إنتقام عشاق الجزء 44 🔥🔥 ( التتمة من بعد 330 لايك طاكيو صحابكم يعاونوكم عليها. بغينا نرجعو ليامات العز ♥️ ) _غير قالها بديت كنضحك بالجهد وكنصفق وكنقول أسيل أسيل . لعبات بيا الساط ولاحت عليا إتهام موتها وهي حية مريحة فشي قنت . كانت عارفة بيلا غادي يجي النهار لي غادي نوصلو فيه لهاذ المرحلة ودارت هاذ الخطة هاذ ختنا عبقرية الساط لقات وحدة كتشبه ليها وقتلاتها باش كولشي يصدق بيلا ماتت أمين : شنو كتقول أخويا مايمكنش راه شفت الجثة أسيل هاديك _ ههه راه قلت ليك الجثة هي طبق الأصل ولكن أنا لي راجلها وعاشرتها وعارف كل جزء في الجسم ديالها أسيل عندها توحيمة في صدرها وخالة أو واحد الحرقة صغيرة في فخدها ليمن والجثة لي كتشبه لأسيل مافيهاش هاذشي و تأكدت من هدرتي فاش شفت الجثة ديالها في الإسعاف عجيب الساط نفس العقل والذكاء لي تزعطت فيهم هوما نفسهم لي حطوني هنا وأهم من هادشي وفات بكلامها فاش قالت ليا حبي ليك يقدر يرفعك لسما ويقدر يدمرك إلى بعدتي عليا وهادشي لي كدير دابا هانتا غادي تشوف ماغدي تبعد مني حتا نموت وماشي هاذشي لي بقا فيا أنا هانية ولكن بقاو فيا دوك الناس لي ماتو بسبابي شنو ذنبهم مساكن من غير انهم كانو قراب مني وبغاوني كنحس بالذنب أخويا وسمح ليا حيث كنت أنا السباب بموت واليديك وخوتك أمين : ماعليش أخويا هاذا هو المكتاب ولكن لي خاصنا نديرو دابا هو نشوفو شي دليل يثبت البراءة ديالك وبيلا هاذيك ماشي أسيل _ مكنظنش تلقا الساط هاذيك ذكية وعارفة شنو كدير لي نوصيك عليك هو تكلف بدفن الأم ديالي أمين : واخا خويا وغادي نحاول نشوف كيفاش نخرجك من هنا _ مشا وبقيت أنا مريح كنمشي وكنجي بحال الحمق كنفكر في هادشي لي دارت ليا أسيل فاش عييت من المشية جلست وجمعت ركابيا عندي وبديت كنتفكر دكراياتي مع الأم ديالي وخويا ولينا وكنبكي حتا نعست ماعقلت على راسي تافيقني واحد البوليسي جاب ليا مناكل خويت ديك الماكلة وتكيت تاني وواحد العقل كيقول ليا دير حد لراسك وواحد العقل كيقول ليا إلى على الأقل فقدتي دنيتك ماتفقدش أخرتك وهاذشي لي خلاني منتاحرتش رجعت تكيت مبغاش يديني النعاس بقيت غير نفكر في داكشي لي وقع ليا حتا صبح الصباح دخل عندي واحد البوليسي خرجني وداني عند الكوميسير أحمد ريحت وقال ليا غادي تجي دابا واحد اللجنة مكلفة بالقضية ديالك ومعاهم العميد الممتاز سمير عاود ليهم كولشي وعلاش قتلتي مك ومراتك . غير كمل هدرتو هوما يدخلو ريحو وبداو التحقيق علاش قتلتي مك وأنا مكنجاوبش وداك سمير كيختارع السيناريوهات من عندو سمير : مك قتلتيها حيث هي كانت السباب في موت الابن ديالك محشمتيش تقتل السيدة لي تعدبات على ودك ايه ومراتك علاش قتلتيها _ بقيت ساكت حتا عييت وأنا نقول ليه ماقتلت حد ومادرت والو واش كاين شيواحد يقتل الأم ديالو ومراتي حتا هي ماقتلتهاش وزايدون هاذيك ماشي أسيل غير كتشبه ليها ومراتي عايشة وهي لي قتلات الأم ديالي وفجرات القاعة ديال عرسي سمير : كضحك.عليا هاذيك مراتك وتأكدنا في التشريح وزايدون مراتك كانت كاتبة كولشي في هاذ الرسالة وكانت عارفة بيلا بغيتي تقتلها حيث محفظاتش ليك على ولدك وبيلا بغيتي تزوج عليها وحاجة أخرى لي فجر القاعة هوما خلية إرهابية ولقينا عليهم القبض وعتارفو هاك قرا رسالة مراتك _ فاش بديت نقرا لقيت كاتبة ليوم كيبان ليا يوسف مقلق وماشي تال لهيه حيث كيعنف فيا وكيهددني بالقتل حيث ماحافظتش ليه على ولدو وحتا موافقتي بالزواج معطيتهاش ليه غير زورها وهددتو باش نديكلاري وبدا كيعنف فيا و إلى وقعات ليا شيحاجة عرفوه هو السباب _ بنت العبد منين جابت هاذ العقل كيفاش قدرات دير هاذشي كامل سمير : باقي عندك شي حاجة ضيفها _ بقيت ساكت حتا قال ليا ليوم غادي يتم نقل ديالك للسجن المحلي والمحاكمة ديالك من بعد سيمانة . رجعوني لديك البنيقة بيما جا الطرونسبور وداوني لحبس علام آخر دخلت وكاع الحباسة كيشوفو فيا وكيقولوا ليا مرحبا بيك معانا وكاين لي كيشوف فيا بواحد النظرة شهوانية مع أنا دري زوين دخلت ريحت في الشومبر ديالي فيها 2 كاتريات واحد الفوق واحد التحت شديت لي لتحت حيث لي لفوق جالس فيه واحد خونا عملاق بدا كيسولني علاش جيت هنا وخليت ليه فيه وتكيت وكنفكر في راسي كيفاش كنت وكيفاش وليت من دفئ العائلة للوحدة من السعادة للتعاسة من لوطيل لحبس حياتي دمرات في رمشة عين وبسباب البنت لي بغيت وحسيت معاها بالسعادة واحد النهار ولكن هاذشي لي عطا الله بقيت مريح بلاصتي بيما وصل الغدا خرجنا لواحد البلاصة كيقولو ليها المطعم وبداو كيعطونا في الماكلة البيصارة والعدس داكشي لي مكناكلش في الأصل وكاس ديال أتاي شربت أتاي وخليت داكشي تصورو من لبارح ماكليت والو رجعت لشومبر ديالي وبديت كندوز وقتي غير بالتفكير والذكريات الزوينة وشنو عندي من غير هاذشي باش ندوز الوقت بقيت على ديك الحالة تا وصلات 20:00 عيطو علينا الحراس باش ناكلو وأنا بقيت في الشومبر ديالي مابغيتش ناكل وداك خونا لي معايا خرج فاش رجع من بعد نصف ساعة قال ليا علاش مكتاكلش غادي تفش الغزال متسوقتش لهدرتو وبقيت ساكت وطلع لبلاصتو وأنا حاولت يديني النعاس وكرشي كتغرغر بالجوع بقيت محاول مع راسي حتا داني النعاس يله داني النعاس حتا بديت كنحس بواحد اليد تحطات ليا فوق الحزام ديالي حليت عيني وأنا نلقاه العملاق العملاق : سس مديرش الحس باش مايسمعنا حد الزين ديالي _ مع كملها ضربتو براسي لوجهو حتا طاح الأرض ومع دوك.الغدايد لي فيا طحت فيه طيحة وحدة ماخليتش ليه فين ينوض بقيت كندخل ليه وكنقول نتا بغيتي تحرش بيا نتا مافكوه مني غير الحراس عرفتو كليتو خليتو كولو دم جا واحد من الحراس هو لي مكلف بالسجن بربقها معايا وقال ليا نتا يله جاي ومنوض الصداع وداوني للإنفرادي هنا حسن من فين كنت حيث هنا القليس غير هو هنا كاين غير الضص لا غطا لا والو حاولت نعس ولكن كيفاش غادي نعس في بحال هاذ البلاصة وراه تجمدت بالبرد بقيت صابر تاصبح الحال عاد جا خرجني واحد الحارس وقال ليا شوف أيوسف أنا كنعرفك وتفرجت فيك وكيما فرحتيني بالرباح غادي نعاونك غير هو تفادا الصداع . صافي شكرا وداني لمطعم فطرنا ضطريت ناكل الخبز نحيد بيه شوية الجوع وخرجوني لواحد الاستراحة لي المدة ديالها ساعة مشيت ريحت في واحد القنت حتا كيبان ليا قاصدني داك العملاق هو واحد 2 آخرين جاو قربو ليا . سيرو بحالكم مابغيتش المشاكيل ياك نتا درتي الدنب تعاقبتي عليه شنو كتقلب تاني العملاق : شنو يسحاب ليك غادي ضربني ودوز ليك سليمة _ بداو كيقربو ليا وأنا نقول ليه كيفاش بغيتي ضربوني والحراس جايين من وراكم غير تلفتو وأنا نجمع العملاق بواحد النص حتا قال راسو زدف مع الأرض طويل وخاوي وانا نزرب على لاخرين سلختهم هو ينوض العملاق تاني يله بغيت نضربو هو يجي واحد الحباس ومعاه واحد الكليكة شافو العملاق دهشر الجوكير : شنو هاذ الصداع كاين هنا العملاق : لا ماكين والو أخويا الجوكير غير بغينا نهدرو مع صحبنا الجديد الجوكير : مزال تقرب لجيهتو مايعجبك حال سمعتيني العملاق : كون هاني أخر مرة سمح لينا _ مشا العملاق وبقا خونا كيشوف فيا أنا تنويت قلت مال هاذا تاهو ياكما كيقلب عليا . جا حط عليا ايودو الجوكير : ممصدقش أنني شتك أنا من أشد المعجبين بيك ايسوف اجي معايا بديت غادي معاه ودخلني لواحد الشومبر ناضية تقول ماشي في حبس التلفازة مكينة الصابون صغيرة وبزاف ديال الامتيازات الديسير الماكلة زوينة كان حاط الدجاج المحمر قال ليا كول ماتقتش بيه خفت يكون من داك النوع و حاط شيحاجة كتنعس في الماكلة شافني متردد وفهمني الجوكير : متخافش ديرني صاحبك وتيق فيا هاني غادي ناكل قبل منك _ شتو كلا وبديت كناكل وكنقول ليه علاش كدير معايا هكذا الجوكير : أنا عجبني لعبك فرجتيني وفرحتيني حيث جبتي لينا الكاس وأهم من هاذشي هو ربحت الفلوس كتيرة من وراك كنت غادي نخسر نص فلوسي في ديك التقميرة ولكن اخر لحظة قلبتي الماتش ودخلت زبالة الفلوس _ مزيان هي نتا قمار الجوكير الجوكير : اه ولكن العمل ديالي هو مروج مخدرات وكندخل هنا مرة مرة باش نغيب على الانظار وصافي ونتا علاش مشدود هنا عاود ليا _ أنا دخلت هنا بسباب جرائم مدرتهمش يعني غير تلفقو ليا هادشي لي نقدر نعاود ليك الجوكير : على خاطرك الموهيم ريح معايا في الشومبر وأي حاجة حتاجيتيها سواء هنا ولا برا ماعليك غير طلبها _ شكرا كملت ماكلتي بيما جا عندي واحد الحارس قال ليا عندك زيارة صاحبك خرجت عنقتو و ريحت معاه أمين : جيت نشوفك ونجيب ليك الحوايج عرفتك غادي تحتاجهم . قول ليا كيف جاك الحبس _ بديت كنعاود ليه شنو طرا ليا وبدينا كنهدرو على موضوع أسيل والمحاكمة ديالي أمين : لقيت ليك واحد المحامي مزيان ولكن الموشكيل في الأدلة _اه اجي تفكرت حاجة مهمة كاين فريد بقدر يشهد معانا كنظن الشهادة ديالو تنفعنا أمين : للأسف من خلال المعرفة ديالي فريد مات بكسيدة _ تفو بنت لحرام هي لي قتلاتو مخلات من وراها حتا دليل صافي غادي نغرق أمين : ماتفقدش الأمل ربي ماغديش يبغي يخليك في هاذ الموشكيل _ بقينا كنهدرو بيما سلات الزيارة ورجعت دخلت حوايجي لغرفة ديال الجوكير لي دايرة بحال شي غرفة ديال اوطيل 5 النجوم وريحت تكيت وهكذا دازت 6 يام ثقيلة وبلا مشاكيل وصل نهار المحاكمة ديالي جاو عندي الحراس باش يدوني .سلمت على الجوكير لي ولا عشيري حيث شفت منو غير الخير عاودت ليه كولشي كاع داكشي لي عشت ضطريت حيث كان خاصني علامن نخوي قلبي الجوكير : الله يطلق سراحك _من بعد ماسلمت عليه تحركت مع الحراس طلعت السطافيط ديال الحباسة وقصدنا المحكامة دخلت تصدمت بالتهم لي تلفقو ليا موت الأم ديالي وأسيل وتيريزا ودوك 2 شفارة لي ضربوني وتهموني بتكوين عصابة إرهابية وكولشي موثق وبالأدلة لي قادت أسيل ماكين فين نكر كولشي مقاد ومغيز كعيت ولكن ماعندي ماندير جا الوقت فين يعطي القاضي الحكم ديالو كنت كنقول بيلا غادي نشد المؤبد ولكن القاضي حكم عليا باالإعدام من هنا فاش سمعتها تقبلتها حيث مابقا عندي مانخسر أصلا اللهم نموت ولانبقا معذب في هاذ الحياة الكئيبة غادي تبقا فيا حاجة وحدة وهي مانتاقمتش من أسيل ولكن ماعليش حقي عند ربي فاش تماو مخرجيني طلبت السماحة من أمين وتوادعت معاه أمين : غادي نجي نزورك _ رجعوني لسجن وقالو ليا قبل ماندخل نجمع حوايجي حيث غادي يدوني لسجن فاس دخلت عند الجوكير عنقتو وقلت ليه المسامحة وعاودت ليه البلان وبديت كنجمع حوايجي الجوكير : للأسف أخويا ولكن بقا مأمن بربي لأخر لحظة وإنشاء الله غادي يكون خير _ جا واحد الحارس بدا كيزرب فيا وتوادعت مع الجوكير وطلعت السطافيط وركبو معايا 6 الحراس وشدينا طريق لفاس وحنا غادين واحد ساعة ونص وهوما يجيو واحد 2 طوموبيلات كحلين كبار موركين حتا تقادو معانا وعمرو الشانطي بقاو كيكفريو علينا حتا تقلبات بينا ديك السطافيط تصورو ضربنا 2 دورات في السما عاد طحنا في البيست أنا كلا عليا غير واحد من الحراس ضربت راسي مع كرشو لي كبيرة خدمات ليا درع ههه ماعلينا بديت كنفقد الوعي وجاب ليا راسي بحال لي كنحلم والصورة مضببة خرجوني واحد 2 رجال مغطيين وجاههم ولابسين حوايج المهمات من السطافيط حطوني في الأرض وشفت واحد الحاجة لي خلاتني كنقول أنا ميت مستحيل نكون مزال عايش ...يتبع في نضركم شنو شاف يوسف ؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM