كيبان ليا واحد خونا بحااال يونس كيتريني معاهم...لا ميمكنش يكون هو....بديت كنقرب شوية باش يبان ليا واش هو ...ولكنولاد الحرام الڤيادرا مخلاونيش نقرب...حيت باقي مارصلتش لذاك السطاج...مشيت لبيتي وبقيت غاكنخمم نارييي ويكون هو...ولكن كيقاش جا ...ميمكنش...بزاااف ديال الأسئلة جاو فبالي...بقيت مريح حتى كتذخل عندي غزلان...مع شفتها وأنا نعنقها بلا منشعر....الله لساني توحش الدارجة....قالت ليا بلي حولوها تخدم هنا...ومدات ليا الوراق ديالي وواحد لاكارط گيشي قادهم ليا پاليرمو. باش يبقا يدوز ليا فيهم الخلاص....ماعلينا بقينا كنجمعو ..تال واحد اللحضة وهو يلعب بيا الشيطان...راكم عارفين بلا منتعمق. حيت كيقراو ناس كيار هنايا....وأنا فأوج العطاء ديالي....حتى كيحل داك اللحية الباب دعيتو لله...جرها ولاحها برى بلا حوايج...و داني أنا لواحد الساحة كبيرة ....وطلق عليا شي رجال بقاو كيعطيوني حتى مبقيتش قادر نشوف....شي سيمانا وأنا مغيب...تا كنفيق على كمارتو تاني...ناريييي قلبو مافيه ذرة ديال الرحمة...خلاني شي يومين حتى وليت شوية وهو يديني ثاني للعداب واحد شهرين...حتى جا واحد النهار فيقني...يلاه بغيت نبدا نجري وهو يوقفني...قال ليا بلي صافي وليت متريني...خاصني ندوز واحد جوج سطاجات وغادي نقدر نتريني مع الجماعة...فرحت بزاااف حيت أخييرا غانشوف واش هذاك يونس ولا لا...نسيت مقلتش ليكم وليت كنقشع شوية فالروسية وكنقدر نجاوب بشكل عادي...ماعلينا داني لواحد الساحة ...فيها ثلاثة ديال الرجال كل واحد فيهم قد الجبل وحتا أنا تباركلاه وليت قدي قداش اللي شافني مايعرفنيش....ماعلينا لاحني تما ونعت ليهم باش يقصدوني...مع جاو بداو كيعطوني حتى تلفت...قلت فراسي ميمكنش نخصر حيت باغي نشوف ذاك خونا واش هو نيت يونس...نضت من بلاصتي كيبان ليا واحد خونا قاصدني وأنا نهز واحد مولاتي الرجل...جبتها ليه فعنقو طاح فالبلاصة معرفتش واش مات ولا سخف....تا راه زيت العود داير خدمتو....ماعلينا مع حطيتو كيبان ليا لاخر قاصدني...حطاني بواحد الكروشي...شكيت واش يدو نيت هاذيك باش ضربني....نضت ودرت راشي فاشل مع قرب ليا وأنا نطيح للأرض وضربتو فرجليه وبقيت كنضرب حتى فشلتو...وبقى ليا خا الواعر فيهم...هذاك عييت منضرب فيه ووالو...واحد اللحضة طيحني وجابني للأرض وبدا كيذخل ليا....قلت صافي هاذي اللخرة ليا...وأنا طايح فالأرض كيبانو ليا غا الخصيتين ديالو 😂😂 شديتو فيهم وبقيت كنورك وكنجر...حسيت بيه صراحة ...بدا كيعوت وكيضربني باش نطلق...ولكن خوكم لصقااا بقيت غا شاد وكنبجغ عتى طاح عندي وبقا شاد فيهم....هزيت واحد الحديدة فالجنب ديال الحيط وبقيت كنذخل ليه حتى جا اللحية جرني....قال ليا صافي باراكة راك دزتي هاذ السطاج...فرحت وبديت كنضحك بالدموع والدم دايز ليا مع وجهي..قال ليا طلع دوش ونزل طريني راه غدا سطاج آخر.....واااااع خونا كيعرف غا لانطريما خليناغا نرتاحو راه كنا غنموتو حتى أنا نزق مغريييبي طلعت باش ندوش وبقيت عاااصر ليه تما شي ساعة كنطل فديك الساحة كتبان ليا حمرا بالدمايات ديالنا...تعطلت وجا كيدق علياء حتى عيا قلت واش غادي يمشي....ولكن هو ولد الحرام هرس عليا الباب وجرني بالصابون ديالي كملت التدويشة فالثلج....بغيت غا نعرف باش كنت كنفكر فاش وافقت نجي لهاد الحفرة 🤦🏻♂️...لاح ليا شي حوايج سترت بيهم...قلت فخاطري دابا بلاش حتى ضحكات علينا المافيا كاملة...كاعلينا داني قصيت وجابني نطريني ثااني مكين غا العذاب تال الليل....مشيت دوشت وتعشيت وضربتها بأحسن نعسة...وطبعا كيما ديما مفيقني داك وجه اللفت مابقيتش حاامل نشوفو....خليتو تا خرج وأنا ندير فجيبي واحد الموس ديال الخضرة لا يصدق مديني عند شي وحدين كثر من ديال البارح....وخرجت تبعتو داني لواحد الساحة أخرى ولكن هاذ المرة ماشي مع البشر..طلق عليا مصخوط شي كلاب جيعانين شي سيمانة...كيبانو ليا قاصديني باغيين يصفيوها ليا...وأنا نيت نجبد داك الموس ديال الخضرا وبديت كنشير ....حتى قتلتهم كااملين وهو يتم جاي اللحية كيصفق عليا...قلت واش غادي يقول ليا شي حاجة على الموس اللي هزيت ولكن مادواش معايا...سولتو قال ليل بلي الخداع داخل فهاذشي ديال المافيا...يعني كلشي مسموح به....وسلم عليا بالوجة أول مرة يسلم عليا بحال هكاك...توادعنا ومشيت مع شي رجال اخرين داوني لواحد البيت جديد...كبير شوية وفيه الدوش...وكنطرينيو غا فالليل...أما فالنهار كيدونا لواحد الغابة كيعلمونا السلاح...اه نسيت بلان يونس....واحد النهار كنا فالتدريب ومشي عندو قلت ليه يونس....ومجاوبتيش ...بقيت عليه واااايونس...ولكن متصوقش ليا ...وأنا ندوي معاه بالروسية..قلت ليه واش سميتك يونس...قال ليا لا ...غريب...والله تا الشبه بزاااف...شافنا واحد boss كندويو وهو يجي جرني بدل ليا البلاصة...دازت شي سيمانة ...واحد النهار كنت مريح فالغرفة ديالي مع ديك العشية...كنا يلاه جينا من الغابة وبغيت ننعس تال الليل فاش تبدا لانطريما...حاى كنسمع التخرشيش على برى خرجت راسي باش نشوف شكاين....وهو يبان ليا داك خونا اللي كيشبه ليونس...شدني وسد ليا فمي باش نسكت
يونس: راه أنا يونس الزمر ...سكت لا يشوفنا شي واحد
عنقتو بالجهد وأنا نقول ليه
-وعلاش ضربتيها ليا بنكرة داك النهار
يونس: راه الى عرفونا عشران غادي يفارقونا..مالك باقي مكلخ اصاحبي
-قول ليا كفاش سبقتيني لهنا
يونس:من بعد ونعاود ليك خاصني نمشي دابا لايصدق شايفني شي واحد...كنت غادي نطير بالفرحة الله شحال كنت مخلوع على هاذ الزمر...قلت ياكما وقعات ليه شي حاجة....ماعلينا مشيت نعست حيت الغد ليه كاينا عندنا لانطريما ديال العومان...وخوكم ماعندوش مع العومان...ماعلينا الغد ليه فيقونا مع الصباح ركبنا فشي طموبيلات كحلين وشذينا الطريق...شي ساعتسن وحنا كاتمشاو حتى وصلنا لواحد البحر تما ...عطاونا جيتسكي ل كل جوج دالناس....ودخلنا لوسط البحر...واحد اللحضة وهو يغفلنا البوص قال لينا كل جوج يدابزو والي لاح لاخر يهرب بالجيتسكي....وهذاك اللي كان معايا دغيا ضربني وجابني فوسط الما...وهو يعيط...بقيت كنترخا حتى هزني الما..وأنا نبدا كندرع..ولكن شحال قدني راه الأرض بعيييدة كايكاليو علينا غا دوك الجيليات اللي عطاونا....شي وحدين مقدروش يكملو بقاو معولين غا على الجيلي ...وشي وحدين عااامو تال القدّام وهوما يفشلو....بقينا فالما شي نص ساعة وهوما يتمو لخرين جايين....خرجونا ستارحنا شوية وهوما يدونا لواحد لاپيسين باش يعلمونا الطرق اللي ناااضيين فالسباحة...واحد الكوتش تباركلاه مطراااسي وناااضي....بقا كيعلمنا شي شهر...وبداو الدراري كينقصو حيت صافي كيكونو كملو التدريب..وكيفرقوهم على الدول فين كاينةالمافية...واحد النهار بان ليا يونس غادي مع هاذوك اللي كملو التدريب...بغيت غير نعرف فينغادي ولكن ماقدرتش نسولو...ههه مصخوط حتى هو لاح واحد الورقة فالأرض وغمزني بلا مايشوفو شي حد....خليتهم حتى مشاو ولقيتو كاتب فديك الورقة ....ألمانيا...عرفتو واش غادي للفرع ديال المافيا اللي فلالمان....يعني دابا خصاتني شي طريقة باش نتبعو....
ماعلينا بقيت صابر تاني واحد الشهر للانطريما وبدات القضية كترخف...بعد الخطرات گاع مكنحضر للانطريما و مكين اللي كيدوي معايا....وأخييرا وصل النهار فاش غادي يفرقونا على المافيا جمعونا فواحد الغرفة وفرقو علينا شي كومپليات و صبابط كحليين وكل واحد عطاوه سلاح..وواحد الرقة فيها الدولة لاش غادي يمشي والماتريكول ديالو ....تفووو بغاو يسيفطوني للبرازيل...ولكن معامن نتوما حتى أنا ممفاكش بقيت كنقلب على شي واحد عندو لالمان...تا بان ليا واحد خونا طلبتو باش نتبادلو و لقيتو هو نيت برازيلي سهل عليا القضية فالبلاصة تبادلنا وتفرقنا على الطموبيلات....داونا للمطار وشدينا الطريق للالمان 🇩🇪 وصلنا لواحد المدينة سميتها hamburg تلاقينا الرجال ديال المافيا كايتسناونا ركبنا وداونا لواحد الغابة خضرااا والطبيعة منعاودش ليك....ماعلينا وصلنا رتاحينا شوية و جمعونا بداو كيعاودو لينا على الخطة ديال شي عملية غادي ينفذوها غدا ....وأنا ممشاركش فيها حيت يالاه وصلت...هي هاذيك سالينا الإجتماع يالاه غادي لبلاصتي كنحس بشي يد قاست ليا كتفي.....كندور كنلقاه يونس...الله عنقتو وبدا كيعاود ليا كيفاش سبقني....قال ليا بلي صدقات ليه وجا مع شي باطو من طنجة...مورا ما برا...ومشا عند پاليرمو وقال بيه نفس الهضرة...اللي مبغاش يتفهم ايا هي انه يونس مكانت عندو لا ورقة لا وااالو...قلتها ليونس ...ناريي خونا غا كايكذب علينا باش نخدمو معاه فالمافية...دابا المشكلة هي اللي عطا الله عطاه صافي منقدروش نخرجو من المافيا دابا....ناااري شهاذ المشكل تحطينا فيه...تفارقنا وقال ليا يونس بلي هو مشارك فالعملية ديال غذا....مشيت لبلاصتي كنتفكر شي حاجك قالها ليا مجيد....اااه تفكرت...قال ليا بلي الشيباني اللي مشارك معاه سميتو رافا ماشي پاليرمو....تما زدت تأكذت أنه كان غا مطلعها عليا...ولكن والله ماتبقا فيه واخا رئيس مافيا....انوريه المغاربة علاش قادين....ماعلينا بقيت صابر حتى تحيني الفرصة...واحد النهار جاتنا واحد العملية وكانت أول عملية نشاركو فيها أنا ويونس ...سيفطونا مع شي رجال نشفرو شي دار....لا لا ماشي دار هاذي راه ڤيلا ديال شي واحد واااصل فالدولة....باغين شي ضواسا فداكشي....ماعلينا وصلنا وهوما يبانو لينا الڤيادرا حدا الباب...مشاو قصدوهم الرجال ديال پاليرمو صفاوها ليهم قبل ما يحسو....عطاوننا أنا ويونس واحد USB وقالو لينا ذخلو..ذخلنا وهو يبان لينا الپيسي فالبيرو ديال خونا وهو مكينش فالدار مشينا ديريكت كوپينا الضوسي اللي بغاو وخرجنا......مشينا بحال الى ماطرا والو...فالطريق نزلت طليت على الكونط ديالي فالبنك لقيتو عااامر رزق...پاليرمو ڤيرسا ليا عرااام د الفلوس...ماعلينا مشيت و داني واحد النعاس حلو نعست شي 10 د السوايع وحتى واحد ما فيقني....ولكن داكشي اللي كان موجد لينا پاليرمو أنا ويونس تا واحد ماضرب ليه الحساب....الغد ليه مع فقنا كنلقاو الدنيا ضايرا مقلوبة علينا گاع الجرائد كيهضرر غا بينا ....حيت شداتنا الكاميرا ديال الدار اللي ساكن فيها خونا....ولد الحرام ديال پاليرمو عرفنا واش عقنا بيه ودار لينا هاذ الگنار....حنى مع شفنا كولشي كيقلب علينا...هزينا حوايجنا وخدينا واحد الطموبيل وديمارينا....معرفناش تا فين غادي نقصدو...بقينا غا غاديين ودايرين الكاگول باش مانتورقوش ولكن شحال قدك ماتهرب ونتا لالمان كاملة كتقلب عليك....وقفنا نرتاحو حدا واحد الغابة فقنا لقينا المينوط فيدينا والبوليس ديالهم ممعاهمش اللعب دورونا وركبونا فالسطافيط وتحركو بينا للكوميسارية ديالهم...تا حنا مانكرنا والو دغيا گرينا حيت شداتنا الكاميرا معندنا ما نخبيو....بغينا نفرشو فپاليرمو ولكن خونا شاري كولشي غا كندكروه كايقلبو لينا الهضرة ولا كيقولو لينا سكتو....ماعلينا داونا لواحد الحبس نقيقي حسن من الخيرية فاش كنت ....على ما تجي المحاكمة...دودنا فيه واحد السيمانة حتى حا النهار ديال المحاكمة....ا نختاصر ليكم ...كانت محاكمة سرية وحكمو علينا بعشرين عام...اييه اسيدي عشرين عام ....أنا تلفت أواااه عشرين عام بزاااف عليا ....الحمد لله ما تسطيتش فديك اللحضة ولا وقعات ليا شي حاجة.....يتبع
تابعوا باقي القصة واكتشفوا قصصًا أخرى عبر :
الفايسبوك : www.facebook.com/9isasRM
الواتساب : whatsapp.com/channel/0029VaicQtDKLaHqQiLXua02
مسنجر :
www.facebook.com/messages/t/25863888246590490
تلغرام : t.me/kisasRM
ليست هناك تعليقات:
إرسال تعليق