إنتقام عشاق الجزء السابع 🔥🔥🔥 ( التتمة من بعد 360 طاكيو صحابكم يعاونوكم عليها بغينا نرجعو ليامات العز ♥️) شدات الدفتر قطعاتو ورماتو خلاتني مصدوم وكملات طريقها وأنا نتعصب قررت نتبعها وندير ليها شي بلان يله تميت غادي عندها وأنا نتلفت لور حتا كيبانو ليا الكردكورات جايين وأنا نتما راجع بحالي عند أمين هوما يوقفو عليا بديت كنترعد غير بوحدي وكنقول ناري ليوم يتخلا دار بويا ومقادر تا على العصا . أمين شافهم شاديني جا كيجري عندي بغا يفكني منهم هو يشدو واحد فيهم حكمو و داك خونا لي ضربني ديك المرة قال ليا أجي نتا مالك مع المدام مابغتيش تبعد منها . يله هز إيدو بغا يعطيني لوجه حتا بدا يصوني ليه التيليفون هو يجاوب قال غير اوكي وطلقني وقال لاخر يطلق أمين طلقونا ورجعو بحالهم . أوف رجع فيا الدم ولاد لحرام كانو غادي يخليو دار بويا . أمين : وليني مسخوط هاذي هي سباب خلا دار بوك بعد منها المسخوط كيبان ليا مامعها ضحك غير بعد منها هاذ المرة سلتي منها مرة أخرى يتهلاو فيك _ ماغديش نبعد منها خاصني نرجع ليها الصرف طغات بزاف والله ماتبقا فيها رجعنا عند الدريات وريحنا معاهم ثاني نسرين : مال هاذوك معاك وعلاش ديك الشهبة هانتك بديك الطريقة هناء : باينة فيها معقدة اش داك أخويا تعطيها شي دفتر خليها تمشي تقلب عليه ديك الساعة _ ماعرفتش مالها يمكن مريضة نفسانيا جيت غير ندير فيها خير ونعطيها دفتارها دارت ليا هاد الحالة . ومع أنا كاعي ضربت الشكارة مع الأرض وهي تعنقني نسرين وبقات شادة ليا في أيدي نسرين : صافي الحبيب ديالي ماديرش في بالك بلا ماتقلق _ تلفت الجيهة في واقفة أسيل لقيتها كتشوف فينا وكدوي في التيليفون . بقيت كنشوف فيها تا أنا وكنخنزر حتا وقف علينا المدير والحارس العام المدير : هاي هاي كتمعشقو ليا هنا عندي بار ماشي مدرسة مزيان تبارك الله تبعوني الإدارة _ وليني مصيبة صافي بقا لينا غير المدير في الحساب . تلفت لأسيل تاني لقيتها مربعة إيديها وكتشوف بحال لا عجبها الحال وكتشفا ... مشينا مع المدير الإدارة دخلنا وبدا يغوت علينا المدير : عندي كباري هنايا كتمعشقو هنا كيما بغيتو وكتصحبوني مجايب خبار واش فراسكم بيلا المدرسة فيها كاميرات وطاح كيجبد لينا في الفيدوات ديولنا والواعرة هي فاش جبد الفيديو ديال أمين وهناء فاش كيديرو بوش أبوش شداتني الضحكة وحبستها غير بزز المدير : سي أمين عندي برتوش هنا ياك أولدي هناء : ويلي ويلي ويلي على شوهة المدير : نتموما خالفتو القانون ومصير لي كيخالف القانون هو الطرد _ الدريات بداو كيبكيو وأمين تصدم وأنا بقيت كنقول ليه الله يحفظك أستاذ غير سمح لينا والله مانعودو اخر مرة والله تابغينا نقراو عطينا فرصة أخرى المدير : نسرين هناء نتوما مطرودين من المؤسسة ولكن حيث قلبي حنين تعاملت معاكم مابغيتش نخرج ليكم على مستقبلكم ونقلت ليكم الميلفات لمؤسسة الإدريسي . ونتوما أدراري أخر مرة يتعاود بحال هاذشي يله قسمكم الدراري ونتوما الدريات غدا سيروا لأدريسي والله يسهل عليكم _ بدا كيطلبو فيه ووالو مابغاش يتصنت ليهم خليناهم كيتنخسسو تما وحنا قصدنا القسم وأمين فرحان أمين : والساط شتي داكشي لي وقع لداخل وعلى زهر عندنا حنا لي سباب المشاكل ومطردناش والبنات لي ماليهم والو طردو _ في هاذي ماديرش الجمع نتا هو سباب المشاكل ماشي أنا ماليا والو في هاذشي ولكن غريبة الساط علاش مطردناش تا حنا كيفاش البلان . أمين : هدا هدا خلينا من هادشي كامل تاشتي المدير عندو الفيديو ديالي مع ختنا نخاف لقا راسي في المواقع الاباحية بلاتي هاني جاي ... سيد المدير المدير : نعام أداك بوراس شنو بغيتي تاني أمين : الله ينورك مامحي داك الفيديو نخاف نتشوه المدير : تاسير تقرا واش توريني خدمتي أمين : شكرا سيد المدير الله يهنيك ... يوسف تسنا . خونا مدار معايا والو _ متخافش اصحبي تاشنو غادي يدير بالفيديو ديالك واش بغيتي يخرج على خدمتو . وهاذ المرة تعلم تبوس فيما ولاك زيد ندخلو راه تعطلنا . دق دق أستاذ الرياضيات : أش هاذ التعطيلة الحصة بدات هاذي نصف ساعة فين كنتو _ استاذ كنا غير عند المدير هو لي عطلنا . دخلنا كتبان ليا أسيل مريحة القدام بوحدها دزت من حداها وأنا نجبد من جيبي ديك الورقة لي لقيت في الدفتار ديالها حطيتها ليها قدامها بالنفخة وريحنا لور أنا وأمين جبدنا ادواتنا وبدينا متبعين الشرح مع الاستاذ و الحصة دازت دغيا وزوينة حيث عزيزة عليا شيحاجة سميتها الرياضيات وكيما العادة الاستاذ خلا لينا ديك 10 الدقايق نجمعو فيها بيما ضرب الجرس والغريب في الأمر هاذ المرة أسيل مخرجاتش قبل الوقت بقات كالسة كتراجع . غير ضرب الجرس خرجنا أنآ وأمين مع الباب ديال القسم دغيا وهي تبان ليا ختنا يله كتجمع ادواتها دقة دقة وأنا نقول لأمين سير سبقني خرج الموطور من عند الكرديان تفكرت واحد التمرين خاصني نوريه الاستاذ يصححو ليا . أمين : صافي واخا متعطلش _ مشا وأنا بقيت كنتسنا في أسيل بقات هي لاخرة في القسم غير خرجات وأنا نشدها من إيديها وجريتها زديتها مع الحيط وحكمتها بيديا بجوج وهي مخلوعة وكتنهج أسيل : شنو عند راسك كدير طلق مني خليني نمشي ولا مايعجبك حال _ شكون كيسحاب ليك راسك بسلامة عمري شفت شيوحدة متكبرة بحالك أنا حاولت نعاونك شحال من مرة وكنت غادي نموت لبارح بسبابك ونتي شنو درتي في المقابل هنتيني قدام بنادم وفراسك عمري حاولت نتقرب من شي وحدة من غيرك حيث بنتي ليا بنت غريبة وقوية ولكن حزينة و وحيدة في حياتك داكشي لاش بغيت نعاونك أسيل : كملتي كلامك طلق مني خليني نمشي _ بقيت كنشوف ليها في عينيها وأنا نتلف سحراتني بالجمال ديالها . غريب بنت زوينة بحالك تكون مغرورة لهاذ الدرجة . نقدر نعرف علاش ماعندكش مع البشار وما بغيتيش ديري أصدقاء ... بقات كتشوف فيا واحد الوقت غفلاتني وهي دفعني . أسيل : ماشي شغلك ماغديش توريني شنو ندير في حياتي _ يله بغات تمشي وأنا نشد من إيديها أسيل حاولي تبدلي وجهة النظر ديالك للحياة وتبدلي طريقة التصرفات ديالك وتواضعي حيث الوحدة ماعندها باش تفيدك . وإلى بغيتي نقدرو نكونو أصدقاء ونعاونك تنساجمي مع بنادم أسيل : مامحتاجة حتا واحد في حياتي ديرها في بالك - نطرات إيديها ومشات وأنا بقيت كنفكر غير مع راسي أو واش يوسف هاذا لي كيدوي منين جاتني هاذ الشجاعة كاملة تاندوي معاها هكذا . خرجت لقيت أمين كيتسنا أمين : تا هاذ الوقت كامل والاستاذ كيصحح ليك وزايدون بان ليا الاستاذ خرج قبيلة شنو بقيتي كدير _ غير تزيرت ومشيت لطواليط صافي بركة من الأسئلة زيد نتحركو راه تعطلنا ... وصلني حدا باب الدار سلمت عليه ومشا يله بغيت نحل الباب حتا كتوقف عليا واحد الطومبيل كحلة كبيرة بحال لي كيخدمو بيها رجال المخابرات نزلو منها 2 الناس لابسين بحال لباس رجال المخابرات كولشي كحل و مغطيين وجاههم ولباسهم مافيه حتا كتبة تاتبين شكون هوما بقيت مكوانسي في بلاصتي و كنشوف فيهم كنت غادي نديرها في حوايجي من الخلعة عرفتي شناهيا يوقفو عليك وحدين مسلحين ...يتبع في نظركم شكون هاذو لي وقفو على يوسف ؟ واشنو بغاو ؟؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM