إنتقام عشاق الجزء 50 🔥🔥🔥🔥 ( التتمة من بعد 400 لايك طاكيو صحابكم يعاونوكم عليها بغينا نرجعو ليامات العز ) يله بغيت نطلع مع دروج حتا بدا كيتيري عليا أمين من لفوق ديال الدروج كانت غادي تجي فيا واحد القرطاسة جاب الله بعدت عليها وبديت كنتيري عليه تا أنا بقا مني منك حتا ضربت ليه سلاح طاح ليه من بين وهو يهز ايدو وتميت طالع ليه حطيت ليه السلاح في راسو وبقا غير ساكت وخايف حتا قلت ليه حصلتي الغدار وحيدت القناع حتا شافني ورجعتو بقا غير مصدوم أمين : هاذا نتا ولكن كيفاش حتا خرجتي عايش من الحريق مستحيل هاذشي لي كنشوف _ تميت منزلو مع الدروج . عندنا وقت كافي باش تسمع لقصتي أسي أمين من بعد ماهبطتو شدوه دراري وداوه الطومبيل وكتبان ليا مونا شادة في سيف وهو مسند عليها مسكين هلكوه عصا كولو دميات كيمشي غير بزز . على سلامتك أخويا سمح لينا حيث تعطلنا عليك سيف : الله يسلمك أخويا ماعليش _ مشينا لطومبيلات وقصدنا المقر ديالنا فاش وصلنا الواليد فرح فاش شاف سيف مشا عنقو الواليد : كرفسوك بزاف أولدي ولكن والله ماتبقا فيهم . مونا ديه لمستوصف يشوفو الطبيب . الجوكير دي هاذ خونا لغرفة التحقيق _ غير داه هو يعنقني الواليد حتا أنا وبقا حاط ايدو على كتفي الواليد : مبروك عليك أولدي أول مهمة برهنتي ليا بيلا راك أهل لتقة وبيلا راه وليتي جاهز لباقي لمهمات _ شكرا الواليد دابا خلينا أول موشكيل وهو لقاو خويا ودابا خاص لقاو باقي العائلة ديالنا الواليد : كنواعدك غادي لقاوهم دابا يله نحضرو لتحقيق ديال أمين أكيد غادي يكون عارف فين كاينين وحتا أدلة البراءة ديالك _ مشينا لغرفة التحقق بدا الجوكير كيحقق معاه وحنا بقينا برا الجاج كنتصنطو الجوكير : فين مخبين مرات يوسف وخوه أمين : في جيبي قلب تقدر تلقاه هههه _ بدا كيدخل ليه في وجهو وكيعاود يسول فيه الجوكير : فين مخبية أسيل أمين : جيب لاخر غير قلب مزيان غادي تلقا الجوكير : وراسك قاصح ولكن غادي دوي بلهلا يطريه ليك سمعتيني أمين : إلى كان كيسحاب ليك غادي نهدر بمجرد الضرب ديالك ليا فراك غالط _ بقا كيحاول معاه باش يهدر ولكن أمين صابر لعصا مبغاش يدوي ملي مبغاش يدوي داوه لواحد الغرفة بحال ديال الحبس الانفرادي وسدو عليه فاش وصل وقت العشا مشيت لمطعم تعشيت وتميت خارج وكيبان ليا واحد من الحراس غادي يعطيه الماكلة وأنا نمشي عندو شديت عندو داك البلاطو ديال الماكلة وتميت مدخلو ليه أنا . إيه أمين فين كنا وفين ولينا شنو ستافدتي دابا أمين : هههههه ستافدت المتعة ديالي وأنا كنشوفك كتعدب _ واش لهاذ الدرجة كتكرهني كيفاش حتا وليتي مرض هكذا أنت لي قتلتي الأم ديالي وماخليتي مادرتي ليا وماقدرتش نكرهك لهاذ لي كتكرهني بيها نتا لدرجة أني فاش شفتك كتعدب قدامي تمنيت لو أن هاذشي كامل كان غير حلم أمين : أنا وصلت لداكشي لي بغيت وهو تعيش معدب ومكيهمنيش راسي حيث أصلا حياتي كانت تعيسة _ نتا وليتي مسطي شنو كان خاصك حتا وليتي مهوس بالحقد و الإنتقام مني ياك كانو عائلتك موفرين ليك كولشي أمين : يوسف أنا كرهتك حيث كنتي عايش الحياة المتالية من ناحية الفلوس والحنان ديال الأم ديالك وخوك أما أنا شنو والو لا فلوس لا واليدين تدمرت فاش عرفت بيلا أنا غير مربي وبيلا هاذوك ماشي عائلتي الحقيقة كنت كنحس براسي منبود ومكروه على هاذ الأرض التعيسة ونتا عندك أي حاجة كتمناها _ ولكن هاذا ماشي سبب يخليك تحقد على الدري لي كان معتابرك كتر من خوك أنا كنت كنبغيك والأم ديالي حتا هي كانت كتبغيك بحال ولدها شنو دنبها حتا قتلتوها بدم بارد وشنو دنب مراتي وخويا وكريم قول ليا فين هوما وكنواعدك غادي تاخد حريتك ونخليك دير بيا لي بغيتي غير تلق عائلتي لي ماعندهم حتا دنب أمين : حبهم ليك هو دنبهم أيوسف دابا خرج بحالك حيث بغيت نبقا بوحدي اه بلاتي عاود ليا كيفاش حتا بقيتي عايش _ بقيت كنعاود ليه وكنحاول نقنع فيه بجميع الطرق يقول ليا بلاصة لينا ولكن معامن كندوي السيد ولا مسطي خرج ليه العقل هاذا ماشي أمين لي كنت كنعرف ولكن لي نقدر نقول ليكم وهو ضروري غادي يتعاقب . من بعد ماخرجت من عندو مشيت عند سيف لمستوصف لقيتو مريح هو مونا وبدا كيعاود ليا شنو دوزو عليه سيف : عارفين بلا حنا عارفين عليهم معلومات وكيضنو بيلا راك ميت وعدبوني باش نعتارف منهم ولكن ماخرجت حتا كلمة _ مزيان حتا أمين تعكس ومبغاش يعتارف لينا سيف : غدا نحقق معاه ونخليه يعتارف بلهلا يطريه ليه _ صافي واخا وتهلا ليا في مونا راك كتبغيك بزاف سيف : نعام شنو كتقول _ شفت مونا تزنݣات وجهها ولا حمر وكتبان ليا كتغمز فيا باش نسكت . أناري يمكن معارفش بيلا كتبغيه يمكن ماقيلة ليه والو . أبسلامة عليكم كحلتها عليها _ خرجت مشيت نعس الغد ليه فقت فطرت ودخلت لقاعة التداريب ترينيت بيما وصل وقت التحقيق هاذ المرة بدا يحقق معاه خويا وشبعو عصا ولكن كيما العادة مانطق بي والو وكعيت وتميت خارج أنا والواليد البيرو ديالو الواليد : شنو غادي نديرو معاه دابا واخا نقتلوه ماغديش يدوي تفكرت واحد الحاجة شنو بان ليك لقاو واليديه ونههدوه بيهم _ ماكنضنش يسمع ليك ولا يهموه حيث غير مربينو هاذشي لي قال ليا عندي ليك خطة مزيانة ..... كيف جاتك خططتي مزيانة الواليد : متأكد غادي تنجح _ 90% غادي تنجح غير دير داكشي لي قلت ليك الواليد: واخا صافي ليوم بليل نديروها _ خرجت تغديت وبقيت مريح في بيتي تا وصل ليل تعشيت وأمرت وحدين من رجالنا يعطيو لأمين العشا ودرت ليه منوم من بعد ما نعس ديتو أنا والفرقة الخاصة لواحد الديبو ربطتناه مع واحد الكرسي وهو ناعس ومشاو رجعو لمقر وأنا بقيت أنا واحد 2 رجال من المخبرات مكلفين بالحراسة . مشيت تكيت في واحد القنت تال الصبح طليت على أمين كيبان ليا فايق كيشوف الصقف أمرت واحد واحد من دوك الحراس يجيب ليا باش نفطر خرج وبقيت غير أنا وواحد الحارس جا خويا سيف حقق معاه بيما فطرت وفي التحقيق بدا أمين كينكر وكيقول بيلا ماعاقل على والو وبيلا مادير والو غير أسيل لي دايرة ليه شيحاجة كتخليه مرفوع ومعارف شنو كيدير سيف : هاني مشيت لمقر حضيه مزيان _ غير خرج مشيت عند أمين بقا كيشوف فيا وكيشوف في الديبو كيبان ليه خاوي من الحراس أمين : خويا يوسف عفاك سمح ليا راه ماشي لخاطري كندير داكشي راه ديك أسيل كتعطيني واحد المخدر كيخليني منبقاش عارف شنو ندير عاوني نهرب من هنا وكنواعد غادي نعطيك الأدلة ديال البراءة ديالك ونشوف ليك في كاينة ديك الموجريمة _ حلف كدوي بصح واعدني بيلا غادي دير هاذشي أمين : والله حتا بصح داوي معاك بصح أخويا راه ماشي لخاطري كنقول داكشي غير مع داك المخدر لي كيعطوه ليا يوميا والمعول ديالو كيدوم 24 ساعة دابا زال المفعول ديالو ورجعت لطبيعتي أنا ماليا والو من هاذشي أخويا واش تبغي تشوف خوك في هاذ الحالة _ واخا غادي نعاونك وهرب ونتلقاو في العنوان لي غادي نقول و هاك سلاحي وضربني لراسي باش ميشكوش فيا بيلا أنا لي عاونتك وقتل الحراس وهرب من بعد ماقلت ليه العنوان فكيتو وعطيتو السلاح وكونتاكت الطومبيل أمين : من بعد ماعطاني داك الدمدومة سلاحو تيريت فيه 3 الرصاصات لكرش حتا طاح الأرض عمري شفت واحد نية بحالو من بعد ماساليت من يوسف زربت على الحراس قتلتهم وتميت خارج وهزيت الطومبيل وتأكدت بيلا ماتبعني حد وتميت مكسيري قاصد الفيلا ديال حبي أسيل من بعد ماوصلت حدا الفيلا هبطت من طوبيل وحلو ليا الحراس الباب وتميت داخل دخلني واحد من الحراس لعند أسيل كانت كتقرا واحد الجريدة من بعد ما شافتني تصدمات أسيل : أمين ماضنيتش غادي نشوفك مرة أخرى كيفاش حتا باقي عايش جلس بعد نداوي ليك جروحك وعاود ليا أمين : بدات كتمسح ليا دم من وجهي وأنا كنعاود ليها البلان من الزيرو ولكن ماقلتش ليها بيلا يوسف عايش فاش وصلت لموضوع ديال الهروب ديالي وكيفاش هربت غير بلاصة يوسف درت خوه وهي تشنق عليا أسيل : كيفاش الحمار تكلختي بلعاني خلاوك تهرب باش يعرفو بلاصتي نوض خلينا نخرجو من هنا أمين : صافي داز الحال وصلو سمعي صوت القرطاس _ دابا كنضن عرفتو الخطة ديالي لي قلت لواليد نرجع بيكم لنهار قبل باش تفهمو البلان مزيان . الواليد الخطة ديالي هي نخليو أمين يهرب ومتأكد غادي نعرفو فين أسيل إلى تبعناه الواليد : ولكن كيفاش غادي نديرو باش نخليوه يتيق بيلا ماشي حنا لي خليناه يهرب حيث لاش يقدر مامشيش لعنوان لي بغينا _ عندي خطة ديوه شي بلاصة أخرى تكون ساهلة في الهروب وغادي نبقا معاه أنا و2 حراس وجد ليا غير بلاستيكات رقاق عامرين دوا حمر وسلاح في قرطاس مزور وطموبيل وديرو جهاز التتبع في الطومبيل الواليد : صافي مزيان نتمنا تنجح _ شتو على خطة كيف دايرة من بعد ماهرب أمين تبعوه شي وحدين من الفرقة الخاصة من لور بلا مايحس باش في حالة نزل من الطومبيل والبقية جاو هزوني من الديبو وتمينا قاصدينهم ولبست حوايج المهمات في الطومبيل من بعد ما وصلنا حدا الفيلا تأكدنا بيلا أسيل كاينة تما وتمينا مهاجمين بدينا كنقتلو في الحراس واخا كانو كتار وتضرب شحال من واحد من عندنا وقدرنا ندخلو مع فرعنا لباب كتبان ليا أسيل مريحة فوق واحد الفوتاي وحاطة رجل فوق رجل وأمين مخبي بحال شي دري صغير ورا واحد الكوافوز ...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM