13 ذكاء مافيوزي الجزء 

تخيل معايا ربي يكتب ليك تعيش 3 د المرات...ذاكشي اللي وقع ليا أنا بحال الى مت جوج مرات.. دابا أنا عايش غا حيت ربي عاوني وسيفط ليا واحد خونا...نجيكم للقصة..المهم كانفيق على الصوت ديال واحد خونا صحيييح بحال الڤايكينگ ...ناااري كان كيصحاب ليا راسي كنتريني وأنا مقارنة بيه تا لعبة...لاا علاقة عرفتي خونا شحال وااازن تباركلاه...المهم مع فقت وهي تبدا مرتو كتعيط ليه ...حيت هي اللي كانت مقابلاني...نااااري كيدايرا. لا ماكياج لا تالعبة وتشوفها تلف...دوزت عندهم شي خمسطاش ليوم..مكين غا الأرنب و الغزال...حيت هوما عايشين فالغابة اللي صيدوها كيقصيوها....الناس اللي فاهمين الدنيا كيفاش كتعاش...دايرين واحد الكوخ بالخشب ومهلييبن فيه كيشعل بالنقا وعايشيين بغييد على صداع البشري...ومن زهري تلاقيت المرا كتعرف تهضر بلونغلي..قالت ليا بلي هربو للغابة حيت شي واحد باغي يقتلهم بجوج.. باغي ينتاقم على شي بلان مبغاتش تقولو ليا...ماعلينا دازت ديك خمسطاش ليوم وبديت كنصح وكنخرج مع داك الراجل كنشوف فيه كيصيد ومرة مرة كنعاونو..بقينا هكاك شي خمسطاش ليوم أخرى...وبديت كنمشي نتريني معاه كان كيهلكني ولد العبد كايتريني غا بالخشب والحديد ومطلع فورمة فين يبااانو صحاب الدوپاج....ماعلينا أخيييرا جا الوقت فاش غادي نتوادع معاه.....عطاني واحد الورقة فيها نمرتو الى حتاجيتو ولا شي حاجة وداني حتال واحد الباصة سولني فين غادي نمشي وقطع ليا التيكي ديال التران ديريكت لماربيا...اخييرا اسپانيا...وصلت تما لا حنين لا رحيم معايا الله بوحدو حتى من الناس اللي عزاز عليا تقطعات بيهم العلاقة بسباب داك غيث دعيتو لله...ما علينا مشيت كنضبر على راسي فاللول كنت كانبات غي فالزنقة وكنطلب الى لقيت اللي يعطيني و طبعا ديما مخبي حيت معندي لا ورقة لا جوج...بقيت غلى ديك الحال شي 3ديال السيمانات..دوزتها كامل كنقلب غي على العنوان اللي عطاني مجيد....ماعلينا جمعت شي فليسات وخديت واحد الطاكسي باش يديني لتما...مع شاف العنوان وبقا كيدير فيا شي شوفات بحال الى الحالة ديالي ماشي ديال تما المهم بدا غادي بيا فاللول كان كيبان ليا غا العمارات والدنيا فشكل ولكن باشما كنزيدو وحنا كنذخلو غا مع الغابة....تلفت و داكشي خضر وناااضي حتى وصلنا حدا واحد القصر ...نقدر نقوليك مدينة...عرفتي قداش بقيت غا حال فمي...تال واحد شوية وانا نخلص مول الطاكسي مشا فحالو و مشيت أنا داخل بحال الى غادي ل شي زريبة...ماحسيت براسي حتى رفعني واحد الگاردكور...وأنا نقول ليه بغيت پاليرمو (سميت صاحب مجيد)...قلت ليه يقول ليه بلي أنا من طرف مجيد...صونا على شي واحد عاد صوناو على پاليرمو...تسنيت تقريبا شي عشرة ديال الدقايق وهي تم جايا واحد jeep كحلة وفيها شي ڤيادرا قداااش ركبوني معاهم ودخلوني للقصر....انا كون عطاوني غا ديك الجردة مناش دزنا غادي نعيش مخير....ماعلينا وصلت عند پاليرمو...مع وصلت سلمت عليه راجل قصير وشارف ولكن صحيح ومربي الشعر ....جبدت ديك الورقة قريتها عليه...قال ليا بلي الكنز ديالنا كين....ولكن من الشروط باش ناخدو هو نخدم مع المافيا ديالو خمس سنين....وبدا كيقرى عليا واحد الوثيقة بالإسپانية باش نتيقو ....مع سمعتها وهوما يتحشو ليا الركابي...مبقيت عارف ما ندير...ولكن فكرت مابقا عندي مانخسر و أنا نوافق...قال ليا أول حاجة غادي نقادو ليك الوراق...عطيتو لاكارط ناسيونال ديالي وسيفطني لواحد البيت دوشت ولبست وقصيت مزياان شي قص ناااضي....غي النموسية فاش نعست خلاتني نحس براسي طارق علي😂😂 الرفاية ابن عمي...ماعلينا دوزت فديك البيت واحد النهار رااهي وعطاوني پيسي أول حاجة درت ذخلت لفيس بوك...كنلقى بسمة مسيفطا شي 40 ولا 4000 ميساج مقريتهمش حيت مباغيش نبدا نبكي تاني...ضربت غا على الميساج اللخر...فيه "يونس فاق" الله على راحة نعست ديك الليلة مرتاااح الغد ليه كتفيقني واحد ختنا بالداريجة....ناريي شميت فيها ريحت البلاد...سيفطها ليا پاليرمو تجيب ليا الفطور حيت عاااارفني مغريبي...ماعلينا بقات كتجمع معايا وقالت جمع راسك وزير السمطة راه المافيا ممعاهاش الضحك..شوف غاأنا شحال وأنا واحلا معاهم...قالو ليا عامين..أنا دابا ذاخلة فعشر سنين....ناريي أنا أصلا مكمل وزادت ختنا سالاتهم معايا....عشر سنين غادي نلقا المغرب تزدا مع إسپانيا😂😂...واااع اش جابني لهاذ الصداعكون غا مشيت ل روما ديريكت...ولكنقلت مع راسي غا حيت ختنا حسداتني واقيلة ذاكشي علاش قالت ليا هكاك....ماعلينا كانت غادا خارجة وأنا نسولها شنو سميتك قالت ليا غزلان...قلت ليها مشرفين ومشات...مكاملاش نص ساعة باش مشاتوهو يجي عندي پاليرمو ومعاه شي رجال...قال ليا اليوما غادي تبدا معانا وخاصنا نسيفطوك لروسيا باش تتدرب ...خيت تما فاش كندربو الرجال ديالنا...وهو يخرج...جاو الرجال ديالو هزوني وداروني فواحد الالكوپتر..وغطاو ليا عيني باش منعرفش فين جات ديك البلاصة...وداني النعاس فالطريق...حتا فيقني البرد ديال روسيا...نااااري شحال ديال البرد تما والثلج واصل شي2 مترو...ولاد الحرام مع وصلنا وهوما يلوحوني من شي عشرة مترو ديال العلو فواحد القصر..جيت فالثلج ديريكت وكان الحال مضلم.....مزال تا ماسخنت بلاصتي جا عندي واحد خونا لحية كيدوي بالروسية...يلاع بغيت ندوي معاه وهو يبربقني بواحد الشمال ما فهمت والو....نضت بغيت نرجعها ليه ولكن لا حيلة...خونا قدااااشناهوا..انا غي فخض ديالو...بدا كينعت ليا باش نجري معاه تا نوصلو...وأنا نبدا كنجري لايصدق قاتلني هاذ الزمر...ناااري هو كيدوي وأنا مفاهم تا لعبة...كنفهمو غا بالإشارات...ماعلينا بقيت تابعو تقريبا شي 3 كيلومتر حتى وصلنا لشي بيوتا جبد ليا واحد الساروت عطاه ليا ونعت ليا واحد البيت...مشيت ليه ديريكت كانت معلقة فيه واحذ اللبسة ديال الكونغ فو وفوطة...ذخلت دوشت غي بالما بارد قدامو بزز مني ...ومشا وخلاني ننعس ولد الحرام ماعطاني حتى باش نحيد الجوع...وأنا أكثر حاجة مكنقدرش نصبر ليها هي الجوع...نعطيك كلوة ومنصبرش للجوع...ماعلينا يالاه نعست شي ساعة وهو يتم ذاخل تاني و جرني وأنا ناعس لاحني فالثلج ديريكت...فالبلاصة جمعت النوضة نعت ليا فاللبسة ديال الكونغ فو ...وبدا كينعت ليا على ما فهمت الى باغي نفطر خاصني نجيب عشرة ديال الدورات على القصر عاد نقدر نفطر....نارييي عرفتي القصر قداش...يالاه ضربت شي جوج ضورات وأنا نمشي عندو قلت ليه راه كملتهم...زعما عند بالي أنا قاااري القوالب...نسيت واش كينين الكاميرات فالسور ديال القصر...والله تا خلاني بلا فطور داك النهار...مشيت باش نستارح واحد الدقيقة...وهو يجي عندي تاني...وااع خونا معندوش شي خدمة من غيري...حتى من النعاس مكينعسش بحال شي روبو....جاب واحد الكروة غليييضة..ونعت ليا باش نبدا نضرب فالطراكسيون...وقتما فشلت كيعطيني بديك الكروة حتى ولا ضهري زرق....وأنا نوض بديت كنسب ليه وبدا كيعاير فيا بالروسية وكيضرب حتى سخفت...ولكن هو محايرش فيا خلاني رتاحيت غا شي نص نهار وجاب ليا شي حاجة باش عتقت وبدينا لانطريما ثاني...كنتريني النهار كااملو وكنعس ربعة ديال السوايع....بقيت هكاك شي ست شهور حتى وليت مولف وكنضرب الدواري على السور عااادي...انا الطراكسيون كانبقا نضرب حتى كيقرل ليا باراكة....ديك الساعة ولاو كيتهلاو فيا بالماكلة وجابو ليا واحد ختنا تعلمني الروسية... وبقيت هكاك شي ست شهور اخرى....دغيا داز العام....نارييي...ماعلينا ختنى اللي كاتعلمني الروسية كانت بنت اللحية وأنا مكنتش عارف...واحد النهار زغبني الشيطان و بديت كنتبسل عليها...معطلاتنيش بنت الكلاب فالبلاصة مشات قالتها للوالد ديالها....جا عندي ووجهو حمر....أول مرةنشوفو فديك الحالة...عطاني ديريكت بشمال ومشا حاب البالة...وقال ليا نحفر واحد الحفرة فالثلج....مع حفرتها وهو يدفعني لاحني فيها وبدا كيدفن فيا....تا بقا غي راسي اللي كيبان وهو يحط فالجناب شي برامل ثقااال باش منقدش نتحرك...وهو يمشي ...بقيت تما شي نهار كااامل....مبقيتش كنحس براسي اعباد الله بديت غا كنغوت باش يسمعني شي واحد يعاوني....ولكن غا الخلا والقيفار....وأخيييرا كيبان ليا خونا جاي جبدني من الحفرة وبدا كيعطني حتى بدا الدم كيخرج وولا الثلج كاملو حمر...ومن ديك النهار ولا معدي عليا فلانطريما وبدلو ليا البنت اللي كتعلمني جابو ليا واحد خونا كنيمة...محملتش دين مو...ولكن معندي مندير بقيت صابر شي شهرين ...واحد النهار جا عندي قال ليا غدا عندك روپو...حيت هو كان غادي يدير شي عملية مع المافيا...نارييي شحال فرحت...الغد ليه فقت مع الصباح دوشت ونضت كنسركل فالقصر...غادي حتا وصلت حدى شي بيوتا وكنسمع شي واحد كيغني بالدارجة...اواااه شي مغربي هاذا دخلت عندو وسلمت عليه غا شافني وهو يبدا كيسب ليا قال ليا عطيني التيساع دابا يجي الكوتش ديالي ويلقاك هنا يصدق معذبتا بجوج....ذاكشي اللي درت خرجت من عندو...غادي حتى وصلت لواحد البلاصة مجموعين فيها بزااااف ديال الرجال كيترينيو....بقيت سااارح معاهم حتى كتبان ليا الصدمة...يتبع (الإخوان هاذ اليامات كثر عليا الضغط مع شي بلانات واقعين ...المهم ماعلينا سمحو ليا الى كنت كنتعطل شوية...400 لايك ناوح التتمة) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM