الأسود 🖤 الجزء الأخير 🔥 ( قرا وعطي الرأي ديالك في القصة ❤️💙) لحتها فوق الكاتري وتلاحيت عليها بديت كنعنق فيها مع بغيت نبوسها منعاتني سناء : لا لا منبوسكش انا مقلقة منك _ علاش شنو درت احبيبتي سناء : قول شنو لي مادرتيش داكشي كامل ومادرتي والو دروك نعطيك الوجه _ حبيبتي من حقي راه أنا وسلوى مادوزناش القليل وزيد عليها كانت حاملة بولدي و ماشي بزاف باش رجعت ذاكرتي كولشي تخربق عليا عفاك عذريني ونساي الماضي وخلينا نبداو صفحة جديدة فيها أنا وياك وبنتنا سناء : واخا احبيبي مايكون غير خاطرك _ بقينا معانقين وعايشين شوية الرومانسية نتوما عارفين وأنا عارف شنو كنقصد من بعد خرجنا الصالون الواليدة : ولدي قررنا نكريو قاعة الياسمين في آسفي وتما فين غادي نديرو العرس _ ولكن علاش نمشيو آسفي خلينا هنا مهدي : قررنا مجموعين نديروه تما قراب لعائلة سناء وصحابنا ومنها رجعو لمدينتنا الحبيبة توحشناها _ صافي على مولانا الي درتو أنا معاكم حسناء : الليلة غادي نرجعو آسفي ديروها في بالكم فدوى : وأخيراااااا انرجعو لمديتنا توحشتها بزاف علي : أمين هدرت مع المسؤولين والنواب عليك وشرحت ليهم الوضع وغادي ترجع للعمل ديالك معانا مرحبا بيك من جديد _ ماعليكش أحسن خبار توحشت خدمتي سناء : مبروك عليك احبيبي _ الله يبارك فيك ، بقينا كنهدرو بيما تحط الغدا كليت ومشيت درت القيلولة حتا كنسمع خويا كيدق عليا مهدي : أمين وجد راسك انمشيو _ نضت غسلت وبدلت حوايجي لقيت العائلة كيتسناو خرجنا لطومبيلات وركبنا خدينا بعض الحراس معانا والبقية بقاو في المقر قصدنا آسفي ومع 1:15 الليل كنا قدام فيلا سناء حلو لينا السيكريتي لي تما ودخلنا مجموعين جلسنا في صالون وكان كولشي مقلوب بالنعاس ولكن الفيلا صغيرة بالمقارنة بالمقر لي كنا فيه ومهازش كولشي مهدي : كاين حل ناضي حنا الدراري انمشيو دارنا القديمة نعسو تما الواليدة : وعندك الساروت مهدي : كنت حاط الضوبل تحت واحد الفاز تما _ نتا هو نتا أفكارك الغبية ماكتحيدهمش ههه كوراه لقاوه الشفارة وخواو الدار مهدي : مكاينش لي يتجرأ يقرب ليها غير زيد _ ها حنا مشينا بسلامة ، يله بغيت نخرج أنا ومهدي ومصطفى وعلي وهي تلصقنا دامي دامي : انمشي معاكم عندي ذكريات زوينة في ديك الدار ياسمين : بصراحة حتا أنا غادي نمشي معاكم سناء : تا أنا غادية لافاطمة : البنات ريحو الأرض ماعندكم فين تمشيو صافي نتوما غير سيرو ياسمين : ماماااا حشومة لافاطمة : زيدو تريحو ماعندكم فين تمشيو تال غدا وايجيو او نمشيو معاكم الدار ولكن باش نخليكم مع الدراري بوحدكم لا دامي : ولكن اخالتي حنا انتزوجو بعد غدا حسناء : ايوا تال بعد غدا وكل وحدة تمشي مع راجلها دابا تبتو ورزنو مهدي : يله هاحنا مشينا _ خرجنا من الفيلا وتوجهنا دارنا القديمة وفعلا لقينا الساروت تحت الفاز حلينا وتمينا داخلين وعينيا غرغرو بالدموع حسيت بالحنين إلى الماضي توحشت دوك الأيام وتفكرت الواليد الله يرحمو , بقيت كندور على الغرف ديال الدار وكنتفكر لحظات لي دوزت هنا من طفولتي وكنبتاسم مهدي : ياريت الزمن يرجع لور _ ماكرهتش أخويا يله زيد نعسو مهدي : واخا ، مشيت عطيت لكواش للداري وكل واحد قصد بلاصتو ينعس _ شديت بلاصتي وضربتها بنعسة كيف صبح الصباح صونات ليا الواليدة باش نجيو نفطرو ، فيقت الدراري فاقو وجدو راسهم وتمينا خارجين ... مهدي قول ليا فين تدفن الواليد ماكرهتش نزورو هو الأول مهدي : مقبرة النور غير قريبة أجي بلاصتي نسوق أنا نديك ليها _ توجهنا لمقبرة دخلنا ليها وقصدنا قبر الأب ديالي وتما حسيت بضعف وبديت كنبكي عليه بحال الولد الصغير وكنطلب السماحة منو حيث ماكنتش تما باش نعاونو ، من بعد ماتفشيت وقرينا عليه ماتيسر من القرأن خرجنا وقصدنا الفيلا دخلنا ريحنا في طابلة ديال الفطور الواليدة : فين تعطلتو مهدي : كنا في الروضة زرنا قبر الواليد الواليدة : مزيان أحسن مادرتو الله يرحمو أنا نيت غير يسالي العرس نمشي نزور القبر ديالو _ إنشاء الله ، بقينا كنفطرو وكنتحدتو من بعد تفرقنا كل واحد فين خرج قدا غراضو أنا وخويا والدراري مشينا ناخذو حطة العرس البنات عند النگافة الواليدة وباقي العائلة مشاو يشوفو باقي التجهيزات ديال العرس ماتجمعنا تال وقيتة الكسكروط وأنا داخل الصالون كنتفاجئ بيلا الكليكة كاملين مجموعين تما فرحت فاش شفتهم مشيت كنعنق فيهم واحد بواحد حمزة : ياك بعدا الأسود مشا ماغدي دير لينا والو _ ههههه الأسود مات وشبع موت مريم : وأخيرا غادي نرجعو لأيامنا الزوينة ونعيشو حياة هادئة فدوى : اه واخا خسرنا بزاف أيمن : كانت أيام كحلة ولكن فيها خير الله يرحم الناس لي ماتو _ بقينا كنديو ونجيبو في الهدرة تاوصل وقت العشا تعشينا وتمينا خارجين باش نمشيو نباتو في دارنا وقبل مانخرج من الفيلا جات عندي سناء عنقاتني سناء : حبيبي ماما ريزيرفات لينا في الاوطيل غدا _ عرفتي شحال وانا كنتسنا اللحظة لي نكون انا وياك بوحدنا ربي لي عالم سناء : وباز بحال الى عمرنا كنا بجوج _ احم احم ولكن ماشي بحال الى كنا مزوجين وحلالي ومعايا بلا مانحشم من العائلة سناء : عندك الحق احبيبي مابقا والو آخر ليلة ونتجمعو _ توادعت معاها ومشيت ركبت الطومبيل توجهنا لدار مشيت بلاصتي تكيت وانا كنفكر في عرسنا وكيفاش غادي يدوز حتا داوني عينيا ، صبح صباح جديد والساعة كانت كتشير الى 10 صباحا لبسنا حوايجنا وتوجهنا لفيلا وتما كلقا غير الواليدة ولا فاطمة أما البقية مشاو الحمام والكوافورة فطرنا من بعد خرجنا حتا حنا نحلقو على الحالة حسنا وقصدنا الحمام دوشنا ورجعنا لفيلا ودغيا كيدوز الوقت لقينا الواليدة وصحابنا ديال الكليكة فقط الواليدة : سربيو راسكم راكم معطلين البنات راه مشاو القاعة مصطفى : اواه دغيا يله 15:15 هاذي الواليدة : وراه ناس دايرين مع 14:00 راكم معطلين كولو و سيرو وجدو راسكم _ داكشي لي درنا كلينا وبدينا كلبسو الحطات لي تقدينا وخرجنا مصطفى: تبارك الله على مولاي السلطان كتبان ناضي _ الله يحفظك ليا أخويا مصطفى حتا نتا زاز لوز الواليدة : الله يحجبكم من العين اوليداتي ياريت كون كان باكم معانا شحال وهو كيتمنا يشوفكم عرسان اهئ اهئ مهدي : الواليدة ماتبكيش اليوم يوم الفرح ماشي الحزن بابا أكيد أيكون فرحان في قبرو _ بقينا كنعنقو في الواليدة وكنحاولو نهدئوها ونمازحوها حتا رجعنا من حالة بكاء الى حالة ضحك مهدي : الواليدة بغيت غير نعرف واش والدانا ولا لقيانا الواليدة : علاش ههه مهدي : حيث كتباني بحال ختنا الصغيرة ماشي منا شتي كون ماكنتي مي والله حتا نخلي دامي على ودك تاشو زيونات _ قويتي السمحمد انسلخك مريح تعنب ليا على مي وفي حضوري الواليدة: سكت خلي الدري يطلع ليا المعنويات تعلم من خوك الكلام الحلو بعدا نتا عمرك قلتي ليا شي كلمة زوينة عكس خوك _ موهيم عارفة شنو نتي بالنسبة ليا واخا مانقولش ومانعبرش تصرفاتي كافيين اميمتي الواليدة : يله نمشيو _ خرجنا من الفيلا وركبنا طومبيلات وحنا معانا الدفوع وتمينا شادين الطريق ديال القاعة ❌❌❌❌❌ عند سناء سناء : من بعد ماسلينا من الحمام والكوافورة توجهنا القاعة وبصراحة طلعنا كنحمقو على غير عادتنا وحاليا حنا في مرحلة الحنة النقاشات كينقشو لينا والقاعة عامرة بالناس منين جاو الله اعلم _ كيف وصلنا قدام القاعة لقينا لافاطمة وخالتي حسناء وبقية العائلة وعائلة سناء مجموعين قدام الباب ومعاهم صحاب الدقة المراكشية بدينا داخلين بالدفوع وأنا وخويا هازين فيدينا الورد ومهدي وعلي كيشطحو حتا وصلنا قدام عريساتنا لقيناهم لابسين لباس الحنة الأخضر ومغطيين وجاهم أنا شفت سناء وعرفتها ولكن درت راسي بحال إلى غادي نجلس حدا دامي مهدي : والسمحمد بقات ليك غير مرتي حتا هي سير بعد ليا من الحريم ديالي _ ياك اولد الهم واخا حتا نشدك ، مشيت جلست حدا سناء من بعد قالو لينا نگفات نحيدو ليهم الغطا على وجاهم وعرفتو اخوتي فاش درتها ضربني الضو وتقول ملاك ماشي إنسية راه لايمكن شحال طلعات زوينة ، سبحان لي خلقك بهاذ الجمال عرفتي اسناء دابا عاد عرفت راسي علاش منحوس وديما طايح في المصائب سناء : علاش _ كاع زهر لي عندي تستهلك من بعد ماعرفتك كنبغيك سناء : احم احم حتا أنا _ بدينا كنشطحو مع صحاب الدقة المراكشية وعلقنا ليهم شوية الفلوس والعائلة كيتصورو معانا وخدينا حتا تصاور مع بنتنا هههه بنتنا غادي تدخل موسوعة گينيس حيث حضرات عرس واليديها ، من بعد لحظات جا العدول تكاتبنا دابا رسميا أنا وسناء مزوجين وحتا مهدي ودامي مزوجين من بعد التكاتيبة مشينا بدلنا دخلنا شومبر تبدال بداو نگفات كيلبسو في سناء وأنا غير حاضي وتفكرت عرسي بسلوى وبديت كنبتاسم حتا هذاك العرس داز زوين الله يرحمها ، خرجنا جلسنا في بلاصة العرسان وحنا كنتصنتو للأغاني الشعبية وكنبرگگو في الحضور وهكذا كيدوز الوقت لبسة من بعد لبسة وكبتناها شطيح واحد لحظة وحنا جالسين حتا جاو السرباية وهازين في ايديهم كادوات على شكل علب مغلفين حطوهم قدامي مصطفى : علاش حاطين الكادوات هنا سرباي : جا واحد الشخص قال ليا انهو من العائلة وباغي يفرح بيكم وخلصنا مزيان باش نوصلوهم لعرسان _ كان قلبي مامطمأنش وكان كيضرب بجهد وستغربت ، حلوهم نشوفو مهدي : وعرفتو مع ديك الحلة مع الصدمة كانت قوية كان راس علي لاااااااااا _ بدا السرباي وبنادم كيغوت وأنا تخلعت وقفت من بلاصتي واحد لحظة بديت كنسمع الصوت القرطاس بداو المدعوين كيجريو كيحاولو يهربو ولكن دخلو بعض من الجنود لابسين لباس رمادي ومغطيين وجاهم شدو كولشي أنا ماقدرتش نتحرك عند بالي ساليت القصة ساعة مزال دامي : ياسيدي ربي اش هاذ الوحلة تاني مهدي : دارها بينا نمرود _ كنت كنتسنا يكون نمرود ساعة طلعت غالط وكانت صدمة العمر شكون هاذ الشخص لي مهاجمنا إنه سعد بات ياسمين وراجل لافاطمة دخل بخطواتوو المعهودة وابتسامتو لافاطمة : سعد هاذا نتا ياسمين : بابااااااااااااا _ بغات تمشي لعندو وقفوها الحراس سعد : وأخيرا تلاقينا مرة أخرى أسي أمين ، مالك مصدوم بحال إلى شفتي شي جن هاذا أنا سعد بشحمو ولحمو ماتصدمش مزال صدمات بزاف عندي ليكم مفاجئة آخرى _ عرفتو مع صفر وتما داخل واحد الشخص لي شفتو برد ليا الما في الركابي هاذا الواليد الواليد : وليداتي توحشتكم هاني رجعت ههه مهدي : فيقوني راني كنحلم من ايمتا الأموات كيرجعو للحياة الواليد : لا مامتناش لعبنا عليكم مسرحية كبيرة وصعيب تخيلوها _ الواليد سعد دابا علاش كديرو معانا هكذا وعلاش خسرتو لينا العرس وفين كنتو علاش ماعلمتوناش سعد : جلس بلاصتك واتفهم كولشي ، ايه نتوما حلو الكادوات _ بداو الحراس ديالهم كيحلو في الكادوات وكيجبدو جماجم بشرية وانا مصدوم ومن بينهم راس سلوى لي قدرت نتعرف عليه حيث مزال ماتحللش سعد : هاذا راس بوزيان وراس العمراني وراس البوص ديال الحشاشين والرئيس ديال الذئاب وسلوى وعلي و نمرود بقا لينا راس دامي باش تكمل التشكيلة نتوما كاملين كنتو مشاركين في لعبة بطلها واحد ولي كان هو نتا أسي أمين لي فزتي في لعبة من بعد مانحيتي كولشي إلى قلت ليك حياتك كانت مجرد لعبة كنت كنتحكم فيها أنا وباك من طفولتك ثيق _ لا مستحيل نتا نتوقع منك كولشي ولكن الواليد مستحيل الواليد : يا المسخوط من بعد كاع هادشي لي داز عليك ومازال مابغيتيش تستافد أنك ماثيقش حتا في الحوايج لي لابس _ نقدر مانثيقش في حوايجي وإنما نتا لا نتا راك كنتي كولشي وكنتيق فيك سعد : باك رئيس مافيا ومن اثرياء البلاد أسي أمين الواليد: أنا مؤسس الذئاب وأنا مؤسس الحشاشين وأنا لي كنت كنحركك الواليدة : علاش كديرو هاذشي الواليد : من أجل المتعة لاغير الحياة مملة مافيها باس نقمرو بالناس شوية _ ولكن حنا ماشي ناس حنا عائلتك الواليد الواليد : داكشي علاش كنت كنقاد ليك الطريق وكنحافظ ليك على حياتك قد ما أمكن سعد : المجلس كان مقمر عليك تربح اللعبة وفعلا ربحتي حنا فرحانين بيك ماخيبتيناش أسي أمين _ مافهمتش شنو بغيتو تقصدو _ نتا كنتي داخل لعبة من نهار دخلنا خوك الحبس وكنا مراهنين أنك تخرجو و تربح وكلما كتزيد تربح كيزيد الحماس ومدخولنا أنا وصاحبي عبد القادر دخلناك الذئاب من بعد رميناك الحشاشين وكنا ديما كنقادو ليك الطريق وكنخسروها من جيهة باش نحسو بالحماس الاكتر وفي نفس الوقت كيزيد ثمن الرهان حيث كنا منقاسمين على 2 مجموعات نصف مراهن تربح ونص مراهن تخسر وكنت أنا وصحابي كنحركوكم كيف بغينا باش نربحو الرهان الواليد : باش تفهم كثر كل واحد فينا كيجر لجيهتو وكيدير اللازم باش يخليك سوا تربح أو تخسر ولكن لقاونا أنا وسعد ملوك اللعبة مهدي : وشنو خاص يوقع باش تخسرو نتوما اللعبة سعد : سؤال وجيه ، الجواب ديالك هو تموتو كاملين ياسمين : علاش أبابا ماظنيتكش هكذا أنك ترخص عائلتك على قبل مصلاحتك سعد : لا ابنتي راكي مارخيصاش والدليل هي قتلنا سلوى قدامك وحتا حد ماقرب ليك أو اذاك _ علاش قتلتو سلوى وولدي الواليد : موت سلوى قلنا ايكون حافز باش تحرك وتقضي على الحشاشين شوف أولدي رآه ماشي بساهل نشوفك كدمر الامبراطورية لي بنيت ولكن خليتيني مفتاخر أني ولدت سبع وبسبابك كسبت فلوس لي واخا نظل نحرقها ماتساليش وفي نفس الوقت حاربت الملل لي فيا سوا أنا وسعد بدينا كنكبرو ولعب ضاما بحال المتقاعدين ممواتيناش فكرنا ليها هاذي مدة طويلة وقررنا لعبو ضامة في الواقع وبالبشار ونحركوكم كيف بغينا وداكشي لي كان حتا حاجة من داكشي لي داز ماكان صدفة _ الواليد ياريت كون متي وماخلتينيش ناخد عليك هاذ النظرة كاع الحب لي كنت كنكنو ليك دمرتيه في رمشة عين مايشرفنيش يكون عندي اب بحالك الواليد : وأنا يشرفني يكون عندي ولد بحالك سعد : مزال ماسليناش مزال عندنا ألعاب أخرى أسي أمين مبروك العرس الواليد : ستمتع ماكسيموو ديال وقتك مع بنت العمراني حيث راها كتقضي آخر ايام حياتها مابقاش ليها بزاف وتلحق على باها ونتا اتكمل حياتك مع بنت سعد أنا عطيتك المستقبل ديالك في دقيقة _ نتا الواليد ماشي هو الله باش تقرر المصير ديالي بصح لعبتو بيا ولكن صافي سعد : حنا لي صنعناك وحنا لي غادي نتحكمو بيك حتا تموت _ ربي لي خلقني وماشي نتوما لي صنعتوني وماحدو خلاني عايش وإلا باش نتاقم منكم وداكشي لي غادي ندير ، درتو فيها قافزين حتا عييتو ولكن تكلختو مافكرتوش كيفاش أنكم دخلتو بسهولة وبدون مقاومة راها ماشي ضعف مني أو صافي عند بالي ساليت من الحشاشين كنت داير صنارة لسي نمرود ساعة ماظنيتش اتشد ليا الحيتان الكبار وماظنيتش أنكم نتوما لي كنتو كتعنو ليا كولشي يطلع منكم هاذ العجب تصدمت فيكم ياريت كون كنتو ميتين وهاذشي يطلع حلم قدرت نتقبل كاع لي وقع ليا ولكن نتوما كسرتوني .... إطلاق مهدي : مع قال خويا إطلاق في رمشة عين طاحو الحراس لي مع الواليد وسعد بحال الذبان قتلوهم القناصة لي كانو مخبيين في القنات ديال القاعة ورا شي ديكروات ديال الورد وماكيبانوش بقا الواليد اكيشوف دغيا بغا يهز سلاحوو نضت تلاحيت عليه ضربتو سعد : شنو كدير أمين عند بالك قافز وشديتينا دابا يدخلو رجالنا يفكونا هههه _ مرحبا بيهم ، دارو ليهم دراري المينوط من بعد 2 دقايق بدا القرطاس وبداو يحاولو رجال الواليد وسعد يقتاحمو ولكن واش معايا أنا داير الاحتياط وموزع رجالي لي عند الإشارة بداو التدخل وبقاو مبادلين إطلاق النار مع رجال سعد والواليد حتا صفاوها ليهم كاملين وتما كانت الصدمة قوية عند با وسعد حيث ماظنوش أنهم ماغديش يخرجو من القاعة الواليدة: سير الله ياخد فيك الحق أعبد القادر حاشا واش نتا بنادم الله يلگيها ليك اهئ اهئ مهدي :صافي الواليدة تهدني لافاطمة : من بعد كاع داكشي لي داز علينا آخر ماكنت نتوقع هي نتا طلع هكذا علاش علاش سعد : الملل وحب المال والسلطة لي خلاوني ندير هكذا ومنادمش بصراحة _خدوهم من هنا ، داوهم رجال المخابرات وخداو الجماجم معاهم وحضرو حتا البوليس والمدعويين تشتتو وصحابي وعائلتي كانو باديين عليهم الحزن وبالأخص حنا المقربين لواليد وسعد حسناء : صافي العرس خسر مجاتش نخسرو النهار كامل سيرو لوطيل دابا ونتشاوفو غدا _ داكشي لي درنا قصدنا لوطيل من بعد ماودعناهم وكنت كاعيين من داكشي لي وقع وخسارة البطل علي ولكن مبادينا مانديرو ، دخلنا لغرفنا بدلت حوايجي أنا وسناء وتكيت فوق الكاتري وجات تكات عليا سناء : صافي احبيبي ماتعصبش ماديرش في بالك ماتبقاش هاز الهم _ كيفاش مابغيتيش نتعصب والواليد لي كنت كنظن مايحرك دجاجة من بلاصتها طلع منو هاذ العجب سناء : الله يدير شي تاويل ديال الخير _ بقيت متكي بلاصتي ومعانق أنا ومرتي لساعات من بعد مابقيتش قادر نقاوم ودخلت على مرتي وكان أحسن شعور لدرجة نسيت شنو وقع في العرس ملي كملنا ضربناها بنعسة الصباح فقنا دوشنا وخرجنا تلاقينا بدامي ومهدي وبقينا كنهدرو على موضوع الواليد وسعد مهدي : كيف نساليو فطورنا انمشي أنا ودامي نحقق معاهم رآه ضرني راسي مانعستش من البارح _ صافي واخا على مولانا ، سالينا فطورنا جمعنا حوايجنا وخرجنا أنا وسناء قصدنا الفيلا في حين مهدي ودامي مشاو الولاية وتما ايحققو مع سعد والواليد حسناء : مرحبا بالعرسان فين لآخرين _ عندهم شي غراض دابا شوية يجيو كيف بقيتو من البارح الواليد : كيف انبقاو أولدي حنا مصدومين _ بقينا كنهدرو بيما تاصل بيا مهدي وصدمني فاش قال ليا بيلا الواليد وسعد كانو مساعدين مع مهدي وعتارفوو بكولشي وحطو صحابهم كاملين ولي مشاركين معاهم وعلمني بيلا خرجات قائمة بحث عليهم وفي داك النهار مزال درنا جنازة تليق بحجم البطل المغوار علي لي خلا بلاصتو في قلوبنا وحزنا عليه بزاف ولكن هاذي هي الدنيا البقاء لله ❌❌❌❌❌ بعد مرور ستة أشهر _ حياتنا في هاذ لحظة تغيرات شوية بدات ترجع السعادة لحياتنا وعايشين بدون مشاكل من بعد ماجميع الأعداء ديالنا ولاو في الحبس أو القبر وأنا رجعت لخدمتي ووليت رئيس المخابرات ومراتي سناء حاملة في شهرها الأول وعايشين بسعادة وسط من العائلة ديالنا في مدينة الرباط ومرة مرة كيزورونا صحابنا أو كنمشيو نزوروهم في آسفي وكنتجمعو ونستحضرو الذكريات كيف كنا من زمان واخا حتا حاجة مابقات كيف تعارفنا في الأول ملي متلث عليهم أني عما الحياة علماتنا كاملين دروس كتار قاسيين لي بدلو لينا شخصياتنا الأولى وقصحو قلوبنا شوية مع المواقع والأحداث ديال حياتنا ولكن مع بعضياتنا كعائلة. وصحاب حنا سمن على عسل . النهاية رأيكم ؟ تابعوا باقي القصة واكتشفوا قصصًا أخرى عبر : الفايسبوك : www.facebook.com/9isasRM