 😂😂 هي هاذيك مع خرجنا شدينا الطريق لتماك شي ساعتين ونص ديال الطريق وزيدها شي ساعة وحنى كنقلبو على الدوار....منين وصلنا تلقى لينا المقدم مع الذخلة قال لينا سيرو ضبرو فين تباتو تال غدا ورجعو...حيت الناس ديال الدوار مكيبغيوش البراني...داكشي اللي درنا مشينا لواحد القنيتة تما وبتنا غير فالطموبيلات حتى للغذ ليه معرفتش علاش ذاك النهار فقت مخلوووع بزااف شي حاجة ميمكنش....واااع أول مرة نحس بحال ذاك الإحساس...تخيل الوالدة ديالك حياتك كاملة ونتا كيصحاب ليك ميتة حتى كيجي واحد النهار غاذي تشوفها بحال الى عاودات حيات ....المهم فقنا مشينا للڤيلاج فطرنا و رجعنا للدوار كنسولو على الدار ...ذغيا نعتوها لينا وبدينا كندقو وهو يخرج عندنا واحد الراجل شارف... -السلام عليكم... الشارف: وعليكم السلام...مايرى الخاطر اربي (شنو حب الخاطر) طبعا مفهمنا تا لعبة وبدا حسام كيقول ليه..زاينة... زاينة انا كنتفرشخ بالضحك...شوية وهو يبدا كيعيط...زاينا وااازاينا... فديك اللحظة بالضبط كون قلبتي قلبي غاتلقاه نشف من الدم...واش عرفتي شكون هاذي اللي خارجة...هاذي الوالدة..الإنسانة اللي ولداتني وفرضو عليها تخليني 😞😞...ماعلينا جات الوالدة وتلاحت علينا كتعنق وتبوس وكاتقول تاروانو...تاروانو (ولادي)....عرفاتنا بلى مانقولو ليها شكون حنى...الله على الحنان واحد الإحساس والله مانقدر نوصفو...مكذبوش اللي قالو الأم كتحس بولادها...ذخلاتنا وجابت لينا ناكلو بقات مريحة حدانا كتبوس وتعنق...مسكينة كبرااات ودات منها الوقت اللي دات...مسكينة باااينا مدوزا تمارة والعذاب...هذاك الشيباني راجلها هو اللي سترها من مور ما رماها الوالد...هي هاذيك قصينا وذخلنا لواحد البيت انا وحسام على أساس ننعسو...وهو يقول ليا حسام.... حسام: الساط خاصنا ندوها معانا غا نشبعو منها قبل ما.... -متافق معاك ولكن هي دابا راه مزوجا وشوووف واش غا يخليها راجلها... حسام: نديوهوم بجوج اصاحبي... -صافي تا نفيقو ونعلموهم ونشوفو اش غادي يقولو... هي هاذيك ضربناها بواحد النعسة مفقنا حتال شي الستة ديال العشية نوضاتنا الوالدة...الله على حنان كيداير...حطات لينا كسكروط وبقات كتعاود لينا على المعاناة اللي كانت كتعاني يامات الوالد...وشنو دوزات قبل ماتلاقى بهاذ السيد...صراحة ديك السيدة كان خاصني نعذبها قبل ما نقتلها...حيت ديك الموتة قلييلة فحقها...كون تشوف الوالدة ديالي شحال تعذبات بسبابها...ماعلينا دابا اللي فات مات...جرينا راجل الوالدة قلنا ليه غاتمشيو معانا...كينا واحد الپرطمة فالدار فاش ساكن خاوية غاتسكنو فيها...لقيناه حتى هو طالب عليها..حيت عيا وبقاش قاد على الخدمة وخاف شي نهار يخلي مي بوحدها...حتى هو فرح بزاااف ملي لقيناها...هي هاذيك دوزنا واحد ثلثيام بيما وجدات الوالدة وراجلها ريوسهم باش نديوهم معانا...دغيا دازو هاذ ثلثيام ديناهم ولفو شوية وحنى نديرو واحد العراضة معتبرة...مزال كنتعشاو وهي تنوض دنيا كتجري للطواليط...فالبلاصة فهمت البلان كيداير...ضرت عند يونس... -مالك اخويا على عاذ الزربة.. يونس: نتا سوقك 😂😂 -ياك واخا تا هذا نضر... يونس: وا صافي الساط راه داكشي على غفلة.. كملنا العشا وكل واخد مشا لدارو وأنا جات الوالدة باتت معايا الليل كامل وأنا كنعاود ليها وكتعاود ليا....الله على إحساس ..الدنيا وما فيها...بقينا هكاك حتى داني النعاس وناضت مسكينة مشات تنعس بلاصتها...الغد ليه مع شي الحداش كيفيقني حسام باش نديو الوالدة عند صاحب الوالد نشوفو الصندوق شنو فيه...ذاكشي اللي درنا فطرنا ومشينا لآسفي ولكن هاذ المرة مشينا فالطيارة دغيا وصلنا وقصدنا صاحب الوالد...مع شافتو الوالدة وسلمات عليه حيت كتعرفو من زمااان...المهم ذخلنا عندو وجد لينا واحد الدكة معتبرة كي العادة وبقينا مجمعين حتال اللخر وهو يجيب لينا الصندوق....ملي حليناه قال لينا متسولوش على ذاكشي اللي فيه غا شوفو وسكتو وهو يحلو...تصدمت من ذاكشي اللي شفت....شفت نفس السنسلة اللي ذخلت على قبلها للحبس وحداها ذاك الكتاب ديال شمس المعارف واخا عاارفو درت راسي قدامهم مكنعرفوش...حيت مزال باغي نقراه...ماعلينا الوالدة عارفة كااامل ذكشي منين جا ولكن مقالت لينا والو على البلان...ملي سولناهل قالت لينا حتى تجيبها الوقت...المهم خلينا الصندوق تما حيت الوالدة مبغاتش تجيبو...وحنى نرجعو فحالنا لطنجة...رجعت للانطريما ووليت مقابل غا الخدمة واحد ست شهور...ويونس مكافي غا مع مرتو كتوحم عليه...حتال واحد النهار كانت عندي شي خدمة فمراكش...كان خاصني نسين مع واحد الشركة باش يجهزو ليا واحد لوطيل....تما فين كانت الصدمة...يتبع (الخوت السموحات اليوما كين غا حزء واحد حيت عندي ما يدار والله ...المهم القصة بددات تاني كتشعل ...) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM