إنتقام عشاق الجزء السادس 🔥🔥🔥 ( التتمة من بعد 330 لايك طاكيو صحابكم يعاونوكم عليها بغينا نرجعو ليامات العز ♥️ ) مشيت كنجري بواحد السرعة خيالية جمعت خونا بواحد النص ماعرف باش تبلا هزيت الجنوية وهو يهرب أسيل غير شافتني وهي تجي تعنقني وكتبكي وكترعد من الخلعة وأنا حاط إيدي على شعرها وكنلامس فيه وكنهدن فيها صافي راه مشا مبقاش غادي يرجع بلا ماتبكي ومبغاتش تسكت . الله على ريحة فيها وعلى تعنيقة معنقاني حسيت بالحنان تسحليتها دازت واحد دقيقة وأنا نسولها أسيل شنو كديري هنا بوحدك ؟ وهي دير فيا واحد التخنزيرة كتخلع ودفعاتني وقالت ليا ماشي سوقك ومشات كتجري لجيهة الطومبيل وأنا غير كنشوف فيها واش هاذي حمقة ولا شنو معاونها وشكرا مقدرات تقولها ليا تفو على متكبرة بنت الفشوش ولكن على الأقل تأكدت بيلا مزنزوناش بديت كنبتاسم و حاضيها حتا ركبات ومشات ويله بغيت نتحرك تا أنا تاكتهرس ليا على راسي واحد القرعة ديال الشراب شداتني الدوخة وجمعني داك خونا لي كان واقف على أسيل بواحد النص وبدا كيشتف عليا هو وواحد صاحبو شتفو عليا مزيان ووليت كلي دميات ولكن واحد الوقت بدا كيرجع ليا الجهد ومع خوكم صحيح غفلتهم وأنا طايح هزيت رجلي بجهد عطيتها لصاحب خونا لمنطقة المعلومة حتا ركع وشديت لهداك رجليه وجريتو لعندي حتا طاح وبديت كنعطيه كنعطيه حتا طاح كاو ودزت لاخر تاهو خليت دار بوه مزيان خليتهم مجبدين تما و مشيت كنجري لمطوري وشداني الدوخة فكرت نمشي لدار ولكن الأم ديالي تقدر توقع ليها شيحاجة إلى شافتني بهاذ الحالة قصدت الدار لي فيها أمين كسيريت لعندو وغادي غير بزز الطريق كتبان ليا مضببة فاش وصلت قدام باب ديك الدار مابقيتش قادر نوقف طحت أنا ومطوري ومابقيت عاقل على والو حتا فقت في السبيطار كلقا قدامي الواليدة كتبكي وخويا وأمين ووالديه الواليدة : الحمد الله تخلعت عليك أحبيبي كنت غادي نتفكر قول ليا شنو وقع ليك أمين : خلعتينا عليك أصحبي أم أمين : على سلامتك أولدي _ الله يسلمكم أمين شنو وقع شكون جابني هنا وشحال من غرزة دارو أمين : أنا لي جبتك جيتي قدام دار الدري صحبنا وسخفتي وأنا جبتك السبيطار ودارو ليك 6 الغرزات عاود لينا شنو وقع _ كنت جاي عندك وأنا غادي في الطريق تزيرت وكان خاصني نستاجب لنداء الطبيعة بانت ليا واحد الجردة خاوية كلت نقضي غراضي ملي هبطت غفلوني الشفارة وضربوني بقرعة هاذا ماكين الواليدة : ولاد لحرام شوية نمشي نديكلاري بيهم فينا بلاصة وقع هاذشي _ صافي الواليدة نسايهم راه كلاو قتلة ديال العصا . الواليدة مبغاتش تفاك قالت ليا صحا نديكلاريو بيهم بزز تاقنعتها حيث ماكين لاش خرجت فيهم غدايدي بقينا مجمعين بيما جا الطبيب الطبيب : يوسف يمكن ليك تخرج وعطي لراسك الراحة والبانضة لي فراسك ماتحيدها على 3 يام _ شكرا ليك ... أوف الحمد الله غادي نبات في الدار ماكنحملش السبيطرات لبست الجاكيط ديالي وتمينا خارجين والواليدة شادة فيا واحد الوقت هو يشدني أمين من إيدي وجرني عندو أمين : هاذ القصة جاتني فشكل كاينة شيحاجة تما ناقصة عاود ليا _ وايه ديك المسخوطة ديال أسيل هي السباب كان باغي يتكرفص عليها واحد خونا وعاونتها . كملت ليه البلان تال لخر بدا كيضحك أمين : هاذ البنت ترمات في طريقك كيبان ليا غادي تكون بنيناتكم شيحاجة شميتها _ شميتيها مالك وليتي كلب الله يحفظك متبقاش تجبدها ليا هاذ ختنا هي سباب خلا دار بويا فينما كنشوفها كنكلها في عظامي. قول ليا فين المطور أمين : راه في دار خونا خليتو تما ارا ليا لوراق باش غدا نمشي فيه الليسي مع الصباح _ هاك ولكن غدا طركني تا أنا غادي نمشي مالك كتصحابني غادي نمنك أمين : تاسير رتاح ليك مالك غادي تمشي بهاذ الحالة بلا ماتعول ندق عليك غدا الصباح ناعس العشية ندق عليك _ صافي واخا العشية جي عندي خرجنا من السبيطار ودعنا أمين وعائلتو وشدينا تاكسي نيشان لدار دخلت لقيت الواليدة موجدة العشا غير سخناتو كليت ومشيا بلاصتي لقيت نسرين مسيفطة ليا عرام ديال الميسجات فيهم تخلعت عليك أحبيبي توحشتك كيبقيتي ... أمين قال ليها راني في السبيطار خليت ليها ڤي ونعست بلا مانعمر المكانة كنت معول مانفيق تال ديك 12 ساعة جابتني الفيقة مع 8.30 فطرت وشعلت التلفازة مالقيت فيها والو هو يشدني الملل بان ليا البلان غير في ليسي بدلت حوايجي وخرجت وصلت مع 10:05 دخلت ليسي وقصدت القسم كيبان ليا أمين كالس هو هناء ونسرين شافوني هوما يجيو عندي ونسرين بدات كتعنق فيا هناء : تخلعت عليك الزين ديالي وعلاش لبارح مجوبتينيش خليتيني مشطونة _ ماكين لاش تخلعي أنا بخير دابا البارح كنت عيان كيف جيت نعست أمين : ياك قلت ليك رتاح علاش جيتي أصحبي _ أخويا مكرهتش ولكن جابتني الفيقة بكري ياك شتي منكت الساعتين لولة مالقيت مايدار في دار قلت نجي ليسي . أمين قرب ليا نقول ليك في ودنيك شيحاجة . واش جات أسيل هاذ الصباح أمين : شوف وراك وبلا ماتعيق راها مقابلة معانا _ درت تلفيتة الخضارة كتبان ليا واقفة مع الكردكورات ديولها كتشوف فينا وكتخنزر . هاذ المخلوقة واخا أية في الجمال مكتبتاسمش ديما مخنزرة مكرهتش نمشي ندوي معاها ولكن معاها الكردكورات قلت تانبغيو ندخلو القسم ونوقف عليها وداكشي لي درت بقيت مجمع مع أمين وهناء ونسرين بيما ضرب السونيط غير بانت ليا أسيل وأنا نوقف قدامها ماعرفت منين جاتني الزعامة وأنا نقول ليها لبارح يله بغيت نكمل الجملة ديالي أسيل : لبارح داز بعد من طريقي _ كيفاش لبارح داز شوفي حالتي كيفاش ولات كنت غادي نموت بسبابك وبلا فائدة تا شكرا ماسمعتها منك واش واليديك ماعلموكش الصواب . غير قلتها ليها دفعاتني بنت العبد عكراتني . اح اح تفو على متكبرة كون رباوك والديك كعما تخرجي معقدة ومعفرة هكذا . دخلنا عند الانجليزيه كلست وراها أنا وأمين وكنحاول نجبد معاها الهدرة بأي طريقة ووالو ممعبرانيش بحال لا ماكينش كاع وهكذا دازت 1h50min كيما العادة أسيل جمعات أدواتها وخرجات بلا متشاور مع أستاذ الانجليزيه بقيت حاضيها يمكن كوكم طاح فيها شخصيتها القوية كتجدبني ليها أمين : مالك فاقل ارا ليا داك الستيلو لي طايح جيهتك _ تحنيت باش نجبدو ليه ( ههه غير الستيلو أمالين العقل الموسخ ) وبالصدفة كيبان ليا واحد الدفتر في القيماطر لي كانت كالسة فيه أسيل يمكن الدفتر ديالها هزيته لقيت فيه سميتها وكنيتها و بديت نقلب فيه وأنا لقا واحد الورقة ديال خلاص الويفي فيها عنوان الدار ورقم الدار شديت ديك الورقة خشيتها في جيبي أمين: أمين فاش تمشي الدار حرك داك الدفتر خلي ديك المسمومة تعدب وتعاود تكتبو _ لا حشومة أصحبي السيدة كاتبة 2 صفحات ومزوقاهم حشومة نعدبوها أمين : مسكين نزل عليك الحنان الله يعطينا وجهك يله نتحركو راه ضرب الجرس _ خرجنا من القسم ووصلني أمين لدار ودار معايا غادي يجي عندي مع 15:30 نمشيو ليسي دخلت الدار كليت ورتاحيت شوية بيما قرب الوقت بدلت حوايجي وكتوباتي وبقيت كنتسنا في أمين حتا جا طركني ومشينا . دخلنا ليسي ومشينا ريحنا أنا وأمين في واحد الكلوار قريب القسم شافونا هناء ونسرين جاو كلسو معانا وبقينا كنتعنبو عليهم شوية وهي تشد ليا نسرين في ايدي وغفلاتني وباستني في حنكي وبالصدفة كانت جاية أسيل دازت من حدانا وكيما العادة جاية بتخنزيرتها . ترددت واش نعطيها دفتارها دابا ولا تاندخلو قررت نعطيه ليها دابا هزيت الدفتر وتبعتها كنجري نسرين : يوسف فين غادي اجي _ أسيل وقفي واحد الدقيقة الصباح خليتي دفتارك في القسم . إيوا دابا مانستاهلش تشكريني دابا ثاني مزيان نديرو معاك . مديتو ليها وهي تشدو وبقات كتشوف وانا كنتسنا فيها تشكرني ولكن هاذ المسمومة غير ماكتزيد تكبر . شدات الدفتر قطعاتو ورماتو خلاتني مصدوم وكملات طريقها وأنا نتعصب قررت ...يتبع تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM الواتساب : whatsapp.com/channel/0029VaicQtDKLaHqQiLXua02 مسنجر : www.facebook.com/messages/t/25863888246590490 تلغرام : t.me/kisasRM