انتقام عشاق الجزء 46 🔥🔥🔥 ( التتمة من بعد 340 لايك . طايكو صحابكم يعاونوكم عليها بغينا نرجعو ليامات العز ♥️ ) الواليد : متقولش هكذا أولدي حيث أنا دابا معاك وغادي نعوضك _ شنو تعوضني داوي من نيتك على شنو غادي تعوضني على الأم ديالي ولا على خويا ولا على مراتي لي ماتت حاملة الأب ديالي : لي نقدر نقول ليك هو غادي نعاونك باش تنتاقم لموتهم _ عندي ليك سؤال اخر قلتي مراقبني يعني علاش ماحاولتيش تدخل ونتا عارف موشكيلتي مع مراتي أسيل وأنا متأكد غادي تكون عارف شنو كانت كدير ليا وللناس الواليد : ماكنتش عارف في لول شنو كدير . وبيلا عندها عصابة إجرامية ولكن من بعد عاد عرفت . فاش دارت ليك براج ديال البوليس برجالها عاد بحث وراقبتها مزيان ولكن ماقدرت ندير والو حيث معنديش أدلة كافية وزايدون عرفت بيلا هي حملات منك مابغيتش مامات حفيدي تكون في الحبس عاد زيد عليها الناس الكبار مني ماغديش يبغيو يخصرو التوازنات حيث راك عارف مكانة أسيل وفلوسها في البلاد عاد زيد عليها عندها ايدين خفية في الدولة ممعروفينش دابا عرفتي علاش مادخلتش _ أعذار قبح من الذنب عمرني نسمح ليك الواليد كون غير بقيتي مختفي وخليتي عندي ديك الصورة المزيانة عليك الواليد : كنتمنا تفهمني وتسمح ليا أولدي . اه وقبل مانسى راه دابا كولشي كيسحاب ليه متي في الحادثة وغادي تعيش من ليوم نتا وخوك بهوية وحدة حتا تبرء وإلى حاجيتيني غادي تلقاني في المكتب ديالي _ كمل كلامو وخرج وبقا سيف كيشوف فيا . شنو مالك كتحنزز فيا عمرك شتي الݣور سيف : حاول ماتقساش عليه وتفهمو _ ونتا مالك سوقك واش دوزتي داكشي لي دوزت سيف : ههه كضحك عليا ياك . فراسك حسدتك أيوسف ياريت كون داوك نتا وخلاوني أنا عايش ديك الحياة لي عشتي نتا واخا تعذبتي شوية ولكن على الأقل عشتي مع مك وخوك ولقيتي حنان الأم أما أنا هنا لا حنان لا حياة غير القسوة ديال لونطريمة والاطر لي كونوني نتا على الأقل قدرتي تشوف الأم ديالنا قبل ماتموت وعنقتيها أنا تمنيت غير مرة نشوفها ولا نعنقها مالقيتش كيف ندير حيث تمنعت _ ضرب ايدو مع الكاتري ( المسيطة هه ماشي يد . سيف هو لي ضربني قبيلة ) وخرج بصراحة بقا فيا مسكين تاهو ماليه حتا ذنب وغير ضحية الأب ديالنا بقيت مريح بلاصتي حتا دخل عندي الطبيب عاود بدا كيقلب فيا وكيداوي ليا راسي بداا يبدل الفاصمة وخايف مني . بلا متخاف ماغدي ندير ليك والو الطبيب : لا ثيقة في عتيقة أنا بعدا وليت خايف منك كتبان غير ضريف ساعة طلعتي كطير كتر خوك _ متخاف والو قبيلة غير كنت خايف حيث معارفش فين أنا . أجي شحال في الساعة دابا الطبيب : مزيان ملي عرفتي بيلا راك.في مقر المخابرات السري . هاذي 4 الصباح الموهيم حاول على ديك اليد ليسرية متعطيهاش لطاك حتا تبرا _ خرج وتكيت حتا داني النعاس الغد ليه فقت على صوت الباب تحل دخل عندي واحد من الحراس لي قدام الباب قال ليا أجي معايا باش تفطر. مشيت معاه لواحد المطعم كاين في داك المقر دخلت لقيت شي وحدين من لي خدامين في المقر كيفطرو في طابلة وحدة وكاملين لابسين الكحل لبسة موحدة . كاينين شي وحدين من لي ضربت لبارح أو واحد 3 البنات فسرات هاي هاي مفراسيش المخابرات كيخدمو فيها التيتز جا واحد خونا حط ليا الفطور وبديت كنفطر ودوك البنات كلاوني بعينيهم وأنا نقول ليهم مالكم حاضيني منخافوش وهي دوي وحدة فيهم هي الزوينة والقافزة فيهم مونا : كنشوفو في المتطفل لي هجم على الدراري لبارح بوحشية _ مالكي كتنقزي أسليعفانة عندك الزهر ماكنتيش معاهم أما كون شربتي من نفس الكاس مونا : ماتقدرش تقرب ليا ونتا لي عندك الزهر حيث ماكنتش أنا تما أما كون مداكش النعاس البارح حيث سلخاتك بنت ريم: سكتي راه ولد الرئيس هذاك واش باغة تجبدي عليك الصداع مونا : ومن بعد _ قالتها بواحد الثقة كبيرة ودارت واحد الابتسامة خفيفة ديال الإحتقار وأنا نوض وتميت قاصدها وهو يدخل سيف كاع لي تما وقفو سيف : مانبغيش الصداع هنا سمعتوني . مفهوم ألا مونا مونا : مفهوم أسيدي _ بقا واقف وكيشوف فيا وأنا نقرب لمونا وحطيت إيدي على وجهها وحركتو ليمن وليسر ومكرهاتش تاكلني غير خايفة من سيف . كشكل زوينة ولكن فيك الهدرة كتيرة وباينة غادي لقا معاك مشاكيل طول ما أنا هنا ورجعت كملت فطوري وخرج سيف ومونا بقات كتشوف فيا بنظرات غضب متسوقتهاش وبقيت كنشرب القهوة ديالي حتا كنسمع سيف نتا هنا من ورايا بواحد الصوت ماغريبش عليا . قرب حدايا وقال ليا فين يوسف وتلفت وتما كانت الصدمة واش عرفتو شكون هاذا الجوكير والله تاهو نضت دغيا غفلتو و جمعتو بنص و شنقت عليه كدبتي عليا الجوكير الجوكير : يوسف سمح ليا راه كانت المهمة ديالي نحميك في الحبس _ درتك صاحبي ونتا غير طالقها عليا في هاذ الأسبوع لي داز كامل الجوكير : كنفد غير الأوامر وتانتا عزيتي عليا ودرتك صاحبي غير تهدن وخليني نعاود ليك _ طلقتو وناض جاب قهيوة وجا ريح حدايا الجوكير : شتي قلت ربي كبير وغادي يخرجك من المحنة ديالك شتي أخويا كان عندي الحق _ ولكن كيفاش حتا داير الإسم ديالك في الحبس إلى كنتي غير واحد من رجال المخابرات الجوكير : أنا واحد من الفرقة الخاصة. العمل ديالي هو هذاك ندخل ونخرج من الحبس باش نراقب التجار المعروفين لي في الحبس ونعرف عليهم المعلومات _ ماجا فين يكمل كلامو حتا تطلق واحد الجرس ديال الإنذار بحال لي تطلق فاش بغيت نهرب ناضو كاملين من بلايصهم من غير هاذوك لي ضربت بقاو مريحين. شنو واقع الجوكير : عندنا التداريب خاص دابا نكونو كاملين في القاعة الرياضية _ مشاو كيجريو وأنا بقيت حتا كملت قهوتي عاد خرجت من المطعم لقيت واحد 2 حراس عند الباب قلت ليهم ديوني لقاعة التداريب نشوف . داوني ليها دخلت قاعة كبيرة ومجهزة مزيان بي أحدت الأجهزة الرياضية . لقيت الأب ديالي واقف تما شافني جا عندي هو يقول ليا الواليد : شتي هاذ 27 لي هنا هوما الفرقة الخاصة والسرية الخاصة بالمخبرات فيها خيرة الشباب والمتكونين من صغرهم لخدمة البلاد وخوك هو القائد ديالهم _ متسوقتوش و قربت ليهم ومع دايرين صف واحد بقيت حاضيهم وكنحسب فيهم شحال من واحد لقيتهم نيت 27 واحد 19 دري و 8 البنات ريحت في واحد الكرسي وبديت كنتفرج في التدريب ديالهم وبكل رجولة داكشي واعر وصعيب بزاف المدربين ديالهم مكرفسين عليهم ولكن حتا هاذ الفريق ديال السري مولفين باينة فيهم وحوش كاملين وصحاح بزاف دابا عاد تأكدت من هدرة مونا كون طاحت فيا كون قسماتني بكل رجولة أنا بعدا نتريني معاهم نعواج . وشوفو الزهر يله فكرت فيها هو يقصدني الواليد الواليد : وجد راسك بعد غدا غادي تبدا تريني معاهم _ شنو قلتي من نيتك داوي أشنو قربني لهاذشي واش أنا بغيتيني ندخل لعصا مع هاذ الحلالف مالي تسطيت من الكورة لعصا الواليد : خاصك تصحاح تولي بحال خوك . راك غادي دخل في حرب خطيرة ضد رجال مراتك وخاص دخلها على صح أولدي تريني مع الدراري باش إلى طحتي فشي موقف تسلك راسك _ أنا مسلك راسي وقاد براسي والدليل هو لبارح شتت ليك النص في رجالك الواليد : هاذوك لي ضربتي لبارح ممكونينش بحال هاذو لي هنا في القاعة نتحداك نجيب ليك الضعيف في هاذ الفرقة وشوف واش غادي تقدر عليه .شتك سكتي أولدي سمع لهدرتي تريني وخدم على راسك باش لا طحتي في بحال هاذو تسلك منهم راسك الموهيم يوميا التداريب من 7 إلى 9 و 17:00 إلى 19:00 . 2 مرات في النهار _ واخا بقيت كنتفرج فيهم بيما سلاو وتميت خارج هو يجي عندي واحد من الحراس قال ليا يله نوريك الشومبر ديالك مشيت معاه دخلت تكيت وبديت كنفكر في المخرج من هنا بكل صراحة مرتاحيتش هنا بقيت كنفكر ولقيت الخطة غير هو خاصني نحفظ المخارج وهاذ الخطة ما يمكن ليها تنجح حتا نحفظ البلان ديال المقر مزيان ونعرف الأرقام السرية ديال البيبان بقيت متكي بلاصتي حتا وصل الغدا مشيت تغديت وريحت مع الجوكير تما كنهدرو وكندوزو الوقت بيما وصل وقت التداريب ولكن قبل مايمشي طلب واحد الحليب بالشكلاط ضنيت غادي تعطاه في كأس ولكن داك حليب تعطاه في علبة كرتون وهي طيح عليا فكرة كيفاش نعرف الأرقام السرية خبيت واحد الفورشيط في جيبي و مشيت تا أنا طلبت داك الحليب والشكلاط هزيتو ومشيت شربتو في الشومبر ديالي من بعد ماساليت حليت ديك الكرتونة وبديت كنجبد منها بالفورشيط واحد الطبقة صحيفية رقيقة مصنوعة من الشمع دايرة بحال ميكة صغيورة إلى تحطات فوق لوحة المفاتيح غادي يبانو الارقام لي توركو عليهم . بديت في الخطة ديالي و هزيت ديك الطبقة الصحيفية وخرجت من الشومبر لقيت الحارس برا قلت ليه بيت نمشي نتفرج في الدراري تما غادي بيا دزنا من الباب لول لي فيه الجاج دار الكود وتحل الباب ولحت واحد الݣورميطة ورايا ويله بغا يسد داك قلت ليه عفاك هز ليا ديك الݣورميتة ماقدرش نتحنا .غير تحنا وأنا نلصق ديك الطبقة من الجبهة لاخرة باش فاش نرجعو يكتب الكود ونهزها من بعد مالصقتها وصلنا لباب لاخر لي قلت ليكم كيفتح بحال الݣراج هذاك بلانو تال غدا دخلنا منو ومشينا لقاعة الرياضة تفرجت في دراري وقبل ميساليو خرجت و تميت راجع أنا وداك سيكريتي وصلنا لباب كتب الكود وقلت ليه ياك ماكيعيط ليك شيواحد من لور غير تلفت دغيا هزيت ديك الطبقة الصحيفية وتمينا راجعين دخلت لشومبر قيدت داك الكود في ورقة وبقيت جالس كنتفرج تال وقت العشا وشفت نيت في الأخبار ذاكرين الوفاة ديالي غير وصل وقت العشا تعشيت ومشيت نعست الغد ليه نفس البلان هزيت ديك الصفيحة ودرتها في الباب لاخر عرفت الكود ومشيت عند الواليد البيرو حاولت نعرف معلومات على فين كاينين حنا قال ليا في مقر تحت الأرض في الدار البيضاء داز داك النهار جمعت فيه معلومات وداز تقيل مع هاز حمل كبير ماحيلتي نهرب من هنا ماحيلتي للأنتقام النهار 3 بديت لونطريمة تكرفست ديال بصح عييت ولكن صبرت والحصة ديال العشية كانت ديال تصويب بالسلاح و من زهري كانت الفوق . نخليكم تعرفو البلان ديال المقر من بعد ماكتفوت القاعة الرياضية كاين البيرو ديال الواليد أو شي غرف كتبقا غادي مع واحد الطوالة كتلقا باب من بعد ما كدخل منو كتلقا على جنبك ليمن وليسر قفوصة فيهم الكلاب كتمشا واحد 10 متر كتلقا واحد السانسور كيطلعك لواحد الساحة كبيرة وعامرة حراس وتما فين كيترينيو على التصويب بديت كندور فراسي وكنشوف فين غادي يكون الباب ولكن ماكين حتا شي باب من غير واحد سانسور أخر في القنت لاخر بديت كنتريني على التصويب وكنتعلم وفي نفس الوقت كنجر لجوكير لسانو حتا قدرت نعرف منو بيلا داك السنسور كيطلع نيشان لواحد الباب لي ميمكنش تخرج منو إلى ببصمة اليد ديال خويا ولا الأب ديالي ولا واحد الحارس كيكون لفوق وقدرت نعرف معلومة مهمة ولي هي المقر مبني تحت مقبرة ديال ليهود والباب ديال المقر على شكل قبر وبيلا ديك المقبرة جات في واحد الغابة في خرجة المدينة من بعد ماسلينا التدريب خبرنا المدرب الخاص بالتصويب بلي الحصة غادي تكون من بعد 3 يام . بفف تناكت دابا مانقدر نرجع هنا حتا دوز 3 يام رجعت لشومبر ديالي بدلت حوايجي وتكيت بيما وصل وقت العشا تعشيت ونعست وهكذا دازت يومين تقيلة دوزتها غير لونطريمة ومراقبة الاخ ديالي وكنشوفو فين كيتعطل ولقيت بيلا كيدخل يوميا يدوش يوميا مع 20:00 وكيبقا في الدوش 25 دقيقة والوقت عندو مضبوط . وصل اليوم 3 ترينيت في الصباح في قاعة الرياضة تغديت وجا الوقت ديال حصة التصويب هزيت معايا ديك الطبقة الصحيفية وتمينا غاديين أنا والمجموعة جيهة الباب لي كيدي لسانسور تليت أنا لاخر غير لقيت الغفلة لسقت ديك الصفيحة وكملت طريقي ترينيت على التصويب فاش سلات الحصة مشيت لبيتي ودخلت بدلت حوايجي وبديت حاضي المݣانة غير وصلات 19:45 قصدت الدوش وفيه واحد الطواليط دخلت ليها و بقيت ساد عليا حتا دخل خويا بدا كيدوش وخرجت منها شافني حيث مديورة غير خامية ديال القلع وقال ليا سيف : يوسف شنو كندير تما _ كنصنع النواوي شنو في نظرك كندير ضراني كرشي وكنخويها لا هيتو بالهدرة وسرقت ليه حوايجو ودخلت تاني لطواليط لبست حوايجو ومشطت شعري ودرت نفس التسريحة ديال الشعر لي كيدير وخرجت وبديت في الخطة ديالي كندوز من حدا بنادم حتا واحد مكيشك فشي حاجة حتا وصلت لجيهة البيرو ديال الأب ديالي كتبان ليا خارجة مونا من عندو شافتي وهي تعيط ليا سيف فين غادي وهي تما قصداني شداتني الخلعة قلت صافي غادي تعرفني جاب الله عاود عيط ليها الواليد ومشات تكلمات ليه وكملت طريقي حليت داك الباب وطلعت السانسور خرجت في الساحة ديال التصويب قصدت السانسور لاخر طلعت فيه خرجت في واحد البيت كبير وتما مريح واحد خونا شافني هو ينوض ݣردف ليا درت ليه بيدي إشارة اجي قرب ليا وأنا نضربو لناضرو بيدي حطيتو دودة بديت كنجر فيه باش نقرب لوحة التحكم أحتا كيوقف عليا واحد خونا من حيث لا أدري هز عليا السلاح وقال ليا هز إيديك الفوق وطلق جرس الاندار هزيت إيديا الفوق بدا كيقرب ليا غير وصل لعندي درت راسي بحال لا كنشوف وراه وقلت بابا راه غير أنا هاذا مع تلفت يشوف ضربتو برجلي لوجهو حتا غيب وهزيت داك السلاح وحطيت يد خونا لاخر فوق لوحة التحكم جربت الصبع لول 2 مرات مبغاش جربت اليد لاخرة المرة لولة مبغاش حتا فقدت الأمل وضغط بدا كيكبر وبالأخص فاش سمعت السانسور تحرك عاودت جربت تحل غير تحل داك الباب حسيت بالفرحة وبديت عاطيها لجري نقزت داك السور وكملت الجري ديالي في داك الظلام حتا وصلت لشانطي بقيت كنوقف في بنادم وحتا واحد مابغا يوقف ليا كولشي خايف على راسو بديت كنتمشا حتا وقف ليا واحد الكميو سولني فين غادي قلت ليه البلاصة لي غادي ليها ديني معاك قال ليا بيلا حدو جمعة سحيم طلعت معاه وشدينا الطريق بدا كيسولني منين أنا راكم عارفين هدرة الشيفورات بقيت طالقها وداير ليه خاطرو وبديت كنفكر فشنو ندير وكيفاش نبين البراءة ديالي باش نقدر نتاقم وهو يطيح ليا عم أسيل في البلان طلبت من الشيفور التيليفون عطاه ليا وتاصلت بي أمين . الو خويا أمين أنا صاحبك يوسف أنا مزال حي أمين : هاذا نتا أه الحمد الله ملي مزال عايش فرحت بزاف فين كاين نتا دابا نجي عندك _ أنا دابا يله جاي لأسفي فين كاين نتا نجي عندك أمين : قيد هاذ العنوان عندك فاش تجي جي ليه غادي تلقاني كنتسناك تما _ صافي واخا بغيتك تعاوني باش نلقا عم أسيل هو الأمل الوحيد لي عندي وأكيد غادي يبغي يعاونا حيث تاني واحد من بعدي كيكرها أمين : لا لا نساه ماكين لاش عندي ليك خبار زوينة ولي هي لقيت دليل البراءة ديالك ماغدي تحتاج حتا واحد _ أواه على لقيتي الدليل ولكن كيفاش لقيتيه شنو طرا عاود ليا أمين : هاذشي مكيتقالش في التيليفون حتا تجي ونعاود ليك نتلقاو في العنوان لي عطيتك يله بسلامة عليك _ قطع وريحت وأنا فرحان حيث صاحبي لقا دليل البراءة ديالي وصلنا لجمعة سحايم مع ديك 1 بدا كيدوي معايا الشيفور وكيحاول يقنعني باش نمشي ندوز ليلة عندو والصباح نكمل الطريق لأسفي شفت راسي أصلا عيان ووافقت مشيت معاه لدار دخلنا حطات لينا مراتو واحد الطاجين شهوة منو كليناه ونعست في الصالون الغد ليه مع 9 فطرت عندو وتميت خارج والشيفور طلع رجولة عرفني زاوي ما عندي ريال عطاني فلوس المركوب تسالمت معاه وشديت المركوب لأسفي غير وصلت قصدت العنوان لي عطاني أمين دقيت خرج ليا تسالمت معاه وريحت أنا وياه بديت كنعاود ليه شنو وقع وكيفاش حتا خرج ليا الأب ديالي وخويا وكيفاش هربوني وكيفاش هربت ليهم أمين : وفيلم هندي هاذا اجي معايا تشوف شي حوايج غادي يفرحوك بزاف _ دخلنا لواحد الغرفة ديال بحال غرفة المراقبة عامرة تلافز وبيسيات هو يخدم ليا الفيديو بقيت واقف ومتكي على الكرسي وكنتفرج ومصدوم من داكشي لي كنشوف هاذ الفيديو كيوثق كاع داكشي لي وقع داك النهار بيني وبين أسيل وكيما قلت ليكم من قبل في الطيحة أنا كليت عليها فاش طاحت هي طاحت على أيدي وناضت صحة سلام وأنا ضربت راسي مع الأرض و غيبت شوية وهي تجي الشبيهة ديالها دخلاتها تال البلاصة فين كنت مغيب وضرباتها بواحد الحديدة لراس بطيحتها بموتها وقداتها وزادت مع الطريق . من الفرحة عنقتو أمين معلم نتا كاين هاذ الفيديو كيساوي الحرية ديالي منين جبتيه أمين : صبر أصحبي نوريك ماحسن _ حيد ديك السيدي وخدم ليا السيدي لي فيه التسجيل ديال القاعة ديال عرسي وداكشي لي بديت كنشوف صدمني وفرحني لواحد الدرجة مكتصورش . لينا وخويا وكريم مماتوش في الانفجار التسجيل كيبين بيلا رجال أسيل خرجوهم قبل الانفجار بي 2 دقايق بيدت كنقول في بلاصتي من الفرحة كنت غادي نطير يله بغيت ندور نعنقو ولكن لقطة لي ورا ماخرجو رجال أسيل عائلتي حبساتني وخلاتني في حيرة من أمري كيبان ليا أمين خارج معنق مو وباه وختو قدامو بقيت كنشوف في داك التسجيل وقلت ليه . أمين كيفاش قلتي ليا مك وباك ميتين وهنا كتبان خارج نتا وياهم قبل الانفجار ماجيت فين نكملها حتا ضربني بواحد الزرواطة لراس طحت الأرض ...يتبع من تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM