اه صافي صافي خليناها فاش مشينا لآسفي..وصلنا مع شي العشرة ديال الليل خدينا اوطيل وفلوس ماريو بداو كيمشيو بقات لينا غا شي 4000dh للواحد..خسارة كون غير كنت عااوف الكرد ديال لاكارط د مجيد ...غا مثقل بيها وصافي...هزيتها لحتها حدى الجردة ديال داك لوطيل وإنا ننعس...فقنا مع الصباح مشينا كاشينا الپاسبورات وقطعنا الطيارة مور 5 أيام ...ولاد العبد فرضو علينا نقطعر آلي وروتور ب ستين الف ريال🤦🏻‍♂️🤦🏻‍♂️ بقات عندنا غا 1000 درهم للواحد...غانوصلو تركيا مكينش الرجوع....غا ربحة ولا ذبحة...المهم قطعنا فواحد الطيارة مور عشر أيام صونيت على الدري اللي قال ليا غادي يمشي هو وصحابو...قلت ليه بلي قطعنا الطيارات قال ليا الى تسنيناكم هو هذاك....متسنيناكمش تبعونا...ماعلينا ذوزنا ديك واحد جوج أيام كنباتو غا حدى البحر و ماكاناكلوش مزيان...بدينا كنفكرو بقات لينا غا ثلاثة أيام فالمغرب علاش منقلبوهاش سرقة منها نضبرو على فلوس نتنفّعو بيهم فتركيا....نسيت مقلتش ليكم خوكم طيارة فالپاركور...ااااش كاندير للتحنقيز...كان يونس كيذخل للعمارات وكيجلس واحد نص ساعة مع السانديك حتى كيعرف الديور اللي خاويين راللي ماليهم خدامين ولا مسافرين معرفتش كيفاش كيجر ليه لسانو مصخووط هاذ يونس....موراها مباشرة كنمشي أنا نحل البيبان بواحد الطريقة ديال الشفارة تعلمت ليها فالخيرية...وكنهز غاع داكشي اللي غالي وكنقز عند السطوحا تا كنخرج...فاش تسالات ثلثيام ..جمعنا شي 4000 dh للواحد ....وحنا نجمعو وراقنا فالمحافظ و طرگنا ENSA خدينا الباك تا هو درناه معاهم...بسمة كنت باغي نزورها ولكن خفت نشري ليها الصداع...دينا معانا شي حوايج على قبل البرد....وتوكلنا على الله ومشينا مع الذخلة ديال المطار وحلنا غا مع السيكيريتي. مخلانا نذخلو حتى مرّضنا .قالك حگا ما حگا بغيت نشوف الپاصپورات ديالكم 🤦🏻‍♂️🤦🏻‍♂️ وحنا كبغيناش نتحاكو معاه وريناهم ليه حيت كان الغرض ديالنا هو نوصلو...اما راه ساهلة نخرج فيه عيني ونقول ليه باشمن صفة كتسولني على الپاصپور....ماعلينا ذخلنا للمطار..كان باقي للطيارة شي ساعة..نضت مشيت للطواليط شي نص ساعة وأنا فيه حطيت شي نص كيلو تما (😂😂)...فاش جيت نورك على لا شاس مبغاش يهبط داكشي...نارييي على شوها فينما مشينا مشوهين...مكيبان ليا غا واحد السطل بقيت كنعمر فيه الما ونخويه حتى بدا داكشي كيغبر...والناس كيتسناو على برى...ناريييي على حالة ديال الكلاب...عدوك وماتبغيهاش ليه...المهم هاذي تفكيت منها..ولكن اللي تابعاها مشكيييلة...تخيل غادي عند يونس و كنلقاه شانق على واحد الگاوري وباغي يضربو ...حيت الگاوري gay ولمح ليونس بشي تصرف ...يونس معجبوش الحال وناض بغا يسلخو..لفيت بناذم كيفارق فيهم تما...أنا منكذبش عليكم رجعت اللور وكنتفرشخ بالضحك..😂😂 حتى من يونس نكرتو...بحال الى عمرني ما عرفتو ...جاو السيكيريتي ديال المطار ذخلوهم لواحد البيرو وبقاو كيدويو معاهم شوية وهو يبان ليا يونس خارج...فرحت قلت الله فك المشكل...وهو يقول ليا الساط غادي نقول ليك شي هضرة... يونس: علاء سير سبقني لتركيا...جاتك الفرصة حرگ...مجاتكش تسناني حتى نجي...أنا راه هاذ الكلب ضيع ليا البلان...بيناتنا التلفون -كانت هاذي آخر مرة نشوف فيها يونس فالمغرب.وقلت مع راسي هاذي هي الفرصة نيت فاش غانعتامذ شوية على راسي..المهم وصلات الطيارة وركبت..واخا خاطري ممرتاحاش..حيت هاذي أول مرة نعول على راسي بوحدي....ديما يونس معايا فكولشي...ماعلينا دزت فداك الباب اللي كيصوني وخداو عندي الپاصپور كاشاو فيه وطلعت للطيار...نااااري آسفي شحال زوينة من الفوق..الدنيا من السا كتبان حلووة بزااف..أنا كنت داير فبالي نتسنا يونس حتى يجي عاد نحرگو..الطريق كاملة وأنا غير كنخمم كيفاش غنتصرف حتى تسدو عينيا ونعست نعسة وحدة تال إسطنبول...وصلت مع الصباح بكري...خرجت من المطار...واااااو شحال زوينة هاذ المدينة...كلشي فيها ناضي..اما القوق بلا متسول ...لا لا غي شاحك بسمة اللي كاينة ومكاين ما حسن..😂😂..ماعلينا مشيت لواحد المطعم تغديت بشي لعيبات لدابا معرفتش شنو هوما غا حيت شفت تصويرة ديالهم فالmenu قلت راه غاديين يكونو رخاص...ولكن مع جيت نخلص ضربوني حتال الجذر...شي 600ليرة اللي هي تقريبا 625درهم مغربية...المشكلة كون غي شبعت...سير أ اردوغان الله ياخد فيك الحق 😂😂 المهم خرجت ومشيت لواحد السوق تقديت واحد صاك ديال التريپ وشي معلبات ديال القص.درتهم فيه وتحركت لحدا الكورنيش...واحد الكورنيش نااااضي بزاااف بقيت غا كنتمنضر مع راسي...وذن المغرب ومشيت لواحد الشارع سميتو استقلال..جا فواحد البلاصة سميتها تقسيم....فيه غاع الأجناسديال العالم ..وا كاطالوگ ديال بناذم..وداكشي كثيير بزاف....المهم بقيت كنضور حتى عييت..هزيت التلفون صونيت لداك الساط اللي قلت ليكم عرفتو فواتساب سميتو غيث قلت ليه بلي وصلت لتركيا ...قال ليا شمن مذينة كين فيها -انا ذابا فإسطنبول نتا فينك غيث:تسنى بلاتي راه أنا تما نيت شادين واحد الوطيل رخيص أنا والدراري... ماعلينا بقيت كانتسنى شي نص ساعة وأنا نسمع شي واحد كيعيط ليا مع كنضور كيبان ليا واحد خونا طويل ورقييق بحال الى كابر فالصومال و سنانو صفرين بحال الى كيشلل بالخرقوم...قلت ليه واش نتا غيث قال ليا آه هو أنا يلاه تمشي معانا..حنى كاريين واحد ربعيام مع الدراري على منحركو قلت مزيانة نيت على ميجي يونس...قال ليا بلي شادين واحد البيت رخيص فواحد لوطيل...مشيت معاه ذخلت كنلقى واحد ربعة ديال الدراري عشرانو...كلهم من مراكش..بقينا كندويو...هزيت التلفون كانت عندي شوية ديال المعلومات عرفتها من اللايڤات ديال الناس اللي فايت حارگين من هنا...بقيت كنشرح ليهم الدعوة كيفاش دايرة...بلاتي بلاتي حتى نتوما معارفينش البلان ديال تركيا....دابا خاصنا ندوزو فاللول من تركيا لليونان...عاد ندوزو لدول البلقان ومن تما لأروپا...والحدود مابين تركيا واليونان..مقسمين على جوج..التص فيه الواد يعني الواد هو نيت الحدودوالنص لاخر جاو فيه الحدود من مور الواد ...يعني واخاتقطع الواد راك مزال فتركيا...قلنا مع راسنا ندوزو من جهة الواد حيت كنقولو ساهلة مافيها لا سلوكا لا تمارة لا والو..المهم وصلات شي الوحدة ونعسنا الغد ليه ماخرجناش من لوطيل ...مع الصباح صونيت على يونس قلت ليه امتى غاتجي قال ليا بلي حل المشكل وقطع ف شي طيارة مور شهر...تما فين قلبت البلان ..قلت الى جا ولقاني مزال هنا مزيانة..وإلى صدقات ليا مع هاذ الدراري فيها خير...ماعلينا جلسنا كنجمعو كل واحد كيعاود القصة ديالو صراحة گاع اللي بان ليك ريسكا بحياتو باش يخرج من المغرب...عرف بيلا فعلا معطاه وااالو..خاصك تحيد القبعة اختراما لكل واحد حرگ ونجى...وخصوصا من تركيا حيت تما فين كتقرى حروب الرجال...ماعلينا حط لينا واحد الدري الشعرية للغذا ..مصاخط عاذو جايبين معاهم الشعرية لتركيا...المهم تغدينا ومشينا كل واحد فين نعس..بقيت أنا مبغاش يديني النعاس ...هزيت التيلي كنلا بسمة صونات عليا فواتساب نقول ليكم شي 10 ولا 1000 مكالمة...اواااه شنو غاتمون باغا هاذي...ذخلت للميساجات...لقيتها كاتبة ليا ضروووري تصوني عليا....فالبلاصة صونيت عليها...جاوباتني...وتما كانت الصدمة....يتبع (الإخواان مكين غا الپارطاج راه ماشي عيب الى كتعجبك شي حاجة تپارطاجيها ...راه العيب هو تقرى وماتسيپورتي ما والو...ونتا تعرف..المهم 400 لايك انلوح التتمة) تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM